رواية بيان الفصل التاسع 9 - بقلم حسناء رمضان

بيان: أيوه عايز إيه يعني. أمجد: عايز أعرف روحتوا فين، وإزاي تمشوا من غير ما تعرفوا حد فينا، ملكوش كبير؟ بيان: لا ملناش. أمجد: أبوكي خلاكي انفجرتي، ولما مات انفجرتي أكتر. بيان: أمجد، أنت حيوان، وأتمنى متتكلمش معانا تاني، لو عايز تعمل كبير روح اعمل كبير على عيلتك، ملكش دعوة بينا.

أمجد: يعني إيه مليش دعوة بيكم، مش بقولك عايزة تدوري على حل لشعرك ومحدش يعرف أنتِ بتعملي إيه، لأ والأسوأ إن الست الوالدة كمان معاكي، والله أعلم أختك الصغيرة بتتعلم إيه دلوقتي. قفلت في وشه السكة. مامتها: مين يا بيان؟ بيان: أمجد. مامتها: وعايز إيه الزفت ده؟ بيان: عايز يعمل راجل. مامتها: آه، خليه يتوكس. بيان: أنا زهقت منهم بجد، دا إيه دا، أنا مشوفتش كدا، لأ والاسم خايفين علينا. مامتها: هنعمل إيه، قدرنا. الباب خبط.

بيان: إيه دا مين؟ مامتها: يمكن عمر. بيان: استني أشوف. بصت من العين لقيتها رولا. بيان: ماما، رولا. مامتها: وجاية ليه دي؟ بيان: مش عارفة، أفتح ولا أعمل إيه؟ مامتها: افتحي يا بنتي نشوفها عايزة إيه. تقى: لأ، عمو عمر قال. بيان: ممكن تكون جايبة حد معاه. مامتها: طب رني على عمر بسرعة. مسكت الموبايل ورنت على عمر بس مبيردش، والباب كمان مبطلش خبط. مامتها: افتحي يا بنتي، كدا كدا في حرس بره. بيان من ورا الباب: نعم! ، عايزة إيه؟

رولا: جايه أعتذر، ينفع أدخل! -المنياوي: أنت بتقول إيه؟ الظابط: دا اللي حصل يا فندم، بس لسه التحقيقات شغالة. المنياوي بتمثيل: لو معتصم دا عمل في ابني حاجة أنا مش هسكت. عمر: ولو كرم هو اللي عمل في معتصم حاجة؟ وقتها مش هتسكت برضه؟ المنياوي: قصدك إيه، أنا ابني مش قاتل قتلة، متنساش إنك بتتكلم عن أخوك.

عمر بعصبية: ومعتصم كمان أخويا، يمكن أخويا أكتر من كرم، والصراحة أتوقعها من كرم، إنما معتصم استحالة يأذيه، بس صدقني، لو عرفت إن معتصم جراله حاجة وقتها هنسى أي علاقة تربطني بكرم. المنياوي: أنت أصلاً نسيتها عشان واحدة غريبة. عمر: ماشي، مش هتجادل معاك أكتر من كدا، دور على طريقة تخرجه بيها من اللي هيحصل. -الشغالة: ربنا يرجعهولك بالسلامة يا رب.

حرم المنياوي: هيرجعه، دا ابني أنا، ابن شويكار هانم، أنا هوريهم إزاي يعملوا في ابني كدا. الشغالة: ربنا ينتقم منهم، هو صحيح كرم شقي حبتين، لكن سيد الناس كلهم، آه والله. حرم المنياوي: آآآه من كرم، عايز يموتني من الخوف عليه. الشغالة: إن شاء الله هييجي سليمة، هو بس عمر بيه يهدى عليه شوية لحد ما الدنيا تعدي على خير، وبعد كدا يبقى يعلمه الأدب. حرم المنياوي: إيه! ، يعلمه إيه؟ ، أنتِ مجنونة!

، نسيتي نفسك، يظهر قعدتي معاكي نستك أنتِ بتتكلمي مع مين. الشغالة: يقطعني يا ستي هانم، مقصدتش والله، ربنا يعلم أنا بحب كرم قد إيه، دا من خوفي عليه بس. حرم المنياوي: أول وآخر مرة تتكلمي كدا، يلا على شغلك. -رولا: جبتلكوا أكل عشان ناكل سوا، اعتبروه اعتذار عن اللي حصل. مامتها: لأ اعتذار ليه، مفيش حاجة. بيان: هو إيه اللي مفيش حاجة، لأ فيه، يلا اتفضلي لو سمحت.

رولا: يظهر إن بيان لسه واخدة على خاطرها مني، طيب يا ستي حقك عليا، صدقيني أنا بس بغير على عمر قوي، ومستحملتش لما لقيتك قريبة منه، وبعدين بصراحة أصل الشقة دي عزيزة عليا قوي، يعني زي ما تقولي كدا قضينا وقت فيها مع بعض. مامتها: استغفر الله العظيم. رولا: ماهو هيبقى جوزي، ما انتوا عارفين، عشان كدا اتضايقت لما لقيت حد غريب قاعد في شقتي اللي هتجوز فيها، خاصة يعني إن كتب كتابنا قاعد عليه أسبوع. بيان: أسبوع!

رولا: إيه دا هو مقللكوش؟ ، آه، تلاقيه اتكسف منكوا عشان هو كان محتاج الشقة عشان هنقعد فيه. مامتها: يعني إحنا كدا معطلينه؟ رولا: آه طبعاً يا طنط، هو بس تلاقيه حب يعمل خير معاكوا، بس نسي للحظة إنه هيتجوز فيها، عشان كدا كان مكسوف يقولكوا، وقالي إنه هيأجل جوازنا عشانكوا، عشان كدا جيت متعصبة.

مامتها: لأ وعلى إيه يا بنتي، إحنا منرضاش نوقف حال حد، ربنا يتمم لكوا بخير، خلاص يبنتي هنلم حاجتنا ونمشي، بيان، رني على عمر بلغي إنه هنرجع البلد. رولا بسرعة: وده كلام برضه يا طنط، أنا مقصدتش. مامتها: لأ يبنتي دا حقك. رولا: ماهو لو قولتله هيرفض طبعاً، ما انتوا عارفين. بيان: يعني إيه، نمشي من غير ما نعرفه؟ رولا: يعني أنا أكيد مش عايزة إتكم تمشوا بس، كلكوا نظر يعني. مامتها: ماشي يا بنتي كتر خيركوا على كدا، إحنا هنمشي.

رولا: بس أوعى يا طنط تجيبي لسيرته إني قولتلك حاجة زي دي، هيزعل مني وهنتخانق. -عمر: مش معقول اختفى كدا، مصيبة، ليكون كرم عمل فيه حاجة فعلاً. الظابط: بص يا عمر، أنت زي أخويا، وخليني أقولك إن الاحتمال الأكبر إن أخوك عمل فيه حاجة ودارى جثته في حتة، عمر، الموضوع كل مدى بيكبر أكتر، وهيصعب علينا وقتها نساعده. عمر: تساعدوا مين! الظابط: أخوك، كرم. عمر: هو انتوا كلكم كدا، مفيش حد فيكوا عنده دين، مبتخافوش ربنا، مفيش ضمير خالص.

الظابط: في إيه يا فندم؟ عمر: مين قالك إني عايزك تساعده، أنا عايزك تقبض عليه، شوفلي معتصم فين وكرم هبب إيه، ولو كرم اللي عمل كدا يبقى يتحاسب، وإلا قسماً بالله هقعدك في البيت. سابه ومشي راح يتمشى ع البحر ومحسش بنفسه غير وهو عند بيان في شقته، خبط بس وقتها اتفاجئ إن رولا اللي بتفتحله، بص لها لقاها لابسة لبس مش تمام وكأنها كانت مستنياه. عمر: بتعملي إيه هنا، بيان فين؟ رولا: مش هنا. عمر: نعم!

رولا: زي ما بقولك كدا، ادخل بس تعالى. دخل وبص عليها جوا ملقاش حد فيهم. عمر: مشت راحت فين؟ رولا: الله، جيت جبت أكل عشان ناكل سوا، وقعدت أتكلم معاهم وناخد وندي، طلعوا لطاف قوي يا عمر، اعتذرتلهم على قلة الذوق بتاعتي واتصالحنا، بعدها معرفش إيه اللي حصل بس هما قالولي إنهم مش عايزين يعملوا بينا مشاكل أكتر من كدا، وكمان لازم يرجعوا بلدهم عشان طولوا هنا. عمر: طولوا إيه دول مكملوش يوم، رولا، قولتي لهم حاجة؟

رولا: أكيد لأ، حتى اسألهم، أكيد معاك رقم بيان هانم، رن عليها اسألها. عمر: هرن عليها، بس صدقيني هعرف إذا كنتي قولتي حاجة، ووقتها مش هبقى عليكي انتي كمان عشان أنا حذرتك. سابها وخرج بسرعة ركب عربيته وعلى ودنه موبايله بيرن على بيان بس مش بترد. رولا: نزلوا من شوية، أكيد وصلوا المكان اللي أنت فيه، وعمر نزل دلوقتي. -بيان: عمر عمال يرن يا ماما.

مامتها: لأ يا بنتي لما نوصل البلد نبقى نقوله ونعتذرله، إنما دلوقتي خلينا نشيل من عليه الحرج ده. بيان: قال إيه، فرحهم بعد أسبوع، والنبي هيبص لدي على إيه، شبه السلعوة. مامتها: وميبصلهاش ليه؟ بيان: لأ ميبصلهاش يا ماما، وكمان هو إنسان محترم، إيه اللي يخليه يحب واحدة زي دي مش فاهمة أنا، دا كفاية لبسه. مامتها: وأنتي متضايقة ليه، ما يحب اللي يحبه، إحنا مالنا. بيان: وأنا مالي هتضايق ليه، كل إنسان حر.

ماشين بالعربية ووصلوا حتة معينة وحسوا بصوت عربية جاية بسرعة من وراهم وجت وقفت قدامهم فجأة. بيان بصت لمامتها اللي كانت مصدومة لما شافته. بيان بزعيق: كرم، كرم يا ماما. مامتها: اطلع بسرعة متقفش، اطلع يلا. الراجل: مين دا؟ بيان: اطلع دا وقته. شغل العربية ولسه هيلف بس كرم ضرب رصاصة في الكاوتش بتاع العربية. وكلهم صوتوا. تقى: ماما أنا خايفة. مامتها: متقلقيش، مش هيعملك حاجة.

نزل كرم من عربيته واتمشى ناحية عربيتهم ونزل منها الراجل. كرم: تحبوا تنزلوا ولا أنزل لكم أنا؟ بيان: أنت عايز مننا إيه؟ كرم: انزلي بقولك. نزلوا من العربية وهما خايفين وعشان يخوفهم أكتر ضرب الراجل صاحب العربية برصاصة في رجله. بيان: أنت مش طبيعي، أنت مريض، أكيد مريض. كرم: طبعاً مريض، شوفتي يا بيبو وصلتينا لإيه، كان هيحصل إيه يعني لو كنتي طاوعتيني وقتها، مكنش وصلنا لكل دا.

مامتها: الراجل بينزف، حرام عليك خلينا نوديه المستشفى. كرم: طبعاً، هنروح كلنا المستشفى، عمر أخويا مقصرش معاكوا، جاي ورايا، وصدقيني لو شاف إن الأمر محتاج إننا نروح المستشفى هيوديكوا، كلكم. مامتها: عايز مننا إيه يا أخي، هي البلد مفهاش قانون؟ كرم: قانون! ، والله يا ستي الكل اللي زيكوا لازم يقتنعوا تماماً إن اللي زينا هما اللي بيكتبوا القانون، وبيغيروه على مزاجهم، يلا بقا، تحبوا أبدأ بمين؟

بيان: طب اسمع، أنا موافقة على أي حاجة أنت عايزها، بس خليهم يمشوا، لو سمحت، أنا هاجي معاك وأعمل كل اللي أنت عايزه. مامتها: أنتِ بتقولي إيه، اسكتي. بيان: كرم، لو سمحت، والله العظيم أنا معنديش مشكلة أجي معاك، بس خليهم يمشوا أرجوك. كرم: تصدقي فكرة، أنا كنت ناوي أخلص عليكوا، بس إن جيتي للحق، كان نفسي فيكي من مدة، طيب أنا موافق، أنتِ هتيجي معايا، بس هما هسيبهم هنا. بيان: هنا! ، إزاي؟

كرم: متقلقيش، عمر في الطريق وزمانه جاي دلوقتي وهياخدكم، يلا ولا إيه؟ مامتها: إياك تتحركي من مكانك، أنتِ فاهمة! بيان: ماما، ماما هيأذيكوا، لو سمحتي، لو سمحتي خليني أروح معاهم. مامتها: على جثتي، وأنت يا بتاع أنت، لو فاكر إني هسيبلك بنتي تبقى غلطان، دا أنا أرتكب فيك جناية. كرم وهو بيرفع في وشهم المسدس: يبقى أنفذ خطتي الأولى، وبصراحة معنديش وقت عشان زي ما قولت، عمر في الطريق. بيان: أنا هاجي معاك.

مشت ناحيته بس مامتها مسكتها من إيديها. مامتها: بقولك تعالي هنا، أنتِ اتجننتي، هتروحي له برجليكي؟ بيان بعياط: دا عندي أهون من إنه يأذيكوا، لو سمحتي يا ماما لو سمحتي. تقى بعياط: لأ متروحيش، هيعمل فيكي حاجة وحشة، دا معاه مسدس. بيان: رني على عمر يا ماما وخليه ييجي، عشان خاطري.

فلتت إيديها من مامتها اللي عمالة تعيط، ركبت العربية معاه بسرعة وسط محاولات مامتها في إنها تمنعها، كرم قفل الباب من جوه وبص لبيان وابتسم لها بشر، ومامتها بره عمالة تخبط على العربية وتصوت، وأول ما العربية مشت طلعت تجري وراها لحد ما وقعت وأغمى عليها ع الطريق.