رواية بنتين من الصعيد الفصل الخامس 5 - بقلم اسراء القاضي

شوفت في عنيها نظرة شماته غريبه. كنت اول مره اشوفها. حسيت عنيها بتطلع شرار وعايزه تولع فيا. بس ليه ده كله؟ انا عملتلها ايه؟ مفوقتش غير على صوت العمدة وإيد نور اللي ثبتت في ايدي وكأنها بطمنّي. العمدة بصوت عالي: قصدك ايه يابت انتي؟ ما تعقلي كلامك كده واعرفي بتقولي ايه.

صفية بغضب: قصدي اللي سمعتوه يابويا. الست هانم اللي عايزين تاخدوها لأخويا ناويّة تعلم بنات البلد وتخليهم زيها كده. هيا وصاحبتها رايحين جايين بحجة العلم، والله أعلم هما بيعملوا ايه من ورانا. لما بيطلعوا من البلد ما إحنا مش شايفين حاجة. شهقت وبصيتلها بصدمة. = انتي اخرسي خالص ومسمعش نفسك. صفية: مش هخرس يابلال لو مش مصدقني ف هيا وصاحبتها كانوا بيعلمونا عشية في الجامع واسألها. أهي قصادك ياخويا.

= أقسم بالله لو متخرستي خالص لأكون ضاربك قلم يربيكي. العمده بغضب: بلال خد اختك وامشوا من هنا. أنا ليا كلام تاني مع نور ومريم. في لحظة مالقتش حد معايا. مش عارفة إزاي وامتى بس لقيتني أنا وعمي لوحدينا. أنا عارفة إن عمي طيب بس في غضبه بيبقى جحيم. كنت بلعن نفسي مليون مرة إني صدقت صفية وأمنت لها. بس هي طلعت أقذر ما كنت أتخيل. نكدت عليا وبوظت فرحتي. بس أنا مش هستسلم برضو. جه الوقت إني أعمل اللي في دماغي.

_هتفضلي سرحانة وبتفكري كتير ولا إيه؟ = يا عمي أنا معملتش حاجة غلط. أنا فعلاً كنت ناويه أعلم سارة. ولما روحتلها الجامع لقيت صفية هناك. فقعدت معاهم أنا ونور وعلمناهم حاجات بسيطة. _صريحة انتي يادكتورة، مبتكدبيش ولا تحوري في كلامك. وده حاجة جميلة. بس انتي غلطي وغلطي قوي كمان. بيوجه عصايته ليها: أنا حذرتك قبل كده وقولتلك هتكملي تعليمك ومالكيش دعوة بباقي بنات البلد. وانتي عملتي إيه؟ خونتي الثقة والأمانة.

= يا عمي افهمني أرجوك. اللي بيحصل هنا في بلدنا ده ظلم وجريمة. تعليم البنت مش حرام ولا هو عيب. البنت تتعلم زي الولد بالظبط. مينفعش والله اللي بتعملوه ده. هتتحاسبوا عليه ياعمي. وأكتر حد هيتحاسب هو انت علشان إنت اللي بإيدك تغير التقاليد دي والعادات الظالمة اتجاه البنات. وكأنكم بتزلونا إننا اتولدنا بنات. أرجوك ياعمي أرجوك. اديني فرصة واحدة بس أحاول أسعد بيهم البنات دي وأعرف كل واحدة منهم إنها لازم تفتخر وترفع راسها بكونها بنت. أرجوك ياعمي خليني أوريهم إن البنت مكانها مش في المطبخ ولا بيت جوزها بس. واخليهم يعرفوا إننا قد أي حاجة وقد أي تحدي.

العمده بنظرة إعجاب لمريم بس خفاها بسرعة: إيه يادكتورة؟ العلام؟ خلي ليكي رأي وبقيتي تتكلمي وتعقلي الكلام. بس شكلك نسيتي إنك بنت أرياف. ولو علمتي البنات كلهم ساعتها هيتساووا بالرجالة وكل واحدة هتتكلم زيك كده وترفع صوتها على الراجل. طلبك م... وقبل ما يكمل كلامه كان بلال واقف لهم على الباب وهو بينهج من الجري وبينده على مريم وأبوه. = أبويا صفية تعبت قوي ومش عارفة مالها. عمالة تصرخ ببطنها ومش مبطلة عياط. العمده: مستني إيه؟

ماروحتش للحكيم ليه؟ يلا نروحله بسرعة. بلال بغضب: أنا اختي مش هتنكشف على راجل أبداً مهما يحصل. كل ده بيحصل ومريم ساكتة، بس مبسوطة من جواها إنهم ممكن يحتاجوا دكتور. ف مش هيكون غيرها. وساعتها هتثبت إنها بنت أرياف بس تقدر على أي حاجة. وإن ده شيء ما يعيبهاش في حاجة. الاتنين بصوا لمريم. والعمده قال: بصي يابنتي انتي عارفة إن مفيش دكتورة في البلد هنا غيرك دلوقتي. وأنا عارف إن صفية غلطت معاكي. بس مقدمناش حل غيرك.

= مفيش حاجة ياعمي. ده واجبي. بس يلا نروحله بسرعة علشان نشوفها. طلع العمده ووراه مريم وبلال. = سامحيني على اللي صفية عملته معاكي. _متتأسفش يابلال. اختك ساعدتني وقربت عليا المسافة. وهي فاكرة إنها ضرتني باللي عملته. = مش فاهمك. _مش مهم. اجري بقى خلينا نشوف اختك اللي طفشتني في حياتي دي. _ااااه ياني هموووت. الحقووني. _مالك يابتي؟ إيه اللي جرالك؟ متخفيش. أخوكي جايب الدكتورة مريم وجاي وراي أهو.

_مريم. مريم بت عمي. لاااااااع. _يوووه بقي ياصفية خليني أشوفك. _خلصينا بقالي ساعتين واقفة. _انتي هتقتليني صح؟ ضحكت مريم: لا مش هقتلك. أصل أنا مش زيك بطعن في الضهر. وانجزي بقى. وبعد ما مريم شافت صفية وكشفت عليها. مريم بصدمة: دي لازم تعمل عملية. بلال: عملية إيه؟ _الزايدة عندها ملتهبة جداً ولازم عملية. _هتعرفي تعمليها يامريم؟

= هو بصراحة ياعمي أنا مينفعش علشان لسه متخرجتش رسمي. لكن أنا أعرف واحدة صحبتي دكتورة برضو. هيا في البلد اللي جنبنا. وعندها إمكانيات وأدوات تقدر تعمل بيها العملية. ومتخافش أنا هدخل معاها مساعد. _طب يلا يابنتي مستنين إيه؟ قوم اختك يابلال ويلا يامريم نروح لها. (بعد العملية) طلعت مريم هيا والدكتورة صاحبتها. والكل جري عليهم. _ها يابنتي طمنّينا. بنتي كويسة مش كده؟

الدكتورة: صفية بخير وكويسة جداً. بس هتقعد معانا هنا يوم أو اتنين. وبعد كده تقدر تروح معاكم تاني. بس كل الشكر لمريم. عرفت تتصرف وحقيقي هتبقى دكتورة شاطرة جداً. يامريم. يلا بعد إذنكم. جات مريم كمان تمشي ورا الدكتورة. _احم استني يامريم يابنتي. ابتسمت مريم بانتصار وجواها صوت بيقول: وأخيييييرا هنقدر نحقق حِلمنا الحقيقي يانور.