رواية بيان الزين الفصل التاسع عشر 19 - بقلم هاجر الغريب

عند الدكتورة. زين: ها يا دكتورة طمنيني. الدكتورة: اطمني الأعراض دي طبيعية لأن مدام بيان حامل. زين: حامل؟ طب شكراً يا دكتورة. بيان طلعت من أوضة الكشف. بيان: إيه؟ طلع إيه؟ زين بفرحة: انتي حامل يا بيان. بيان: بجد؟ أنا حامل؟ الدكتورة: بس خلي بالك انتي محتاجة راحة تامة وتاخدي فيتامينات علشان انتي ضعيفة. الدكتورة كتبت لبيان الفيتامينات وأدوية وزين أخدها ومشوا. *** في عربية عمار. عمار: أيوه انتي زعلانة مني ليه دلوقتي؟

هنا بغضب: عشان تجاهلتني كأني مش موجودة فوق ولا كأنك اتفاجأت مثلاً إني جيت. عمار بخبث: معنى كده إنك كنتي جاية تعمليلي أنا مفاجأة؟ هنا بتوتر: وهعملك مفاجأة ليه يعني؟ عمار: عشان وحشتك مثلاً؟ هنا: لا طبعاً وتوحشني ليه؟ لو سمحت بقى روحني. عمار بتمثيل الحزن: اممم... يعني مش بتحبيني خلاص يا هنا؟ أنا... هنا: لأ... لأ... بحبك مين قال كده. عمار بخبث: بتحبيني؟ هنا وشها احمر واتكسفت. هنا: لأ طبعاً... لـ... لو سمحت روحني.

عمار غمزلها: ماشي. *** في القسم. مراد: الو مين معايا؟ المجهول: تطلع على السيوطي وإلا القمر بنتك في خطر. مراد: أنت مين؟ المجهول قفل. مراد: الووو! دخل نادر على صوته. نادر: فيه إيه يا مراد؟ مراد: فيه حد كلمني في التليفون وقال تطلع على السيوطي وإلا بنتي في خطر. نادر: مش ممكن يكون بيشتغلك؟ في اللحظة دي وصلت رسالة على تليفون مراد. مراد: دي صورة بنتي هنا فعلاً... دول بيراقبها. نادر: استنى... مين اللي معاها؟

مراد: خطيبها عمار. نادر: طيب اتصل بيه بسرعة يطلعها البيت بأسرع وقت. مراد: صح عندك حق. واتصل بعمار. عمار: الو أيوا يا عمي في حاجة؟ مراد: فيه عربية ماشية وراك. عمار: آه فيه بس مالها؟ مراد: العربية دي مراقبينك... عاوزين هنا. عمار: متقلقش يا عمي أنا هضللهم. مراد: عمار هنا أمانة معاك أرجوك. عمار: متقلقش يا عمي أنا هحميها بروحي... سلام دلوقتي. عمار قفل مع مراد. هنا: فيه إيه يا عمار؟

عمار: هنا أنا عايزك تنزلي في العربية من تحت تمام. هنا بخوف: ليه؟ فيه إيه؟ عمار: اسمعي الكلام يا هنا... انزلي تحت. هنا نزلت بخوف. وعمار حاول يضلل العربية واتصل بزين. زين: الو. عمار: زين الحقني أنا محتاجلك. زين بقلق: فيه إيه يا عمار؟ عمار: فيه عربية ماشية ورايا بتراقبني وعايزين ياخدوا هنا... بحاول أضللهم بس مش عارف. زين: طيب أنت فين دلوقتي بالظبط؟ ابعتلي اللوكيشن وأنا هاجي. عمار: تمام سلام.

عمار: هنا امسكي ابعتي اللوكيشن لزين. هنا: حاضر. وأخدت التليفون وبعتت اللوكيشن. العربية بدأت تضرب نار عليهم. عمار: اوعي تطلعي يا هنا. هنا بدأت تبكي: عمار خلي بالك. عمار حس بخوفها: متخافيش يا هنا مش هسيبك... ركزي معايا دلوقتي أنا هعدي جنب رصيف من غير ما ياخدوا بالهم وعايزك تنطي بسرعة. هنا: لأ مستحيل مش هسيبك. عمار: أرجوكي اسمعي الكلام يا حبيبتي متخافيش أنا هرجعلك... خلي تليفونك معاكي مفتوح واجري استخبي في أي مكان ماشى؟

وأنا هوصلك. هنا: لاااااا مش همشي. عمار: هنا يلا دلوقتي جهزي نفسك أنا هقلل السرعة... متخافيش افتحي الباب ونطي بسرعة. هنا: استنى أنا بحبك أوي... ارجوك استخبي في أي مكان وخلي بالك على نفسك. هنا بدموع: حاضر. وعمار قرب بالعربية من رصيف من غير ما يشوفوه وهنا نطت واستخبت لحد ما مشوا ورا عمار وجريت بسرعة استخبت في بيت. عمار اتصل بمراد. مراد: الو... إيه اللي حصل؟ عمار: متقلقش يا عمي هنا في أمان مستخبية في مكان...

تليفونها معاها... العربية ماشية ورايا أنا متخافش... حاول توصل لهنا بسرعة وتجيبها. مراد: حاضر أنا بعتت قوات وراك على اللوكيشن اللي زين بعتهولي... متقلقش هيلحقوا يوصلوا. عمار: تمام سلام يا عمي. عمار حاول يضللهم بس للأسف قطعوا عليه الطريق وأخد رصاصة في صدره... وقبل ما يروحوا للعربية كانت القوات جت وقبضت عليهم وخدوهم على القسم. زين بعد شوية وصل للمكان ولاقى عمار متصاب. عمار: زين وصلت أخيراً.

زين: متقلقش يا صاحبي هتقوم وتبقا كويس... خليك معايا بس متنامش خليك فايق. عمار بتعب: خلاص يا صاحبي... خلي بالك من أمي وأختي وهنا علشان خاطري. وغمض عينه. كانت الإسعاف وصلت وأخدوا عمار على المستشفى. *** هنا: أنا آسفة والله بس أرجوكم خلوني هنا لحد ما بابا ييجي ياخدني. دلال: تعالي يا بنتي متخافيش اهدى... إيه اللي عمل فيكي كدا؟ هنا حكت لدلال اللي حصل. دلال: متخافيش يا بنتي أنتِ هنا في أمان... تعالي اغسلي وشك. ***

عربية الإسعاف وصلت المستشفى. زين: دكتور بسرعة. الدكتور: حضروا بسرعة أوضة العمليات. وأخدوا عمار على العمليات. زين كان واقف قدام الأوضة وعينه دمعت علشان صاحبه... بيان اتصلت بيه. بيان: زين فيه إيه حصل؟ وهنا وعمار فين؟ زين: اهدى يا بيان... عمار اتصاب ودخل العمليات... وهنا مستخبية في مكان معرفش فين. بيان بدموع: إيه؟ طب وأنت كويس؟ قول لي فين المستشفى. زين: اهدى أنا عايزك متتحركيش من عندك مفهوم؟ متنزليش خليكي عندك.

بيان: حاضر.