رواية بنتين من الصعيد الفصل الثاني عشر 12 - بقلم اسراء القاضي

كنا متجمعين في جو أسري عظيم، لزمان معشتوش. القعدة كانت جميلة، واللي كنت مستغرباه تغير صفية معايا 180 درجة. معقول لمسة بسيطة تغيرها كده؟ كنت أنا وهي وحسان وزينب وحسن وبلال ومرات عمي وعمي وفارس، اللي بقي أغلب وقته عايش مع ليلي، بقت تلهيه عن حزن الدنيا، أو هي اللي بتتلهي بيه. قطع شرودي وتفكيري بلال وهو بيمسك إيدي وبيقولي: _حرمي المصون، سرحان في إيه؟ _أوعى تكوني سرحانة فيا. أتغر، الكل ضحك على طريقته.

_ماتبعتي للبشمهندسة يا بتي تيجي تقعد معانا بدل ما هي لوحدها أكده. _ياريت والله يا مرات عمي، بس أخوها جه النهاردة وهتقضي معاه معظم وقتها، فمش عارفة هتيجي ولا لأ. حسن بعصبية: _هي سامحته بالسهولة دي إزاي؟ تسامحه إزاي؟ بصتله بنص عين كده: _وأنت عرفت إزاي يا بشمهندس؟ _ها ها، لا أصل ده شي بديهي، هي كانت بتعيط الصبح ودلوقتي أنتِ بتقولي أخوها رجع.

محبتش أكتّر في الكلام معاه، لأن واضح الست نور هتعيش مغامرة وقصة لذيذة وأنا فرحانة فيها الصراحة. لاقيت بلال بيهمسله وبيقوله: _لا، وقعت يا بن عمتي. ضحكت على بلال وقمت ألعب مع ليلي وفارس. _رووح قلبي يختي، يناااس قمر يا لولة. بتحبيني أنا ولا بتحبي فارس؟ _بحب فااااس (فارس) ياااا لهوووي على اللدغة السكر دي. طب شوفي جبت إيه يا ليلي يا قمر. _ها، بتحبي مييين بقي؟ _أنا بحب ميييم (مريم) حبيبتي.

_يا جزززمة، طب وأنا مش أنا فارس حبيبك؟ بعتيني بمصاصة يا لولة؟ أخس عليكي. الكل ضحك عليهم وعلى ضحكت ليلي معاهم. _بعد إذنك يا عمي. _اتفضل يا حسان يا ولدي. _بعد إذن الدكتورة مريم طبعًا وبلال. أنا كنت عايز أعجل بالفرح بتاعي أنا وصفية. _لا طبعًا يا ولدي، مينفعش ميبقاش عمها مات، ونعمله فرح.

_يا عمي، بعد إذنك، بابا مكنش هيوافق ده يحصل لو عايش. وبعدين إحنا أصحاب الميتة وإحنا أصحاب الفرح، ومفيش حاجة هترجع اللي راح. بلاش نوقف حياة شخصين عشان حاجة مش هتحصل. _يا بتي مينفعش الناس تاكل وشنا عاد. _لا يا عمي، بعد إذنك، مالناش دعوة بالناس، أهم حاجة رأي صفية. صفية: _أنا بقول نستنى شوية يا حسان، على إيه السربعة عاد؟ _سربعة يا صفية؟ عشان عايز نتلم في بيت واحد. يبقى متسرع. أنتِ عتهربي مني ليه عاااد؟

لو مبقتيش رايداني يا بت عمي بلاها. بعد إذنك يا عمي أنا مروح بيتنا. _استني يا ولدي عاااد. معلش يا عمي. _قومي يبتي قومي، طيبي خاطر جوزك، قومي قاعدة ليه؟ _يا أما. _بلا أما بلا مش أما، قومي. حسان: _حسان. _نعم يا بت عمي. _مبتقولش بت عمي دي يا حسان غير وانت شايل مني. مال فين صفصف حبيبة قلبك عاد؟ _أنتِ اللي بتضطريني لكده. افهم إيه وأصل من تأخيرك ده كله؟

_يا حسان، مديك شايف اللي بيحصل وأنا لسه متوترة ومش حمل مسؤولية. وحياتي عندك وغلاوة صفصف عندك. _بتكسبي يا صفية دايماً بدلعك ده. _وه، مش جوزي عاد. يلا يلا بينا نرجع مكاننا، مفيش مشي غير لما نتعشى. (عند العمده) _بعد إذنك يا عمي. _اتكلمي يبتي. _أنا من بكرة هبتدي أعلم صفية وسارة وزينب، ونور هيساعدوني. _لسه يا مريم هتفكري في الموضوع ده؟ إحنا قفلناه وسكينا عليه عاد.

_لا يا عمي، بعد إذنك، إحنا سبناه لوقت يناسبه، لكن أنا منستوش خالص. _وأنا مش موافق يبت أخوي، هتفتحي الموال اللي اتقفل زمان، ول إيه؟ _موال إيه يا عمي؟ كل ما أكلم حضرتك تقولي كده، إيه اللي حصل زمان؟ _ها، محصلش حاجة. محصلش حاجة. _لا يا خال، حصل. _اسكت يا حسن. _يا خال حرام عليك اللي بيحصل ده، برغم إني كنت طفل عنده 12 سنة، إلا إني فاكر اللي حصل ساعة ما أمي اتوفت، وكنت أنا ومرات خالي سالم معاها في الأوضة.

_اسكت يا حسن عاااد. _بعد إذنك يا خالي، أنا ومريم محتاجين نفهم ونعرف. _أيوه يا عمي. _عجبك أكده يا ابن صفية؟ عجبك؟ هتفتح دفاتر كانت اتقفلت ليه عاااد؟ _أنا قايم وسيبالكوا. (عند فاطمه والأولاد) _صممي يا مريم، صممي يا بتي زي ما فهمتك. _ما أديكي شايفة يا مرات عمي، مش موافق إزاي. _مفيش حاجة بتيجي من أول مرة عاد. يبتي، أنتِ موقفك حلو معاكي زينب وحسن ونور وبلال وأخو نور، وكله بالاقتناع، يبتي.

_ربنا يقوينا على اللي جاي يا مرات عمي. _يارب يابتي. _بلال، بعد إذنك ممكن توصلني عند نور أطمن عليها ونرجع على طووول. حسن بإندفاع: _طب مانروح أنا وزينب معاكوا؟ يعني قصدى علشان نشوف البلد ونتمشى وكده. ضحكت أنا وبلال وبصينا لبعض وقولنا: ماشي، موافقين. روحنا، واللي استغربناه أول ما سامح فتح، كان هو وحسن بيسلموا على بعض جامد. _إيه ده؟ أبو علي! _سامح! _إيه؟ بتعمل إيه هنا؟ _أنت اللي بتعمل إيه؟

_أنا جاي زيارة لبيت خالي العمده. _وأنا نزلت أقعد مع نور أختي. فجأة ملامح حسن اتغيرت وبان عليه العصبية، وبعدها لانت، وكأنه افتكر حاجة. بلال: _مش تعرفونا عاد يا جماعة، تعرفوا بعد منين؟ _أنا والبشمهندس حسن بنشتغل مع بعض في شركة واحدة في السعودية. _إزيك يا دكتورة زينب؟ زينب وشها قلب ألوان. _الحمد لله يا بشمهندس، إزيك؟ بلال همسلي: _ده واضح هتحلو وهتيجي في صف حسن.

ضحكت وسلمت على نور وحكتلي اللي حصل بينهم، وعرفتها بزينب وحسن. _وأنتِ دخلتي هندسة ليه يا بشمهندسة نور؟ هواية ولا إيه؟ _الحقيقة أنا نفسي أطلع زي سامح في كل حاجة، هو قدوتي. مريم بتهمسلها: _اللي يشوف الصبح لسه فاكر ليه اخت، لسه فاكر مش عارفة إيه، أنا بكرهه، أنا بكرهه. _أخويا ومحبش قده، اطلعي منها. _ماشي يا كلب البحر، بس اللي ميجيش يشتكيلي بعد كده. _بصوا يا جماعة. _اتفضلي يا مريم.

_بما إننا متجمعين، فأنا حابة إننا نتفق عشان نحاول نقنع عمي ونمحي فكرة عدم تعليم البنات من دماغه. والكُترة تغلب الشجاعة، ول إيه؟ الكل: _معاكي حق. _طب إيه رأيكوا نبدأ من بكرة تاني؟ نور: _أنا أساسًا الفترة اللي فاتت كنت مع سارة وتقريبًا خلصنا الحروف، وهي ماشاء الله بتتعلم بسرعة. _سارة بالنسبالها عادي علشان هي بتتعلم لوحدها فمحدش ملاحظ، بس أنتِ مش هينفع تبدأي يا مريم. _ليه يا حسن؟ ليه مش هينفع؟ بس.

_لازم القديم يتفتح يا مريم الأول. لو القديم اتفتح خالي هيلين، وهو من جواه مش معترض بس بيكابر. _وإيه القديم يا حسن؟ _للأسف، كل حاجة ليها وقتها يا مريم، مش هينفع أنا اللي أتكلم. لازم خالي اللي يتكلم. بس مبدئيًا، كلنا هنغير عادات بلد بحالها. نقرأ الفاتحة على كده. يتبع...