رواية بيان الفصل الثامن 8 - بقلم حسناء رمضان

رولا: يانا يا هو عمر: رولا، امشي لو سمحتي رولا: اختار يا عمر، وصدقني هطلع من هنا على المطار على طول ومش هتشوف وشي تاني عمر: انتي عايزة ايه دلوقتي، انتي اصلا مش فاهمة حاجة رولا: مش المفروض كنت جاي النهارده؟ ، وأنا فضلت مستنياك! مجتش ليه عمر: حصل ظروف، اضطريت ألغي الطيارة رولا: وبيان هانم هي الظروف دي؟ عمر: أخويا بيهددها، والله أعلم عايز يعمل فيها إيه، جبتها هي ووالدتها وأختها هنا لحد ما كرم يتقبض عليه رولا: شقتك!

، كان ممكن توديهم مكان تاني، اشمعنى شقتك يعني عمر: عشان محدش يعرف مكانها، ومعرفش انتي عرفتي مكانها ازاي رولا: عرفت من مكان ما عرفت، المهم دلوقتي البت دي تمشي من هنا دلوقتي حالا عمر: هو عِند وخلاص؟ ، ما أنا قولتلك اللي حصل رولا: مش مشكلتي، وانت تشيل همها ليه، تغور في ستين داهية إحنا مالنا والدتها خرجت والدتها: غارة تشيلك أما انتي قليلة حياء صحيح، ماتتكلمي عدل ياختي رولا: ياي، بيئة، ناس بيئة يا عمر، بجد مش مصدقاكم

والدتها: بت انتي، لمي الدور أحسنلك، قسماً بالله أجيبك من شعرك عمر: بس اهدوا، رولا امشي من هنا، نتكلم بعدين رولا: لو مشيت يا عمر اعتبر كل اللي بينا انتهى عمر: يعني إيه رولا: يعني مش هعرفك تاني، ها، امشي؟ عمر بعد ما بص لها بنظرات طويلة: امشي رولا: عمر؟ عمر: امشي بصت له بصدمة مش مصدقة إنه اختار واحدة غريبة على حساب السنين اللي بينهم، وبعدها خرجت ورزعت الباب وراه

والدتها: لا حول ولا قوة إلا بالله، يابني خلينا نمشي يابني، إحنا مش عايزين نعملك مشكلة عمر: لا ولا مشكلة ولا حاجة بيان: يلا يا ماما لو سمحتي عمر: يلا فين بيان: عملنالك مشكلة مع خطيبتك، خلينا نمشي أحسن عمر: لا انتوا معملتوش حاجة، ارتاحوا البيت بيتكم، أنا هستأذن، معاكم رقمي لو حصل أي حاجة بلغوني وبره في حرس زي ما قولت، أتمنى تسمعوا الكلام ومتتحركوش من هنا بيان: بس بما إنها عرفت المكان يبقى ممكن كرم يعرفه

عمر: لا متقلقيش، أنا هنبه عليهم ميدخلوش أي حد، وفي شاشة هنا أهي تقدروا تشوفوا أي حد هيقرب من البيت، لو حسيتوا بأي حاجة رنوا عليا وأنا هاجي فوراً والدتها: مش عارفين نشكرك إزاي يابني عمر: لا متقوليش كدا، أنا اللي مش عارف أقولكم إيه على اللي انتوا فيه، بعتذرلكوا جداً على اللي كرم بيعمله والدتها: لا وانت ذنبك إيه عمر: طيب أستأذن والدتها: اتفضل يابني *** حرم المنياوي: عملت إيه المنياوي: مش قولتلك هيرتكب مصيبة؟

، لقوا معتصم غرقان في دمه، وعرفت إن معتصم كان بيدور عليه عشان عمر اللي قاله حرم المنياوي: يالهوي، ومات؟ المنياوي: ااه، مات وشبع موت حرم المنياوي: طب وكرم فين، أو وعوا يكونوا قبضوا عليه المنياوي: لا هرب، بس معرفش راح فين حرم المنياوي: طب ومعتصم الشرطة عرفت إنه مات؟ المنياوي: أكيد لا، دي تبقى مصيبة، وقتها مهما حاولت مش هعرف أخرجه حرم المنياوي: أما أعملت إيه المنياوي: دفنت جثته، مش ده المهم دلوقتي، المهم ربنا يستر

في اللي جاي حرم المنياوي: المشكلة كانت يادوب حاجة صغيرة، إيه اللي دخلنا في القتل وكل القرف ده المنياوي: كله من ابنك، لما أشوفه بس على المصايب اللي وقعنا فيها دي، مش كفاية الانتخابات اللي خسرتها حرم المنياوي: مش عارفة عمر ليه بيعمل فينا كل ده، ما موضوع البت دي اتحل وخرجت وخلاص، ليه لازم يعمل النمرة اللي عملها دي

المنياوي: رني عليه، خليه ييجي بأي طريقة، لو وصل لكرم قبلنا هيسلمه، ومصيبة لو عرف إن معتصم صاحبه عمره مات، وقتها مش هنعرف نقف قدامه *** رولا: متقلقش محدش هيعرف إنك هنا كرم: أوعي يا رولا، عمر لو عرف هيوديني في داهية رولا: متقلقش مش هقوله حاجة البت خبطك كرم: إيه ده، انتي مستنية حد؟ رولا: لا، كرم: بس إيه رولا: ده أكيد عمر كرم: يعني إيه، إيه اللي هيجيبه دلوقتي رولا: عشان اتخانقنا، أكيد جاي يصالحني كرم:

وأنا هعمل إيه دلوقتي رولا: ادخل، ادخل المطبخ وأنا مش هخليه يدخل خالص كرم: متأكدة؟ رولا: ااه ادخل بسرعة طلع يجري على جوا وهي ظبطت نفسها عشان متبقاش متوترة قدامه وراحت فتحت عمر: إيه كل ده رولا: نعم، إيه اللي جابك عمر: إيه الوش ده رولا: انت مش طردتني؟ عمر: لا، قولتلك امشي ونتكلم بعدين رولا: وأنا مش عايزة أتكلم، يلا عمر: اهدي بقى، تعالي بس اقعدي رولا: يا عمر لو سمحت امشي، وبعدين تعالى هنا، إيه اللي في وشك ده عمر: إيه

رولا: اللي في خدك ده إيه، اتخبط في إيه عمر: لا وانتي الصادقة دي جزمة أم بيان كانت معلمة على وشي رولا: نعم! عمر: سيبك من ده بس قوليلي، أمي اللي قالتلك تيجي هنا رولا: عمر مين دي، وليه شاغل نفسك بيها كده عمر: حكيتلك يا رولا، ليه مش عايزة تسمعي الكلام رولا: بس مامتك ليها رأي تاني، بتقول إن في بينكوا حاجة عمر: إيه الجنان ده رولا: طب فهمني، ليه تقعدهم في شقتك اللي أهلك نفسهم عمرهم ما دخلوها

عمر: رولا، خلقي ضيق، مش عايز مناهدة كتير، لو سمحتي اهدي وسيبيني في حالي عشان أنا متلخبط دلوقتي ومش فاهم حاجة، وبعدين إيه ريحة السجاير دي رولا: عمر: رجعتي تشربي سجاير؟ رولا: لا اا اه، اه شربت سيجارة كده عمر: وإيه البساطة دي رولا: ما أنت بتشرب يا عمر عمر: هو إحنا هنقلد بعض في الغلط؟ رولا: طب فيها إيه لما نشرب سوا عمر: رولا، إيه ده بص على الترابيزة لقى كوبايتين عمر: انتي عندك حد رولا: إيه، لا، كانت صاحبتي هنا

ومشيت قبل ما أنت تيجي عمر: ااه، صاحبتك مين رولا: عمر: صاحبتك مين رولا: شهد صاحبتي، أول ما عرفت إني رجعت قالت تيجي تسلم عليا وتقعد معايا شوية، بما إني قاعدة لوحدي عمر: قاعدة لوحدك إيه انتي هتحوري، انتي لسه جاية النهارده رولا: عمر انت طردتني من بيتك عمر: صدقيني همشي، دماغي هتتفرتك، وبعدين لسه محاسبتكيش على اللي قولتي هناك. رولا بدلع: طب خلاص خلاص، مش هتخانق معاك يا روحي، لما تبقى رايق نبقى نتخانق قامت قعدت جنبه، وكلمته

وهي بتلعب في قميصه رولا: بقولك إيه عمر: إيدك رولا: مالها عمر: شيليها رولا: هو انت ليه معقد كده على رأي مامتك عمر: لما نتجوز ابقي فكيني رولا: طب ما نتجوز دلوقتي عمر: ما تتعدلي بقى رولا: الله، مش نافع معاك لا خناق ولا دلع ولا أي حاجة، أعمل إيه أنا عمر: ولا حاجة، أنا ماشي رولا: طب استنى، إيه رأيك ننزل نعمل شوبينج سوا عمر: لا مش فاضي رولا: يعني هضطر أروح لوحدي عمر: خدي شهد معاكي رولا: ما هو عمر: ما هو إيه رولا: أصل يعني

عمر: عايزة إيه رولا: نزلت فجأة ومجبتش فلوس كفاية معايا، وبصراحة شفت حاجات كتير حلوة قوي هنا، بس مش معايا تمنها عمر: ااه، طيب خدي رولا: لا لا، أنا بس عايزة حاجة بسيطة هعمل إيه بالكريدت كلها عمر: امسكي يا رولا رولا بابتسامة: ماشي عمر: يلا سلام، عايزة حاجة رولا بدلع: شكراً خرج ناحية الباب بس حاجة وقعت جوا اتكسرت *** بيان: ماما عايزة أزور أبويا والدتها: انتي شايفه إن ده وقته بيان: وحشني يا ماما، أنا أصلاً لحد دلوقتي مش

مصدقة إنه سابني والدتها: أمر الله يا بنتي، هنعمل إيه، ربنا يرحمه ويغفر له بيان بعياط: أنا حتى ملحقتش أشوفه والدتها: وبعدين معاكي يا بنتي بيان: صعب يا ماما، انتوا كنتوا معاه، إنما أنا لا، ملحقتش أشوفه ولا أحضنه ولا أي حاجة والدتها: أهم حاجة إنك اثبتي براءتك، ده الأهم بالنسباله يا بنتي، دلوقتي هو يرتاح تقى: ماما والدتها: ماما والدتها: عايزة إيه تقى: هو أنا لما أكبر، ينفع ألبس زي رولا دي والدتها: نعم؟

تقى: ما هي كانت لابسة كده عادي أهي والدتها: بت انتي، هقوم أكلك علقة محترمة، دي جسمها كله كان باين، عايزة تمشي تعرضي نفسك للناس؟ ، مش شايفة أختك بتلبس إيه؟ تقى: بس يا ماما بصراحة بقى الحجاب بيكبرها، يعني شوفي دلوقتي بشعرها شكلها حلو قوي، ليه بتلبس الحجاب والدتها: ما هو ده السبب اللي بيخلينا نلبس الحجاب، عشان نداري حلاوتنا تقى: ونداريها لييييه

والدتها: عشان جوزك بس اللي ينفع يشوفها، وعشان ربنا أمرنا بكده، وإحنا ما إ إلا عباد لله، هو سبحانه وتعالى يأمر وإحنا نقول سمعنا وأطعنا تقى: بس أنا مش عايزة أخبي شعري، شعري حلو والدتها: لما تكبري وتبقي عروسة زي أختك كدا، انتي بنفسك هتقولي عايزة ألبس لبس محتشم عشان أبقى مرتاحة وراضية عن نفسي تقى: وانتي مرتاحة يا بيان؟

بيان: بت انتي، قسماً بالله هقوم أجيبك من شعرك، متتكلميش معايا أنا مش طايقاكي أصلاً، وبعدين شعر إيه يا أم شعر انتي، شعرايتين طلعوا في دماغك هتعملي عليهم فرح؟ تقى: أنا عارفة إنك متغاظة بيان: وهتغاظ من إيه يا أختي تقى: عشان عمر حط إيده على شعري وقعد يلعبلي فيه وانتي لابسة بيان: شايفة بنتك؟ ، وحياة ربنا لأوريكي *** رولا: قولتلك أكيد قطة عمر: من امتى وانتي بتقعدي مع القطط في مكان واحد؟

رولا: معرفش بقى يا عمر أنا لسه راجعة، أكيد كانت محبوسة هنا ولا حاجة بصلها بصة غريبة وهي قلقت منها بس قطع نظراته دي رنة موبايله عمر: أيوا الشرطة هنا يا فندم عمر: نعم، ليه؟ مش عارف بس بيقولوا إنهم عايزين حضرتك عمر: طيب أنا جاي مشي من عندها وطلع على شقته الظابط: عمر بيه عمر: في إيه الظابط: الحاجات دي خاصة بمعتصم، عمر: ااه، هو فين الظابط: لقينا الحاجات دي في بيت****، وعليها آثار دم، بس لسه بنحقق في الموضوع

عمر بصدمة: إيه؟ انت بتقول إيه الظابط: وبصراحة عرفنا إنه كان بيدور على كرم عمر: وقبضتوا على كرم؟ الظابط: لا للأسف لسه عمر: طيب وفين معتصم، والدم ده بسبب إيه الظابط: محتاج حضرتك تيجي معايا عشان تشوف حاجة مهمة *** رولا: انت مجنون، كنت هتودينا في داهية كرم: لولا إني استخبيت كان نفخني، أنا مش خايف من الحكومة قد ما أنا خايف من العلقة اللي هاخدها منه رولا: مسيطر عمر صح كرم: طبعاً، مش أخويا الكبير رولا: طبعاً،، هو في زي عمر

وحلاوة عمر وطعامة عمر كرم: وفلوس عمر رولا: نعم! كرم: بقولك إيه، بطلي تعملي الحبتين دول عليا، أنا عارف اللي فيها رولا بتوتر: وإيه اللي فيها كرم: عمر غاية، هدف بالنسبالك، فرصة متتعوضش، بنك متحرك يعني رولا: انت اتجننت، انت عارف أنا أبقى مين كرم: إيه ده في إيه، انتي نسيتي ولا إيه، مين يابتاعة انتي، هو مش ده حوار عملناه أنا وانتي عليه عشان توقعيه ولا إيه يا أختي رولا: الكلام ده كان زمان، دلوقتي أنا بحبه بجد

كرم: ياروووحي، عشان كدا عمالة تصرفي فلوسه، وهو يعيني عشان شايفك زوجته المستقبلية، وكدا كدا هيصرف عليكي فَ مش بيقولك رولا: لا طبعاً، أنا أصلاً مش باخد منه فلوس كرم: والكريدت اللي في جيبك دي، بتاع بابي برضو؟

، بقولك إيه، إحنا متفقين اتفاق، وهتكملي فيه غصب عنك، وإلا هروح أقوله وأرسيه على الحوار كله، وبيني وبينك، الواد صعبان عليا، بقاله سنين بيحبك وانتي.. هيهي، مالك اتخطفتي كدا ليه، متقلقيش، مش هقوله حاجة، طول ما انتي في صفي أنا في صفك، وبصراحة عندي شرط صغير كده رولا: شرط إيه كرم: بيان، فين رولا: ليه كرم: عند عمر صح؟ رولا: ليه يا كرم كرم: متقلقيش، أكيد عامل حسابه ومأمن المكان، وأنا مش هعرف أروح رولا: طب كويس كرم:

انتي اللي هتروحي رولا: نعم كرم: هتروحي وتعملي اللي هقولك عليه بالحرف الواحد، وإلا، فيديوهاتك وحاجاتك كلها هتبقى عند عمر بكرة الصبح.. *** الظابط: دي آثار الدم اللي لقيناها هنا، وجنبها لقينا حاجة معتصم عمر باصص لكمية الدم اللي على الأرض ومصدوم الظابط: وخط الدم ده يدل على إن الجثة تم نقلها من المكان، ولو في احتمال إن الشخص المصاب يكون عايش وهو اللي حاول يخرج من هنا فَ ده احتمال ضعيف بالنسبة لكمية الدم دي..

تعالى شوف يا فندم عمر راح بص لقاها تسجيلات الكاميرا اللي بره، وواضح فيها معتصم وهو بيحاول يسيطر على كرم عشان يدخله البيت الظابط: دلوقتي في احتمال من اتنين، يا أما كرم قتل معتصم، أو العكس عمر بص له وهو مش مستوعب، مش قادر يتخيل إن الدم اللي جوا ده دم أخوه أو صاحبه عمره....