رواية بريئة غيرت حياتي الفصل السابع 7 - بقلم مارينا عبود

ريان قام مفزوع وبصلها بغضب وعصبية: -أنتِ مجنونة إيه اللي أنتِ عملتيه ده؟ نازلي بصتله ببراءة وابتسمت: -حضرتك جبتني البيت ده والمفروض إنك مسئول عني، علشان كده قوم يا شاطر وهاتلي هدومي. اخد نفس عميق كمحاولة إنه يسيطر على غضبه: -تقومى تعملي كده وتغرقيني بالميه، أنتِ مفيش عقل خالص يا نازلي. نازلي بهدوء: -دي لسه البداية، بس بعدين حضرتك من النهارده لازم تقوم بدري، مينفعش تقوم الظهر، سيادتك عندك شغل. اتعصب وبصلها:

-طيب اطلعى بره أوضتي وسبيني أنام، علشان لو قمت دلوقتي هفتح دماغك، ومش بهزر. نازلي اتنهدت وشدت البطانية من عليه وشدته قومته من على السرير: -طيب يا جميل قوم غير هدومك الأول وبعدين نشوف موضوع النوم ده، يلاه بسرررعة مفيش وقت. ريان كان بيبصلها بدهشة، والأغرب إنه كان مستسلم تماماً ومش قادر يعمل حاجة. اخد نفس وبصلها بغضب: -طيب ممكن تتفضلي تطلعي دلوقتي وأنا هغير هدومي وأنزل وراك. نازلي بابتسامة: -أوك، هستناك متتأخرش.

طلعت وهو فضل واقف متنح ومستغرب من تصرفاتها. -هي بتتحول ولا إيه؟ بص على نفسه وعلى هدومه اللي غرقت ميه واتنهد بغضب. قرب من دولابه واخد هدوم ودخل الحمام يغير. *** -صباح الخير يا جدو أبو العيون الزرق. منير بصلها وضحك على الاسم: -صباح النور يا بنتي، تعالي يلاه افطري. -إيه ده، إحنا عندنا ضيوف ولا إيه؟ -مين دي يا جدو؟ منير بهدوء: -دي نازلي يا يزن، خطيبة ريان. يزن كان بيشرب، أول ما جده قال كده شرق وفضل يكح.

وفاء والدة ريان قامت وفضلت تمشي إيديها على ظهره بخوف وهي ماسكة بإيدها كوباية الميه: -ألف سلامة عليك يا ابني، خد اشرب. يزن ابتسم واخد منها الكوباية: -متقلقيش يا عمتي، أنا كويس. يزن بص لجده وضحك: -جدو، أنت بتهزر معايا على الصبح؟ ريان مين ده اللي خطب؟ منير بهدوء: -ولد عمك يا غبي، عندنا كام ريان في بالبيت يعني. يزن بضحك: -ريان ابن عمي خطب من ورااانا، جدو أنت بتتكلم بجد؟ الجد بيأس:

-أيوه يا ابني، اومال بهزر معاك، دي نازلي خطيبة ريان، وفرحهم هيبقى نهاية الأسبوع ده. يزن وقف متنح لثواني ورجع يضحك: -جدو ده مستحيل، ريان مش بيكره في حياته قد الجواز، وبعدين ده كل يوم مع واحدة جديدة، تقولي هيتجوز؟ ياعم بلاش هزار ده، لو سمعك وأنت بتقول الكلام ده كان زمانه قلب الدنيا. نازلي بغيظ: -يعني أنا مش مالية عينك يعني، ولا أنت مسمعتش جدو كويس؟ يزن بصلها وضحك:

-لا يا قمر، أنا أقدر أقول كده، بس أنا بتكلم بجد، يعني ريان أكيد بيضحك عليكِ، أو في حاجة غلط في الموضوع. ريان نزل ومسك يزن من لياقة قميصه: -كنت بتقول إيه علشان مسمعتش كويس؟ يزن بصدمة: -ينهار أسود، جدو الحق، ريان قام بدري، دي معجزة. الجد منير بص لنازلي اللي ابتسمت، ورجع بص لريان: -الظاهر إنه ريان هيبدأ يتغير بالتدريج. ريان بص لنازلي بغضب:

-لا يا جدو، أنت فاهم غلط، أنا صاحي بدري علشان عندي مشوار مهم لازم أعمله، مش أكتر، ريان دويدار محدش يقدر يغيره. يزن بضحك: -ريان، هو أنت بجد هتتجوز زي ما جدو بيقول، ولا جدو بيهزر؟ ريان بضيق: -لا مش بيهزر. يزن بهمس: -طيب زي الشاطر كده، تحكيلي كل حاجة بالتفاصيل. ريان بص لنازلي بغيظ: -بعدين هفهمك كل حاجة، دلوقتي اقعد افطر، واطلع على الشركة، وأنا هاجي وراك، وكمان قول لبدر وعمرو يستنوني علشان في موضوع مهم عاوزكم فيه.

يزن بتفهم: -أوك. منير بهدوء: -تعال يا ريان علشان تفطر. ريان بهدوء: -لا يا جدو، مش عاوز. بص لنازلي وتابع: -قومي يا نازلي علشان هاخدك مشوار. نازلي هزت رأسها بهدوء وسلمت على منير، وريان أخدها وطلع. يزن بهمس: -أكيد في حاجة غلط، أنا لازم أكلم بدر وأقوله. ريان أول ما طلع قرب من نازلي ووو....