رواية بسمة مدفونة في خيالي الفصل الثامن 8 - بقلم ضاقت أنفاسي

جواد بغضب :الله أعلم ولدك الكلب وش قال لها حتى عملت كذا !
وبغضب ناظر نايف وهو يرفع يده يشبر فيها : قلت لك ابعد عن البنت خير شر !
انت ما تفهم
نايف بقهرمنه نطق : الحين تبيع أخوك علشان حثاله ما عرفتها إلا البارحه ويا ليت معترفه فيك !
ابو جواد بغضب من جواد أشر على نايف : هذا عمها لو كسر رأسها ما يطلع لها ترفع بوجهه المشرط اي بنت جايب لنا يا جواد ..الله يلعنك يا جازي ويلعن ما جبتي !
كله بسببها !
وانت يا جواد ما يطلع لك تحاسب أخوك كذا تفهم !
تراه ما عاد أبو الطعش إلي تزفه وتضربه تراه قريب يصك الأربعين والكلبه ذيك دواها عندي!
من باكر أبغى اشوفها مغروسه قدامي !
جواد انتفخ وجهه : يبه الحين حطيت عليها الحق وتغاضيت عن نايف !
ابو جواد بغضب أعلى وهو يناظر حوله : انت يا راكان متعلم يا محامي تكلم يصير ترفع المشرط بوجه عمها ؟!
انت يا ليث يا حضرة الضابط !
قولي فهمني يمكن أنا ما أفهم
وانت يا حضرة الدكتور تكلم فهم ولد عمك يمكن يفهم منكم !!
زياد وهو يناظر عمه بهدوء : اي بنت ما يصير ترفع صوتها على عمها من باب الإحترام والتقدير للأب فما بالك بمشرط ؟!
لكن رونق تختلف لأنها أصلا ما هي معترفه فيكم !
يعني هي ما تشوف نايف عم لها ...نايف بنظرها رجال دمر حياتها فما استغرب تصرفها تجاه نايف
ابو جواد ما عجبه الكلام : الحين هذا إلي تعلمته !
وإلا لأنها طالبه عندك ترقع عنها !
لكن علم يوصلكم ويوصلها والله ما تكمل جامعه وإلا تجلس بالبيت مثل البهيمه !
زياد عقد حواجبه ما عجبه الكلام: ليه وش فيه تخصصها يا عمي !
لما تمرض وحده من محارمك على طول تطلب دكتوره وين هالدكتوره إذا انت وذاك رفض
ابنته تدرس هالتخصص !
نايف باتهام لزياد: ليكون الاخ مضبط وضعه جالس تدافع عنها !
راكان بغضب رفع يده بتهديد: وقسم بالله كلمه وحده أهفك بهذا الكرسي !
هذا الكلام ما ينقال لزياد !
هذا الكلام ينقال لأشكالك حتى محارمك ما خلصوا من شرك !
وذيك ابنة اخوك ما دخلت العشرين ومطلقه من عمها !
بس خبرني مين رح يقبل فيها بعد عملتك ؟!
ما في غير إلا مطلق أو أرمل أو عجوز على حفة قبره !
ما هو زياد إلي يركض خلف فضلتك !
زياد ما يتزوج إلا بنت معروفه تربيتها واخلاقها ما هي مم مركز لمركز وفوق هذا ما يتزوج الا عزباء
تفهم !
أعطاه نظره ناريه وطلع !
جواد حس كأنه أحد شطره نصفين لقوة كلام راكان عن ابنته ما أحد يقبل فيها إلا مطلق وإلا أرمل وإلا
عض على شفته من القهر إلي بداخله
يحس ما هو قادر يبلع ريقه إذا عيال عمه يقولون ع ابنته كذا وش ينتظر من الغريب !
سبحان الله تدور الايام نفسها ليتجرع نفس الكأس إلي شربه وليد لما ناظر الجازي باحتقار وهو يردد مين رح يقبل فيها إلا أرمل وإلا مطلق !
ناظر نايف بكل حقد العالم : ليه يا نايف ؟! ليييييه !
ابو جواد ناظر نايف : حدك يا نايف عيال عمك !
يكفي ما نواجه شيء إلا نلقاهم يمنا يدهم بيدنا !
زياد يناظر بهدوء ما علق على كلام راكان !
ليث زفر بضيق : المفروض قبل ما تسعون وترجعونها لكم يكون في حل لاشتباكها مع عمي نايف إما عمي نايف يطلع من البيت أو عمي جواد يطلع من البيت ويسكن في بيت مستقل مع عياله
ابو جواد بحزم: والله ما احد منهم يطلع من عندي
زياد تكتف ما عجبه الكلام: ترى كلامك يا عمي ابدا ما هو منطقي كيف تقبل إنهم يعيشون في بيت واحد
إما ابوها بيستقل في بيت لوحده أو تسكن عند جدتي أم ناصر تراها تعبانه وبحاجه احد يجلس عندها!
جواد برفض قاطع : كيف تجلس وانتم بنفس البيت
ليث بمقاطعة: ترى بيت جدتي مفصول عن بيت عمي ناصر !
ابو جواد مط شفته بسخريه: ليه ما بقى إلا هالملعونه أحطها عند امي حتى تجيب اجلها
جوادبقهر : يبه تراها ابنتي وما ارضى عليها وما نقدر نحاسبها على شيء هي ما لها يد فيه !،
ابو جواد زفر بضجر: أنا هذه البنت ما ارتاح لها والحين تلقاها ملتصقه بوليد تأخذ منه دروس
نايف زفر بضيق ..كلما يتذكر انه متزوج ابنة اخوه يشعر بالجنون ويزيد كرهه لرونق وابنتها !
زياد تكتف بهدوء: المفروض تكونوا اكثر مرونه بالتعامل مع الأمور وعلى وضعكم هذا على جثتي ما ترجع البنت لكم!
اول شيء وقبل كل شيء لازم تتقبلوها كحفيده مثلها مثل مريم وتنسون سالفه نايف ولا كأنها صارت !
وشرعا ما عليها ولا على نايف اثم !
هذا قدر من ربنا ...نصيب هالبنت تيجي على هالدنيا !
كل شيء أقدار مكتوبه من عند ربنا !
متى تفهمتم هالنقطه رح ترجع رونق لكم ....لكن بالبدايه رح تسكن عند جدتي خلي هالنفوس تهدأ ونتجاوز هالعقبه !
ابو جواد صد بوجهه وما نطق بحرف واحد!،
ليث بتأييد: كلامك عين الصحيح
جواد تأفف : يصير خير يصير خير!
*•
**
**
**
وليد وعيونه على الطريق : هذه قصه أمك من لما خطبها أبوك الى يومنا هذا !!
قبل ما تقولين حرف انت أم تصوري نفسك مكانها ويأخذون قدر منك !
كيف رح يكون حالك كيف رح تعيشين حياتك !
وفوق هذا يخلون قدر تكرهك وما تتقبلك !
أعطيني وش رح يكون موقفك !
امك عانت لفقدكم أتمنى إنك ما تكسريها مثل مريم !
انا ما تكلمت حتى اسمع منك لكن ابغى تكونين على إطلاع على الماضي ويكون عندك معلومات عن هالشخصيات !
ويكون بعلمك من المؤكد رح يعاملونك زين لأنك منهم وفيهم بخلاف الجازي اعتبروها غريبه !،
وحطوا المر بحلقها !
والحين اي بيت من البيوت بيتكم
سكتت للحظات وبعدها تنحنحت حتى تطلع صوتها لأنها طول الوقت صامته : من هذا الاتجاه
كتمت نفسها للحظات وبعدها أخذت نفس طويل وهي تحس قلبها يدق طبول لملاقاة جدتها مروان !
قفلت سيرة الماضي إلي سرده وليد لأنها الحين رح تشوف أخوها وجدتها هم حياتها والدنيا بدونهم ما تسوى !
اول ما وصلوا البيت طلبت منه يتوقف عند الباب: تفضل
وليد بهدوء: وش مصلحتي من الدخول انت اجلسي مع اهلك وطمني قلبك عليهم !
ناظرته بامتنان لأنها فعلا محتاجه جدتها : مشكور يا جدي!
هز رأسه بابتسامة تدخل لأعماقك الراحه ! توجهت للداخل وهي متلهفه لشوفتهم
**
**
**
***
فياض هز كتوفه بعد ما استلقى على كنبه: والله ذاك أبوك اسأليه وين راح فيها؟!
ام فياض بتحليل: يمكن اخذها لمطعم او شيء تغير جوها وقسم بالله انه شوفتها تجيب الاكتئاب
الجازي ناظرت عمتها بزعل ...ام فياض باستدراك: ما هو قصدي شيء بس لازم تطلع البنت من هالاكتئاب الي فيها
حنين بهدوء؛ وليه ما يرد على جواله !
الجازي بحنق: نفسي ادخل عقل أبوي واعرف كيف يفكر !
بندر دخل عليهم وهو يدندن : سلااام
حنين عفست ملامحها : متى أشوفك انسان عاقل تراك مب صغير !
ترى أبوك طق كبده منك !
بندر بضجر : اووووووو وبعدين !
أنا وش فيني ؟!
هذا انتم خطبتم لي وما فتحت حلقي!
الجازي رفعت حاحب: لا والله اعترض !
ناظرها بازدراء: انت خليك ببناتك كل يوم طالعه لك بنت !
حنين بتحذير : وازن كلامك يا بندر!
بندر انتبه على فياض إلي متمدد : انا وش قلت !
اقترب وجلس مقابل فياض:هلا والله بحضرة المدير ! اقول البيت منور !
فياض خزه بعيونه: يعني لو الحي كله ينور بوجودي ما رح تأخذ اجازه ولو لساعه !
بندر بانتكاسه: لااااا اهون عليك أنا أخو المدام
الجازي وهي تجلس جنبه : وعلشاني ما تعطيه اجازه يا ليت تعطونه ساعات اضافيه !-
بندر فتح فمه. بصدمه : شريره أنا أخوك مب عدوك !
فياض بابتسامه: لا توصي حريص
بندر انتفخ وجهه بقهر ...التفت لأمه وهو يهم بالخروج : ترى زوجك لمحته عند محطة البنزين ومعه حرمه ان ما خاب ظني إنه متزوج عليك
فياض باهتمام: وما عرفت وين راح ؟!
هز كتوفه بلا مبالاه : ما أعرف !
الجازي بقهر منه : طيب ما سألته ؟!
ضحك بندر من قلبه : هههههههه ومين قالك اني اقتربت أنا لمحته من هنا وخلال ثواني اختفيت من المنطقه كلها أنا مب ناقصني تحقيق،
رفعت أصابع يدها بقهر : انا لو خرمشت وجههك بأظافري ما أحد يلومني !

*
**
**
ام مرعي بضيق : والله يا ابنتي ما وصلنا إلا وجع الراس تحقيقات وكأننا مجرمين !
للحين مب مصدق كيف انت مب حفيدتي
رونق بصوت مخنوق: أنا حفيدتك انت وغصب عنهم كلهم !
انا ما أبغى أهل إلا انتم !
خلاص رح أترك الدراسه وأعيش هنا ما لي احد غيركم
ام مرعي برجاء : دخيلك يا رونق لو يطلع بيدي ما فارقتيني لكن كافي مشاكل لعمك مرعي تراه ما له قوة حتى يواجه اهلك !
ارضي بقدرك !
دام إنهم أهلك ليه كارهيتهم كذا!
وسالفه نايف لاتخليها تؤثرعليك وتتصرفي بالغلط ذول أمك وأبوك ومطلوب منك تبريهم !
هذ أمر ربي!
تحاشي وجود نايف وان التقيتي فيه أعطيه ظهرك وكأنك ما شفتيه !
ما تسمعين الحقران يقطع المصران !
خليك قويه مثل ما ربيتك !
زفرت بضيق :احاول
مروان : تزوجي احد من هنا وقتهاما رح يقدر يتحكم فيك ء
ابتسمت بسخريه رونق : هذا الشيء مستحيل اكرره !
تجربتي الفاشله اعطتني درس ما رح انساه ولا تنسى أخاف ان تزوجت قدر يسحبونها مني!
وقتها ما رح امسك نفسي رح اذبحهم واشرب من دمهم
ام مرعي بهدوء : لا يا أمي مثل ما علمتك تصرفي بحكمه وعقل ولا تنجرين لعواطفك !
واترك سوالف هالخبل هذا !
ابتسمت بالرغم من ضيقها : وأحلى خبل !
كيف دراستك يا مروان !
هز رأسه بهدوء: الحمد لله!
رونق بتذكر سحبت اذنه : جوالك ليه مقفل؟!
أنا بالي منشغل عليكم وظروفي ما تسمح كل يوم عندكم أكون ..اذا لي خاطر عندكم لا تقفله ابغى يرتاح قلبي لسماع صوتكم !
ام مرعي بهدوء: مامعه شاحن للجوال
رونق فتحت شنطتها : خذ هذا شاحني أنا أدبر عمري بالله لا تقفل جوالك .....انت ما تعرف كم قلبي يشتاق لكم !
مروان بتساؤل : شفتي توأمك !
هزت رأسها بقلب ميت : ما لي نفس اشوف احد منهم !
ام مرعي زمت شفتها بضيق: لازم تتأقلمين
قاطعتها بروح ميته: ما أقدر ما أقدر احس جمره هنا بقلبي مب قابله تنطفي!،
انا إلي شفته بحياتي صعب صعب اتحمله!
احس روحي بأي وقت رح ترجع لباريها!،
ما يكسرني إلا قدر ....قدر يمه أنا دمرتها ودمرت مستقبلها !
كيف تعيش وتواجه إلي حولها!
قلبي ينذبح الف مره على حالها!
اتمنى اختفي من الوجود أنا وقدر للأبد !
قاطعتها ام مرعي: تعوذي من الشيطان هذا كله منه ...لازم ترضين بقدرك وتقولين الحمد لله !
رددت رونق بهمس: الحمد لله الحمد لله !
المهم الحين انتم تكونون بخير ورح افتح حساب بالبنك وكلما قدرت رح أرسل لكم فلوس
وقبل ما تعترض جدتها نطقت بغصه: ربيتيني أنا وقدر على الأقل تعبير عن شكري وامتناني ومع إنه قليل..جدتي انا احبك قطعت كلامها وهي تنحب بوجع من الم الفرقه ما تدري متى ترجع وتشوفهم !
مسحت دموعها بخفه: مروان اذا لي خاطر عندك كمل دراستك ورح نكمل احلامنا ونجلس مع بعض للحين كلامي ما غيرته !،
انت اخوي ومستحيل ابدلك بالعالم كله !
مروان باختناق لفراق رونق بس ما يظهر ضيقه من فراق روحه ..رونق كانت بحياته كل شيء !
من لما وعي على الدنيا وهي مرافقيته على الحلوة والمره..ضحكوا مع بعض وزعلوا مع بعض ...تشاركوا كل هموم الدنيا مع بعض والحين الدنيا تفرقهم بلحظه يبعدون ...يااااااه من قسوة الدنيا !
ما في كلمه وحده توصف روحه لانهم كانوا روح بجسدين
**
**
**
**
زفرت بضيق قبل ما تطرق الباب ..اليوم الاربعاء ...متى تخلص من الامتحانات
وصلها صوته بعد ما طرقت الباب ..دخلت بهدوء : السلام عليكم
رد وهو يناظر اللاب : تفضلي رونق
تكلمت بهدوء عكس الضيق إلي متلبس روحها: دكتور بالنسبه للامتحان
هز رأسه بمقاطعه: تفضلي الحين اعطيك ورقة الامتحان !
جلست وهي تكتم أنفاسها حتى ما يسمعها ليه خايفه من الامتحان كذا !
زفرت بهدوء ورفعت نظرها لما مد لها ورقه الامتحان بدون ما يطالعها : خذي معك نص ساعه
اخذت الورقه وهي تناظر الاسئله ومعقده حواجبها ...وش هالاسئله هذه؟!
والعبره خانقيتها،
تكلم بنبره مهنيه:بدأ الوقت إذا عندك أي سؤال عن الاسئلة اسألي الحين !
عضت على شفتها السفلية بضيق وهي تحس نفسها رح تبكي من صعوبة الأسئلة ! يبغى لها وقت ...هزت رأسها بالنفي ما عندها اسئلة
غمضت عيونها وهي تردد «ومن يتق الله يجعل له مخرجا ويرزقه من حيث لا يحتسب ومن يتوكل على الله فهو حسبه ان الله بالغ امره قد جعل الله لكل شيء قدرا »
سمت بالله وبدات تحل بالاسئله وهي مستغربه ليه كل الناس ضدها ويصعبون الأمر عليها !،
حتى أسئلة الامتحان صعبوها عليها !
مر الوقت وهي تكتب بسرعه تحاول تكتب كل شيء تتذكره ....اسئله دقيقه وتحتاج تركيز.... رفعت رأسها بصدمة لما نطق : انتهى الوقت !
تحس الوقت مر بسرعة ....بلعت ريقها ومدت له بالورقه بدون اعتراض ... وبداخلها قهر ... الحين يظن انها تجلس ترتجيه يمدد الوقت ..مستحيل تذل نفسها لأجل علامه !
زياد بهدوء تكلم لأنه وضع لها علامتها مسبقا والامتحان مجرد شكليات .. لأنه متأكد رح تفلل بالامتحان...عبقريتها عجيبه: كيف الأسئله؟
ردت بهدوء: عادي
أخذت أغراضها ووقفت وهي تهم بالخروج وقفت لما تكلم : مب ناويه تزورين أهلك ؟!
ردت وهي رافعة حاجب بثقه: البارحه زرت أهلي مع جدي وليد !
رفع حاجب باستغراب وهو يناظرها : بس ما سمعت إنك زرتيهم !
ردت وهي تمشي خطوة : مب ضروري
تكلم بهدوء :صدقيني أنا أبغى مصلحتك البنت ما لها الا بيت أهلها !
لا تربطين علاقة أمك بأبوك الفاشلة بحياتك ..يمكن شكت أمك لك عن علاقتها بأبوك السيئة بس هذا الشيء المفروص ما يؤثر على علاقتك بجواد هذه أختك مريم عايشه عند أبوها ومبسوطه معه ...انت وش مشكلتك بالضبط مع جواد يمكن أقدر أساعدك !
مطت شفتها بسخريه يساعدها بعد ما تدمرت حياتها: لا تربطني بمريم لأني اختلف عنها 360 درجه إذا هي رضيت بحياة العبوديه عندكم أنا ما أرضى هالحياه ابدا !
حياة التخلف والرجعية الي تعيشونها ما تناسبني ابدا !
هذه المشكلة باختصار !
أعطته نظره قويه واثقه وتركته وغادرت وهي تمشي بخطوات ومن داخلها ضياع ...تتظاهر بالقوةومن داخلها ضعف وتشتت ....عندها رغبة كبيره للبكاء ....طلعت جوالها إلي يرن ...رقم أمها ...ما لها نفس تكلم احد الحين الضيق إلي يتصاعد بداخلها مانعها من التنفس بشكل طبيعي !.... اليوم ملكة بندر ما لها نفس تحضر !
للحين تشعر بارهاق وتعب لكن اخف من قبل ...طلعت من الكليه وهي تمشي بدون هدف ...بداخلها ضياع شتات وحزن ما هي قادره تتقبل وضعها !،
جلست على احدالمقاعد وهي تتذكركلام وليد ..تحس أمها فعلا عانت لغيابهم وما تنكر شافت هذا الشيء بعينها لأنها متأكدة نفس الحرمه إلي التقت فيها عند الرصيف بعد ما انطردت من الشغل هي نفسها !،
هي تقدر مشاعرها ومستحيل تجرحها لكن من داخلها ما هي متقبله إنها أمها ما هي متقبله احد من إلي حولها !
زفرت بضيق من هالحياه .....
أهل أبوها عندهم قسوة مب طبيعيه كيف عاملوا أمها كذا !
لما تجلس تستذكر كلام وليد عن حياة الجازي تستغرب من تصرفات الآباء يدوسون على مشاعر بناتهم بسبب عادات وتقاليد سخيفه !
كيف سكت لهم ؟!
لو كانت مكانه كان مستحيل تسمح لأحد يهين ابنتها بحرف كيف يضربها ؟!
الي يزعل ابنتها بنظره وحده مستعده تذبحه وتشرب من دمه !
زفرت بقرف من عادات تقيدنا ...تستنزف كل طاقات التحمل عندنا مقابل ولا شيء
اكثر شيء قاهرها لما تفكر بالسالفه «مريم»
كرهتها من قبل ' ما تشوفها !
يا قساوة قلبها كيف تعمل كذا بأمها ؟!
من صغرها تعرف أمها الحقيقية وتجحدها وترفضها!
ما ررح تسكت على هذه المهزله ورح تخلي مريم تندم على تصرفاتها مع الجازي كذا !
قطع حبل أفكارها وعد وهي تجلس جنبها بضحكه : الحلوة البريئة وش عندها سرحانه ؟!
عفست ملامحها رونق وسألت باستغراب: انت عندك دوام ؟!
وعد بضحكه مرتفعه : حلوة ذي !
ليه أحد قالك ما ندخل الجامعه إلا للدوام او الامتحانات :!
عدلي معلوماتك ترى حنا بأي وقت يطخ برأسي أنا وشلتي نطلع للجامعة نغير جو !
المهم جيتك بسالفه مهمه جدا !
ناظرتها رونق بملل : ترى إذا سالفه تافهة مثل س
قاطعتها وعد بحماس : سالفه طازج!
تعرفيني أحب الخير واحب اجمع القلوب !
الحين فارس إلي يدرس معنا بالكليه تعرفينه
رونق بقلة صبر : يا ربي قلت لك أنا ما أعرف أحد
وما عندي خرابيطك
وعد مطت شفتها : ادري بك يالمعقده!
المهم الحين فارس حسب الأخبار إلي وصلتني يبغى عنوانك حتى يخطبك
قاطعتها رونق وهي رافعه حاجب باستغراب يخطبني ؟!
وانت وش عرفك بالسالفه
ردت وعد بابتسامه عريضه : تراه يكون صديق مح
قاطعتها رونق وهي توقف لما اشرت وعد على فارس واقف مقابل لهم بس بعيد وما يسمع كلامهم : كلامك هذا كله اذا فتحتيه مره ثانيه معي ما رح يعجبك تصرفي !
تركتها وغادرت بخطوات هاديه لخارج الجامعه ما لها خلق تشوف هالوعد كل حياتها هالسوالف يصيبها غثيان من كلامها !
مطت شفتها بسخريه «يخطبها » يمكن بعد الزواج تكتشف إنه خالها والله حاله !
**
**
**
**
تمشي مع صديقتها بالممر بحرص وهي تناظر مكتبه وبهمس: مكتبه مفتوح اكيد انه موجود
صفاء بضجر : وش تبغي فيه !
وعد بحقد : انا اراويه خايف على ابنة عمه مني !
حضرته يهدد فيني !
ماتحسين بشعوري وأنا اشوفه يسحب منها علبة البيبسي ويرميها بالزباله الظاهر إنه متوقع اني حاط لها حبوب أو أي شيء ...قهرني
صفاء هزت رأسها وبصراحه نطقت : هو ما ينلام لأنه بصراحه تاريخ أهلك
قاطعتها وعد وهي تمشي:اقول امشي بلا تاريخ صايره مؤرخه !
ناظرت صديقتها وابتسمت بخبث وبعدها تكلمت بصوتها المرتفع كالعادهلما اقتربت من المكتب : والله انك نهفه هههههههههه
صحيح نسيت اقولك توقعي رونق مين يحبها
_ مين !
لما اقتربت من مكتبه نطقت : فارس إلي بالدفعة الي قبلنا يحب رونق وتعرفيني احب الخير والحين اعمل حتى يتواصلون مع بعض اليوم خبرتها بهذا الخبر
صفاء ابتسمت بعد ما تجاوزوا مكتبه ::وش قالت لك ؟
وعد بابتسامه خبيثه غمزت لها : نسيت اعطيها رقمه لما ارجع للبيت اتصل فيها وأعطيها الرقم ......مسكين ذايب بهواها ..
جالس بمكتبه وصوتها العالي يوصل له ..يميز صوتها الجوكر بالنسبة له... متأكد إنها تتكلم كذا حتى تقهره ...!
ترك القلم من يده وبداخله غيض من هالإنسانه لازم تبعد عن رونق بأي وسيلة !
رفع حاجب بتذكر لاسم الشاب إلي ذكرته «فارس» يمكن يعرفه بالشكل ما يستحضر صورته الحين !
تنهد رونق يعتبرها مثل اخواته وما يبغى وعد تجذب لها المصائب ..رونق قويه مب ناقصها صديقه سيئه تزيد من الطين بله !
مط شفته بسخرية وهو يردد كلامها بعقله «التخلف » حنا متخلفين؟!
الأهل يحافظوا على بناتهم ويخافون عليهم من النسمة يصيرون متخلفين ورجعيين ؟!
ما يعرف وش الصورة إلي نقلت لها عنهم !
كل إلي يهمه الحين ترجع البنت لأهلها والأهم تكمل دراستها بالطب ....مثل هذه البنت وعبقريتها حرام يضيع كذا بالهواء ...المستشفيات بحاجه لطلاب بهذا الذكاء ما رح يضيع مستقبل رونق رح تكمل غص غصب عن الكل !

**
•*
**
يوم خطوبة مريم
الجازي برفض وبداخلها غصه : ما رح احضر الملكه ...مجرد اتصال استخسرت تخبرني!
مين أولى أنا وإلا زوجه أبوها!
خلاص يمه والي يسلمك لاتضغطين علي تراني
سكتت الجازي لما انقطع صوتها بشهقه تحكي حزنها وجرحها من ضناها !
ام فياض بترقيع: ما تعرفين ظروف البنت !
الجازي برفض قوي وهي تمسح دموعها: قلت لا يعني لا
حنين ناظرت رونق إلي بيدها كتاب مطالعه تطالع وكأنها لوحدها بالمكان : وانت بعد ما رح تحضرين ملكة اختك ؟!،
ام فياض بانتقاد : هذه ملكة خالها ما حضرتها تبغينها تروح تحضر ملكة مريم !
الجازي بغصه : يا عمه تبغين تروحين هذا الطريق الله معك !
انا مب رايحه !
رونق قفلت الكتاب بهدوء..ناظرت الجازي تمسح دموعها بصمت ... وبصوت أمر واثق: رح تحضرين !
الجازي فتحت عيونها بصدمه والدموع ما زالت تنسكب من عيونها :-سكت دهرا و نطق كفرا
انا ما
رونق بنفس الهدوء: رح تحضرين وأنا معك
حنين ناظرت ام فياض باستغراب!
الجازي سكتت للحظات وبعدها نطقت : تبغين انذبح وانا
قاطعتها ببرود: ما رح تنذبحين ما بقى وقت أنا طالعه اتجهز وانت اسبقيني وجهزي نفسك !
الجازي برفض : ما رح اروح
رونق بثقه : رح تروحين صدقيني ما رح تندمين !
هذا أول طلب اطلبه منك وترفضين؟!
يلااا ما بقى وقت !
الجازي بضيق مجبره ماتبغى تكسر بخاطرها وتقول لها لا: نشوف اخرتها معك !
ام فياض فاتحه فمها وهي تشوفها تكلم الجازي وكأنها ابنتها والغريب إنها الجازي طلعت تتجهز !
حنين زفرت بهدوء بعد خروج رونق : رح تجلطني هذه البنت ببرودها !
ام فياض: أشك إذا عندها مشاعر !
لكن الأهم إنها قدرت لابنتك العنيده !
**
**
**
بالصالة واقفه رونق تناظر حولها بعد ما سألت حنين عن الشخصيات الموجوده..بعدها رجعت نظرها على
الجازي وأوجعها قلبها وهي واقفه تشوف الكل قريب من ابنتها وهي الغريبه عنها !
ما تقدر تقرب منها ..مثلها مثل أي أم بيوم خطوبة ابنتها !
المفروض هي تكون اقرب وحده للعروس!
تولدت بداخلها مشاعر كره وبغض لشق التوام لها ...كيف تفضل زوجه الأب على أمها !
لو جربت الحمل والولاده كان عرفت وش يعني ام !
تتخيل نفسها مكان الجازي وقدر تعمل فيها كذا إلا تموت من القهر !
أخذت نفس متجاهله اي نظره موجهة لها لأنها باختصار ما يهمها أحد من الحضور !
وبنبره هاديه وهي تمسك يد الجازي : تفضلي معي
الجازي برفض وبداخلها غصه وهي تشوف زوجه جواد أخذت مكانها : صدقيني أنا الطالعه وهم الداخلين بالنسبة لمريم ...هذه البنت تكرهني وما تبغاني
قاطعتها وهي تهمس بصوت حاد: حتى لو ما تبغاك غصب عنها لازم تعرف قائمه الأولويات انت أمها وغصب عنها تكونين جنبها ...انت تعالي وما عليك منها حتى لو ما تحبك لازم تثبتين وجودك وما احد يأخذ مكانك... انت إلي حملت فيها وتعبت وعانيت ألم الولادة وعشت حرمانها وقلبك مهما عملت وغلطت يبقى يحمل لها مشاعر جميله هذا حق لك انت ما هو لزوجة أبوها !،
حنين راق لها كلام رونق ...ناظرتها رونق : وانت بعد قدامي انت جدة العروس ...قبل ما تعترضين ادري بك ما تحبين التوأم لكن هذا ما يمنع تواجدك عند حفيدتك ومقامك لا تتنازلين فيه لأحد!
سحبت معها يد الجازي وهي تناظر حنين : يلا
توجهت للكوشه بثقه ...وما ناظرت توأمها ما لها نفس تشوف شبيهتها !
وقفت بثقه وبصوت عالي تلفت النظر لها : لو سمحتم الكل يبعد عن العروس كذا رح تكتمونها ...ما أحد يبقى إلا أمها وجدتها والباقي يتفضل هناك !
ام جواد انتفخ وجهها من كلامها اقتربت منها ... وقبل ما تتكلم همست لها رونق بتحذير : كلمه وحده أقلب الخطوبه مجزرة والتفتت وهي تؤشر للموجودين تبعدهم عن المكان !،
تركت ام جواد واقتربت من زوجه أبوها وهي رافعه حاجب بغرور : لو سمحت انزلي
الجازي بهدوء بهمس: انا
قاطعتها رونق بصوت ساخر : انت المربيه حقتها والمربيه مكانها تحت الرجاء تفضلي بدون مشاكل وما تعطين نفسك فوق حجمها تراك مجرد مربيه سرقت البنت من أمها ....وكنت شريكه بالجريمه مع زوجك...انت كلمة بشر ما تستحقينها لأنك
ناظرتها بتقييم ما في كلمه توصف حقارتها : تفضلي مع الضيوف ما أبغى أغلط عليك
ناظرتها الجازي بقهر من كلامها لفت وجهها بزعل وغادرت متجاهله ام جواد خلفها !
رنيم مسكت شذى : خلاص فكينا من المشاكل تراهم يبغون يخربون الخطوبه
شذى جلست بغضب : هالكلبه أكيد أمها عبت رأسها علينا !
حنا أهلك العرس وتطردنا هالقرويه وأمها القزم !
اخخخخ يالقهر !
ام راكان رفعت حاجب بحده لرونق: حنا أهل العريس
رونق بلامبالاه وبصوت مرتفع :اهل العريس تفضلوا لأماكنكم متى ما دخل العريس تتفضلون هنا ....حنا كذا عاداتنا !
ام لؤي أعطت نظره لبناتها يختصرون ما تبغى تتحول الملكه لحلبه مصارعه ورونق مب ناويه على خير !
تنهدت براحه وهي تشوف ما في أحد حول العروس إلا حنين والجازي وام جواد !
حنين تناظر ام جواد بانتعاش !
الجازي واقفه جنب مريم إلي ما عجبها حركة رونق ....الجازي بعتب هامس : اتصال استخسرتي تخبري أمك ....اااه منك يا مريم
رونق وقفت فوق رأسها: اتركيها هالغبيه ... لأني اتوقع لو فتحنا عقلها إلا نلقاه كله تبن ....يا كلبه الحين تفضلين زوجة أبوك على أمك أنا ما أدري عقلك حالفه يمين تسلمينه بكرتونته!
مريم تناظر توأمها نفس ملامحها لكن رونق بشره شاحبه حول عيونها أسود لابسه شاله وعبايه فضفاضه ولا كأنها جايه لخطوبه !
تكلمت بقهر منها: انت مين سمح لك
رونق وهي تناظر مريم وما تحس فيه شبه بينهم يمكن من المكياج وبنبرة تحذير : اوصصصص صوتك ما ابغى اسمعه انكتمي قفلي حلقك !
لأنه احقر منك ما أتوقع فيه على وجه الارض !
ابتعدت وقفت جنب حنين
ام جواد اقتربت منها وبداخلها نار تشتعل وهي تشوف ابتسامه حنين :: وربي لتندمين !
طنشتها رونق وهي تناظر للبعيد.....مطنشه نظرات الحقد من حولها ....ما هان عليها تشوف أم مكسور خاطرها على ابنتها فآقسمت بنفسها إلا تأخذ حقها كيف مريم تعمل فيها كذا !
ام راكان جالسه على احد الكراسي وتحس ضغطها ارتفع : الحين هذه القروية تطردنا من متى هالعاده أهل العريس ما يقربون من الكوشه إلا لما يدخل العريس
ام لؤي وقلبه يغلي غليان : يا يمه خلي هاليوم يعدي على خير شوفي الناس تناظر بس تبغى سالفه يتكلمون فيها !
لجين بتوعد هامس:اخخ يمه اتركيني عليها والله لأمسح فيها الارض ..هالقرويه وجهها يلوع الكبد
قاطعتها ام لؤي: خلااص الحين يدخل خالك وتنقلع !

*
**
**
**

على طاوله ثانيه تتكلم بابتسامة : يمه ما توقعت ام مريم كذا ...مب باين إنه بناتها كبار كذا
صغيره وكيوت مع هالفستان العنابي جميله وصغيره !
جمانه : والله حلوة اشوفها احلى من مريم ...تدرون اكثر شيءيضحكني عمتي شذى ههههههه
مروه وهي تهمس وعيونها على شذى: لو حطينا فوقها طبخه الا تستوي من الغليان
ميس بابتسامة : حنا ما لنا دخل !
نغم رفعت حاجب: الحمد لله سعاد ما وصلت للحين كان صارت علوم
ميس بضحكه : رح يكتمل المشهد ههههههه وهي تشوف ضرتها
مروه تناظر رونق بتأمل : احسها رافعه خشومها بزياده وفوق هذا قويه شفت ما استحت من احد وطلعت خالتي أم عبود من المكان وحطت أمها غصب عن الكل !
ما هي مثل مريم شخصيتها ضعيفه !
نغم هزت رأسها : ايه فعلا قويه نفسي اعرف وش قالت للجازي حتى تركت الحفله وطلعت بس اتوقع جواد ما رح يسكتلها !
جمانة اشرت بعيونها : شوفي شوفي خالتي ام راكان شوي وتنفجر هههههه
مروه : شوفي وجه جدتي مب قادرة تفتح حلقها بحرف واحد وفوقها اكيد متفشله من شق التوام ههههه
ميس تهمس لنغم : شوفي عمتي حنين كيف تناظر خالتي ام جواد ههههههه يا شماتتها الحين
ابتسمت نغم : اسكتي لا احد يشوفنا ترى كاميرات المراقبه يا كثرها !
ميس بضحكة : وأنا وش قلت هههه
**
**
***
أم راكان تناظر أم فياض إلي جلست عندها : هذه أخرتها !
ما بقى إلا القرويه تطردنا
ام فياض عجبها تصرف رونق تجاه أهل جواد بس ما عجبها تصرفها مع أم راكان بما إنها صديقتها وبترقيع : تراها ما تعرفك لو تعرفك ما قالت كذا !
ام راكان بتوعد :هين !
انا ما أدري كيف ابو فياض مدخلها بيته !
البنت اخلاقها حثالة ولها سوابق مثل وجهها !
انت كيف ترضين إنها تعيش عندك !
الجازي على عينك بس البيت بيتك انت وما يطلع لأحد يدخله بدون اذنك !
أنا لي كلام مع ابو فياض لما يرجع !
يصير خير !
ام فياض بهدوء : صدقيني ما تعرفك وما تعرف انك ام العريس
ام لؤي بكره لرونق: الا تعرف بس هي وقحه بزياده شوفيها كيف واقفه مثل الضابط ورافعه خشومها للسماء ويا ليت لابسه عدل !
عبايه احد يلبس بخطوبة أخته عبايه !
اكيد في عيب فيها وما تبغى احد يشوفه !
ام فياض التفتت لرونق بتأمل من لما جاءت طول الوقت تنزل لهم بالعبايه والشال مع انه البيت ما فيه رجال معقول فيها عيب وما تبغى احد يشوفه !
يمكن مشوهه؟!
لجين مطت شفتها وهي ماسكه نفسها : نفسي اشوتها برا الحفله من شعرها !
ام فياض بنهر : اقول اسكتي تبغين فضائح شوفي الناس كيف تناظر وكأنهم حاسين فيه شيء !
ام راكان بتوعد : اتركيها الحين يا لجين بعدين بعدين !
**
**
**
**
واقفه قريب من أمها هي تناظر القاعه والفخامه تفكر كم دفعوا مقابل كم ساعه .....بالمقابل فيه كثير بالقرية يبحث عن لقمة الخبز ما هو ملاقيها !
كم تعيش بحالة ترف وغيرنا يموت من الجوع ...مطت شفتها حضرته محامي ومعه فلوس يشفطها من الناس حتى يعطيهم حق غيرهم !
وش حظ اختها النحس حتى يكون راكان نصيبها !
مطت شفتها بتعب وهي تحس بدأت نفسها تقلب عليها !
مجرد ما ينتهي مفعول الدواء تحس جسمها ينتكس من جديد !
امالت رأسها بارهاق بداخلها جرح ينزف ...ذول اهلها لكن ما تشعر بالانتماء لهم ...تحس نفسها غريبه عنهم !
حتى نظراتهم الظاهر إنهم ما هم متقبلينها !
متأكده بعملتها هذه زادت من كرههم لها ...بنفس الوقت ما يهمها محبتهم ...إلي يهمها تقدم معروف للمرأة إلي انجبتها وما تشوف بعيونها الحزن !
متناقضه بمشاعرها ما تحمل مشاعر للجازي وبنفس الوقت ما تقبل احد يجرحها او ينقص من قدرها خاصه بعد ما سمعت قصتها !
فعلا ما تحس إنها شريره مثل أبوها بالعكس تحسها بريئه وبداخلها روح جميله !
ما تدري يمكن تحمل لها مشاعر جميله من تعاملها اللطيف والجميل مع قدر وكأنها فعلا بنت من بناتها !
تنهدت بهم كلما تتذكر قدر !
ناظرت ام جواد إلي تتكلم بغل : العريس رح يدخل الحين !
ولا هذا بعد بحاجة لموافقه منك حتى يدخل ؟!
رونق بهدوء وثقه عكس جسدها المنهك تكلمت مع امها مطنشه جدتها: خليك هنا مع الغبيه هذه تراك ام العروس غصب عن الكل وسلمي على خطيب ابنتك النصاب ...ناظرت اختها بترفع : مبروك مقدما خروجك من سجن جواد ودخولك سجن راكان تكسرين الخاطر
ام جواد بحده وهي تهمس: حاسبي على كلامك وقسم ب بالله رح تندمين !
ناظرتها رونق بتقييم من فوق لتحت وبهدوء العالم نطقت : ما انخلق إلي رح يخليني اندم !
هذه حقائق... ليه تزعلون منها ؟!
تركتهم وغادرت وهي تمشي مكتفه يد واليد الثانيه ماسكه ذراعها ..خطوات هاديه واثقه وكأنه ما في أحد بالمكان غيرها !
توجهت للحمامات وهي تحاول تتماسك أكثر ....بعد وقت غسلت وجهها بعد ما استفرغت ...كذا ما رح يرتفع دمها إلي تأكله تستفرغه !
مسحت وجهها وهي تشوف الشحوب والتعب بدأ يظهر اكثر !
رجعت للقاعه تخاف إذا طلعت برا تفقد وعيها وبنظرها ما في أمان ..حتى فكرة تروح للمستشفى بسياره أجره ملغيه تخاف تفقد وعيها مع رجال غريب !
جلست على طاوله فارغه ...نزلت رأسها بتعب ....لو جابت الدواء معها كان شربت !،
غمضت عيونها بقوة وهي تحس الدنيا تلف فيها !
دعت من قلبها ربنا يعطيها القوة حتى ترجع البيت ما تبغى تنتكس حالتها هنا ..... رفعت نظرها باستغراب وحست الوضع متكهرب عند الكوشه!

**
**
**
حنين سلمت على راكان وباركت له بفرح بالرغم انه ما في علاقه بينهم لكن ولد اخوها ناصر ...وناصر له معزه عن باقي إخوتها !
راكان وهو يسلم على الجازي بعدم تصديق وحنين تتكلم : وهذه ابنتي الجازي حماتك !
راكان بضحكه : ظنيتها العروس ما شاء الله !
ام جواد حاست بوزها وهي تشوف الجازي وجهها احمرمن الاحراج : تراه يحب المزح !
الجازي رفعت حاجب وناظرتها سبحان الله عادتهاما تتركها ولعانه فيها حركت حواجبه مع ابتسامه تغيضها وكأنها تقول لها «موتي بحرتك»
ام جواد لفت وجهها بقهر وبداخلها تردد «مالت عليك يا قزم»
ام راكان للحين زعلانه ...واقفه خاطرها مب طيب !
سلم على مريم إلي تبكي بصمت !
ام جواد بقهر : حسبي الله كدرتم خاطر العروس !،
خلاص مريم الناس تناظر !
راكان وهو يناظرها بابتسامه: كل هذا خوف وتوتر !
ام لؤي : يا قلبي رقيقه وحساسه ما هي مثل بعض ناس !
الجازي بحده ؛إلي بيحلم يفسر !
ام جواد ما تبغى يصيرون مضحكه بين الناس ويتشابكوا : كل وحده تصل على الرسول وما له داعي هالكلام الحين !
يلا ابتسمي يا مريم وفكينا من الدموع !
اكيد تبكي تبغى أمها تكون جنبها حسبي الله على من كان السبب
الجازي ناظرتها بقوة : احترمي نفسك تراك زودتيها وأنا ساكت لك ترى أنا امها تفهمين
حنين بكره تطالع ام جواد : انا نفسي
ام لؤي برجاء : الناس تطالعنا فكونا من المشاكل وخلي الخطوبه تمشي على خير
راكان حاس فيه شيء صاير وخاصه مع بكاء مريم :وش صاير
حنين عفست ملامحها بقرف:-الي صاير إنه زوجة عمك ما تحترم احد
ام جواد بتحذير : قفلي السيره ما هو وقته الحين
حنين رفعت حاجب بشر : يعني انتم وقته ترمون الكلام وإلا انتم يطلع لكم
الجازي بقهر : حتى خطوبة ابنتي يبغون يحرموني منها
مريم بقهر من تصرف رونق والجازي تحس كسروا فرحتها بتصرفاتهم خاصه قدام اهل خطيبها .. نطقت بقهر: يكفي طردتم امي من الحفله انتم وش تبغون مني ومن أمي !
خربتم الحفلة بتدخلكم أنا اصلا ما عزمتكم
الجازي وكأنه أحد صب فوقها مويه بارده ...ناظرتها ودموعها بدأت تنزل بدون انذار ...يا كثر ما تجرحها مريم ...ذبحتها من الوريد للوريد ....تحس بوسط حلقها خنجر مب قادره تنطق حرف واحد ...... وش هالقساوة إلي بقلبها ؟!
لجين وهي تتخصر : بعد 18 سنة تذكرت إنه لك بنت
مريم بقهر وهي تبكي : مو ابنتها
قطعت كلامها لما استقرت يد رونق على خدها وبصوت عالي ما عاد يهمها خاربه خاربه : انت وقحة بزياده وما لاقيتي احد يربيك !
هذه امنا تاج رأسك غصب عنك تفهمين !
دام وجودنا خرب الحفله الحين رح تخرب على اصولها
راكان بتحذير وغضب من وقاحتها :رونق اقصري الشر وانقلعي
ردت بقوة وهي واضعه يدها على بطنها تحس بالوجع بدا يتلاشى مع هذا الآكشن ...وبصوت عالي يسمعه الموجودين : إلي يدوس على طرف ثوب أمي إلا امسحه من الوجود !
خلال ثواني كانت تسريحة مريم تحت قبضتها وبصراخ فيه غصه وهي تتخيل نفسها مكان الجازي وقدر تنكرها كذا : هذه أمك يا عديمة التربيه تفضلين المربيه على أمك !
وش هالقلب إلي بداخلك ...ما عندك إحساس ولا مشاعر
بدا الصراخ والأصوات ترتفع ...ومريم تحاول تفك نفسها من رونق !
راكان بغضب : اقولك اتركيها
لما شاف ما في استجابه منها ...سحب يد رونق بقوة عن مريم ودفها بقوة !
حنين بغضب ركضت لرونق تسندها لما سقطت على الارض وناظرت راكان بعصبيه : كسر يكسر يدينك !
الجازي واقفه توزع نظرها بين التوأم ..مريم إلي انعفست حالها ومتكوره تبكي بضعف.و رونق إلي اسندتها حنين !
ياااه من حالهم المتشتت هذا!
ام راكان بغضب بعد ما خربت الحفله ..والحريم يطالعون ويتهامسون ويضحكون : ابنتك هذه
الجازي بغضب : ولا كلمه حدك رونق ما اسمح لك خلاااص كافي
ام جواد بغضب:انا ما رح اسكت عن هذه المهزلة !
رونق تحس جسمها تكسر من دفته ..بس مب رونق ابنة القريه الي تسكت عن حقها ...خلال لحظات غمضت عيونها من الوجع وكأنه تربيه ام مرعي خلال السنوات الماضيه وقسوة الحياه إلي عاشتها بدأت تشحن بداخلها قوتها المعروفه.. ما هي ضعيفه رح تأخذ حقها بيدينها ...وبدون سابق إنذار استغلت تلاسن حنين والجازي مع الحريم ..وراكان انحنى لجهة مريم يطمئن عليها ...سحبت كرسي ...وبكل قوتها ضربت فيه راكان
عم الصمت لحظات بنظرات استنكار لهذا الحدث وكأنه الزمن توقف للحظات !
رونق ما تسمح لأي رجال غريب يلمسها .........محافظه على نفسها ..ييجي راكان بكل جرأة يمسك يدها ويرميها للأرض ....مين يظن نفسه ...و بصوت عالي متوعد: والله إن مديت يدك مره ثانيه إلا اذبحك واشرب من دمك تفهم!
التفت راكان للخلف بصعوبه وهو عافس ملامحه بألم ...ناظرها وهي واقفه تناظره بتهديد ... بدأ صراخ الحريم بالقاعه يرتفع ...وبوعيد نطق : رح تندمين
ام راكان بدافع الأمومة هجمت على رونق مع ام لؤي ولجين... وشاركت معهم شذى الي قلبها يغلي من الجازي ورونق !
خلال ثواني اشتبكوا مع بعض والصراخ عم المكان !
راكان يحس ظهره انقسم نصفين مب قادر يوقف نطق بغضب لام جواد : اتصل بالرجال بسرعه !

**
***
**
بعد ما غادر الرجال وما بقى إلا الأهل
جواد ناظر فياض بقهر : انت ليه من البدايه تفتح بيتك لها
وليد بهدوء لكن فيه نبره قويه، رد عن فياض: والله البنت عند أمها وما يطلع لك يا جواد تتمادى أكثر من كذا !
ابو جواد بكره لوليد : هذه ابنتنا ومردها لنا يا ليت تحطها حلقه بإذنك ....ترانا ما نرضى عيالنا يعيشون بعيد عنا ويأخذون عادات غيرنا
وليد قاطعه بسخريه : عاد رونق عكس عاداتكم وعاشت بعيد عنكم !
ندري انكم ما تطلعون البنت غريبه لكن ما توصل لدرجه تزوجونها لعمها يا كبرها عند ربي وأعطاه نظره شماته
قاطعه ابو جواد بغضب : وليد ترى نايف
وليد مط شفته بسخريه : لو ولدكم مشى بعاداتكم كان ما تزوجها اذا ولدكم رمى عاداتكم بعرض الحائط وانتم للحين تقولون عاداتنا !
تتكلمون عن التربيه والاخلاق وشفنا هالتربيه على أصولها ما شاء الله نايف أعطى نموذج رائع عن تربيتكم !
جواد زفر بغضب : لا تطولها وهي قصيره البنت رح ترجع لي !
وليد بابتسامة : والله هذا راجع لابنتكم ترى ما احد جبرها تعيش عند أمها هي اختارتها وانبهك تعمل حركات ملتويه تراها البنت ولا أسهل منها تشتكي عليك بمركز الشرطه !
عملتها من قبل حسب معلوماتي !
وابتسم باستفزاز !
ابو احمد بغيض : انت جاي تتشمت فينا يا وليد !
عبدالله بكره : اتركه يقول إلي يبغى الله يستر اذا ما هو إلي خطف
قاطعه زياد بسرعه ما يبغى تكبر المشكله أكبر من كذا : يا جماعة الخير مب كذا تنحل هذه الأمور !
قلنا لكم اصبروا فتره البنت تتقبل واقعها وانه لها اهل وقتها هي بنفسها رح ترجع لأبوها وما رح ترضى تعيش عند زوج أمها ...تراها البنت عندها عقل وتفكر وما هي عبيطه وإلا سلبيه اي واحد يمشي كلمته عليها !
فياض بتأكيد: صادق البنت شخصيتها قويه وما هي من النوع إلي احد يؤثر عليها بالعكس اذا ما اقتنعت بالشيء ما رح تعمله !
مسألة وقت وكل شيء ينحل !
ابو جواد بتوعد : يصير خير يصير خير !
ناظر جواد إلي يتكلم بالجوال وملامح وجهه تغيرت....تكلم بعدم صبر قبل ما يقفل جواد الجوال: وش صاير ؟!
جواد وقف بملامح ما تتفسر : امي تقول الحريم اشتبكوا مع بعض !

**
**
**

الجازي تمسح على شعر رونق بتنهيده: جعلهم للفنى ..قومي يا رونق يا قلبي
حنين جالسه بهدوء: الدكتور يقول وضعها تمام ...مجرد وقت وتستيقظ
الجازي بصوت مخنوق: يمه من وقت الاشتباك للحين ما صحيت وهي فاقده الوعي...اخاف ضربوها بمكان على راسها وتفقد ذاكرتها
حنين بضجر: استغفر الله حاضره فيلم وجايه تطبقيه على البنت ...ترى ما أحد لمسها منهم فقدت الوعي قبل ما أحد يلمسها ...لا تخافي شوي وتصحى
دخل فياض بملامح ما تتفسر وناظر الجازي :ممكن تتفضلين معي أبوها يبغى يدخل عندها من لما دخلت وانت مقيمه هنا
الجازي بغضب : فوق ما ضربوها وله عين يشوفها !
ما رح اطلع ثانيه وحده ما أفارقها
فياض مط شفته بسخريه : البنت ضاربه الرجال وتقولين ضربوها ؟!
هذه البنت بصراحه ما شفت مثلها ابدا !
حنين تكتفت بشماته: يستاهل أكثر من كذا ... هو الي دفها
فياض بملل : أنا ما لي علاقه بالسالفه كلها وحنا ما لنا دخل ...قومي يا جازي
هزت رأسها بالرفض : ما رح اتركها
حنين ما تبغى اصطدام بين فياض وجواد : خلاص روحي يا جازي أنا عندها
الجازي بإصرار: مستحيل ذول ما عندهم رحمه الا يأكلونها !
فياض عقد حواجبه: والله!
ترى هي بروحها تأكل بلد !
والا بنت عاقله تضرب رجال بكرسي !
الجازي مطت شفتها بشماته: خليه يستاهل
هز رأسه باسف: تدرين نسيت انه البنت وأمها مجنونات مثل بعض بس الفرق إنك هبله وقلبك طيب ما عندك إلا هاللسان بعكس ابنتك مجنونه وقويه تشتغل وعقلها شغال ما هي عبيطه ولا غبيه اي كلمه أو فعل يصدر منها يكون مقصود منها
الجازي ما عجبها كلامه: ما احد طلب منك تحلل شخصيات وخليها قويه إن لم تكن ذئبا أكلتك الذئاب ..هذا البيت ما يحتاج إلا يكون لك انياب وتأكلهم
فياض بدأ يتنرفز: لا تشجعين البنت تراها مفترسه بدون تحريض !
وبتذكر : مين قدم بلاغ وطلب حضور الشرطه !
رفع أصبعه بتحذير : الجازي لا تدخلين نفسك بمشاكل
الجازي قاطعته: لا تناظرني كذا أنا ما بلغت كنت ناويه أبلغ بس ابوي حلف يمين ما
حنين هزت كتوفها وهي تقاطعها : حنا ما تكلمنا بشيء
فياض عقد حواجبه : تدرين إنه الشرطه تنتظر إنها تفوق يأخذون أقوالها !
الجازي تحمست : صدق !
لازم انتظر وأكون معها حتى تقول أسمائهم لأنها رونق ما تعرفهم
وخاصه عمتها شذى ام خرطوم وام لؤي الدبه وام راكان المتوحشه وحفيدتها وش اسمها يمه
حنين باندماج: لجين أن ما خانتني ذاكرتي
ناظرهم بتعجب : ما شاء الله عليكم .....الحين وش استفدت لما اغتبت الناس !
الجازي لا تستفزيني تراها واصله معي وماسك أعصابي بصعوبه ...تعالي معي وبعدين نرجع لها
دخل وليد بهدوء وناظر وضعهم المتكهرب: اطلعي يا جازي أبوها يبغى يدخل
الجازي زمت شفايفها بقهر تبغى تعترض بس ملامح ابوها وفياض أجبرتها تسكت !
حنين بهدوء : ما عليه يا جازي البنت بخير
ناظرت فياض بقهر وطلعت معه من الغرفه ...شافت جواد ومعاطه شاب قريب من الغرفه تمنت تذبحه وتخلص منه لأنه هو سبب معاناتها وأحزانها !
*
**
*
**
بالغرفه دخل جواد وخلفه عبود بهدوء رد السلام !
حنين بدون نفس ردت السلام وصدت للجهة الثانيه!
جواد وضع يده على جبهة رونق ...زفر بضيق وبعدها نطق باتهام: اخذتم البنت لكن ما اسمح لكم تخربون علاقتها مع أهلها
قاطعته حنين بردح،: نعم نعم !
الي يسمع يقول طول وقتنا نحش برأسها ..يا عمي اصحى تراها البنت ذكيه من أول نظره عرفتكم على حقيقتكم وما هي مثل العبيطه والغبيه مريم !
من وهي رضيعه تحشحش برأسها بافكار وخليتها تكره أمها ...هذا انت خربت علاقتها بأمها والا انت يطلع لك !
جواد بأسلوب متعالي : والله أنا أبغى مصلحة ابنتي وابعدها عن كل شيء يشكل خطر على حياتها
حنين عفست ملامحها بكره : دام ام جواد أمك ما رح أعلق لأنه يطلع منكم أحقر من كذا !
وليد بهدوء ظاهري : رجاء بدون رمي كلام
يا جواد ...
جواد جلس على جنب السرير : وكأنه ما هو ذنب ابنتك إلي ضيعتها وبسببها عاشت حياه
وليد بمقاطعة : جواد اسم الجازي ما لك حق تنطقه افضل لك !
عبود يناظر بعدم اعجاب : ومتى تصحى حضرتها ؟!
حنين ناظرت عبود بكره : يا شين البزران إذا تفلسفوا
عبود فتح عيونه بصدمه وقبل ما ينطق تكلم وليد بهدوء: أتمنى إذا صحيت رونق ما تفتح معها تحقيق ودروس بالأداب ترى البنت نفسيتها تعبانه المفروض قليل من مراعاة المشاعر ....ما هو يتهجمون حريمكم عليها .....هذا استقبال ؟!
كيف تبغى البنت تقبل تعيش عندكم بهذا الاستقبال ؟
عبود بتدخل : والله يبغى لها تكسير رأس وإلا هذه القروية تطرد أمي من الحفله
حنين بشماته : ما طردتها بس وضحت لكل واحد مستواه حتى ما ترتفع رقبته لفوق وبعدها تنكسر
جواد بتحذير رفع إصبعه: انا احذركم تستعملون رونق أداة للانتقام وتصفيه الحسابات
وليد مط شفته بسخريه: شوفوا مين يتكلم عن الانتقام وتصفيه الحسابات !
لا حول ولا قوة الا بالله!
مغمضه عيونها بإتقان وكأنها فعلا فاقده للوعي....تعبها ومرضها ساعدها بإتقان هذا الدور .... أفضل شيء إنه الشرطه موجوده ...الحمد لله الدكتور سمع لها وتأثر بالمسلسل إلي الفته له واستدعى الشرطه ...تحس جسمها كله مكسر بسبب دفع راكان للأرض ......يا الله وش هالقدر يكون لها اهل مثل كذا كل طرف يكره الثاني !
تعبت وهي مغمضه عيونها ...نفسها تقلب عليها الحين ...
مشاكل أهل أمها وأبوها ما تنتهي !
فتحت عيونها وهي عافسه ملامحها بتمثيل متقن لهذا الدور .. وكأنها الحين استيقظت
وليد انتبه على حركتها اقترب منها وما اهتم لجواب جواد على كلامه: كيفك يا أبوي الحين
جواد اقترب من رأسها: يوجعك شيء!
حنين عفست ملامحها وهي تكلم جواد : ابعد عنها تراك تكتمها كذا !
ناظرها جواد وهو يكتم غضبه ... !
ابتسمت حنين تقهره ...وقفت وهي ناويه تخبر الدكتور انها صحيت حتى يحققوا معها وياخذونهم للسجن وتتشمت فيهم !
جواد باهتمام استغربته رونق توقعت إنه يمسح فيها الأرض : كيفك الحين إن شاء الله أفضل ؟!
طيب وش سبب فقدان الوعي ..وجهك شاحب
وليد مط شفته : اكيد رح تفقد الوعي من الرعب والخوف أربع حريم ناويين يضربوها
جواد انتفخ وجهه: إلا قول من قلة التغذيه
عبود بملل : متى يكتبوا لها خروج
رونق بالرغم من تعب جسدها نطقت : انكتم !
جواد ناظرها : ما له داع هالأسلوب
قاطعه دخول الدكتور ..سكت وهو ناوي ما يرجع للبيت إلا رونق معه
*
**
**
راكان واضع يده على ظهره بألم : جعل يدها للكسر هذه مجنونه ما فيها عقل !
ابو جواد بحرج : لا تزعل انت تعرف إنها البنت عاشت بعيد عنا وأخذت عادات وطبع هالقرية ..لكن صدقني رح تعتذر منك غصب عنها !
راكان مط شفته وهو للحين عافس ملامحه: ما ابغى تعتذر بس هذه البنت بحاجه لإعادة تربيه !
الله يكون بعون إلي رح يتزوجها مفترسه !
بدر بضحكه : والله شكلك نهفه العريس ينضرب
دخل الغرفه عبود وحامل الأخبار: الشرطه عندها تحقق
ابو جواد وقف : نبه عليها جواد تقول بلاغ كاذب وأنها سقطت عن الدرج لوحدها
عبود هز رأسه :ايه قال لها كذا وهزت رأسها حتى ابو بندر قال لها ذول أهلك ما يصير تشتكي عليهم مجرد سوء فهم بينكم وينحل !
أبو جواد عفس ملامحه بقرف : يعمل نفسه فهيم وحكيم زمانه!
راكان باستغراب: نفسي اعرف مين طالب الشرطه والمشكله الدكتور رافع خشومه للسماء وما يتكلم إلا بالقطاره يا ثقل دمه !
زياد عقد حواجبه: انا طالع اشوف وش رح يصير !
استغرب من الصراخ لما وصل مقابل الغرفه ..اسرع بخطواته وهو يبعد جواد عن بندر وش فيكم ؟!
جواد بغضب: ما احد لعب بعقل البنت غيركم
بندر يتفلت على جواد بس وليد مسكه: من زينك وزين ابنتك !
جواد يتنفس بسرعه وزياد مثبته من كتفه: وش صاير
جواد بقهر نطق : رونق اشتكت على راكان والحريم
زياد ببرود :ما هي مشكله أنا أحلها
رفع جواله واتصل على ليث كلمه بهدوء وبعدها قفل الجوال وهو يتكلم : كل شيء ينحل
حنين ناظرته بشماته : بصراحه تكسر الخاطر ابنتكم تجرجركم بالمحاكم ههههههه
جواد بصراخ عم المكان: لا تستفزيني تراها واصله هنا
حنين بمتابعه استفزازها: كنتم تتكلمون على الجازي وتربيتها ما هي عاجبيتكم لحتى جاء اليوم إلي ابنتك من مركز لمركز ومشتكيه عليكم ههههههه والله تكسرون الخاطر
زياد بنرفزه : يا عمة حنا نطفي النار وانت ترشين بنزين !
والله ما هو وقته هالكلام !
جواد بتوعد :والله الحين رح ترجع معي ما احد خرب البنت غيركم لكن يصير خير
وقفت على باب الغرفه لأنهم كتبوا لها خروج ....مطت شفتها بقرف مستحيل ترجع مع جواد !
شافت الجازي متوجه لها بعد ما وقف فياض عند جواد ووليد وبندر وصوتهم للحين طالع !
الجازي مسكت يدها :امشي نطلع بسرعه !
رونق بهدوء: ترى ما أخاف من أحد
جواد ناظر جهتها اقترب منهم وبصوت حاول يكون هادي:؛رح ترجعين معي بعد ما تسقطين الشكوى
رونق بهدوء وهي تعدل نقابها: ما رح اتنازل حتى يوقعون تعهد بعدم التعرض لي
ابو جوادوصل وهو بأعلى درجات غضبه : ضاربه الرجال ولك عين تتشرطين..
ردت بقوة عكس جسمها إلي يرتجف من التعب و الإعياء : دفاع عن النفس المره هذه مرت سليمه لكن وقسم بالله ان لمسني مجرد لمس إلا اذبحه واشرب من دمه !
الجازي متمسكه فيها بقوة خايفه أحد يأخذها بقوة ما تستبعد عنهم شيء
جواد بلع قهره ونطق بهدوء وهو يتحاشى النظر جهةالجازي: يلا يا رونق
تحركت خطوات هاديه : أنا جالسه عند امي وإلي فيه خير يعترض طريقي !
هم جواد نحوها لكن وقفهم زياد بنبره امره :اتركها يا جواد
ناظره جواد وجهه احمر من القهر .. أعطاه نظره زياد بمعنى سلك الموضوع الحين !
صك أسنانه بغيض وقهره و هو يحس نفسه مكبل ابنته قدامه وتتحداه وهو ما يقدر يعمل شيء !
ناظرت زياد إلي يكلمها بهدوء :الحمد لله على سلامتك يا رونق... انا اعتذر نيابه عن راكان ما كان قصده يمسكك حقك علينا .ما تشوفين شر !
نزلت نظرها وهو يتكلم اسلوبه ورقة كلامه بدا يعزف على اوتار قلبها ....وفوقها يعتذر لها وهو دكتورها .....احتارت هل هو فعلا هذا طبعه والا تمثيل وله أهداف ثانيه؟!
نطقت باحترام له كونه مدرسها بالجامعه : الشر ما يجيك
تحركت بعيد عن المكان والجازي للحين متمسكه فيها وما هي مصدقه إنه ما أحد اعترض طريقها ومرت بسلام !
ابو جواد بغيض: مرتاح يا وليد الحين !
وليد مط شفته ببرود : والله البنت عافتكم أنا وش دخلني
بندر بتهديد : وقسم بالله إلي يحط أمي وابوي بالسالفه إلا أكسر رأسه وخاصه انت «اشر على جواد » عدل كلامك لما تتكلم مع أبوي
ابو جواد بانتقاص: شوفوا مين يتكلم السكير الداشر
بندر بلامبالاه : والله كنت اسكر مع نايف وداشر معه بس هو تفوق علي وتزوج ابنة اخوه ههههههههههخ
جواد بغضب هجم عليه وكأنه ثور هايج... .قبل ما يوصله مسكه زياد: يكفي !
ليث تقدم منهم: خلاص ما له داعي هالتجمهر السالفه انتهت
ابو جواد مولع من القهر : والشكوى
ليث ببرود : مزقتها وخلي حفيدتك تشرب مويتها !
وليد تكلم وهو يغادر :يلا يا ام بندر !
حنين ناظرت اخوها بشماته : اليوم شكوى باكر تسجنكم كلكم هههههه الوضع فررررررري عندكم
تركته وغادرت وهي تمسك بيد بندر وسخريتهم واصل لهم !
ابو جواد ناظر فياض إلي ملتزم الصمت من البدايه: عاجبك كلام حماتك
فياض زفر بضيق: والله هذه اختك قبل ما تكون حماتي... أنا ما لي علاقه بالسالفه ومجرد وقت وترجع لكم ابنتكم وهذا يرجع لحكمتكم حتى ترجع برضاها لأني مستحيل اقبل إنها تطلع مغصوبه
جواد ناظره بعدم رضا والتزم بالصمت لأنه إذا تكلم رح يحرق كل من حوله !
زياد بنبره هاديه تكلم وهو يناظر فياض: رايتك بيضاء ما قصرت يا أبو وسيم وتأكد إنه خلال اسبوع رح تكون عندنا وبرضاها
ناظره جواد بعدم تصديق لأنه بنظره رونق صعبت الأمور وما هي سهلة ما هو ناقصه فضائح !
ابو جواد هز رأسه بتوعد :يصير خير !

**
**
**
**
الجازي بقهر رفعت يدها بدفاع: لا تكلمني كذا !
فياض وهو ماسك أعصابه بصعوبه..والغيره تأكل قلبه من تصرفاتها ..نطق بحده: وكيف تبغيني اتكلم؟
اسمعيني زين مكان فيه جواد ما أسمح لك تدخلينه فاهمه ولما أقولك اطلعي يعني اطلعي !
وما أسمح لك تكسرين كلامي!!
الجازي عفست ملامحها بغضب : انت وش فيك قالب علي...كل هذا لأنه صديقك زعل ؟!
بالطقاق إلي يطقه وبعدين ما يهمني موجود وإلا ما هو موجود ومب مستعده أغادر المكان لأنه حضرة جواد موجود ...خلاص يكفي
فياض ناظرها وهو رافع حاجب : لا اصرخي أكثر ترى ما أحد سامعك !
زفرت الجازي بضيق ..وبنبره حزينه موجوعه : انت تستفزني !
خسرت ابنتي الأولى ما أبغى أخسر الثانيه !،
ما رح أتخلى عنها ...لأنها رونق غير عن الكل بالرغم من لقائنا القريب إلا انها حاولت تعمل شيءمن اجلي
فياض عفس ملامحه: الحين ما احد عمل شيء لك إلا رونق !
انت اصلا
الجازي مسكت يده وبصوت مخنوق : فياض ما تزعل مني !
أنا ما أنسى فضلك علي ومساعدتك إلي قدمتها لي ...وما أبدلك بالكون كله ...قلبي ما ينبض الا لك ...وما يشوف رجال بالعالم غيرك ...لكن كمل معروفك وتحملني أنا ما أبغى تصير بيننا فجوة
فياض ناظرها وزفر بضيق : رح اصبر ونشوف آخر هالقصه لأني رح انفجر منها كلها !

**
**
**

ام راكان جالسه مع ام ناصر وهي تحس ضغطها الف :والله يا خالتي مب قادرة أنسى الموقف !
أنا أنا هالقرويه تعمل فينا كذا !
ما هي من ثوبنا يا خالتي !،
لجين عفست ملامحها : لو تشوفينها تظنين إنها طالعه من القبر !
أنا أشك إنها مدمنه السواد حول عيونها ما هو طبيعي والله كأنها مدمنه !
رفع عيونه على كلام لجين للحظات «مدمنه» و كأنها ضربت الوتر الحساس وبنبره حاده تحذيريه نطق : هذا الكلام لو اسمعك تعيدينه ما تلومين إلا نفسك
لجين بلعت ريقها وهي تشوف نظرات خالها المتوعده!
ام راكان بكره: وهي صادقه لو تشوفها إلا تقول إنها مدمنه وأكبر دليل جايه للعرس بالعبايه الله يستر وش فيها عيوب حتى أم فياض تقول دائما لابسه العبايه بالبيت !
أكيد داسه شيء عن الكل وما تبغى أحد يعرفه !
ام ناصر بصوت ضعيف : يا أم راكان الظلم ظلمات يمكن هالبنت تستحي
قاطعتها لجين بضحكة : حلوة هذه تستحي !
ترى وجهها مغسول بمرقه تد
قطعت كلامها لما ناظرها زياد بحده !
ابتسمت بتورط وناظرت جدتها الي تكلمت
ام راكان مطت شفتها وهي تكلم زياد: وليه تناظر البنت وهي صادقه ...وبعدين يا خالتي انت بعظمه لسانك قلتي إنها بحاجه لتربيه قليلة أدب !
احس هنا قهر بداخلي وأنا أتذكر لما طردتنا من عند العروس قال عاداتهم أهل العريس ما يقربون على العروس إلا بوجود العريس!
نسيتي يا خالتي لما تهجمت علينا ورفعت المشرط على لبنى
وفوق هذا ضربت راكان بكرسي هذه أبعد ما تكون انثى هذه مفترسه
ام ناصر قاطعتها ؛ والله ادري  وش أقول .... أنا معك الغلط راكبها بس وش يطلع بيدنا نقول او نتكلم
البنت ما هي مثل بناتنا وكأنها عايشه برا ... أي واحد يتكلم عليها تشتكي عليه !
أنا ما نسيت لما اشتكت على أبوها وتوقف بالمركز ... أنا أقول ابعدوا عن شرها واتركوها بحالها هي بحالها وحنا بحالنا مب ناقصنا فضائح !
أم راكان زمت شفتها : الحمد لله سعاد ما حضرت وإلا كان صارت علوم بالحفله سعاد ما تسكت والله لو كانت موجوده إلا تمسح فيها الأرض !
زياد مط شفته بسخرية: تراكم مكبرين الموضوع زياده ..يعني واضح عملت كل هذا حتى يكون لأمها مكان بالحفله وما هي على الهامش !
على الأقل قدرت أمها مع إنها ما جلست مع أمها إلا ايام عكس كنتك إلي ما هي سائله عن أمها
لجين قاطعته: ومين قالك بالعكس مريم تحب تزور امها بس ما تحب تضايق على أبوها أو تزعله وهي قالت متى ما تزوجت ما رح تقطعها حتى خالي راكان قال لها باكر تروح مع أمي وتزور
قاطعها بتهكم : قصدك اجبرها تروح تعتذر لأمها !
وإلا بنت فهمانه تقول لأمها أنا ما عزمتك والله انها كفو رونق يوم طقتها
ام راكان بحده: اشوفك جالس محامي دفاع عنها والله لولا إنها فقدت الوعي وإلا كنت ناوي امسح القاعه بشعرها
وبعدين أنا قلت لأم فياض دامها جالسه بالبيت ما رح أدخله تقلعها لأي مكان بوقت زيارتنا والنيه تعطينا خبر لما تنقلع برا !
مط شفته بضجر من تفكير الحريم أبعد ما يكون عن المنطقيه !
قرر يغادر برا أفضل له !
يحتار بشخصية رونق ضربت راكان لأنه مسكها اكيد كلام رعد عنها مب صحيح لكن وعد تحوم حولها واكيد ما رح تتركها إلا وتجرها لمستنقعها!

**
**
**
**
جالسه بالحديقه على الأرض وسانده ظهرها على ساق الشجره وبيدها كتاب تطالعه وكل ما حولها هدوء ..لكن بداخلها ضجيج ....يمكن تبدو من الخارج ما عندها مشاعر أو أحاسيس إنسانه جماد ...يظنون بالكلام ما تتأثر تراها إنسانه وعندها مشاعر وأحاسيس....كلام أم فياض لها ثقيل تبغاها ما تكون موجوده لأنه صديقتها أم راكان ما تبغى تشوفها!
تتمنى إنها كانت بكامل صحتها ومسحت بأم راكان الأرض حتى تعرف قيمتها !
مطت شفتها بسخرية وفوق هذا بدأت ام فياض تعمل لها موشح باحترام الكبير والمفروض ما عاملت ام راكان كذا !
صدق فاضيه أشغال !
نزلت نظرها للأرض وهي تلعب بالعشب الأخضر ...وعيونها بدأت تلمع بالدموع .....بداخلها حزن يذبحها بقوة !
تحس بمعنى الضياع الحين ...هنا غريبه وفي بيت أبوها غريبه وين تروح؟!!
وإن رجعت للقريه ما رح تضمن قدر معها ...كل شيء هنا يلوي ذراعها ويخنقها ...
رجعت تقلب صفحات الكتاب بعشوائيه .... تحب تطالع الكتب حتى تخرج عن عالمها الحزين أو تهرب من الواقع  من خلال المطالعه !!!
لمتى رح تجلس هنا !؟
أهل أبوها سالفه ثانيه !
ما تعرف غلطت لأنها ما أعطت أبوها وجه بالمستشفى !
دامه أبوها لازم تعامله بالحسنى !
رح تحاول تغير من نفسيتها وتعدل علاقتها معه بغض النظر عن المشاعر الي تحملها له
وقفت لما سمعت صوت صراخ مرتفع ..توجهت للداخل بخطوات متزنه ..ناظرت أم فياض إلي تصرخ بصوت عالي : تعالي شوفي ابنتك كسرت هذه الفازا ...
رفعت رونق حاجب ببرود : أنا على بالي وصلك خبر وفاة علشان كذا تصرخين قلت يمكن زوجها مات وإلا ولدها وبالأخير كل هالصراخ علشان فازا؟!
حنا اسفين وأنا باكر رح اشتري لك وحده بدالها
ام فياض بغضب : تتمسخرين علي !
وبعدين على بالك انت المنتفه تقدرين تدفعين ثمنها !
تراها غاليه وجاءتني هديه !
رونق مسكت يد قدر لما شافتها خايفه وببرود نطقت : اوكي قولي للشخص إلي اهداك يرجع يهديك مره ثانيه !
ومره ثانيه صوتك ما ترفعينه على قدر وتفزعينها !
ام فياض لمحت فياض واقف أعلى الدرج يناظر الموقف بصمت ..نطقت قهر من وقاحتها : تعال شوف حل معها !
رونق ما التفتت لأحد ..... أبعدت قدر وتقدمت تنظف الزجاج المكسور بصمت !
نزل فياض بهدوء: اتركي يا رونق الحين الشغاله تلمه !
ردت بهدوء وهي تجمع القطع المتناثره: قدركسرته انا رح أنظفه !
ام فياض بغيض ناظرت ولدها : هذا الي قدرت عليه الشغاله تنظفه !
فياض بابتسامه وهو يتقدم من قدر ويمسح على شعرها : انكسر الشر يمه فدى هالأمورة الصغيره ...شوفي صراخك كيف ارعبها !
باس رأسها بحنيه وابتسم لها !
ام فياض بقهر غادرت المكان !
وسيم بعد ما غادرت جدته تكلم بضحكه :، تخوف جدتي إذا أحد خرب هذه الأشياء
توجهت رونق بصمت للمطبخ أحضرت أدوات التنظيف ورجعت تنظف بصمت !
جلس فياض مقابل لها وهو يتصفح الكتاب إلي كان بيدها باللغه الانجليزية ....كانت روايه عن جريمه قتل ....رفع حاجب  وهو ينطق بتساؤل: عن وش يتكلم هذا الكتاب !
كملت تنظيف وتوجهت له سحبت الكتاب بهدوء...ناظرها وهي كالعاده بالعبايه والشال نفس الشحوب..رجع لنفس السؤال : عن وش يتكلم هذا الكتاب !
مسكت يد قدر وبهدوء نطقت : كيف تتخلص من الفضوليين
رفع حاجب بانتقاد : يعني حنا فضوليين
؟!
ردت وهي مستمره بالمغادرة: دامك تعرف عن وش
يتكلم ليه تسأل ؟!
رد بصوت عالي حتى تسمعه : ما ألومك على الحس الاجرامي إلي عندك دام هذه كتبك !
والله حاله !
متأكد هذه البنت عندها مب عقده نفسيه إلا عقد متراكمة !
وبنفس الوقت تكسر خاطره بالرغم من قوتها ... أحياناً يفكر يطلعها برا المنطقة تسافر وتبعد عن الكل مع ابنتها لكن يتراجع !
دخلت الجازي وناظرته وهو جالس وسارح بفكره : السلام عليكم
ناظرها ورد بهدوء : وعليكم السلام ...خالي وصلك؟
هزت رأسها وهي تجلس جنبه: إيه
رد بهدوء: ليه ما دخل ؟!
نطقت وهي تفتح الجوال : مشغول كالعاده!
وسيم اقترب من أمه : فاتك يا ماما أكشن !
فياض أعطاه نظره قويه : وسيم اطلع على غرفتك !
الجازي بإصرار: وش فيه ؟!
وسيم تكلم وهو يناظر أبوه : قدر كسرت الفازا لجدتي وجدتي عصبت على الأخير !
الجازي عقدت حواجبها : قالت شيء لرونق
فياض بهدوء : ما قالت شيء تتكلمين كأنك ما تعرفين أمي... النظافه وديكور البيت والأدوات شيء مقدس !
ردحت شوي وبعدها طلعت لغرفتها تدرين لازم تفقدت أمي أكيد ضغطها مرتفع للحين !
ناظرته الجازي بصمت وهو يبتسم ...تحس شيء بداخلها انجرح...تخاف عمتها تسمع رونق كلام تجرحها !
ما تبغى أحد يجرحها بكلمه وحده !
رونق غير عن الكل )
رونق إلي عرفتها من أيام وقفت معها على حساب علاقتها بأهلها وكل هذا مقابل حتى ما تكون على الهامش بالحفله !
رونق رفضت تكون على الهامش ..وقفت معها قول وفعل ... أعطتها إحساس جميل ..وكأنها تقول لها «انت أمي وما أرضى أحد يهينك لو بنظره»
وقفت بهدوء وبنبره مخنوقه تكلمت : أنا عند رونق تبغى شيء!
هز كتوفه بهدوء: سلامتك!
تغاضى عن تصرفاتها وعنادها لأنه يعرف كمية تعلقها بالتوأم ما حب يدخل معها بنقاش ويجرحها !
رح يسلك لها حتى يشوف نهاية هالقصه
**
**
*

رفعت رأسها من السجود ...دخلت الجازي بهدوء ...جلست على طرف السرير جنب قدر و مسحت على شعرها بحنيه : كيفك يا بطله !
قدر ابتسمت : بخير
أنهت رونق الصلاه..والتفتت للجازي لما كلمتها: وش تصلين ؟
ردت  رونق بهدوء: سنة الوضوء
الجازي ابتسمت لها: الله يقبل !
تقدمت رونق وهي عارفه إنها رح تتكلم بذي السالفة ...الجازي بتردد نطقت : ما أعرف وش أقول بس صدقيني عمتي هي كذا عندها الأثاث والنظافه خط أحمر
رونق ببرود تجاوزتها وهي تتوجه لرف الكتب مدت يدها بخفه تناولت كتاب ...التفتت للجازي وبجديه تكلمت بموضوع آخر : تدرين هذا الكتاب للصدفه لقيته بأحد البسطات قريب من بوابة الجامعه تخيلي يبيع كتب على بسطه ..تخيلي حتى الكتب صارت يبيعونها على بسطه !
وما عادت بمكانها الصحيح بالمكتبات !
رفعت الجازي حاجب باستغراب هي تتكلم وين وابنتها بعالم ثاني إلا إذا كانت تقصد إنها الكتاب أو انها تبغى تغير الموضوع ردت بمجاراه : يبحثون عن أبواب رزقهم !
اليوم أنا وخالاتك طالعين للسوق جهزي نفسك !
هزت رأسها لأنها بحاجه للسوق حابه تطلع تتنفس من أجواء هذا البيت !
الجازي بابتسامة : ليه ما تختلطين ببنات خالاتك والله إنهم عسل
قاطعتها رونق وهي تجلس على الكرسي مقابل لها : ما أحب الاختلاط وما أحب الأصدقاء ولا اؤمن بالصداقه!
أنا ما أصادق إلا الكتب على الأقل إن تركتها ما تطعني بظهري صح ؟!
الجازي عبست ملامحها بضيق من حال رونق وش هالعقل إلي فيها من لما جاءت ما تتكلم إلا بالقطاره وإن جلست الصمت رفيقها أو كتاب تطالعه غير كذا ما عندها !
تحاول معها لكنها محصنة نفسها بحصون وأسوار كثيره حتى ما أحد يقترب منها !
وبنبره حزينه مجروحه نطقت : ليه دوم تصرون على جرحي يا التوأم ؟!
أنا ما عملت لكم شيء؟
ليه تعاملوني بهذا الجفاء؟ أنا أمك تعرفين وش يعني أمك ؟!
ليه تعامليني كذا !
رونق مطت شفتها بملل من هالحياه: انا ما عملت شيء !
اتوقع من حريتي أختار صديقات وما أحد يجبرني !
رفعت نظرها للجازي بوجع تتابع كلامها: ما تلوميني بداخلي أشياء ما يعلمها إلا ربي !
وما أحب أبوح فيها لأحد !
صدقيني أنا ما أكرهك بالعكس أحسك انسانه حبوبه ورائعة و العيب فيني !
خذيها نصيحه مني
انسي التوأم وعيشي حياه جديده مع عيالك .....كل منا رح يمشي بطريق صدقيني حنا ما نستاهل هذا الاهتمام ..
قاطعتها الجازي بقهر : كيف أنساكم تراكم قطعه من روحي
قاطعتها رونق بروح معدمه وكأنها مروان إلي يتكلم : والي فقد روحه يعيش حياه طبيعيه ؟!
انت كملت حياتك زوج وعيال ومبسوطه وتضحكين ....عن اي روح فقدتيها تتكلمين؟!
مريم كملت حياتها مبسوطه مع أم بديله وأبو متعلقه فيه والحين زوج وباكر عيال مكمله حياتها بسعادة ...عن اي روح تتكلمين ؟!
وأنا عايشه مع ابنتي_ بلعت غصتها _ مبسوطه كثيره وحنا متشتتات كل يوم بمكان الحمد لله وش تبغين اجمل من هالحياة !
غمضت عيونها للحظات وبداخلها تصرخ انا الي فقدت روح الحياه ...كل  واحد فيهم مكمل حياته وهي على الهامش ما أحد حاس بالنيران إلي بداخلها
الجازي زفرت بضيق : لا تقلبين المواجع عسى ربي ما يحرمني منك ..انت ما تعرفين غيابكم عني كيف مزق وجداني ..الحياه بدوكم ناقصه وما لها طعم وما تكتمل إلا باجتماعنا واجتماع ارواحنا ...رونق متى تحسين فيني انت وأختك ....انتظر على أمل نجتمع الثلاثه مع بعضنا
رونق بشبح ابتسامه : تأخر الوقت باجتماعنا يمكن لو اجتمعنا قبل كذا وبظروف غير رح يكون الوضع أفضل بكثير ...لكن الحين وش أبغى منك ومن أبوي !
يعني لو كنت انت وأبوي مو منفصلين كان الوضع اخف وأفضل بكثير ....يعني انت متخيله الوضع أم وأب منفصلين عن أي جو أسري نتكلم عنه ؟
إما تعيش عند زوج أمك ويتحكم بحياتك وغير نظرات الكره لأنك ابنة طليق زوجته أو تعيشين عند زوجة أب تحرث عليك ليل نهار وتقلب حياتك نكد !
هذه الحياه السعيده إلي أفرح فيها بعد ما لقيتكم ؟!
أنا كبيره ومب محتاجه لا حبكم ولا حنانكم ولا عطفكم ولا فلوسكم ...شوفيني هذا أنا كبرت وكونت نفسي بنفسي مب مثل أي بنت دلوعه ما تقدر تقوم بأمورها إلا بمساعدة أمها وأبوها !
خلينا نقفل السالفه أفضل لأنها بصراحه تنرفزني وما أبغى أقول كلام يجرحني قبل ما يجرحك خلي كل شيء للأيام يمكن تتغير الحياه !
خليها للأيام تداوي جروحنا !
الجازي رفعت حاجب وعيونها تلمع بالدموع على حال رونق والنفسيه إلي تعيشها : فياض ضايقك بشيء ؟!
أو يناظرك بكره او
قاطعتها رونق بضيق،: أنا أقول مثال لا تدققين
الجازي بدفاع : صدقيني فياض انسان رائع قلبه كبير
ابتسمت رونق بمجامله : الله يهنيك معه !
دخل وسيم : ماما بابا ينادي عليك ديما تبكي
الجازي بضجر ناظرته : اسبقني وأنا ألحقك
ناظرت رونق : جهزي نفسك بعد المغرب !
زفرت رونق بضيق من الحياة ...تجبرها تتواجد بأماكن ما تبغاها !
دفنت وجهها بالكتاب وهي متأكده من شيءواحد ما رح تطول هنا ام فياض ما تنطاق ما تدري كيف أمها متحمليتها !
*•
*•
•*

جواد بترقيع: أنا اتوقع ما هو قصدها !
ابو جواد بغضب : كيف مب قصدها وهي تقول لها بوجهها إنها مجرد مربيه وما خلتها تقرب من مريم !
ربت مريم أحسن تربيه كيف تقول كذا !
وفوق هذا فشلتنا مع أم راكان وضربت راكان
جواد بضيق من رونق ما تركت له مجال يرقع عنها ...نطق بضيق : بس راكان ما يطلع له يمد يده عليها
ابو جواد  بقهر من كلامه: الرجال اعتذر منك وقال مب قصده ....الموقف جعله يتصرف بدون وعي والسبب ابنتك!
ام جواد للحين مقهوره: يرحم أيام الجازي مسكينه بالنسبة لها ...سبحان الله أخذت القو كله من حنين وراثه إلي برأسها تعمله وما يهمها أحد!
بدر باستدراك : الا قولي مثل نايف رامي كل العادات والتقاليد خلف ظهره وإلا ناسيه سوسن فضحتنا مع زوجها بمشاكلها إلي ما تنتهي وإلا نسيت شذى لسانها وش طوله والأهم أبوها رأسه يابس
قاطعته ام جواد :الحين طلعت كل هالعيوب بعيالي !
على الأقل عيالي يحترمون إلي اكبر منهم
ابو جواد خلاص فاض المر على المرار ما يتحمل تصرفاتها أكثر ...نطق بأمر حازم : اسمعني تسحب اوراقها من الجامعه هذه لو تدرس دراسات اسلاميه ما ابغى تدخل الجامعه
جواد برفض لكلام أبوه: مستحيل!
تصرفها بالخطوبه شيء ودراستها شيء ثاني لا تخلط الأمور
بدر بتأييد: صحيح دراستها ما لها علاقه حنا ما نبغى نظلم البنت ونحرمها من الدراسه
ابو جواد برفض : إذا درست ما تكمل طب
جواد عقد حواجبه :يا يبه طول عمرك تقول البنت ما لها دراسه إلا معلمه أو طبيبه حنا إذا مرضت حريمنا نطلب دكتوره من وين نلقى اذ
قاطعه بقهر : ابنتك هذه قويه باكر إن صارت دكتوره مين يقدر لها !
الا من الحين قص جنحانها خلها تجلس بالبيت ...صدقني إن كملت دراسه ما تقدر تنطق اسمها ..
نايف رفع حاجب: طول ما هي جالسه عند وليد ما رح تتقبلكم أكيد عمتي حنين تحش برأسها كذا !
ام جواد بتأكيد : وأنا اقول كذا ..انتم ما شفتم كيف بالخطوبه نافشه ريشها حنين وتناظر بشماته
بدر يناظر ساعته : تأخر راكان وزياد !
ام جواد وهي تقوم : الحين يوصلون أنا رح ادخل أشوف أخواتك
زفر جواد بضيق بعد خروج امه !
وقت قصير دخل راكان وزياد .....ابو جواد باهتمام بعد ما جلسوا : كيف ظهرك الحين
هز رأسه راكان :-الحمد لله اليوم أفضل بكثير
المهم خلينا الحين بسالفه رجوعها
ابو جواد بتفكير: كيف نرجعها لو يطلع بيدي إلا اسحبها من شعرها هالكلبه
جواد صحيح متضايق من تصرفاتها إلا إنه ما يحب احد يتكلم عليها ..عفس ملامحه وناظر نايف إلي تكلم : أنا عندي الحل أسحب قدر منها وقتها رح تضطر ترجع غصب عنها
جواد برفض قاطع : مستحيل أقبل انكم تحرقون قلب ابنتي مستحيل وأنا حذرتك من قبل يا نايف لا تقرب من قدر دامها مع رونق !
راكان رفع حاجب؛ بالعكس فكره نايف ممتازه ..
جواد برفض : قلت لا يعني لا
زياد ابتسم بسخريه : نرضى لغيرنا ما لا نرضاه لأنفسنا
المهم الحين عمها مرعي على وصول عن طريقه رح نرجعها لهنا وبرضاها !
جواد عقد حواجبه : كيف يعني!
زياد بهدوء: الحين يوصل وتعرف
**
**
**
مريم ناظرتهابضيق:حتى راكان زعلان مني يقول متى ما رضيت أمك أكلمك !
أنا والله مب قصدي اقول كذا بس أنا تضايقت لما طردوك !
ام عبدالله بضيق : أول مره أحمل بنفسي على أحد بصراحه اختك ما عندها ذوق ...احسها بس حضرت الحفله حتى تصغرني وتطردني !
مريم بأسف : والله اني تضايقت علشانك بس وش يطلع بيدي وقتها وفوق هذا تضربني وتضرب خطيبي وش هالأخت الهمجية
ام عبدالله مطت شفتها : أبوك متضايق حيل وخاصه بعد الاشاعات الي طلعت إنها رونق تبغى راكان وانقهرت لأنه خطبك علشان كذا خربت الحفله !
مريم فتحت عيونها بذهول : مين قال هالكلام !
الجازي هزت كتفها بلامبالاه: الحريم خليها تستاهل هي جابته لنفسها !
مريم بتحليل : معقول كانت عينها على راكان كونها اشتغلت عنده وانقهرت لأنه خطبني!
الجازي باستبعاد: ما اتوقع كل هدفها تخرب الحفله حتى تنتقم لأمها !
مريم عقدت حواجبها : تنتقم ليه ؟!
ماما خربت بيتها بتصرفاتها لو كان رجال ثاني كان ذبحها بعد ما ضيعت بناته بس بابا اكتفى وطلقها ...وبعدين اي زوجين يصير بينهم مشاكل وينفصلوا خلاص ليه حاقدين على بابا كذا !
الجازي تنهدت : بس ما هو ذنب الجازي إنكم انخطفتم اي إنسان يتعرض لمثل هذا الموقف ...يعني لو أبوك ما حرم الجازي منك ما كان أمك حقدت علينا !
مريم بصراحه :مب قادره أحس إنها أمي اقنع نفسي للحظات وبعدها ما أقدر أجاملها أكثر من كذا !
تدرين مروه وجمانه يقولون لي إني باين اكبر منها واغلب للناس تقول البنت باينه أكبر من أمها بصراحه أنا انقهرت يعني لذي الدرجه أنا باينه كبيره وفوق هذا راكان شافها ويقول ظنيتها العروس انقهرت يا ماما !
الجازي مطت شفتها بعد ما غزتها مشاعرالغيره فعلا الجازي مب باين فيها العمر وكل فتره تزيد جمال وما يتصدق إنه التوأم بناتها : يمكن لأنها قصيره واقصر منكم الناس تقول كذا !
مريم بتردد نطقت : حتى يقولون كيف عمي جواد تركها لو يشوفها إلا يندم
الجازي انتفخت ملامحها : ترى مروه وجمانه ما عندهم إلا فلسفه زايده وأبوك لو بغاها أو كانت بنفسه ما طلقها !
**
**
**
**
ناظرت الجوال باستغراب وهي تشوف رقم عمها مرعي ...ردت بتوجس تخاف صار لجدتها شيء : الو
_ هلا رونق كيفك !؟!
ردت وهي معقده حواجبها ودقات قلبها زادت : بخير ..عمي انتم بخير ...جدتي بخير ؟ ومروان
قاطعها وهو يناظر إلي حوله وبعدها نطق باتقان نبرة الضيق : من وين يجي الخير يا رونق من وين ؟!
ردت برعب : صاير شيء؟
مرعي بضيق : نأكل المر ونتجرعه من بعد سالفتك كل يوم تحقيق وسوالف ما تنتهي والحين المحامي يهدد رح يسجني أنا وجدتك
قاطعته بحده : ما هو على كيفه وانت صدقته ما في دليل واحد ضدكم ...عمي لا تكون ضعيف كذا ويلعب عليكم هالمحامي النصاب !
كل الأنظار توجهت لراكان بعد كلام رونق وتحول وجهه للون الأحمر
جواد ناظره برجاء يمسحها بوجهه !
مرعي ناظرهم بحيره وش يرد عليها !
راكان أشر له يحط كتم ....وبعدها تكلم قول لها إني اقدر ألعب بالقضيه وأقلبها ومن هذا الكلام حاول اضغط عليها
هز مرعي رأسه بتفهم ورجع للمكالمه ..ورونق مسهبه بالكلام : عمي انت معي ؟!
مرعي بتلعثم :ءءء ايه معك بس يا رونق هذا المحامي مب سهل قلت له هالكلام ما في دليل علينا يقول عنده واسطات يقدر يقلب القضيه ويرمينا بالسجن ...يهون عليك آخر هالعمر أنا وجدتك يسحبونا للسجن
خلاص ارجعي لبيت ابوك وهو يقول مستعد يتنازل عن القضيه !
وش قلت ؟!
قلبها نغزها في مؤامرة حولها ...ردت وهي رافعه حاجب : طيب انت وين الحين ؟!
رد بتلعثم : ءءانا طالع بالسياره
نزلت حاجب بعدم تصديق : يعني راجع للقريه
ناظرهم وهو متورط من اسئلتها : ايه على الطريق قريب أوصل
مطت شفتها وبداخلها غيض من كذبه: وليه ما اسمع صوت للسياره
رفع عيونه للسقف بصبر ما له صبر على كثر الأسئلة : لا حووووول ولا قوة الا بالله !
انت جالسه تحققين معي ؟!
يا بنت الحلال ترى وقفت على جنب وجالس اكلمك تبغين اتخالف وأنا أكلمك !
الحين قولي لي وش قلت ؟!
زمت شفتها بضيق وهي للحين قلبها ناغزها : طيب شغل السياره خليني اسمعها من زمان ما سمعت صوتها
جواد ناظر أبوه وهو كاتم غيضه من رونق فعلا ترفع الضغط !
زياد زفر بإحباط لأنه متأكد إنها كشفت لعبة عمها !
يا قو هالبنت !
مرعي يظهر نبره غاضبه حتى يخرج نفسه من المآزق: انت جالسه تكذبيني !
خلاص انسي طلبي ورقمي احذفيه دامك تكلميني كذا !
وإلا شفت أهلك و تكبرتي علينا حنا
قاطعته رونق : عمي ممكن دقيقه خليني اتكلم
رد بغضب : تكلمي بالموضوع والله لو دخلت بسوالف ما لها طعم إلا اقفل الجوال
ابتسمت بألم : ما تخاف رح ارد على كلامك ...شوف يا عمي انت تعرف كم اغليك وأعزك أكثر من أبوي إلي طلع لنا فجأه
جواد فتح عيونه باستنكار وهو يسمع كلامها !
وضع بدر يده على فمه يمنع ضحكته تطلع !
تابعت رونق بنفس الهدوء : وما أردك لو طلبت روحي لكن هذا ما هو طلب منك !
قول للي جالسين حولك وأولهم المحامي ما أحد يجبرني على شيء ما أبغاه لو على رقبتي ...طرقهم الملتويه ما تمشي معي ...انا متى ما بغيت اعيش عند أبوي ما انتظر الإذن من احد افتح الباب وادخل !
يا عمي انتم أهلي إلي ربيتوني
راكان بصوت هامس ما يسمعه مرعي : ازفت تربيه !
نايف ناظره وكتم ضحكته على تعليقه !
تابعت رونق كلامها : انتم ربيتوني وما رح انسى فضلكم علي .. أتمنى يا عمي لا تكون لعبه يحركها المحامي على كيفه ...إلي خطفني مات الله يرحمه وما لهم عندك وعند جدتي شيء واحد ...بالعكس المفروض تطالبهم بكل فلس صرفته جدتي علي كتعويض وغير كذا ما عندي !
والحين رح اقفل سلام !
قفلت الخط وهي شاده على الجوال بقوة : نذل حقير !
أحقر من راكان ما شافت الحين يبغى يضغط عليها عن طريق أهلها بالقريه !
لازم تبعد عن المنطقه كيف ؟!
ما تقدر تعيش لوحدها هي بنت والدنيا ما فيها امان !
رفعت رأسها وهي تفكر لو تزوجت أبو فياض وقتها تقدر تبقى قريب من أمها وتهتم بقدر وهي تكمل دراستها ومن لما تتخرج يكون أبو فياض ميت اكيد إنه عجوز ومنه تقهر أم فياض ...ابتسمت على أفكارها لو تسمعها أم فياض !
ضحكت بصوت عالي وهي تتخيل شكل أم فياض ...من زمان ما ضحكت ....توسعت ابتسامتها وهي تشوف قدر تناظرها باستغراب !
بس لحظه هذه فكره ما هي بطاله تتزوج ابو فياض .....
**
**
**
مرعي قفل الخط وناظرهم باستسلام: هذا إلي قدرت اعمله .....وهذا أنا عملت مثل ما طلبت مني والحين اسمح لي
بدر بهدوء: اجلس تعش
قاطعه مرعي وهموم الدنيا فوق رأسه: تسلم بس الطريق طويل وما أقدر أتأخر !
استأذن وغادر وهو يناظر حوله بإعجاب ...بيوت راقيه وحضرتها ما هو عاجبها هالنعيم ....طول عمرها رأسها يابس وتفكر بطريقه غريبه
راكان ناظر جواد وهو عافس ملامحه: ابنتك هذه ما ينفع معها إلا القوة يبغى لها تكسير رأس
ابو جواد انفجر منها : والله يبغى لها واحد يكسر رأسها وين قوتك ياجواد يرحم ايام الجازي الحين ابنتك مب قادر تمشيها على الصراط !
جواد زفر بقهر: قلتها بعظمة لسانك يا يبه ابنتي !
اذبحها وأنا طول السنين احس بغصة فقدها وبعد ما لقيتها تبغاني اذبحها !
راكان بتفكير : طيب اخطبوها لواحد من عيالكم شاوروها يمكن ترضى !
ابو جواد اكتساه الهم: يا وليدي رونق معها بنت صعب ما أحد رح يقبل فيها من العيال !
دخل عليهم بعد ما سمع كلامهم وبتردد نطق : انا اخطبها على سنة الله ورسوله
جواد عفس ملامحه بغضب وقبل ما يتكلم نطق زياد بنبره غاضبه: وقص يقص لسانك يا قليل الأدب
بدر بضحكه وهو متكي بروقان: وش فيك على الولد أكلته ..وبعدها ناظر اياد:وين أبوك؟
اياد رفع حاجب وبضجر رد: أحد قالكم اني أحمله 24 ساعة بجيبتي !
جواد عباره عن بركان وجاء مين ينفجر فيه : صدق أبوك ما رباك ولا علمك سلوم العرب
ابو جواد ابتسم لإياد هذا الولد له ميزه عنده : علامكم عليه !
زياد بانتقاد: تراكم تخربونه بهذه
التربيه انت وأبوه تراه مب صغير
اياد وقف وهو ينفش ريشه: هذ ا انت قلتها بعظمة لسانك مب صغير ...خلاص أنا قررت أخطبها سمعت انها تدرس طب يعني من هنا لوقت ما اكبر تكون تخرجت وتوظفت وجهزت البيت
قطع كلامه وخلال ثواني هرب لما وقف زياد وهو ناوي يعطيه كم علقه!
ا بو جواد بلوم : وشفيك حاط عقلك بعقل هالبزر
زياد بحده : تراه مب صغير يا عمي عمره 14 سنة !
وبعدهاناظر راكان بغضب : انا كم مره قلت لك سالفة زواج رونق تنساها وترجع وتفتحها وكأنك تعاند !
رونق ما رح تتزوج إلا بعد ما تتخرج وتكون ابنتها كبرت وهي اعتمدت على نفسها بعدها رح تتخذ قرار زواجها بنفسها بدون اي ضغوط حالها حال اي بنت بعمرها تفهم !
ابو جواد باعتراض: كلامك ما هو منطقي ابدا،!
انا مب راضي بدراستها تبغى البنت تدرس هالتخصص المختلط وهي ما في خلفها رجال
قاطعه زياد بنظرات قويه :ترى لها أب إذا نسيت يا عمي !
ابوها خلفها يحميها
البنت إلي ما يكون أبوها وأخوها سند خلف ظهرها مكسورة السند يا عمي !
وبعدين كثير بنات درسوا وتخرجوا وتوظفوا وسمعتهم الكل يشهد بأخلاقهم الطيبه !
المفروض ما نخلط بالأمور ...رونق رح تكمل دراستها وقدر معها وما أحد يعترض طريقها !
بدر بضحكه: والله احسك أخذت دور أبوها !
جواد اعجبه كلام زياد خمد شوي من النار إلي يحسها بداخله !
زياد رد على كلام بدر : رونق من لحمنا ودمنا وانا اعتبرها مثل بنات أختي ... أبغى مصلحتها!
نايف خزه بس ما قدر ينطق بحرف وهو خايف من عواقب كلامه وهو متأكد 100% إنه زياد مخطط على رونق !
راكان بهدوء: طيب الحين رح نمشي على كلامك ..اعطيني طريقة ترجع فيها الى هنا !
زياد بثقه : رح ترجع صدقني وبنفسها مستحيل تحس بالاستقرار عند فياض رح تحس نفسها ثقيله عليهم ..ورح تطلع بنتيجه ما لها إلا ابوها وهو مجبور إلي يتحملها !
راكان باستياء : ومتى ييجي هاليوم ؟!
زياد تنهد وناظر نايف : سبب نفورها من أهل أبوها هو نايف
نايف بغضب وقف : انتم كل شيء تحطونه فيني ترى
قاطعه زياد وهو معقد حواجبه : ايه انت السبب البنت رافضة تقبل بحقيقة إنه جواد أبوها حتى ماتواجه الواقع إنك عمها !
شوفها كيف تقبلت أهل أمها واختارتهم قبل ما تشوفهم !
بدر بتأييد : كلامك منطقي وعين الصواب ...طيب بذي الحالة وش الحل ؟
جواد ناظر نايف بغضب وهو شاد على اسنانه: كله منك ومن أخلاقك المنحطة أنا لو ذبحتك ما أحد يلومني
نايف رفع يده بتهديد : عاد من زين ابنتك لا تخليني اسحب منها البنت وأحرق قلبها ترى ما اسمح لك تناظرني كذا وتكلمني بأسلوبك الخايس هذا كلما جبتم سيرة بلقيس !
والله حاله !
ابو جواد أعطى نظره لجواد يختصر بعدها ناظر نايف : اخوك مب قصده
الحين وش الحل كيف نرجعها ؟!
بدر بتفكير : أنا أقول خليها عند أمها وانت يا جواد بين كل فتره تزورها مع الأيام تعتاد على هذا الشيء وترجع عندك يعني خلينا واقعيين شوي إذا أمها كلمتها عن معاملتك معها أيام زواجها اكيد البنت رح تنفر منك
قاطعه جواد وهو معصب: نعم نعم !
أنا وش عملت فيها ؟!
لو كنت مكاني ما تحملت تصرفاتها دقيقة !
زياد بمقاطعه: هذا ما هو موضوعنا ..حاليا نعتمد فكرة بدر نهاية الاسبوع نسق زياره لها وخلال الأسبوع اتصل فيها تطمئن عليها وهذا رقمها سجله عندك !
نايف مط شفته بسخريه بعد ما عقد حواجبه وبداخله «ومعه رقمها يا سلاااام »
جواد ما علق على الرقم لكن بداخله تضايق رقمها مع زياد ومحتفظ فيه!
ابو جواد ما اهتم للسالفه لأنه يثق بزياد ويعرف انه ما هو من النوع اللعوب !
بدر بتذكر : لاتنسى لها مصروف أكيد إنها بحاجه لمصروف وفياض ما هو ملزوم فيها وانت يا نايف أرسلت لقدر مصروف !
نايف عفس ملامحه: مب اختارت فياض خلي فياض يصرف عليهم !
انا يا دوب أقدر اصرف على بيتي
راكان خزه بقوة: مقطع حالك مصروف وسعاد طول الوقت تشكي من شحك
قاطعه بقهر : ناكرة المعروف
راكان خزه : أقول ترسل لابنتك المصروف وانت ما تشوف الطريق !
ابو جواد بهدوء: رح يرسل لا تخاف !
رجع اياد دخل وبتهديد : تراني علمت أبوي عنكم ويقول لكم البنت ما تطلع غريبه وولد عمها أولى وأنا ولد عمها ومحيرها لي
قاطعه بدر بابتسامه: الأحق ولد عمها إلي مجهز نفسه وليث سبقك وحيرها له وأنا موافق على الخطوبه والحين مالك شيء !
انقلع برا !
زياد ناظر بدر بتفحص يشوف معالم وجهه حتى يعرف إنه يمزح او يتكلم بجديه !
اياد بغضب: بس انا خطبتها قبل ولدك المهبول!
جواد ناظره وما هو رايق له : خطبت قبله ورديناك يلا وريني مقفاك قبل ما أقوم واعلم بالعقال على ظهرك ..ترى قلبي يغلي والله إن وقعت بيديني ما تطلع سليم ..انقلع لا بارك الله فيك !
اياد انقهر برد عمه ...وبنبره حاول ما يظهر قهره :من زين ابنتك أنا أصلا حزنت عليها وخطبتها لأنها ما أحد رح يناظر وجهها ..ما بقى إلا أتزوج مدمنة مخدرات
بلع آخر كلمه وحاول يهرب لما شاف جواد قام مثل الثور الهائج ..تعثر بخطواته ...وسرعان ما انقض عليه جواد مثل الأسد إلي مسك فريسته!
ابو جواد بتدخل ؛: اتركه يا جواد تراه جاهل
زياد اقترب من جواد : إلا يستاهل كم علقه تسنعه حتى يوازن كلامه!
بدر بتدخل : اتركه يا جواد اخاف يعملها على نفسه شوف كيف وجهه صار ؟ !
جواد وهو صاك على أسنانه هزه من ثوبه بقوة : وش هالكلام الي سمعته!
اياد وهو يبلع ريقه بخوف : ءءاا انا ما لي دخل سمعتهم يقولون كذا
زياد سكت للحظات وكأنه الزمن توقف وهو يتذكر كلام امه ولجين !
جواد بغضب وصوته يرعد رعد : مين الي يقول كذا !
راكان عنده علم بالكلام من كلام أمه ما يبغى تكبر السالفة ...مسك يد جواد : اتركه جاهل يتكلم بدون عقل
قاطعه جواد وعيونه تشع شرار ويهز اياد إلي كان مثل الريشه بيده: مين إلي يقول
زياد حتى ما تكبر السالفة ...يخاف تكون اصل السالفه من عند امه ما هي حلوة بحقهم:-اتركه حتى يتكلم
بصعوبه تركه جواد : يلا تكلم
زياد أعطى اياد حركه بدون ما يشعرجواد حتى يهرب !
وما صدق خبر مثل الفأر هرب بسرعه من بين يدين جواد
جواد بغى يلحقه مسكه راكان: اتركه كأنك ما تعرف اياد ولسانه الطويل
جواد بغضب :انا لو هذا الولد عندي كان زمان ذبحته
نايف بسخريه :عندك ازفت منه بنت وش طول لسانها ويدها طويله وما عملت لها شيء
جواد بتهديد : انت انكتم أحسن لك
ابو جواد بضجر : لا حول ولا قوة إلا بالله
اسمعني يا جواد انا اقول من باكر تسحب اوراقها من الجامعه لانه كل شغلكم ماهو عاجبني هذه البنت ما تنعطى وجه نعطيها العين الحمراء شوفها سكتنا لجلستها عند أمها قامت تتمادى علينا انا مستحيل أقبل تكمل دراسه لازم نقص جنحانها قبل ما تحلق بعيد !
زياد تغيرت ملامحه من كلام عمه ...حاول تكون كلماته هاديه: عمي أنا قلت رونق تكمل دراسه إلا إذا بغيت تفشلني وتردني !
راكان بعدم قناعه: مع إني مب مقتنع بدراستها لكن يا عمي ما يصير تفشل زياد تراه ما هو صغير !
بدر يضغط على أبوه : والله ما يصير جالس في بيتنا ونرده !
صدقوني إذا فصلتها من الجامعه رح تتعقد الأمور أكثر حنا نحاول نعدل الأمور وانتم تعقدونها !
ابو جواد ما قدر يرفض وبعبوس رد : انا حذرتكم وقلت لكم ما تكمل دراسه باكر تندمون وتقولون يا ليت سمعنا كلام أبو جواد !
زياد هز رأسه بارتياح : لا تخاف إن شاء الله كل الأمور تمام !
**
**
**
**
**