رواية بلا امل الفصل الثامن عشر 18 - بقلم ضحي ربيع

كلامه خلاها تقف تتسمر في مكانها. ولأنها عارفة أنهم ناس ميخافوش من ربنا، ممكن يعملوها فعلاً. وقفت للحظة وهي مغمضة عينيها، بتتمني الأرض تنشق وتبلعها ولا أنها تضر إبراهيم أو آية، لأنها ملقتش حنان وحب غير معاهم. مش هتقدر تختار ما بين مستقبله وروحه. "هسيبك تفكري ليوم الجلسة، واتمني أنك متخيبش أمل المعلم فيكِ." طلع وسابها. لسه واقفة مكانها، فتحت عينيها وخرجت للشارع وهي تايهة.

مفيش في دماغها حاجة غير أنها السبب في أي حاجة ممكن تصيب إبراهيم. أملها الوحيد أنها تتمسك بالدنيا بدأ يتلاشى مع دموعها اللي كانت مغرقة عيونها. ماشية بتبكي من غير صوت ولا كلام. كل آمالها بتنتهي. كل اللي في بالها أنها لو مع أهلها الحقيقيين من الأول، مكنش زمان أي حاجة من كل ده حصلت. فضلت ماشية كتير من غير ما تحس بنفسها. لغاية ما لقيت تليفونها بيرن. ردت ورفعته على ودنها. "الو."

إبراهيم بعصبية كبيرة وخوف: "سندس انتِ فين؟؟؟؟ بقالي خمس ساعات بتصل بيكي مش عارف أوصلك." "أنا كويسة متقلقش." "انتِ فين دلوقتي عشان أجي آخدك." بصت سندس حواليها عشان تحدد مكانها وهي بتعدي الشارع. "أنا... ااااااه." "سندسسس الوووو سندس ردي عليا سندسسس حصل اي." "الو يا أستاذ، صاحبة التليفون خبطتها عربية وجريت العربية."

مرت ساعة تقريباً لغاية ما وصل إبراهيم وآية للمستشفى اللي فيها سندس، بعد ما قاله الراجل اللي رد عليه عن اسم المستشفى اللي هياخدوها ليها. وصل للاستقبال وهو وشه وارم وعنيه حمراء كأنه كان بيبكي، وآية حالتها أسوأ منه من الخوف والخضة عليها. "وصلت هنا بنت عاملة حادثة سير اسمها سندس؟ "آه يافندم، وصلت من حوالي نص ساعة." "طب وهي فين دلوقتي؟ "امشي آخر الطرقة دي هتلاقي دكاترة الاستقبال هناك، تقدر تسألهم."

طلع يجري عليهم، حتى نسي والدته من كتر خوفه أنها ممكن يكون حصلها حاجة. وصل لآخر الطرقة، بس مكانش فيه دكاترة. ملقاش غير ترولي وعليه حد متغطي بملاية كلها دم. فضل واقف بيترعش قدامها. مش معقول تكون هي. مش معقول البنت الوحيدة اللي عاف قلبه بعفتها وحنيتها تموت. أكيد مش هي. فضل واقف حابس دموعه وبيترعش جامد لغاية ما قربت والدته منه. "أبراهيم سندس فين." صرخ بكلمة واحدة بس، وبعدين قعد على الأرض. "ماتت سندس، ماااتت يا أمي."