رواية بنت في ورطة الفصل العاشر 10 - بقلم كوكي سامح

خلصت المكالمة وخدت أوبر، وكانت في إيدها المفاتيح وبتكلم نفسها.. المفاتيح دي أنا عارفاها كويس.. دي بتاعت الراجل المتسول، بتاع العمارة القديمة الفاضية اللي خدني فيها وشكني بالدبوس في رجلي. أنا فاكرة كويس. أنا هروح وأتأكد وأشوف بنفسي.

الأوبر وصل قدام باب العمارة. نزلت حورية ومسكت المفاتيح. وفعلاً فتحت باب العمارة. والله كنت متأكده. وقفت وراها الباب وطلعت الدور الأول وفتحت الباب ودخلت. وقعدت على كرسي وكأنها متسمرة وبتكلم نفسها.. هي مين حور العين اللي خلاني أتقمص شخصيتها وأعيش دورها؟ وياترى حكايتها إيه؟

أنا فاكرة كل حاجة وفاكرة أمل الممرضة وجلال اللي قال إنه ابن عمي. أنا مشفتهوش بس أمل قالت كده. وفاكرة العلبة الخشب والخزنة وكل حاجة. حتى أيوب وأخته المتكبرة سالي. ودي بالذات أنا فكراها كويس أوي من يوم ما طردتني عشان الفازة الكريستال. وأنا مش قادرة أنساها. بس اللي مجنني إن المتسول قال إني هنسى كل حاجة وأهلي كمان هينسونى وهعيش مع ناس تانية. ودلوقتي أنا فاكرة كل حاجة ولما كلمت ماما كانت فكراني!

ده أنا كمان افتكرت خالد اللي نجدني من الترعة لما فوقت. بس برضه مش يمكن عشان مقلتش على المواقف اللي حصلت قبل شكة الدبوس؟ ولا الموضوع في "آن" بقى؟ والراجل ده نصاب وضحك عليا؟ بس لو نصاب مكنش ساعد ماما وإخواتي؟! مش يمكن حب يستغلني ويوهمني عشان يسرق القصر؟ الموضوع فيه حاجة غلط أنا مش فاهماها. وسألت نفسها.. بس مين حور العين!؟ وقامت من مكانها تدور يمكن تعرف حاجة. ولقيت قصادها غرفة مقفولة. فتحتها ودخلت.

وبقت تدور فيها ومفيش حاجة. بس لما فتحت الدولاب شافت صورة بنت جميلة. خدتها وقعدت تبصلها. ورجعت تفتش في الدولاب وشافت فيه باسبور أمريكي باسم حور العين وعليه نفس صورة البنت. يعني فيه بنت اسمها حور العين بجد. طيب لما هي موجودة أتقمص أنا شخصيتها ليه! ده حتى مفيش بيني وبينها أي شبهة خالص. وافتكرت الكلام اللي مكتوب في الورقة. معنى الكلام إن حور العين مختفية. طيب وأنا مالي بكل ده.

وبغيظ قعدت على الكرسي وبداخلها يبقى لازم أرجع القصر عشان أعرف المتسول ضحك عليا ليه. وليه وعدني بالقصر وقالي إني هكون صاحبته. واللي فهمته إن القصر ملك والد أيوب. وبعدين أنا مالي بحكاية حور العين. فيه أسئلة كتيرة ولازم حد يجاوبني عليها. وأنا عارفة الإجابة مع مين؟ مفيش غيرها "أمل". هي اللي معاها حل لكل إجابة أنا عاوزاها. ونزلت من العمارة وركبت أوبر وراحت على القصر. لقت البوابة مفتوحة ومحدش قاعد عليها.

خالد بصوت واطي واقف ورا شجرة.. حور.. حور. حورية بخضة.. أنت! قربت منه.. إيه اللي جابك هنا؟ خالد باستغراب.. إيه اللي جابني هنا.. مش ده كان اتفاقنا ولا إيه. إنما السؤال ده ليكي انتي إيه اللي جابك هنا؟ حورية.. أنا جايه القصر بتاعي. خالد.. ما أنا عارف.. بس مش انتي قولتي هترجعي عندنا عشان تلبسي الفستان.

حورية بتوتر.. مش مهم يا خالد. المهم إن القصر مفتوح والجنزير مش موجود عليه. وبجد ميرسي ليك على وقفتك جنبي من يوم ما أنقذتني من الترعة لحد ما شوفتني عند باب القصر. خالد بابتسامة وفرحة.. يعني انتي فاكراني. يعني أنا مش مجنون. حورية.. أنا افتكرتك لما فوقت بس محبتش أبين لحد ما أجي هنا. دبت برجليها على الأرض. خالد.. طيب إزاي! حورية.. الموضوع يطول شرحه وأنا مستعجلة. يا شهم باي. ودخلت جري جوه القصر وقفلت البوابة وراها.

خالد بص من خلف البوابة.. حور العين. حورية.. نعم. خالد.. خلي بالك من نفسك. حورية.. حاضر.. باي بقى. ودخلت على جوه. وطلعت على أوضتها. فتحت الباب. أمل بخضة.. مين؟ حورية.. أنا حور العين يا أمل. أمل بفرحة قامت جري وخدتها في حضنها. حورية بتحضنها ببرود. أمل.. كنتي فين يا حبيبتي.. حد زعلك. أوعى يكون حد وزك على الهرب. ولا حد خطفك ومش عاوزة تقولي. عارفة.. جلال لما يعرف إنك رجعتي هيفرح أوي. ده إحنا قلبنا الدنيا عليكي.

حورية قعدت على السرير. أمل مسكت الفون وبلغت جلال إن حور رجعت. حورية.. ممكن أتكلم معاه. أمل حطت إيدها على الفون. بعدين يا حور عشان مشغول. حورية.. طيب قوليلوا إني عاوزاه ضروري. أمل بتوتر.. حاضر. وبعلوا صوتها.. حاضر يا جلال هديها الحقن والعلاج. وقفت معاه. وراحت عند الكمود. وحضرت حقنتين في سرنجة واحدة. وقربت منها.. يلا حبيبتي عري دراعك عشان تاخدي العلاج بتاعك عشان تخفي على طول. حورية بصتلها بحدة وعينها في عين أمل.

أنا مش هاخد حقن تاني. أنا عرفت كل حاجة على فكرة. وخلاص افتكرت إني حورية الدمنهوري. وبصت لمكان الحقن اللي في إيدها. أكيد تأثير الحقن انتهى. وبغضب قربت منها.. انتوا مين بالظبط؟ وعاوزين مني إيه؟ ومين جلال ده؟ ومين الراجل المتسول اللي دخلني القصر؟ أمل فتحت الباب وبصت في القصر كله واتأكدت إن مفيش حد بيسمعهم. دخلت الأوضة وقفلت الباب وراها. وقعدت على السرير وببكاء وصوت محشرج. إنتي عرفتي كل حاجة.

حورية.. أيوه.. وعاوزة منك الإجابة انتوا مين؟ ومين حور العين؟ أمل بخبث.. أنا هكلم جلال وهو هيقولك على كل حاجة. إنما أنا مقدرش أتكلم خالص. ده جلال كان يموتني. حورية قربت منها وبتوعد.. لأ هتتكلمي يا أما أمشي دلوقتي حالا. وقبل ما أمشي هقول لأيوب إني مش حور. أمل.. أيوب عارف إنك مش حور. حورية.. لما هو عارف سايبني قاعدة هنا ليه! ها؟ أمل بغضب.. عشان نصاب وابن كلب. وهو ورا اختفاء حور. حورية بذهول.. اختفاء حور. أمل.. أيوه.

حورية.. أنا عاوزة أعرف كل حاجة دلوقتي. مش هستنى جلال. أنا ده مش موجود ومن يوم ما دخلت القصر ده وأنا مشفتش وشه ولا حتى أعرفه. أمل ببكاء.. المتسول هو جلال. حورية "صدمة 😱" نعم.. قعدت جنبها. جلال هو نفسه المتسول.. إزاي! مش بتقولي إنه في أمريكا وعنده شغل. وبعدين المتسول يبقى جلال.. أنا مش مصدقة. أمل.. كذب.. جلال موجود هنا.. مش في أمريكا. هو كان في أمريكا إنما خلاص رجع مصر من بعد اختفاء حووور.

أمل.. أنا هحكيلك على كل حاجة بس ياريت تسمعيني وتقدري موقفنا كويس. حورية.. اتفضلي.. أنا بسمعك. أمل قامت وقفت وبتوتر وارتباك.. أنا وجلال في قرابة ما بينا من بعيد وكنا ومتجوزين ودلوقتي منفصلين والسبب حور العين 😥. حورية بتعجب.. انتي كنتي مرات جلال وكمان قريبة؟ وقال إيه أنا بحسبك بتشتغلي عنده. وضربت كف بكف. وكمان اللي فرقت بينكم حور. يعني هي موجودة مش مختفية زي ما قلتي. أمل.. كانت موجودة.. إنما محدش يعرف طريقها.

حورية.. يعني راحت فين. أمل.. ما هو ده اللي جلال جابك هنا عشانه. حور العين كانت عايشة في أمريكا هي ومامتها وجلال أخوها الوحيد. حورية.. مش انتي قولتي إن أخوها مات في الحادثة.

أمل.. ده كلام. إنما الحقيقة اللي بقولها دلوقتي. ويا ريت تسمعيني كويس أوي. من حوالي 7 سنين أبو العز كان على كرسي متحرك وبيتعالج من الشلل في مستشفى كبيرة في أمريكا. وفي يوم حماتي كانت بتزور واحدة صاحبتها كانت تعبانة ومحجوزة في نفس المستشفى. واتعرفت عليه وخصوصاً إنه كان لوحده فترة العلاج. كان تملي يشكلها من سوء معاملة أولاده له خصوصاً بعد ما اتشل ومبقاش يتحرك زي الأول. كان بيقول إنهم رموه للشغالين ومكانش حد فيهم مهتم

بيه بعد ما مامتهم اتوفت ولا حد فيهم بيسأل عليه. وقرر إنه يسيبهم ويسافر على أمريكا عشان يتعالج. جلال كان بيقولي إنه كان دايماً حزين عشان مفيش حد من أولاده بيحاول حتى يسأل عليه. ولما اتعرف على حماتي حياته اتغيرت تماماً وبقى سعيد وسعادته زادت أكتر بعد ما شاف حور العين الشقية البنت الجميلة. وجلال حبهم أوي وكان بيعتبرهم هما أولاده. وكان بيقول إن حور اعتبرته أبوها من أول يوم شافته وكانت بتعامله معاملة البنت لأبوها فعلاً.

وبدموع.. أصلها كانت يتيمة من صغرها. حورية.. انتي بتقولي الكلام ده من 7 سنين. مع أنك قولتي إن زوج مامتها معاهم من زمان. أمل.. أنا قولتلك أي حاجة قبل كده قولتها ليكي ممكن تكون مش حقيقة بس فيها شي من الصدق عشان أتوهك. وأرجوكي بلاش تقطعينى. لو عايزة تعرفي الحقيقة كلها أنا دلوقتي بقولك عليها وياريت تسمعيني. حورية.. اتفضلي أنا بسمعك.

أمل.. المهم إن أبو العز حب حور وجلال أوي. ومن سوء معاملة أولاده له كتب كل فلوسه لجلال وحور على حياته من غير ما أولاده يعرفوا. ويوم عيد ميلاد حور كتب ليها القصر باسمها. باع وشري وسجلو كمان. حورية بغضب.. ده ظلم مهما ولاده عملوا فيه.. مينفعش يظلمهم. أمل.. في وقتها حماتي رفضت بس هو اعترض وقالها.. إنها فلوسه وهو أدرى بيها. إن شاء الله يرميها. حورية.. وموقف جلال وحور كان إيه؟

أمل.. كان فرحان طبعاً وقال إن أولاده يستاهلوه وهما أحق بثروته لأنهم رعوه وعوضوه عنهم. وحور كانت فرحانة بالقصر مع إن عمرها ما شافته. حورية بغضب.. بس ده ظلم. وجلال ده ظالم.. إزاي يقبل مال مش ماله. وحور كمان.. ده القصر مش من حقها. أمل بعصبية.. يا بنتي حتى لو هما رفضوا محدش كان يقدر على أبو العز. لأن حماتي رفضت بس هو كتب ماله لولادها وساب ولاده. وتقريباً أنا عرفت من جلال إنهم معاهم ميراث مامتهم بعد ما اتوفت.

حورية.. كملي. أمل.. اللي حصل بقى غير كل حاجة. أبو العز كان ابتدى يخف وحالته تتحسن. وفي يوم خرجوا في فسحة وعملوا حادثة 😭. حماتي وأبو العز ماتوا. حورية.. وجلال. أمل.. ما أنا قولتلك جلال مكنش معاهم في الحادثة بس كنت بتوهك يا حور. قصدي يا حورية. حورية.. ممم.

أمل.. كانت معاهم حور وللأسف لما شافت مامتهاماتت وأبو العز اللي اعتبرته أبوها ماتت تعبت وعانت من الاكتئاب الحاد. وراحت عند الكمود. وكانت بتاخد كل الأدوية دي. على فكرة الحقن والأدوية دي كلها من أمريكا. كانت بتنسيها اللي فات ولما تأثيرها يروح ترجع تفتكر كل حاجة من تاني. حورية.. آه وأنا خدتها ونسيت. أمل.. آه.. عشان تنسي. حورية بضحكة سخرية.. يعني كله كان ضحك على الدقون ههههههه هههههه. ولا شكة دبوس ولا بتاع.

أمل.. شكة الدبوس.. كانت كذبة من جلال. حورية.. بس أنا بعدها محستش بحاجة. أمل.. لما جلال شكك بالدبوس إنتي غمضتي عينك وجلال ضربك على دماغك وفقدتي الوعي. بعدها على طول إنتي فضلت نايمة لأن أنا وهو كنا بنديكي الحقن لمدة يومين عشان تقومي ناسيه كل حاجة زي حور. وده اللي حصل معاكي. ولما سافروا جلال دخلك القصر بنسخة مفاتيح أبو العز اللي كانت معاه.

حورية.. بس أنا افتكرتك وافتكرت كل اللي حصل في القصر. وراحت عند الدولاب وشاورت عليه.. وافتكرت العلبة الخشب والخزنة. أمل.. ده طبيعي. ما حور كان بيحصل معاها كده. بعد ما كانت بتاخد الحقن وتنسى. كان جلال بيخرجها ويفسحها. ولو في يوم نسي ميعاد العلاج كانت تفتكر كل حاجة من وقت الحادثة. حتى الخروجة وكانت تفتكر كل كلمة اتقالت ما بينهم. وبدموع.. إنتي متعرفيش جلال كان بيحب حور قد إيه. كانت كل حاجة ليه 😭. حورية🥺.. وبعدين.

أمل.. بعد سنة من موت حماتي كانت حور مدمرة وتعبانة أوي. كنت بكلم جلال على الفيس واتعرفنا على بعض أكتر.. آه إحنا قرايب بس من بعيد مكنش في ود ما بينا. وبعد ما حبينا بعض جاب حور ونزل بيها على مصر واتجوزنا وعشنا مع بعض أحلى سنتين في حياتي. وطبعاً بعد حور ما دخلت مصحة عشان تتعالج. بعد فترة من العلاج خرجت وكانت اتحسنت شوية. جلال سابها في رعايتي وأنا كنت لسه مخلفش. كنت بحبها أوي والله يا حورية. كنت بعتبرها بنتي. إنما جلال

نزل وقعد هنا شوية ورجع عشان يخلص شغله في أمريكا ويرجع يستقر هنا. لما سافر.. قدر الله إني أحمل وكنت تعبانة أوي ووقتها مكنتش باخد بالي من حور ولا من علاجها. وفي يوم لقيتها بتتكلم على القصر وإنه ملكها وعاوزة تروح تعيش فيه وتغير جو. وطبعاً أنا رفضت وبشدة. إنما راحت من ورايا واكتشفت إنها سرقت الورق من الخزنة وراحت لحد القصر.

حورية.. يعني الورق اللي معايا مزور. أمل.. أيوه.. الورق الأصلي كله كان مع حور. استنيت أسبوعين يمكن ترجع ومرجعتش واضطريت أبلغ جلال بكل اللي حصل. حورية.. مفترى أسبوعين وميسألش عليكم. أمل.. أصله كان مشغول جدا ومكنش بيتصل خالص. اتعصب عليه وزعل مني أوي. بس أنا كلمتها وقالت إنها في القصر وكانت فرحانة وقالت أيوب وسالي هيمشوا لما عرفوا إن القصر ملكها. حورية.. هو أيوب ميعرفش حور وجلال. أمل.. لأ كانوا في أمريكا وعمره ما شافهم.

حورية بتنهيدة.. وبعدين.

جلال حاول يكلمها. كان الفون مقفول على طول. طلبت منه إني أجي هنا أطمئن عليها. رفض. ونزل بعدها وراح القصر. وكانت المفاجأة إن أيوب قالوا إنه حور جت عنده فعلاً ومكدبوش. وكتبت القصر بيع وشراء ليه هو وأخته. ورجعت حقهم ليهم. وقال إن ده حقه وطبيعي.. وأختك طلعت بنت ناس ومستحلتش مال غيرها. طبعاً جلال اتجنن عليه.. حور متعملش كده. دي كانت فرحانة جدا بالقصر. ولما سألوا هي فين. أيوب قالوا مشيت من القصر وميعرفش عنها حاجة. جلال طلب

منه إثبات على كلامه. هنا بقى ظهر المحامي النصاب "سامي" وصدق على كلام أيوب وطلع الورق وكان مظبوط. جلال اتجنن لما شاف الورق وعرف إن فيه خطة مدبرة عشان حور متعملش كده أبداً. ومن بعدها جلال قاعد من سنة على البوابة متخفي بملابس المتسول عشان يشوف حور أو يعرف عنها أي حاجة.

حورية.. مش يمكن أيوب صادق وحور رجعتله القصر فعلاً. أمل.. طيب وراحت فين؟ وبعدين البنت مريضة وبتتعالج نفسياً. وبتوتر.. لو رجعت القصر.. طيب ليه مرجعتش الفلوس وقالت ليا أو لجلال؟ والطبيعي بقى إن أيوب يطلب فلوسهم كمان. مطلبش ليه! حورية.. ليه بقى؟ أمل.. عشان هو ورا اختفاء حور ومش عاوز يفتح مواضيع ويدخل في س و ج. حورية.. طيب حور فين؟ أمل.. معرفش؟ حور اختفت من بعد ما دخلت القصر.

حورية.. أكيد أيوب وسالي وولاد عمو عملوا فيها حاجة.. أكيد قتلوها الكلاب. أمل بفزع.. لا.. أوعى تقولي اتقتلت. ده جلال يموت فيها.. حور كانت روح جلال. من يومها وهو طلقني شيلني ذنبها. وأنا سقط من حزني على اللي جرالنا. حورية.. طيب وليه كل اللف والدوران ده؟ ما كان جلال يقولي وأنا كان ممكن إني أساعده من غير أي حاجة.

أمل.. على ما أعتقد إنك كنتي هتقولي لأ. لأنك هتخافي على نفسك. وبصراحة لما شافك مكسورة الجناح وكنتي بتعيطي وعرف حكايتك كلها لقيته اتصل بيا وطلب مني إني أساعده وبكده أكفر عن ذنبي. كلمني وكان فرحان وقالي. أنا لقيت حور خلاص. أنا فرحت وروحي ردت فيا. بس قالي. أنا لقيت البنت اللي هتعرف الحقيقة وهتقدر تعرف حور فين. وسأل عنك وعرف كل تفاصيل حياتك. وبرضه هو قالي إنك اتكلمتي معاه وحكيتى حكايتك وصعبتي عليه أوي. ورسمنا الخطة مع

بعض. وعشان تكمل وإنتي تصدقي راح لراقصة اللي خدت فلوسكم وعرف إن والدك مديون ليها بمبالغ كبيرة. عشان كده استولت على كل حاجة. سد الديون كلها وخلاها تروح لحد بيتكم وترجع كل حاجة. حتى الفيلا رجعتها. وهشام أخوكي راح المستشفى يكمل علاجه. وكان بيطمن عليه من بعيد لبعيد. بس والله يا حورية ما قصدنا نأذيكي. كل الحكاية إن جلال عاوز يعرف حور فين.

وبصعوبة وتوسل.. أبوس إيدك يا حورية. كملي معانا. عاوزين نعرف حور راحت فين. زي ما جلال أنقذ مامتك وإخواتك من التشرد ورجع لكم حقكم. وبدموع.. اقفي جنبه عشان يعرف أخته الوحيدة راحت فين. وكمان أرجع بيتي اللي اتخرب. حورية بضعف.. حاضر🥺. أنا هكون معاكم للآخر ومش عاوزة أي مقابل. أمل بابتسامة وحضنتها.. ربنا يخليكي لينا يا حورية. قصدي يا حور. حورية.. هههههههه. أنا مش هاخد حقن تاني.

أمل.. أكيد.. بس خليكي على وضعك. إنتي حور العين شمندي. حورية.. حاضر. أمل.. النهارده محدش فيهم موجود من الصبح. تقريباً عند المحامي عشان تعبان. أنا هنزل أعمل كام سندوتش واتنين عصير لحد ما يرجعوا. اهو نتسلى. حورية.. تمام. وأنا هغير الطقم وألبس أي حاجة تانية. عشان حاسة إني مخنوقة. _أمل نزلت على المطبخ.

حورية قامت فتحت الدولاب وطلعت ملابس نوم. ولابستها ونامت على السرير. بس المرة دي كانت مرتاحة وحاسة إن اللي بيحصل بإرادتها وإنها بتعمل خير عشان عاوزة ترجع أخت لحضن أخوها. وراحت في النوم. _من جهة تانية خالد واقف قصاد باب القصر. عاوز يشوف حورية عشان يطمئن عليها. ولما الوقت اتأخر قعد جنب الشجرة. "أنا مش همشي غير لما أطمن عليها."

أمل فتحت الباب ومعاها السندوتشات والعصير. أنا عملت السندوتشات وبصتلها. إنتي نمتي يا حور. قعدت أكلت بسرعة ونامت جنبها. وبعد مرور ساعتين الفون رن وكان الوقت متأخر. أمل.. أكيد جلال جه. قامت بسرعة وقفلت الفون خالص. وخرجت بره الأوضة وهي بتتسحب. قفلت الباب وراها.

_حورية بتفرك في عينها وبصت جنبها. هي أمل راحت فين. وقامت وخرجت وشافتها دخلت الأوضة اللي جنبها. وباستغراب.. هي دخلت الأوضة وسابتني ليه. يمكن هتنام لوحدها. وبابتسامة.. أصلي نومي وحش أوي.. أنا عارفة نفسي ههههه. قربت من الباب. وكان موارب. وشافت "صدمة 😱". راجل نايم على السرير وهي في حضنه. أمل.. وحشتني أوي يا جلال💋. جلال.. وإنتي كمان يا روحي💋. أدم بيسلم عليكي.. كل شوية يعيط ويقولي مامى فين.

حورية بذهول.. إيه ده مش هي قالت إنه طلقها؟ يا نهار أسود ومنيل وكمان عندها ولد. يعني كانت بتكذب عليه. لا سقطت ولا طلقها. ورجعت تسمع كلامهم. أمل.. حبيبي أنا نفسي أشوفه فيديو. جلال.. مينفعش يا قلبي. أمل.. يعني ينفع إنك تكون هنا دلوقتي. اتصرف. مليش دعوة!

جلال.. يا حبيبتي.. أنا عارف إن أيوب وسالي وابن عمه عند سامي بيطمنوا عليه بعد ما دبرت الحادثة عشان أرتاح منه. ولما شوفت أحمد خرج هو كمان.. اطمنت وقولت نقضي ليلة مع بعض النهارده. أنا واثق إنهم مش هيرجعوا غير لما سامي يفوق. ما ابن الكلب ده اللي عارف كل حاجة. أمل.. هو لوحده يعني.. ما كله بسببها. منها لله إذا كانت حية ولا ميتة. طول عمرها مدوخاك وراها.

جلال.. حور دي فعلاً كانت إنسانة مستهترة وفاشلة وغير كل يوم والتاني عاملة علاقة مع راجل غير التاني. وكثير قولتلها إننا مصرين لا دي عاداتنا ولا تقاليدنا. إنما هي كانت دماغها غيري خالص. واللي زاد بقى لما أبو العز كتب لينا ثروته. ضيعت نصها على الرجالة. وماما كانت في صفها دايماً. وأبو العز تلف أخلاقه. وبصراحة كان لازم أتخلص منه. حورية😰.. يا نهار أسود ده قتلوا. أمل.. بس اللي بوظ الدنيا إنك مكنتش تعرف إن مامتك معاه.

جلال.. ده اللي وجع قلبي. بس بعد موتهم قدرت أسيطر على حور بالحقن والأدوية لحد ما اتجننت. ورجعت مصر وراحت من ورانا عند أيوب. أمل.. أنا كلمتها وقالت إنها عنده وقولتلها ترجع. بس كانت دماغها ناشفة وقال إيه حبته. جلال.. خد القصر وفلوسها كلها. أمل.. وخباها والله أعلم عمل فيها إيه. جلال.. مش مهم هي المهم الفلوس. يا ريت يكون قتلها وريحني منها. حورية فتحت الباب بتهور. أمل بخضة.. إيه ده حور.

حورية بغضب.. حور.. أنا حورية يا نصابة يا محتالة يا كذابة. جلال قام من على السرير. ارجوكي افهمي. حورية.. أفهم إيه.. إنك أوسخ من أيوب وولاد عمه واخته.. أفهم إيه.. إنك قتلت جوز أمك ومامتك وجننت اختك عشان الفلوس. بس والله شكلك حلو خالص. تصدق متغير عن ما كنت متسول. أمل.. إنتي فهمتي غلط.

حورية بغيظ.. آه أصل جلال بيحب أخته الوحيدة. وهيتجنن عليها. ده طلقني وأنا شايلة ذنبها. يا حرام ولا إيه يا ست أمل. مش ده كل كلامك الكذب ليه. يا أوساخ نصابين محتالين. جلال.. يا حورية افهمي. حورية.. حور كانت بنت فاشلة. جلال.. آه وتستاهل القتل. حورية.. عشان الفلوس والقصر. وأنا اللي كنت فاكراك إنسان وخايف على اختك. بجد مش مصدقة نفسي.. هي الفلوس تعمل كده. جلال قرب منها وهي جريت على الباب.

_من جهة تانية وقفت عربية قصاد باب القصر. نزل منها أيوب وسالي وولاد عمه. أيوب.. الله يرحمك يا سامي.. أنا حاسس إني تاييه ومش عارف أتصرف. معاه كل حاجة. محمد "ابن العم" إحنا في كارثة. وغير البت اللي فوق دي. سالي.. أقسم بالله البت دي لو مقالتش هي مين أنا هقتلها وأشرب من دمها. أيوب.. أنا عارف إنها نصابة وكذابة. وبصلهم.. ما إنتو عارفين كل حاجة؟

خالد بارتباك 😰.. حور في خطر. أنا لازم أتصرف وأدخل القصر. كنت عارف إن فيه حاجة غلط بس أنا مش عارفاها. هي مقالتش. أعمل إيه دلوقتي يارب. _أيوب دخل القصر ومعاه سالي وولاد عمه. والحزن على وشوشهم. أحمد بزعيق.. أنا هقفل الباب. خالد قرب منه. أحمد بخوف وارتباك.. إنت مين؟ خالد.. أنا.. وضربه على دماغه. وقع مكانه مغمى عليه. خالد دخل القصر وهو بيتسحب وبيدور على حور. _حورية نازلة جري من على السلم.

يا نصابين.. يا محتالين.. أنا مستحيل أكمل في المهزلة دي. ودخلت في حضن أيوب. حورية.. ها 😰 أيوب. جلال نازل ووراه أمل. سالي.. إيه ده هلو هلو. وبذهول.. جلال أخو حور. أيوب مسك حورية من رقبتها. آه انتي تبع جلال.. عمل عليكي دكر وجابك هنا تنصبي عليه. جلال بغضب.. أنا دكر من قبل ما أشوفك يا ابن أبو العز. أيوب بسخرية.. هههههههه. وبص لحورية. عشمك بإيه هه. حورية بخوف.. أنا مليش دعوة بحوارتكم. أرجوكم.. سيبوني أمشي.

أيوب.. إنتي فاكرة دخول الحمام زي خروجه يا روح ماما. حورية.. الحكاية إنه عاوز يعرف أخته فين. بس كده. أنا مالي بقى. جلال.. فين أختي بقولك. أمل بزعيق.. فين حور يا أيوب. اللي نصبت عليها وخدت فلوسها والقصر غصب عنها. أيوب.. كانت بتحبني. وبعدين أنا خدت حقي. وبسألي أبويا كتبوا ليكم ظلم. جلال.. ده مش حقك.. دي فلوسي أنا. سالي.. آه.. أظهر وبان على حقيقتك. إنت عاوز الفلوس والقصر. إنما حور متلزمكش.

أيوب.. بس يا سالي أنا لازم أريحه وأقولوا أخته فين قبل ما يموت. جلال بضحكة عالية.. هههههههه. يا ترى مين فينا اللي هيموت. أنا ولا إنت. خالد من ورا الباب.. حور أهي وواضح كده إنها في مشكلة كبيرة. أنا لازم أدخل أنقذها من إيد الراجل اللي اسمه أيوب. أيوب.. أنا اللي زي ميموتش أبداً. الزمن زمني أنا وبس. إنما الأغبياء اللي زيك وزي حور لا زم يدفنوا وميقومش ليهم قومة. أمل.. فين حور وفين الفلوس. جلال.. بس يا أمل.

أيوب.. إنتي مين أصلاً. حورية.. دي مراته.. وهو بقى المتسول اللي كان بيقعد على الباب. أيوب بسخرية.. بجد... إنت الشحات يا عيني. جلال بغيظ طلع مسدس من جيبه وصوبه على أيوب. وبقى ينزل من على السلم وأمل نازلة وراه. أيوب بسخرية.. هههههه.. آه أنا كده خوفت. وزق حورية على الأرض. حورية مسكت دماغها.. آه يا دماغي. أيوب.. اقتلني أنا فارد دراعاتي قدامك أهو. جلال.. فين الفلوس.. وعاوز عقد القصر. يأما تترحم على روحككك.

حورية بتسحف ببطنها وبتحاول تخرج بره القصر. أيوب.. اختار حاجة واحدة. القصر ولا حور. عموماً حور غرقت في البسين ودفنتها تحته. "صدمة 😱" أنا مش شايف حد فيكم زعلان يعني. جلال قرب منه ورافع المسدس عليه. ما أنا قتلت أبوك أبو العز. أيوب.. إنت قتلته.. طيب واحدة بواحدة. عاوز إيه تاني.. مش عرفت طريق أختك. أختك ماتت بعد ما كتبت القصر ليا ولسالي. و طبعاً بعد ما وقعتها في حبي. أصلها كانت سهلة أوي.

جلال بغضب.. يا ابن الكلب أنا مش هسيبك. وحصل بينهم اشتباك وانتهى إن أيوب قعد على الترابيزة وبيكتب القصر باسم جلال. أيوب.. أنا مش هكتب أي حاجة. جلال.. هموتك.. طلقة واحدة في دماغك وتبقى في خبر كان. محمد "ابن العم" طلع المسدس من جيبه وصوبه على جلال. أيوب قام من مكانه. حورية ابتدت تخرج بره القصر. خالد شدها من رجليها. حورية بصت وراها.. خالد 😰. ومسك إيدها وقومها بسرعة. يلا بسرعة على بره. الاثنين بيجروا في الجنينة.

خالد.. مين دول. حورية بتبص وراها.. دول.. دول مصايب. على الأرض وباين كده مش هتنهي على خير. أيوب.. أنا مش هكتب حاجة. وخد المسدس من محمد ووقف قصاد جلال. راس براس. أمل واقفة 😰. جلال حاسب. سالي بتهور جريت على المطبخ وبعدم وعي. ووقفت ثواني وقربت من الغاز وفتحته. خرجت جري وقالت بصرااااخ.. جلال إنت مش هتقدر تموت حد فينا. إنت فاهم. جلال واقف قصاد أيوب وبيدوس على الزناد. لو عاوز تعيش رجعلى الفلوس والقصر. ومش هحبسك.

سالي بعدم اتزان.. هيعيش غصب عنك. كلنا هنعيش. لو ضربت طلقة واحدة من المسدس ده القصر هينفجر بينا كلنا. أمل.. إنتي بتقولي إيه. جلال.. دي بق.. سيبك منها. سالي.. أنا فتحت الغاز.. لو قربت من أيوب وضربته كلنا هنموت. وإنت هتموت. أيوب بصلها.. إنتي بتقولي إيه. جلال داس على الزناد. أمل بخوف.. ريحة غاز.. أوعى يا جلال. دي فعلاً فتحت الغاز.. المجنونة دي. سالي.. مش هيقدر يقرب من أي حد فينا.

أحمد فاق ودخل القصر ولما شاف جلال رافع المسدس على أيوب. وطبعاً من غير ما يسمع الحوار. رفع المسدس. أنا هموتك يا جلال. أمل.. أوعااااااا تضررررررب. لااااا لااااااا. وضرب طلقة في قلب جلال. بوم بوم بوم 💥💥💥💥💥💥🔥 🔥 🔥 🔥 🔥 🔥 🔥 🔥 القصر انفجر 💥💥💥. حورية بعيد عن القصر بصت وراها 😰😱😱😱. القصر انفجر بكل اللي فيه. بقى كله نار نار نار 🔥🔥🔥. خالد.. يا ترى انفجر إزاي؟

حورية.. انفجر من ظلمهم. دول ناس ظالمة صدقني. أنا شوفت في كام يوم وعشت حياة مش حياتي. بس كانت حياة وحشة أوي. كلها كذب وظلم وافتراء. وكله بسبب الفلوس. خالد.. إنتي بتقولي إيه أنا مش فاهم. مش إنتي قولتي يا حور إنك صاحبة القصر. حورية.. أنا اسمي حورية. مش حوووور يا خالد. حور هي صاحبة القصر مش أنا. وبصت في إيدها وشافت مكان المفتاح معلم في كف إيدها. خالد.. فيه حاجة؟ حورية.. لا لا.. مفيش.

خالد.. الوقت متأخر أوي. تحبي تروحي على فين؟ وخصوصاً بعد ما القصر انفجر. إنتي بقى تيجي معايا عند ماما ومنال. أكيد وحشتيهم أوي. حورية.. ما قولتلك أنا مش صاحبة القصر ولا أنا حور يا خالد. وضربته على كتفه. أنا ليا بيت وأهل على فكرة. خالد.. إيه حكايتك.. عاوز أعرفها؟ حورية ماشية معاه.. حكايتي حكاية. أنا كنت في ورطة. وبدأت تحكي حكايتها من أول ما الراقصة ضحكت على باباه. لحد ما خرجت من القصر.

وصلوا على أول الطريق. النهار شقشق والشمس ابتدت تشرق. _ومن جهة أخرى البوليس والاسعاف متجهين ناحية القصر. حورية.. الوقت فات والقصر أكيد بقى رماد. خالد.. يلا نركب. وقف أوبر وقالت على عنوان الفيلا. الأوبر وصل. نزلت وودعت خالد. جريت على باب الفيلا وبقت تخبط بجنون. مامي مامي. أنا رجعت. الباب اتفتح وكانت الأم. خدتها في حضنها. حورية بتحضنها باشتياق. بعد فراق. كان حضن دافي مليان حب وحنية❤️. الأم بلهفة.. وحشتيني يا بنت عمري.

حورية.. وإنتي أكتر يا مامي. الأم.. بعد تليفونك ليا أنا اطمنت عليكي. بس مش ناوية تقولي إنتي كنتي فين! حورية.. كنت مخطوفة. الأم.. مخطوفة.. إزاي ده حصل. حورية.. مامي بعدين.. بس فين أخواتي وفين بابي. الأم.. أخواتك نايمين وبابي كمان. أما هشام فالمستشفى ونفسه يشوفك. بيسأل عليكي كل يوم. حورية.. حاضر يا مامي. هو كمان وحشني أوي. أغير بس هدومي وبعد الضهر أروح أشوفه عشان حتى أكون استريحت. وبلهفة.. مفيش جديد في موضوع سليم أخويا.

الأم بحزن.. أخوكي اتجوز بنت من بره وعايش معاها. حورية بذهول.. إزاي.. معقول يسبنا ويروح يتجوز. مين اللي قالك. الأم.. عرفت من واحد صاحبه. حورية دخلت الفيلا وبصت في كل أركانها. وخدت نفس عمييييييق. ياااه كان وحشني بيتنا أوي يا مامي. كل ركن فيه كان وحشني. الحمد لله إننا رجعنا بيتنا❤️.

الأم.. والله يا بنتي ربك كبير. لقيت الراقصة داخلة علينا وقالت إن فيه حد سد ديون بابا كلها ورجعت كل حاجة أخدتها بالنصب والغش. رجعت الفيلا وحتة الأرض. حورية بداخلها.. دي الحسنة الوحيدة اللي عملتها. فيا يا متسول قصدي يا جلال. ومش هقول لمامي على أي حاجة وأعكنن عليها. وطلعت على أوضتها. _نامت نوووم عمييييييق لمدة 24 ساعة.

وفي صباح يوم جديد تشرق الشمس على غرفة حورية. قامت من النوم. ياااه أنا نمت كتير أوي. دخلت الحمام وخدت شاور ولابست طقم. ونزلت. وكانت السفرة جاهزة وعليها أجمل فطار لأحلى حورية. الأم.. على فين. حورية.. إنتي ناسيه إن عندي جامعة. أنا في تانية طب يا ماما. الأم.. حبيبتي أنا عارفة بس إنتي تعبانة وباين عليكي الإرهاق. حورية بابتسامة.. بالعكس أنا فرحانة جدا. هروح الجامعة وبعد كده المستشفى لهشام أطمن عليه. وعندى مشوار مهم جدا.

الأم.. حورية. حورية.. عارفة أنا هدور على شغل وهساعد في المصاريف. وإن شاء الله ربنا معايا. الأم.. الفيلا رجعت والأرض. بس أنا مش معايا فلوس ومعرفتش أتصرف في أي حاجة؟ حورية.. ماما عندي اقتراح بس ياريت توافقي. الأم.. عارفة.. وموافقة. حورية باستغراب.. إنتي عرفتي عاوزة إيه الأول. مش يمكن متوافقيش يا ست الكل. الأم.. إنتي عاوزة تبيعي الفيلا.

حورية.. لا يا مامي. إحنا نبيع الأرض ونفتح حساب في البنك ونعيش من أرباحها. وبرضه أنا هشتغل. لأن بابي خلاص مبقاش قادر على الشغل. أنا عارفة إن الأرض غالية عليكي. بس ده الحل الوحيد. الأم.. مفيش حاجة غالية عليا غيرك إنتي وإخواتك بس. بيعيها يا حبيبتي واتعلمي. وإن شاء الله تبقي دكتورة كبيرة ناجحة. ومفيش زيك يا ضي عنيه❤️.

وبضحكة سخرية.. ما الأرض كانت ضايعة ومش هترجع. بس ربنا عالم بينا 🥺. أنا بشكره في كل وقت وفي كل أذان. لك الحمد والشكر يارب❤️🙏. وقربت منها.. مش ناوية تحكيلي كنتي فين؟ حورية بداخلها.. كان نفسي أقولك بس مينفعش. الأم.. إيه روحتي فين؟ حورية.. معاكي يا مامي. وقاطع كلامهم جرس الباب. حورية.. يا ترى مين؟ وجريت عشان تفتح. وبذهول.. خالد!؟ .. اتفضل. الأم.. مين يا حورية. حورية.. ده خالد يا مامي.. زميلي.

خالد.. آه إنتي بتاعة بابي ومامي. حورية بضحكة.. بس جدعة وأعرف الأصول. خالد.. عارف يا حور.. احم.. قصدي يا حورية. الأم خرجت.. اتفضل يا ابني تعالى. مش تعزمي على ضيوفك يا حورية. حورية.. ده مش ضيف يا مامي. وبصتله. ده صاحب بيت.. تعالى افطر معانا. خالد.. إنتي كنتي خارجة.. شايفك لابسة ومتشيكة على الآخر. حورية بصت لنفسها.. كده متشيكة. ده العادي بتاعي 😂. خالد.. تعالي أوصلك.

حورية.. عن إذنك. ودخلت استأذنت من مامتها. وخرجت بره الجنينة وبصت لزرع أوي. وللفيلا كلها.. عارف الفيلا مش كبيرة أوي والجنينة صغيرة بس بحبها جدا. أنا عشت هنا أجمل سنين عمري. خالد.. هي فعلاً الفيلا حلوة. حورية خرجت بره الفيلا. أنا كان عندي عربية بس راحت في الديون. خالد.. يا بنتي خليكي في اللي جاي. حورية.. عارف أنا رايحة فين دلوقتي. خالد.. فين؟

حورية.. كنت رايحة الكلية.. أنا في تانية طب. وعندي مستقبل كبير مستنيني ومستحيل استغنى عنه. خالد.. ربنا يوفقك.. إنتي بنت تستاهلي كل خير. حورية.. وإنت كمان.. إنت بجد جدع وشهم. وراجل وشوفت ده في تعاملك مع أهل بيتك ومحترم جدا. محاولتش تستغلني أو تأذيني. بالعكس كنت بتنقذني من كل مصيبة وتطلعيني منها. وبابتسامة.. فاكر الترعة. خالد.. دي بالذات متتنسيش. حورية.. هههههه كانت ريحتها وحشة أوي.

مشيت معاه.. بعد ما أروح الجامعة هطلع على هشام عشان أطمئن عليه. خالد.. ممكن أجي معاكي أطمن عليه. حورية.. أكيد.. لما يشوفك هيحبك أوي. أصله اجتماعي وبيحب الناس. نفسي وأمنية حياتي إنه يرجع طبيعي زي الأول. حبيبي المرض هده وهو صغير ميستحملش. وبدموع.. استحمل كتير من كيماوي ووجع وألم. خالد.. ربنا معاه وإن شاء الله لطفه كبير. حورية.. يارب. وبلهفة.. بقولك إيه. إحنا نروح المستشفى عند هشام الأول. خالد.. أوك.

وراح معاها وقضوا مع هشام يوم جميل. وبعد ما مشيوا من عنده قعدوا في كافيه. خالد.. أكيد عندك أكونت على الفيس. حورية.. والله أنا نسيت الموضوع ده من شهرين. نسيت الفيس أصلاً. مكنتش فاضية. بس عندي أكونت أكيد. خالد لسه بيفتح الفيس وشاف خبر على جوجل تحت صورة قصر فخم كبير. انفجار قصر والجثث أصبحت رماد. خالد.. شوفي كده! حورية.. فيه إيه؟ وخدت الفون وشافت الخبر. وبصت لخالد والاثنين ضحكوا مع بعض.

حورية.. قصر مين.. إنت تعرف حاجة عنه🙃. خالد.. ولا عمري شوفته! وبعد مرور شهرين. حورية باعت الأرض وفتحت حساب بيها في البنك وابتدت حالتهم المادية تتحسن. بعد ما استلمت شغل في شركة أدوية كبيرة. كانت بتشتغل وتدرس في نفس الوقت. أما خالد كان بيتكلم مع حورية كتير. ومع الوقت اعترف بإعجابه بيها وإنه حبها.

وفي يوم جديد. الدكتور اتصل ب حورية وقالها إن هشام اتكتبله عمر جديد بعد التحاليل الجديدة. السرطان انتهى وخرج من جسم هشام. وبقى يقدر يعيش حياته زي الأطفال. وطبعاً مع علاج بسيط ونظام غذائي صحي. حورية بفرحة اتصلت ب خالد. هشام خف.. السرطان خرج من جسمه. وطلبت منه يروح معاها المستشفى عشان يخرج معاهم. خالد كان معاها في كل لحظة وأي وقت. كان بيشاركها الحزن قبل الفرح. في المستشفى. هشام خارج. حورية بتلبسه الكاب.

هشام.. مش أنا خفيت خلاص وبكرة شعري يطلع. أنا مش هلبس الكاب ولا هخاف من كلمة أقرع. حورية حضنته وبدموع.. ربنا يتم شفاك على خير. ويشفي كل مريض على وجه الأرض. خالد.. أنا هعيط.. ودموعه نزلت. حورية بدموع.. أنا مطلقة يا خالد. وكنت خايفة أقولك. خالد.. طنط قالت ليه على كل حاجة. وبعدين تجربة فاشلة مبنية على الطمع. ذنبك إنتي إيه بقى يا حورية❤️. حورية.. أنا مش هتجوز غير لما أخلص دراستي. خالد.. نتخطب وهستناكي. المهم أكون جنبك ❤️.

هشام مسك إيد حورية وضمها في إيد خالد. مبرووووك❤️. ومشوا الطريق مع بعض بفرحة💖. وتمت قصتنا بحمد الله❤️.