رواية بلوتي القمر الفصل الثالث عشر 13 - بقلم لؤلؤة محمد

عند قصي كان في مكتبه وسمع صوت عالي بره. خرج لقى بنت ضهرها ليه وبتعيط. الظابط بيقولها: / يا آنسة، حضرتك بتعيطي ليه دلوقتي؟ بقولك لازم البطاقة عشان أعملك المحضر. البنت: / وأجيب لك البطاقة منين دلوقتي يعني؟ بقولك الشنطة كلها اتسرقت والبطاقة فيها. أنا عايزة أفهم أنت إزاي بقيت ظابط أصلاً بذكاء الحضّانة ده. الظابط: / لا، ده إنتي قليلة الأدب بقى وبتغلطي. طب وحياة أمي لأكون حاطك في الحجز. قصي: / فيه إيه يا سعد؟ سعد:

/ الآنسة جاية تعمل محضر ومعاهاش بطاقة، لا وبتغلط كمان. قصي: / هناء!!! هناء: / شنطتي اتسرقت. قصي: / طيب هي بتقولك شنطتها اتسرقت والبطاقة كانت في شنطتها، تجيبهالك منين فعلاً دلوقتي؟ اعملها المحضر. تعالى ورايا لو سمحت. ودخل مكتبه. / اتفضلي يا هناء. بتحبي عصير الليمون؟ هناء: / أيوه، ليه؟ قصي: / وبتقولي عليه هو اللي ذكاؤه ذكاء حضّانة؟

أكيد بسألك عليه عشان تشربيه يروّق أعصابك بدل ما إنتي شبه الطفل اللي حد أخد منه لعبته كده. هناء: / إنت جايبني هنا تهزأني وتتريق عليا ولا إيه؟ تصدق أنا غلطانة إني جيت وراك أصلاً. وأنا الغبية كنت فاكراك محترم، طلعت مهزأ. قصي بصدمة: / أنا مهزأ؟ تصدقي إنتي اللي لسانك متبري منك فعلاً. صدق اللي قال: "خلي بالك من القصير لأن ربنا أخد من طوله وحط في لسانه". هناء: / قصدك إيه يعني؟ إن لساني طويل وكمان بتتريق على طولي؟

آه ما أكيد لازم تتريق على طولي. ما إنت لو اتهزيت هتنزل بلح. قصي: / أنزل بلح؟ هناء: / إيه يا بطرمان النباهة، يا برميل الذكاء؟ مش فاهم إنك نخلة؟ ولا البعيد مبيفهمش؟ آه صح، دورلي على شنطتي وهاتهالي ومن غير بعد إذنك. ومشت من غير ما تسمع رده. قصي واقف مصدوم منها ومن كلامها. / هي مش كانت بتعيط من شوية وعاملة شبه الكتكوت المبلول؟ يا شيخة، تبا لكِ. عند أحمد كان قاعد في مكتبه وفجأة لقى الباب بيتفتح بعنف. بص على الباب بغضب.

لقى هناء. / فيه إيه يا هناء؟ مالك بتعيطي ليه؟ وقام من مكانه راح لها. / اهدي طيب، تعالي اقعدي. ومسك سماعة الهاتف. / مروة، هاتي عصير ليمون لو سمحتي بسرعة. وراح قعد على الكرسي اللي قدام هناء. / اهدي يا هناء واحكيلي حصل إيه؟ حسام ومرات عمي كويسين؟ هناء: / كويسين الحمد لله. أحمد: / طب الحمد لله، اومال فيه إيه بس مالك؟ هناء: / شنطتي اتسرقت مني عند المول وكان فيها الفون والفلوس، حتى البطاقة والفيزا. أحمد: / طب وعملتي بلاغ؟

هناء: / آه عملت بلاغ. بس أنا لقيت إني قريبة من هنا، قولت أجى أتخانق معاك. أقصد أقعد معاك. يووه، أقصد أرن على حسام من عندك يجي ياخدني عشان أعصابي تعبانة ومش قادرة أسوق. أحمد وهو بيضحك: / ياستي، عايزة تتخانقي معايا اتخانقي. عايزة تقعدي معايا؟ يا ريت والله. هو أنا أطول هناء هانم تقعد معايا. وبعدين ياستي، أخلص شوية الشغل اللي معايا ده بس ونروح مع بعض. هناء: / تمام. تحب أساعدك؟ أحمد: / يعني لو مش هتعبك. ياريته.

قعدوا يشتغلوا مع بعض وبعد تلات ساعات خلصوا. هناء: / يااااه، أخيراً. ده أنا جالي الغضروف يا جدع. أحمد: / غضروف وجدع؟ إنتي بتدرسي إيه في الكلية بتاعتك دي؟ حاسك إنتي وملك بتروحوا تدرسوا بلطجة وترجعوا. هناء: / الواحد يا ما يعيش يا ما يشوف يا أخويا. أحمد: / بقيتي بيئة أوي يا نؤه. هناء (مع نفسها) / إلهي مالك ياض؟ ماتنشف كده، من امتى وانت بتتكلم بنحنحة؟ أحمد: / ألووووه. هناء: / هاه. أحمد: / هاه إيه اللي واخد عقلك؟

يتهنى بيه يا قمر. هناء: 😳😳🙂 أحمد: / احم احم. طب يلا نروح. هناء: / يلا. وقاموا روحوا. وهما في العربية أحمد شغل أغنية "اضحكي خليني أضحك". ضحكتك بترد روحي، ربنا وحده اللي عالم بعشقك إزاي يا روحي. هناء (في نفسها) / إلهي. لا إله إلا الله. هو ماله الواد ده؟ مش راكب على بعضه ليه؟ / احم احم. الأغاني حرام يا شيخ أحمد. أحمد (في نفسه) / ده إنتي بت فصيلة. أبو سألتك يا شيخة. طب ماشي. / أيوه صح، أنا آسف.

وقلب الأغنية وشغل نشيد "ياما كان فيها ممالك إلا وجه كل هالك، مهما نوره طال ظهوره جاي ليل أسود وحالك، جاي ليل عالدنيا ضلمة". هناء: / جاي ليل أسود وحالك وجاي ليل عالدنيا ضلمة؟ إيه ده يا ببلاوي؟ هات صبارة يا راجل وادفنّي هنا بالحيا. أحمد بضحك: / إنتي مشكلة يا هناء بجد والله. صدقت مرات عمي إنك بلوه. هناء: / بلوه؟ أنا بلوه؟ يا شلوكة يا بلوكة يا حبي الدربوكة، يا مصطبة هد يا مشط الكد، يا إبرة مصدية، يا حبل المعدية. أحمد:

/ باااااااااااااس. إيه بلاعة واتفتحت؟ هناء (بشهقة) / مين دي اللي بلاعة؟ يا عومااااار. أحمد بيقاطعها: / بس كفاية خلاص ياستي. إني آسف، حقك عليا. هناء: / عفونا عنك. وصلوا عند البيت لقوا ناس كتيرة ملمومة عند بيت هناء، وعساكر وبوكس. هناء: / يالهوي. أمي طلعت بتاجر في الآثار ولا المخدرات؟ كان قلبي حاسس يا اعتكاف يا بنت بلحة. أحمد باستغراب: / هي ستك اسمها بلحة؟ هناء: / إيه ده؟

إنت ماكنتش تعرف اسمها بلحة وأمها كان اسمها عنايات؟ مش عناية واحدة؟ هقهقهق. أحمد: / هو إنتي مش ملاحظة إنك قاعدة هنا بتقلشي وإحنا مش عارفين فيه إيه فوق؟ هناء: / آه والله. تعالى نشوف فيه إيه. ومشت بسرعة. أحمد وهو بيخبط كف بكف: / طب والله عقلها مش مظبوط. ومشي وراها. واحدة من الجيران: / إيه ده يانؤه؟ إنتي مش مخطوفة؟ هناء: / مين دي اللي مخطوفة يا أم سماح؟ أم سماح:

/ ده أمك بتصوت من العصر وبتقول إنك اتخطفتي وحسام أخوكي بلّغ البوليس والدنيا مقلوبة يا بنتي. هناء: / هااااارسوووح. يا فضيحتك يا نؤه. وطلعت تجري على فوق. اعتكاف: / يا ترى عملوا فيكي إيه ياهناء؟ عملولك شاورما ولا باعوكي أعضاء؟ يا ضنايا. هي فيها أعضاء؟ يا ربي ده كل حاجة فيها ضاربة. حتى عقلها ممكن خدوا كبدتها شوّحوها ببصلتين؟ والا خدوا مصارينها وعملوها ممبار؟ يالااااااااهوااااااااي. والا خدوا الصلب عملوه في شوربة؟

والا خدوا... هناء: / باااااااااااااس. سيبتي إيه تاني ياخدوه يا ولية؟ ده إنتي لو ضاع منك بقرة والا جاموسة مش هتعملي كده. يخربيت الكفر. اعتكاف وهي ماسكة الشبشب وحدفته في وشها: / كنتي فين يا صايعة يا ضايعة؟ يا تربية الشوارع، يا اللي مشوفتيش بربع جنيه تربية. فاطمة (مامت أحمد) / إيه يا اعتكاف؟ ماكنتي لسه بتعيطي على البت أول ماشوفتيها. بتضربيها؟ والا عشان اطمنتي عليها؟ ما خلاص يا ولية حصل خير. اعتكاف:

/ حصل خير إيه بالمشاكل دي كلها؟ ده حسام وشعيب وقصي بيدوروا عليها من العصر وهي خارجة الساعة 10 راجعةالي بعد العشا. كنتي فين يا مقصوفة الرقبة؟ أحمد: / كانت معايا يا مرات عمي. هناء اتسرقت منها شنطتها وكان فيها كل حاجة، حتى الفون. وجيت فضلت معايا لحد ما خلصت شغل وجينا مع بعض. اعتكاف (ياختاااااااااااااااااي) / بتقول شنطتها اتسرقت؟ وقامت تتفحص بنتها. جرالك حاجة يابت؟ حد عوّرِك؟ لا يكون غَزّك بمطوة؟ والا رش في وشك مية نار؟

هناء: / يا ولية، هي أي مصيبة وخلاص؟ تشبعي فيها لطم. حسام وهو داخل البيت جري ووراه شعيب وقصي. وهو بيحضن أخته: / هناء حبيبتي! إنتي كويسة؟ فيكي حاجة ياروحي؟ حصلك حاجة؟ هناء: / أنا كويسة والله يا حسام، مفيش حاجة. حسام: / اومال كنتي فين من ساعة ما خرجتي من عند قصي؟ هناء: / كنت قاعدة مع أحمد نروح مع بعض عشان مكنتش قادرة أسوق. بص قصي لأحمد كده وقال في نفسه: "وتقعدي معاه ليه؟

ما كنتي قوليلي وأنا كنت أروح. والا هو كده، ناس ليها خناق وناس ليها حظ". شعيب: / عامة، حمد الله على سلامتك. قصي: / شنطتك لاقيناها ومسكنا الحرامي. وأنا اديتها لحسام. بصتله هناء وافتكرت لما خبطت فيه عند المسجد، ولما كانوا عندهم في البيت، ولما كانوا في القسم. ولاحظت قد إيه هو كاريزما وشخصية قوية. / شكراً لحضرتك. قصي ابتسملها بمعنى العفو وقال في نفسه: "طب ما إنتي رقيقة وكيوته أهو. بس يخربيتك لما بتتحولي يا شيخة". شعيب:

/ نستأذن إحنا بقى يا جماعة. اعتكاف: / لا والله ماينفع، لازم نقعد نتعشى مع بعض. قصي: / معلش يا مرات عمي، مرة تانية بإذن الله عشان بتول في البيت لوحدها. اعتكاف: / ممكن أسيبكم تمشوا، بس بشرط. أنا عازماكم على الغدا بكرة بإذن الله، وكده كده بكرة بإذن الله الجمعة يعني إجازة، مفيش شغل. شعيب: / اتفقنا يا مرات عمي. بعد إذنكم يا جماعة. وراحوا شعيب وقصي. عبد المجيد: / طب نستأذن إحنا كمان. يلا يا جماعة. فاطمة: / حاضر يا حاج.

اعتكاف: / متنسوش العزومة بكرة بإذن الله يا جماعة. عبد المجيد: / حاضر يا أم حسام. يجعله عامر. هناء: / ممكن ملك تبات معايا النهاردة يا عمو؟ عبد المجيد: / ماشي يا حبيبتي، مش مشكلة. يلا يا جماعة، تصبحوا على خير. الكل: / وإنت من أهل الخير يا حاج. ملك وهناء دخلوا الأوضة غيروا هدومهم وقعدوا مع بعض. هناء: / بت يا ملوكة. ملك: / إيه؟ هناء: / هو أخوكي مش مظبوط كده ليه؟ ملك: / مش مظبوط إزاي يعني؟ مش فاهمة. هناء:

/ بقى منحنى أوي كده ويقولي يا نؤه ويتكلم ويهزر ويشغل أغاني. هو فيه إيه؟ ملك: / أحمد أخويا طلع منه ده كله؟ 😳 أنا كده اتأكدت. هناء: / اتأكدتي من إيه؟ ملك: / اتأكدت إنه بيحبك باين عليه أوي بصراحة. هناء: / لأ، بيحبني إيه؟ أنا كنت بحبه عشان مكنش بيطيقني وكان بيهزأني. ملك بصتلها بقرف: / مش بقولك طول عمرك مهزأة. نامي يا هناء. نامت عليكي حيطة. اتخمدي. وراحت نامت ونامت هناء بعدها على طول. تاني يوم. اعتكاف

وهي بتفتح شباك الأوضة: / قومي يا كلبة البحر منك ليها. الناس بتصلي الجمعة وجايين وأنا اللي قولت هتساعدوني وظنيت فيكوا الظن الوحش. طلعتوا هتفضلوا طول عمركم معفنين. نفسي أعرف هتفتحوا بيوت إزاي. هناء وهي بتحط المخدة على وشها: / بالمفتاح يا كوكي. اقفلي الشباك وشغلي المروحة بقى. اعتكاف وهي بتمسك الشبشب: / وحياة أمكوا لو ما وقفتوا انتباه حالا لأكون مقطعة الشبشب الجلد عليكوا. هناء وملك قاموا من على السرير بسرعة. ملك:

/ كله الشبشب الجلد. قومنا خلاص يا حاجة. فاطمة (مامت ملك) / شاطرة يا اعتكاف. عيال مبيجيش غير بالعين الحمرا. هناء: / لا وحياتك ده بالشبشب الجلد. اعتكاف: / البسوا يلا واخرجوا ساعدونا عشان صلاة الجمعة هتخلص والناس تيجي. يلا منك ليه. ملك وهناء راحوا يلبسوا. هناء لبست فستان بنفسجي وخمار أبيض. وملك لبست من عند هناء فستان كاشمير وخمار أسود وخرجوا. شوية والباب خبط. وراحت هناء تفتح. / توتو يا توتو. وحشتيني والله يا بت.

وحضنوا بعض. / تعالي ادخلي. شعيب: / طب وأنا قرطاس لب والا إيه؟ مش هتسلمي عليا يعني؟ اعتبريني زي أختك حتى. قصي: / أهو ده تمامك بالظبط. ضحكت هناء وبتول. وقصي أخد باله قد إيه هناء ضحكتها حلوة. ورجع حمحم واستغفر ربه. هناء: / إزيك يا شعيب؟ إزيك يا قصي؟ قصي: / الحمد لله. هناء: / اتفضلوا. حسام زمانه جاي من الصلاة. حسام: / مين جاب في سيرتي؟ شعيب: / ياريتك جبتي سيرة ربع جنيه مخرم. حسام: / ده أنا اللي هخرم دماغك. مالي ياض؟

شعيب وهو بيمثل الخوف: / تخرم دماغي؟ اثبت يا حضرة الظابط. محضر شروع في قتل أهوه. حسام: / لا لا، حضرتك هو اللي خرملي ودني الأول. شعيب: / لأ، إنت اللي خرّمت دماغي. حسام: / لأ، إنت اللي خرّمت ودني. قصي: / والله لو ماخرصتوا إنتوا الاتنين لأخرّم عليكم. سكتوا خالص وخافوا منه. أحمد: / إيه ده يا قصي؟ إنت مقعدهم شبه التلاميذ المتذنبين كده ليه؟ قصي: / صدعوني يا عمة. هناء: / بضحك على شكل حسام وشعيب. الأكل جاهز يا جماعة. اتفضلوا.

شعيب: / ممكن أتحرك يا قصي؟ قصي: / اتفضل. حسام: / وأنا؟ قصي: / يا عم اتنيل إنت كمان. وهما معديين ضربهم على قفاهم. هناء ضحكت على آخرها وهي بتقول لحسام: / داين تدان يا حبيب أختك. حسام: / لأ، ظريفة. بتقصي: / ضربة على قفاه. اتكلم معاها عدل. حسام: / يا عم دي أختي. قعدوا ياكلوا وسط ضحك وهزار. وكانت قعدة جميلة جداً. اعتكاف: / ربنا يديم الفرحة واللمة ويديمكم لبعض ويديم محبتكم يا حبايبي. الكل: / آمين. ويديمك لينا يا حاجة.

بعد الأكل والشاي العصر أذن. قصي: / يلا ننزل نصلي يا جماعة. اعتكاف: / طب منصلي كلنا هنا جماعة. شعيب: / ياريت والله بدل ماننزل. قوموا يلا نتوضى. اتوضوا كلهم. حسام: / يلا يا قصي إمّنا. قصي: / ماشي. وبدأ قصي الصلاة. وهنا نقف لحظة. إيه ده؟ إيه اللي بيحصل ده؟ ده نفس الصوت. أيوه، هو نفس صوت الإمام اللي خطف قلبها من أول مرة. لحظة، ده معناه إن الصوت ده صوت قصي؟ يعني قصي هو الإمام اللي خطف قلبها؟ مش معقول.