رواية بيان الفصل العاشر 10 - بقلم حسناء رمضان

حمدلله على السلامة. أنا فينعمر: في المستشفى. مامتها: بيان، بيان فينعمر: اهدي، أنا بعت ناس يدوروا عليها وكمان الحكومة بتدور. مامتها بعياط: يلهوي، أكيد عمل فيها حاجة. عمر: إن شاء الله خير، متقلقيش. مامتها: مش ههدى غير لما ترجعلي بنتي، أنا السبب، ياريتني ما طاوعتك وجينا معاك. عمر: اهدي بس، أنا قلتلكوا متخرجوش من البيت ولا تفتحوا الباب حتى. مامتها: يبني بالله عليك قولي بنتي فيها إيه.

عمر: مفيهاش حاجة والله، صدقيني بيدوروا عليها في كل حتة، ودلوقتي هوصلكوا البيت وأروح أنا كمان أدور عليها. مامتها: لا لا، روح دلوقتي، روح دلوقتي، مش مهم أنا، المهم هي، روح بالله عليك قبل ما يعمل فيها حاجة. عمر: مينفعش أسيبكوا هنا لوحدكوا. مامتها: بالله عليك يابني اسمع الكلام. عمر: طيب، هجيبلكوا حد يروحكوا، وإياك تخرجوا من البيت تاني أو حتى تفتحوا لحد. -بيان: أنت عايز مني إيه؟ ابعد عني، خلي عندك دم.

كرم: الله، مش قولتي موافقة تيجي معايا؟ بيان: حرام عليك، حرام عليك، أنا عملتلك إيه؟ أنت اللي حاولت تأذيني. كرم: لا كدا مش هينفع، يلا يحلوة، معنديش وقت، وبعدين جبتلك أكل حلو أهو، يلا. بيان: مش عايزة منك أكل. كرم: خلاص، ندخل في الموضوع على طول. بيان: لا لا، خلاص هاكل، طب أنا عايزة أروح الحمام. كرم: دا وقته. بيان: أعمل إيه، عايزة أدخل الحمام، مش هتأخرك. كرم: وماله، تعال.

دخلت الحمام وهو مراقبها من مكانه، طلعت الفون وحاولت تبعت رسالة لعمر. كرم: ها. بيان: جاية ثواني. حاولت ترن عليه وتكتم الصوت بس هو كان أسرع منها وفتح الباب عليها وخطف من إيديها الفون. كرم: مش بقولك اللي زيك مينفعش ييجي بالذوق. -عمر شاف الرسالة بتاعتها ووقف بالعربية، حاول يرن عليها تاني بس مجمعش معاه. طلع رقم ورن عليه. عمر: محتاج تتتبع الرقم دا بسرعة، أنا جايلك. -أحمد: شوفت يمعلم، هرب واحنا اللي لبسنا الليلة كلها.

محمود: مانا قولتلك بلاش، شوف هتخرجنا إزاي بقى من هنا. أحمد: أعمل إيه يعم، أبوه قالي أقول كدا وأشهد معاه، أقوله لأ إزاي. محمود: واحنا استفدنا إيه دلوقتي، أنا مش هتحبس بذنب حد داير في الشوارع بحريته، أنا معملتش حاجة، لو رست هقول إن المنياوي هدّدني وأجبرني أشهد، مينفعش أتحبس. أحمد: والله! ، والمنياوي هيسكت، صح!

محمود: أمال أعمل إيه، أتحبس ليه وأنا معملتش حاجة، الأولى يكون كرم اللي هنا مش إحنا، تلاقيه دلوقتي هربه بره البلد واحنا اللي نشيل الليل. أحمد: لا اهدى، متتهورش، أنا هقوله يحاول يخرجنا، ولو معرفش يعمل حاجة نقول إننا اتهددنا، لكن استنى لحد ما نشوف هيعمل حاجة ولا لأ. محمود: أمي عيانة ياحمد، مفيش حد معاها. أحمد: يعني أنا اللي لوحدي، مانا عندي أختين لوحدهم. -تقى: ماما هيلحقها صح؟

مامتها: أيوا، أيوا إن شاء الله، ادعي، ادعي ياتقى اختك تكون بخير، يارب، يارب جيب العواقب سليمة يارب، يارب ملناش غيرك، يارب خليك معاها. -عمر: يلا بسرعة. ركبوا العربية وطلعوا بسرعة ع المكان اللي الرقم رن منه. -بيان بصريخ: ابعد عني، ابعد عني، حرام عليك. بتحاول تقاومه بأي طريقة وهي بتصرخ وهو بي*قطع لها هدومها. مدت إيديها جنبها مسكت حاجة و*خبطته بيها على دماغه وقامت بسرعة.

طلعت تجري لحد ما وصلت للباب وبتحاول تفتحه بس كرم كان قافله ومعاه المفتاح. دورت حواليها على أي حاجة ملقتش حاجة، بس لقت المس*دس اللي كان مع كرم. مسكته ووجهته لكرم وهي إيديها بتترعش. كرم: هاتي اللي في إيدك دا. بيان: لو مبعدتش عني همو*تك. كرم: انتي عارفة أصلاً بيشتغل إزاي! ، اديني يحلوة عشان مزعلكيش مني. بيان: عندك، صدقني همو*تك لو قربت خطوة كمان. بدأ يقرب منها بالراحة وهي خايفة، غمضت عينيها وضربت ر*صاصة.

فتحت عينيها بالراحة وبصت عليه لقته ع الأرض، الر*صاصة جت في رجله. كرم: اااه، صدقيني محدش هينجدك مني، اااه. بيان: اديني المفتاح وإلا هفر*تك دماغك. كرم: اعملي كدا، حتى لو ق*تلتيني، عارفة هيحصل فيكي إيه، عارفة هيحصل في أمك وأختك إيه، أبويا هينس*فهم، هيقطع*هم حت*ت قدامك. كلامه خوّفها بس فضلت رافعة في وشه المسد*س. فضلت كدا وهو بيتوجع قدامها وهي بتعيط، فجأة الباب اتزرع جامد وهي صوتت ورمت المسد*س من إيده. بيان: عمر!

عمر بص لها وشاف لبسها المقطع وهو مصدوم. جرت عليه حضنته وهي بتعيط. عمر: اهدي خلاص مفيش حاجة، متخافيش. بيان: ماما فين. عمر: بخير متقلقيش، خلاص بطلي عياط. خدها ركبها العربية والشرطة وصلت المكان وخدت كرم المستشفى. عمر: عملك حاجة. بيان بعياط: لأ. عمر: هدومك مقطعة. بيان: قطع لي هدومي وأنا عرفت أجري منه. عمر: طيب، محتاجين نغير اللبس دا عشان والدتك متتخضش عليكي أكتر من كدا. قاعدة باصة في الأرض وبتعيط.

عمر: بيان، بيان متعيطيش لو سمحتي، صدقيني أنا هخليه يتحاسب على كل ده. بيان: أبوك هيسفره بره أكيد. عمر: لا، مش هسمح ب دا أبداً، صدقيني هقف معاكي، وأهو اتقبض عليه، يلا لو سمحتي امسحي دموعك عشان والدتك متتعبش، وياريت تقولي لها إني وصلت على طول ومعملكيش حاجة، احم، حتى لو كان عمل. بيان: معملش. عمر: طيب. -حرم المنياوي: يعني إيه اتقبض عليه. المنياوي: بس سيبيني أروح له. حرم المنياوي: رد عليا، قبضوا عليه إزاي.

المنياوي: ات*ضرب بالر*صاص، ارتاحتي؟ حرم المنياوي: إيه؟؟ ، أنت بتقول إيه، مين عمل فيه كدا. المنياوي: بيان، بيان اللي عملت فيه كدا. سابها ومشي ومهتمش لكلامها، طلعت تلبس وراحت وراه. -مامتها حضنتها وهي عمالة تعيط. عمر: شوفتي، قلتلك مش هيحصل حاجة. مامتها: الحمدلله، الحمدلله يارب، طب وكرم؟ عمر: اتقبض عليه بس هو دلوقتي في المستشفى. مامتها: مستشفى ليه. عمر: أصل. بيان: ضرب*ته بالمسد*س ياماما. مامتها: يلهوي. بيان: جت في رجله.

عمر: متقلقيش مجرالوش حاجة، المهم بس ارتاحوا شوية عشان هاخد بيان معايا. مامتها: معاك فين. عمر: لازم ياخدوا إفادته. مامتها: لا بنتي مش هتخرج من هنا. عمر: متقلقيش مش هيحصلها حاجة، هتروح معايا وتيجي معايا. مامتها: إيه اللبس دا، أنتِ مكنتيش لابسة كدا. مامتها بصت لعمر ورجعت بصت لبيان بخوف. بيان: متقلقيش يماما محصلش حاجة، أنا بس هدومي اتبهدلت شوية.

-حرم المنياوي: أنا عايزة أعرف أنتوا لازمتكوا إيه، إزاي تسيبوها تمشي، دي ضر*بته بالر*صاص، أنتوا مجانين. الظابط: يهانم اهدي، هي ضر*بته بالر*صاص عشان كانت مخطو*فة، وحاول يعتد*ي عليها، يعني دفاع عن النفس. حرم المنياوي: ومين قال إنها كانت مخطو*فة، أكيد بتكدب. الظابط: لا يفندم مبتكدبش، عموما عمر بيه هيجيبها عشان ناخد إفادتها. حرم المنياوي: هي راحت مع عمر! المنياوي: أيوه، ابنك المصون هو اللي خدها.

حرم المنياوي: زودها، زودها قوي، يعني ساب أخوه المصاب وراح مع الجربوعة دي. -عمر خدها وراحوا عشان تقدم إفادتها، كانت خايفة وماسكة في عمر. دخلت قعدت وهو قعد معاها وفي وسط ماهي بتحكي اللي حصل، الباب اتزرع بقوة، بصوا وراهم لقوها. حرم المنياوي: أنتِ ليلتك معايا سودا، بقا أنتِ يابتاعة أنتِ اللي تعملي في ابني كدا! ، أول مرة عديتها، بس صدقيني المرادي مش هيكفيني ر*وحك. عمر وهو ماسكها: اهدي شوية، اهدي واعرفي اللي حصل.

حرم المنياوي: هيكون حصل إيه، الهانم مش مكفيها إنها كانت هتمو*ته قبل كدا، جايه تخلص عليه دلوقتي، أنا بس عايزة أعرف جايبه الجرأة دي منين. عمر: ابنك اللي خط*فها، عايزاها تعمل إيه يعني، تشكره؟ حرم المنياوي: لا تضر*به بالر*صاص، وبعدين ليه صدقت إنه خ*طفها، ماهي ممكن تكون بتكدب. عمر: لا مبتكدبش، انتي نفسك عارفة كويس إنه خطف*ها، بطلي تدافعي عنه بقى، هتفضلي كدا لحد إمتى، طلعتيه إنسان فاشل وصايع ومش متربي.

ضربته بالقلم على وشه، بيان شهقت من الصدمة والظابط قام وقف. الظابط: استهدوا بالله يجماعة، اتفضلي يفندم ارتاحي. عمر بص لها ببصة لوم وحزن هي فهمت سببها. عمر: في حاجة تاني ياحضرة الظابط ولا نمشي؟ الظابط: لا تقدر تتفضل يفندم. مسك إيد بيان وهو باصص في عين مامته وخدها ومشي. مشوا بالعربية وهو ساكت وملامحه جامدة وباصص قدامه. بيان بتوتر: أنا آسفة. رد عليها من غير ما يبصلها: على إيه. بيان: أنا اللي حطيتك في الموقف ده.

عمر: لا متتأسفيش، معملتيش حاجة. بيان: بس حصل مشاكل بينك وبين عيلتك بسببك. عمر: لا مش بسببك ولا حاجة. بيان: هو أنا ينفع أسألك سؤال. عمر: همم. بيان: هو انت ابنهم إزاي، قصدي يعني مش شبه بعض في أي حاجة خالص، شخصياتكوا مختلفة. عمر: يمكن عشان اتربيت بعيد عنهم. بيان: إزاي. بص ف الشباك ورجع بص قدامه بنفس الملامح فهي حست إنه مش حابب يتكلم، احترمت رغبته وسكتت. رجعوا البيت لقوا مامتها بتحضر الأكل.

مامتها: اقعد متمشيش لما تاكل لقمة. عمر: لا متشكر همشي. مامتها: عشان خاطري اقعد كل لقمة معانا، أنا خلاص قربت أخلص. عمر: طيب ماشي. مامتها: تعالي يبيان ساعديني. بيان: حاضر. دخلوا المطبخ وهو قعد ع الكنبة وسرحان، عينيه حمرا وباين عليه الإرهاق. -الظابط: يفندم كل حاجة بتدين ابنك، يعني كمان احتمال كبير يكون هو اللي ق*تل معتصم، دا هربان يفندم، صعب أقدر أساعدكوا.

حرم المنياوي: مفيش حاجة اسمها صعب، ابني مش هيدخل السجن، أنت فاهم. المنياوي: اسمع، أنا عارف إنك بتقوم بشغلك، وأنا محترم دا جداً، بس فيه استثناء في كل شيء، ودا كرم المنياوي، يعني اعقلها كدا! الظابط: يفندم. المنياوي: ولا فندم ولا غيره، أنت عارف المفروض تعمل إيه. -خلصوا الأكل وطلعوا لقوه نايم ع الكنبة. مامتها: ياعيني يابني، دا نعسان. بيان: كان باين عليه إنه تعبان أساساً.

مامتها: طب إيه، خلاص ادخلي هاتي غطيه بيها ويبقى ياكل لما يصحى. غطوه وسابوه لحد ما صحي. قام لقى نفسه نايم ع الكنبة ومتغطي ومفيش حد حواليه. قعد وفرك عينيه وقعد يكح. بيان: تقريباً صحي ياماما. مامتها طلعت: إيه يابني النوم دا كله، خضيتني عليك. عمر: هي الساعة كام. مامتها: إحنا المغرب، أنت منمتش بقالك قد إيه. عمر: مطبق. مامتها: طب يحبيبي ادخل اغسل وشك على ما أحطلك الأكل. دخل غسل وشه واتوضى وصلى وقعد ياكل معاهم.

تقى: عمو هو انت أنقذت بيان زي الأبطال بتوع التلفزيون وكدا! عمر: اسأليها وهي تقولك كنت زيهم ولا لأ. تقى: صح يبيان. بيان: اسكتي ياتقى. تقى: شوفت، أهي هي كدا على طول، تقعد تتخانق معايا بس. عمر: خلاص متتكلميش معاها تاني، اتكلمي معايا أنا. تقى: على فكرة أنا اللي عملت السلطة، حلوة؟ عمر: إيه دا بجد! تقى: ااه. عمر: وأنا أقول إيه الطعامه والحلاوة اللي في السلطة دي، أول مرة أدوق سلطة بالحلاوة دي بجد. تقى: بجد ياعمو؟

، هعملها كل يوم. عمر: ااه طبعاً، هتبقي ست بيت شاطرة. تقى: بس أنا مش عايزة أبقى ست بيت. عمر: ليه. تقى: هبقى مصممة أزياء وأعمل فساتين حلوة. عمر: الله، طب كويس، بس إيه المشكلة لما تبقي ست بيت برضه، وفي نفس الوقت مصممة أزياء. تقى: لا مش عايزة أنا أقعد في البيت وأحضر الأكل لواحدة تانية ع الجاهز، هو أنا خدامته! عمر: خدامته! مامتها: أقول فيها إيه بيان، هي اللي كل شوية تقول كدا قدامها.

عمر: ااه، طيب مين قالك إنك هتبقي خدامة، متصدقيش أي حاجة تقولها بيان، بيان مبتفهمش. بيان: الله، وأنا مالي أنا. عمر: مش انتي قولتي لها كدا! بيان: أنا كنت بكلم ماما، هي اللي بتحشر نفسها في كل حاجة. عمر: وهو انتي عشان تطبخي لجوزك تبقي خدامة! بيان: مبطبخش لحد أنا. عمر: مانتي طبختيلي أهو. بيان: عشان..

عمر: شوفي يتوتو، مفيش حاجة اسمها خدامة، انتوا الاتنين بتساعدوا بعض عشان الدنيا تمشي، هو يشتغل ويجيبلك فلوس، وانتي تصرفيها بنفسك ع البيت والأولاد وتشوفي المناسب إيه وتعمليه، إنما كلمة خدامة دي مش صح، ليه مقولتيش إن هو اللي خدام وشغال عندك! هو مش بينزل الصبح بدري ويروح يتمرمط في الشارع ويلف في كل حتة عشان يجيب فلوس وييجي يديهالك عشان تصرفي ع البيت وع نفسك! تقى: إيه دا بيان مقالتش كدا.

عمر: وهو في حد عاقل يسمع كلام واحدة اسمها بيان برشامة! تقى بضحك: أيوا صح. بيان: أعتقد يا عمر بيه في مواضيع كتير تقدر تتكلم فيها وتضحكهم عليها غير. عمر: معتقدش إني هلاقي أحسن من برشامة أتكلم عليه. بيان: شايفة يماما! مامتها بضحك: عنده حق الصراحة. بيان: والله! ، مبسوطة انتي بالسمعة اللي طلعتيها عليا دي. عمر: أنا مش عارف إزاي مخدتش بالي منك لما شوفتك، كان المفروض أعرف نوع الصنف اللي بتاخديه. بيان: نينيني، إيه الخفة دي.

قاعدين بيضحكوا ويتكلموا والباب خبط. قام عمر وفتح الباب لقاها مامته، زقته ودخلت. حرم المنياوي: الله الله، دي العيلة كلها هنا، أنت فتحتها فندق! عمر: إيه اللي جابك هنا. حرم المنياوي: مش شايف إنك بقيت قليل الذوق معايا؟ عمر: عرفتي مكان الشقة منين، رولا اللي قالتلك طبعاً. حرم المنياوي: ملكش دعوة مين اللي قالي، قولي انت الناس دي بتعمل إيه هنا. عمر: أنا اللي جبتهم، عشان أعرف أحميهم من ابنك، المج*رم.

حرم المنياوي: اخرس، ابني مش مجر*م. عمر: لا، مجر*م، مجر*م وهيتسجن، وديني ليتسجن، الدنيا مش سايبة، عايزين تمشوا الدنيا على مزاجكوا. حرم المنياوي: الناس دي تمشي من هنا حالا، أنت فاهم؟ عمر: لا مش هيمشوا. حرم المنياوي: بلاش تتحداني يعمر. عمر: مش هيمشوا يعني مش هيمشوا. حرم المنياوي: يعني انت كدا بتختارهم علينا؟ أبوه دخل في الوقت ده. عمر: لو سمحتوا امشوا، عايزين إيه. حرم المنياوي: اختار بينا ياعمر، بين أهلك وبين الناس دي.

عمر: بابا لو سمحت قولها حاجة، وخدها وامشوا لو سمحت. المنياوي: لا، عندها حق، مضطر تختار، لأن كدا انت زودتها قوي، دانت سيبت أخوك وهو مص*اب ومشيت مع البنت دي. عمر: يعني إيه. حرم المنياوي: يعني اختار، بس اعمل حسابك، لو اخترتهم هما، اعتبر نفسك ملكش أهل من الأساس، وأنا مش هعرفك تاني.

المنياوي: وكمان ملكش حاجة عندي، كل اليغمة دي مش هتطول منها حاجة، يعني ملكش ورث عندي، بس خليك فاهم كمان، إن شركتك اللي بره دي ليا فيها النص، يعني لو قررت آخد حقي انت عارف إنك هتخسر كتير قوي، يعني معندكش أهل وكمان هتخسر شغلك، وكل دا عشان مين، دول؟ حرم المنياوي: اختار يعمر، أمك اللي تعبت عليك، ولا الناس دي، ولا أخوك اللي مستقبله بيضيع، ولا خطيبتك اللي هتسيبك! ، هتاخد صف مين؟

المنياوي: ولو قلقان وضميرك واجعك عشان البنت دي، فأنا بقولك وبوعدك إنها مش هيجرالها حاجة، كرم هسفره بره ومش هيرجع البلد دي تاني، والبنت دي هترجع تعيش طبيعي زي ما كانت، وأنا بوعدك ب دا وانت عارف أنا لما بوعد بوفي، ومنه تبقى مخسرتش شغلك ولا اسمك ولا عيلتك، ها، هتعمل إيه...