رواية بقاياها فيا الفصل الرابع 4 - بقلم مي عبدالله

أنا مش حابه عيال اختي يعيشوا معايا. كريم وقف بصدمة وهو بيقول: يعني إيه؟ دول عيال اختك، اعملي حساب طيب إنهم من لحمك ودمك، لو مش عشانك فعلشان اختك! ليل ببرود ولامبالاة: أنا قلت اللي عندي يا كريم، توديهم عند ماما في ملجأ، المهم يطلعوا من البيت ده، أنا مش عاوزاهم، أنا حرة! كريم بانفعال وعصبية من برودها: دول عيالي يا ليل، ومهما عملتي مستحيل أفرط فيهم مهما كان، انتي سامعة؟ كمل بتحدي وبرود مماثل:

بلاش أنا يا ليل، انتي مش قدي، لغاية دلوقتي عامل حساب إنك اخت مراتي الله يرحمها، وقولت أهاودك وأشوفك عايزة إيه، بس إني أفرط في عيالي مستحيل! خرج من الأوضة ورزع الباب وراه بعصبية. شافته صباح وهو نازل، اتكلمت وهي بتعوج بقها يمين وشمال: مقدرتش عليها ولا إيه يا سبع البرومة؟ شاطر بس تتكلم معايا أنا واختك. كريم بص لها بعصبية واستغراب من أفعالها وقال وهو بيحاول يتمالك أعصابه: مفيش حاجة يا أمي، مشكلة في الشغل ومحتاجني.

سابها وخرج من غير ما يسمع ردها وهو بيفكر يعمل إيه. بصت صباح في أثره بغضب وهي بتبرطم بغيظ. فاقت من سرحانها على صوت سهى بنتها وهي بتقول بغيظ: وبعدين يا ماما هنعمل إيه؟ أنا هطق، هموت. صباح بحقد باين في صوتها: العمل إننا هنهدي اللعب اليومين دول يا بنت بطني، وبعدها نبدأ اللعب اللي على أصوله! سهى بخبث باين في نظرتها: تعجبيني يا صباح. في مكان تاني كان فيه واحد ماسك صورة ليل وهو بيبصلها بشهوة وشر. ساب الصورة لما سمع

صوت البنت اللي كانت معاه: وبتمُد إيديها. ويسكي يا باشا. بصلها وخدها منها وهو لسه بيفكر بخبث إزاي ينتقم من ليل. في بيت منال، كانت قاعدة بتعيط بحسرة على عيالها الاتنين وبتكلم نفسها. فاقت على صوت الباب اللي بيخبط، قامت بضعف فتحت اتفاجئت بليل قدامها وهي بتقول بهدوء: إزيك يا ماما؟ بصت لها بعتاب وسابتها ودخلت. دخلت ليل وراها وهي بتقول بهدوء وحنية معاكسة لشخصيتها: لسه مش عايزة تكلميني برضو؟

أنا جيت علشان أراضيكي وأقولك حقك عليا يا ست الكل. بصت لها منال ومردتش، فتنهدت ليل وهي بتقول بهدوء: عايزة أطلب منك طلب. بصت لها منال بسخرية وهي بتقول: خير. اتكلمت ليل بترقب من رد فعلها: عايزاكي تاخدي عيال اختي عندك. بصت لها منال واتكلمت بذهول: مش مكسوفة على دمك وإنتي بتقولي كده يا بجحة؟ اتكلمت ليل بهدوء عكس عصبية منال: وغلاوة فاطمة يا ماما توافقي، أنا بجد بعمل كل ده ليهم. بصت لها منال بسخرية وهي بتقول:

ماشي يا ليل، بيتي لعيال اختك مفتوح لهم في أي وقت، دول أحفادي ونور عيني. هزت ليل راسها بهدوء واستأذنتها ومشيت. عند كريم، كان بيلف بالعربية وهو حاسس بتوهان ودماغه عمالة تعمل فلاش باك للي حصل. عند ليل، وصلت للبيت دخلت بثقة. كانت صباح وبنتها قاعدين، بصت لهم ليل بجمود وهي بتقول بملامح خالية من التعبير: أنا عارفة إنكم اللي قتلتم فاطمة اختي الله يرحمها! يتبع