رواية بنات السعد الفصل التاسع 9 - بقلم نورهان ثروت

نظرت له سليا بتوتر وقالت: أصلًا أنت كنت مستفز الصراحة. ثم قالت بجدية: هات اللحمة خليني أمشي. ابتسم هشام بسخرية وقال: مستفز، تمام. ماشي، عمومًا اتفضلي. أهي اللحمة. جذبت سليا اللحمة من يده ثم غادرت وهي تقول بهمس: الحمد لله، كان هيعرف إن مش أنا ساندي. نظر هشام لها وهي تسير لخارج وقال بهمس: مع إنهم نسخة من بعض، بس لما اتكلمت اتأكدت إنها مش هي. *** واقف فارس أمام مكتب. نظر لعسكري وقال:

قول يا ابني للواء إسماعيل إن الضابط فارس بره. نظر له العسكري وقال بهدوء: معلش يا باشا، مينفعش أدخل من غير أي حاجة تثبت أنت مين. ممكن بطاقتك؟ أومأ فارس بتفهم وقال: امسك، أهي. دَق العسكري الباب ودخل المكتب وقال: باشا، الضابط فارس عايز يقابلك. ثم اقترب وضع البطاقة على المكتب وقال: دي البطاقة بتاعته. أومأ اللواء إسماعيل وقال: دخّله يا ابني. أنت مستني إيه؟ بعد مرور دقائق دخل فارس المكتب وقال: السلام عليكم. حضرتك عامل إيه؟

نظر له اللواء وقال: الحمد لله، أنت عامل إيه؟ نظر له فارس بهدوء وقال: الحمد لله. ممكن حضرتك تقولي إيه التفاصيل بالظبط؟ ابتسم اللواء إسماعيل وقال: دايمًا مستعجل. اقعد الأول وقولي تشرب إيه. جلس فارس أمام اللواء وقال: الحمد لله، شربت قهوة قبل ما أجي. مش هقدر أشرب أي حاجة تانية. حضرتك عارف إن دايمًا مستعجل عشان معنديش أي وقت. أنا مطلوب مني كمان ساعة أكون في مهمة تانية. ابتسم اللواء وقال بحب:

تعرف يا فارس، أنا دايمًا بشوف نفسي فيك وأنا صغير. كنت شبهك كده، مباخدش أي راحة. المهم عندي إني أخلص البلد من القرف اللي موجود فيها. ثم قال بجدية: بص يا سيدي، المهمة هي إنك هتفضل موجود مع الدفعة الجديدة اللي موجودة في أكاديمية الشرطة لبنات، ليه؟ لأن فيه ضابط هناك، إحنا متأكدين إنه فاسد وبيوزع مخدرات على البنات هناك. قطع فارس كلماته وقال باستغراب: إزاي يا باشا؟

على ما أظن إن البنات دي قبل ما تدخل الأكاديمية بيكون فيه اختبارات كتير ومستحيل واحدة بتشرب تقدر تعدي كل الاختبارات دي. تنهد اللواء بحزن وقال:

عندك حق. أنا معاك في دي. بس الضابط دا بيحط ليهم المخدرات في الشرب والأكل. ولما بيدمنوا الحاجات دي بيظهر ليهم التعب. هو ساعتها بيعرفهم إن مع مسكن قوي ويبدأ يبيع. الضابط دا متفق مع كام بنت هناك ومع كام ضابط. إحنا لسه منعرفش عددهم أوي، بس إحنا محتاجين تدخل وسطهم. ومش هتكون ضابط. هتكون دكتور بتدرس ليهم. لو دخلت ضابط هيحاولوا يبعدوا عنك الأمان إنك تكون دكتور. وكمان هيبقى ليك بطاقة تانية متغير فيها معلوماتك كلها وهيكون عندك شقة قريبة من الأكاديمية. والبطاقة هتكون مكتوب فيها العنوان دا. عايزك لما تدخل تجيب أكتر من دليل على الناس دي. ولو عايز حد يساعدك في المهمة دي، قولي.

نظر له فارس بتفكير وقال: لا، مظنش إني هحتاج حد معايا. متقلقش يا باشا. أنا بس عايز أعرف المهمة دي هتبدأ إمتى وهكون محتاج ملف فيه كل المعلومات دي. وكمان معلومات عن الناس اللي أنتم شاكين فيهم. وطبعًا معلومات عن الضابط. وضع اللواء ملف أمام فارس على المنضدة وقال: دا الملف. أنا جمعت فيه كل المعلومات اللي هتحتاجها. والمهمة هتبدأ مع بداية السنة ليهم. يعني كمان شهر أو شهر ونص في الحدود دي. أومأ فارس بتفهم. أمسك

ذلك الملف ثم نهض وهو يقول: تمام. أنا هتابع الدراسة هتبدأ إمتى وهكون هناك. وكل حاجة هتحصل هبعت لحضرتك. أنا لازم أمشي دلوقتي بعد إذنك. *** جلست سليا على الفراش وهي تقول بصوت مرتفع: تعالوا انتوا الاتنين، عايزة أقولكم حاجة حصلت. جلست بجانبها ساندي وقالت بضيق: خير يا أختي؟ مفيش حاجة بتيجي من وراك عدلة. نظرت له سليا بخبث وقالت: طبعًا، مانتي مش هيعجبك اللي هقوله. جلست سمر أمامهم وقالت بفضول:

ما تقولي يا بنتي إيه اللي حصل. لو مفيش حاجة مهمة خليني أروح أكمل الفيديوهات بتاعت أكاديمية الشرطة. نظرت لها سليا بغيظ وقالت: أنتي لسه مركزة برده في حوار الشرطة دا؟ تنهدت سمر وقالت بضيق: آه يا سليا. وقدمت خلاص، مستنية إني أتقبل وأعرف أول اختبار إمتى. وانجزي، فيه حاجة هتقوليها ولا إيه؟ نظرت لها سليا بغضب وقالت: خليها تنفعك يا أختي. ثم نظرت لساندي وقالت: حبيب القلب افتكرني. أنتي بس نفسي أعرف انتي شتمتي الواد ليه؟

دا قمر. نظرت لهم سمر بصدمة وقالت: حبيب مين يا بت؟ أنتي اتجننتي ولا إيه؟ واطي صوتك، أبوكي لو سمع الهبل اللي بتقولي دا هيقتلنا. ابتسمت سليا بسخرية وقالت: وأنا مالي يا أختي؟ ما تسألي أختك. نظرت لها ساندي بغضب من أسلوبها وقالت: سليا، احترمي نفسك. حبيب مين؟ هو أنا بتاعت الكلام دا؟ تنهدت سليا وقالت:

الجزار بتاع الخناقة شافني وبيقولي انتي شتمتيني ليه آخر مرة ولييه بتعامليني وحش. كان نفسي أضحك عليه وأفهمه إنك إنتي بس. شكلوا خد باله. تنهدت ساندي براحة وقالت: أنتي خوفتيني وربنا. أنا فضلت أفكر مين حبيبي دا. يا ستي، الواد كل ما أروح في حتة ألاقي وشي فيه دا واحد بلطجي. أنا مالي بيه. وأكيد مش هروح أكلم ولد عدل. ثم قالت بغضب: أوعى تكلميني بشكل دا تاني، انتي فاهمة؟ ثم نهضت وتركتهم وهي تقول: قال حبيبي قال. نظرت سمر

لسليا بضيق وقالت بعتاب: عجبك كده؟ أهي زعلت. هو دا هزار يا سليا؟ مينفعش تهزري كده. دا لو أبوكي كان سمع كلمة "حبيبك" دي كان صدقها وساعتها كانت هتبقى في مصيبة. تنهدت سليا بحزن وقالت: مكنتش أقصد والله. أنا كنت بهزر. مانتي عارفة هزاري. أنا هحاول أصلحها. *** بعد مرور يومين لم يحدث بهم شيء. استيقظ الجميع على صوت مرتفع جدًا. نهضت سليا وهي تنظر لساندي وتقول بقلق: فيه إيه؟ الصريخ دا؟ نهضت ساندي من الفراش وهي تقول: هعرف منين؟

تعالي نخرج نشوف فيه إيه. كانت تقف سمر في المطبخ وهي تمسك الهاتف بقوة وتقول: يا رب، يا رب، يا رب. صرخت بصوت مرتفع وهي تقول: نجحت! نجحت! لولولولي! دخلت والدتها المطبخ وقالت بغضب: بس بس، فيه إيه؟ أنتي عاملة الدوشة دي على الصبح ليه؟ ابتسمت سمر وقالت بسعادة: أنا نجحت يا ماما! اتقبلت في الأكاديمية! أول اختبار ليا هيكون يوم الخميس. نظرت لها والدتها بصدمة وقالت: أنهي خميس يا بت؟ دا بكرة الخميس؟

ولا تقصدي الخميس بتاع الأسبوع اللي جاي؟ ابتسمت سمر وقالت: لا، بتاع بكرة. الحمد لله. هروح أول اختبار بكرة. مش عارفة هيكون اختبار إيه، بس بإذن الله هكون قدها. دخلت ساندي وسليا بجانبها المطبخ. نظرت لهم سليا وقالت بضيق: هو محدش يعرف ينام في البيت المنيل دا؟ نظرت لها والدتها بغضب مزيف وقالت: بت اتلمي. ثم قالت بفرحة: بكرة أول اختبار لأكاديمية الشرطة لأختكم. اقتربت منها ساندي ثم عانقتها بقوة وقالت بحب:

اللهم بارك. مبارك ليكي يا قلبي. أنا واثقة فيكي وعارفة إنك قدها. عاش يا ست الظابطة. محدش هيعرف يكلمك بعد كده. ابتسمت سمر على كلماتها وقالت بحب: الله يبارك فيكي يا قلبي. ثم قالت بغرور مزيف: طبعًا يا بنتي، بس متخافيش. هبقى أقبل الفلوس لو عايزة أي مصلحة. أنا هظبطها لكِ، بس كله بفلوسه. ثم نظرت لسليا وقالت: ولا أنتي إيه رأيك؟ ابتسمت سليا واقتربت منها وهي تقول: كنت عارفة إنك هتتقبلي، بس شدي حيلك كده وعدي الاختبارات دي.

ثم قالت بمرح: وخليكي الواسطة بتاعتنا. تعالي في حضني يا قلبي. عانقتها سمر بقوة وهي تقول: كنت خايفة أوي تقولي كلام يزعلني. رتبت سليا على ظهرها وهي تقول بحب: يا بت، دا انتي توأم روحي. حياتي كلها. إزاي مفرحش ليكي؟ بس أنا كنت خايفة لما تروحي الأكاديمية دي تبعدي عننا. وانتي فعلاً هتبعدي عننا. دا إحنا هنشوفك مرة في الأسبوع. نظرت لهم والدتهم وهي تقول بغضب مزيف:

خلاص يا أختي، أنتي وهي. كفاية حب في بعض. وكل واحدة تقوم تعمل شغل البيت. ثم نظرت لسمر وقالت: أنتي تدخلي أوضتك وتفضلي تعملي تمرين والحاجات اللي بتبقى موجودة في الاختبارات دي. ثم نظرت لساندي وقالت: عارفة لو لقيتك خلعتي وروحتِ تذاكري، هعلقك. يلا يا بت منك ليها على الشغل. *** واقف يحيي أمام المدرسة. نظر أمامه وهو يقول: حبيبة عمو، تعالي بسرعة، وحشتيني. عانقها يحيي بحب أبوي وهو يقول: عملتي إيه النهارده في المدرسة؟ حد زعلك؟

ابتسمت أليس وقالت بحب: لا، شكرًا. إنك دخلت وكلمت الميس، هي زعقت ليهم وهم مكلمونيش تاني. قطع كلماتها صوت سيدة وتقول بصوت مرتفع: أليس، بنتي!