رواية بيان الفصل الثاني عشر 12 - بقلم حسناء رمضان

بصلها وهو ساكت بس قطع نظراته صوت صر*يخ. واحدة ست. الاتنين طلعوا يجروا ناحية الباب ومامتها وتقى اللي كانوا نايمين صحوا وطلعوا يجروا وراهم. صوت الصر*يخ كان جاي من ناحية البيت اللي جنبه. أول ما وقفوا قدام البيت لقوا دخان كتير طالع من جوا وفيه نا*ر. كسر الباب. عمر: بيان خليكي بره. بيان: لا يعمر في نا*ر متدخلش. سابها ودخل وسط النا*ر وهي واقفة بره والناس ابتدت تتلم ع الصوت. غاب شوية وطلع وهو شايلها ومغمى عليها.

الناس اتدخلت وطفوا النا*ر وعمر فضل يحاول يصحيها لحد ما فاقت والنا*ر طفت. عمر خدها بيته. عمر: انتي كويسة! ، تحبي نروح المستشفى! ـ لا انا كويسة. مامتها: اتفضلي يابنتي اشربي مايه. عمر: الحمدلله النا*ر طفت، بس تاخدي بالك بعد كدا. ـ مش عارفة ايه اللي حصل، كنت نايمة وسمعت صوت حاجة فرقعت، صحيت لقيت الأوضة بتو*لع. عمر: طيب مفيش حد عايش معاكي؟ ـ لا مفيش، عايشة لوحدي. مامتها: ومامتك فين يابنتي؟ ـ أهلي كلهم مسافرين يا طنط.

عمر: في حاجة غير ايدك اتحرقت؟ ـ لا لا مفيش. عمر: طيب بيان لو سمحتي هاتي علبة الاسعافات من اوضتي. بيان: ماشى. دخلت أوضته وهي متكدرة.

بيان في نفسها: بيان لو سمحتي هاتي علبة الاسعافات من اوضتي، جاتك نيلة انت وهي وانتوا شبه بعض اصلا، نينينني، دي حتة مش مكسوفة من نفسها وهي قاعدة بهدوم النوم قدامه، طبعاً، مانت راجل وغد حقير زي الباقيين، أكيد الموضوع على هواك، مفيش فيكوا حد يتقي الله، ياخي كلكوا كدا، طيب حتى ياخي دي مفهاش حاجة يتبصلها، كفاية انها شبه علبة التونة، وقال إيه، طالع شايلها، ياخي يشيلوك من وراك ياخي، وبعدين هو ده حرق ده، ولا هي مرقعة وخلاص عشان تمسك إيديها، آآه منكم يا رجالة، اعععععع، انت، انت جيت امتى؟

بصت وراها لقيته واقف وحاطط إيده في وسطه راحت صوتت. بيان: احم، اانت، انت هنا من امتى؟ عمر بضحكة بيحاول يداريها: من ساعة وراكي اللي هيشيلوني منه. ميل فتح الدرج وخد علبة الاسعافات وطلع. بيان في نفسها: يافضيحتِي هيقول إيه دلوقتي أووووف. خرجت وراه لقته قعد جنبها وبيحطلها مرهم على إيديها.

ربعت إيديها ووقفت تتفرج عليهم، حاولت تعمل نفسها طبيعية عشان كفاية اللي سمعه منها، بس مقدرتش، ملامحها قالت أكتر من اللي هي قالته جوا، مركزة على إيديه وهو بيلمسها، بدأت تهز رجلها في الأرض وهو خد باله وابتسم بخفة بس مبصلهاش. مامتها دخلت تعملها حاجة تشربها. عمر: الف سلامة عليكي. ـ الله يسلمك. عمر: اسمك إيه؟ ـ اسمي فريدة. عمر: طبيعي تكوني فريدة والله. بيان برقتله من رده عليها قدامهم وابتدت تفرك في إيديها جامد.

بيان: آآه، اسمك حلو يا فريدة، حلو قوي. فريدة: وانت اسمك إيه؟ بيان اتغاظت أكتر لما سألت عن اسمه. عمر: اسمي عمر. فريدة: حلو. عمر: والله؟ ، محدش قالي قبل كده إن اسمي حلو. فريدة: إزاي، اسمك حلو قوي، وكمان مش اسمك بس. بيان: احم احم، حمدلله ع السلامة يا مدام فريدة. فريدة: آنسة. بيان: إيه ده فعلاً؟ ، مش باين عليكي خالص. فريدة: قصدك إيه؟ بيان: فكرتك متجوزة ومخلفة كمان. فريدة: هو في واحدة في جسمي تبقى مخلفة؟ ، تيجي إزاي دي!

بيان: لا فعلاً مش باين عليكي. عمر: لا بالعكس، شكلك حلو جدا، حتى يمكن أصغر من سنك، ولو إنها غريبة إنك تكوني مش متجوزة، الرجالة عموا ولا إيه؟ بيان بدون وعي: عمررر! الاتنين بصولها باستغراب من نبرة صوتها وملامحها. بيان: احم، آآ، الوقت اتأخر، هدخل أنام. فريدة: طيب هستأذن أنا، ومتشكره جداً على اللي عملته معايا، مش عارفة لو مكنتش موجود كنت هعمل إيه. عمر: لا ده واجبي، بس خلي بالك بعد كدا. فريدة: حاضر، عن إذنك.

خرج معاها وصلها بيتها وبعدين رجع البيت. مامتها: ده أنا صحيت قلبي مخلوع من صوت صويتها. عمر: آآه، الحمدلله ربنا ستر. مامتها: هدخل أنام يابني محتاج حاجة! عمر: لا متشكر تصبحي على خير. مامتها: وانت من أهله. دخلت نامت وهو دخل بلكونة أوضته، بص جنبه لمح بيان اللي قاعدة وساندة دماغها. فضل باصصلها وهي سرحانة مش واخده بالها منه. عمر: القمر غايب النهارده. بيان: هاا، آآه. عمر: آآه إيه؟ بيان: كان هنا من شوية. عمر: وراح فين؟

بيان: راح بيته، كنت عايزة يبات معاك؟ عمر: والله أتمنى، معنديش مانع. بيان: أماااال، هتفرق إيه عن غيرك، كلكوا صنف واحد. عمر: كلنا مين؟ بيان: الرجالة. عمر: طب وأنا عملت إيه، أنا بتكلم ع القمر. بيان: آآه مانا كمان ع القمر. ابتسم وبص قدامه. عمر: بتعرفي تعومي؟ بيان: ليه؟ عمر: بسأل. بيان: معرفش إيه المغزى من السؤال الثعباني ده، بس آآه، بعرف أعوم. عمر: ثعباني! بيان: آآه. عمر: ليه هستغل الموضوع في إيه، هغ*رقك مثلاً؟

بيان: ممكن، ليه لأ، أضمنك منين أنا؟ عمر: لا متقلقيش، كنت هقولك نتسابق مثلاً. بيان: في العوم؟ عمر: آآه. بيان: بتعرف! عمر: نجرب! بيان: بس إزاي، وفين؟ عمر: البحر كله قدامك. بيان: والناس اللي رايحة جاية دي. عمر: اامم، دي مشكلتك يعني، طيب إيه رأيك هلاقيلك مكان كويس؟ بيان: والله كدا كدا معروف مين هيكسب، بس للأسف عندي مذاكرة. عمر: قولي كدا بقى. بيان: كدا إزاي، انت بتشكك في قدراتي؟ عمر: لا طبعاً.

جاتلها مسدج ع الفون، بصت فيها وركزت كام ثانية وعمر باصصلها. فونها رن وهي فضلت باصة وهي ساكتة وعمر فضوله زاد. عمر: في حاجة؟ بيان: لا خالص، أنا هدخل أنام، تصبح على خير. عمر: وانتي من أهله. تاني يوم صحت بدري على صوت كحة عمر. طلعت بره لقيته لسه ف أوضته وعمال يكح، دخلت المطبخ تعمل حاجة تشربها وهو دخل عليها وهو بيقفل زراير القميص، أول ما شافته لفت وشها. عمر: أنا آسف، مكنتش أعرف إنك صحيتي دلوقتي. بيان: صحيت على صوتك.

عمر: صوتي! بيان: بتكح كتير. عمر: مش بإيدي والله. بيان: أكيد برد، بتلبس خفيف والجو برد. عمر: مفرقتش. بيان: تشرب شاي معايا؟ عمر: لا متشكر أنا خارج. بيان: خارج رايح فين، قصدي يعني لسه بدري قوي و.. عمر: عندي مشوار. بيان: طيب ينفع تاخدني معاك، يعني محتاجة أروح مشواري ضروري، بعدها روح انت مشوارك وابقى تعالى خدني، لو سمحت. عمر: قصدك أسيبك هناك وأمشي! بيان: آآه. عمر: لا صعب.

بيان: صدقني مش هيحصل حاجة، طب بص، وديني مشواري وهي كلها ساعة ورجعني وانت روح مشوارك، عشان خاطري. عمر: امم، ماشي بس بشرط. بيان: إيه هو؟ عمر: مش هسيبك ثانية واحدة، هفضل معاكي لحد ما تخلصي، بعدها هجيبك هنا وأنا أمشي. بيان: طيب أمري لله. عمر: يلا ادخلي بلغي مامتك والبسي. ـــــــــــــــــــــــــــــــــــــــــــــــــــــــــــــــ حرم المنياوي: متقلقش ياحبيبي هتخرج من هنا.

كرم: ماما لو سمحتي أنا مش عايز أتسجن، اتصرفي أرجوكي. حرم المنياوي: متقلقش يعمري محدش هيقدر يعملك حاجة، لو رست إني أهربك هعمل كده. المنياوي: ولما انت خايف كده بتعمل كده ليه، كل ما أجي الم الموضوع من ناحية ألاقيك بوظته من الناحية التانية. كرم: أعمل إيه يعني، كنت عايزني أعدي اللي عمر عمله ده بالساهل! ، ده مسح بكرامتي الأرض قدام الجامعة كلها، متخيل شكلي كان عامل إزاي.

المنياوي: عشان انت قليل الأدب، أنا حذرتك كتير يا كرم، مش كفاية الانتخابات اللي ضيعتها مني انت وأخوك؟ كرم: وأنا مالي، روح قول الكلام ده لعمر، مش هو اللي كل همه ينصر البت دي عليا؟ ، معرفش أنا عملتله إيه عشان يكرهني كده. حرم المنياوي: لا مش بيكرهك ياحبيبي، هو صحيح غلطان لأنه لازم يقف معاك في كل الأوقات، بس مش بيكرهك ده أخوك. كرم: آآه، أخويا يضربني ويه*يني كده قدام الناس، ويخليني أعتذر لواحدة متسواش.

المنياوي: خلاص خلاص، المهم دلوقتي تهدى شوية لحد ما نتصرف. ـــــــــــــــــــــــــــــــــــــــــــــــــــــــــــــــ عمر: لمين الحاجات دي؟ بيان: لو سمحت، أنا شرطت عليك لو هتيجي معايا يبقى متتدخلش في أي حاجة، ماشي! عمر: امم، ماشي يا ستري. ركبوا العربية وهي قعدت توصفله الطريق. بيان: بس اقف هنا. عمر: هتعملي إيه هنا؟ بيان: وبعدين! عمر: المكان غريب، بتيجي هنا تعملي إيه، وإيه الحاجات دي أنا عايز أفهم.

بيان: أستاذ عمر، عمر بيه، عمر باشا، ينفع تخليك في نفسك؟ عمر: لا. بيان: ماهو أنا مينفعش أقولك، مش كفاية جبتك معايا! عمر: جبتيني معاكي فين، أنا اللي جايبك. بيان: مفرقتش. عمر: لا فرقت، وبعدين المكان غريب وهادي، مش هقدر أسيبك تدخلي هنا لوحدك. بيان: مفيش حاجة هتحصل، الناس اللي هنا طيبة جدا، مش زي أخوك. عمر: بيان لو سمحتي قوليلي في إيه، أنا عاطي مامتك وعد إني هحافظ عليكي. بيان: وأنا مش هقدر أقولك، اعذرني لو سمحت.

عمر: طيب، اتفضلي بسرعة. نزلت وخدت الحاجة معاها ودخلت الشارع وخبطت ع الباب. عمر بيحاول يطولها بنظره ويعرف مين اللي جوا. فتحت الباب طفلة صغيرة، أول ما شافت بيان اترسم على وشها علامات الفرحة وطلعت تجري عليها حضنتها. البنت: بيان؟؟ ، وحشتيني قوي. بيان: وانتي كمان، مارو فين؟ مروان: أنا أهو. حضنته وسلمت عليهم وعمر واقف متابعهم وساند ع العربية بتاعته. لقى واحدة ست خرجتلها وسلموا ع بعض.

بيان: اتفضلي، معلش سامحيني اتأخرت عليكي، بس والله عندي ظروف. ـ حبيبتي ولا يهمك كتر خيرك. بيان: يلا محتاجين حاجة؟ ـ الهي يرزقك ويفتحها في وشك قادر يا كريم، ربنا يحرسك يابنتي ويحفظك، اقعدي اشربي حاجة. بيان: لا معلش عشان معايا حد، مرة تانية. ـ والله أبداً، لازم تدخلي، نادي عليه ييجي. بيان: لا طب عشان الحلفان هاتي مايه عشان مستعجلة والله. دخلت جوا تجيبلها الماية وعمر واقف مش فاهم حاجة. مروان: بيبو بيبو.

بيان: إيه ياحبيبي؟ مروان: في لحمة صح؟ ميلت قعدته قدامه ع الأرض. بيان: طبعاً، في لحمة وفراخ وكل حاجة قولتيلي عليها المرة اللي فاتت جبتهالك. مروان: الله، أنا بستناكي مخصوص عشان عارف المرة اللي هتيجي فيها يبقى هناكل لحمة. بيان: يلا فين البوسة بتاعتي؟ خلصت معاهم ورجعت لعمر اللي متابعهم من بدري، لقيته باصصلها من تحت النضارة بطريقة غريبة. بيان: في إيه؟ عمر: مفيش. بيان: طب يلا. عمر: يلا. ركبوا العربية ونزلوا المكان التاني.

عمر: برضه مينفعش أنزل! بيان: بالظبط. خدت باقي الحاجة ونزلت خبطت ع الباب وطلعلها الشيخ عثمان. الشيخ عثمان: نور. بيان: إيه ده إيه ده، بتشم ريحتي ولا إيه؟ الشيخ عثمان: لا بحس بيكي، كنتي فين يابنتي إيه الغيبة الطويلة دي؟ بيان: سامحني ياعمي والله غصب عني، كان عندي بلاوي متلتلة والله. الشيخ عثمان: طب ادخلي، ادخلي يابنتي نتكلم. دخلت قعدت وطلعت الأكل وبدأت تحكيله وهي بتأكله.

ــــــــــــــــــــــــــــــــــــــــــــــــــــــــــــــ في المطبخ. تقى: مصحتنيش ليه يماما أروح معاه؟ مامتها: تروحي معاها فين انتي كمان؟ تقى: مش راحت مع عمر! ، كنت هروح معاهم. مامتها: مش رايحين يتفسحوا ياتقى، رايحين مشوار تبع الجامعة وراجعين. تقى: ماما مام. مامتها وهي بتعمل الأكل: إيه؟ تقى: كنت عايزة أسأل على حاجة. مامتها: اسألي يا آخرة صبري. تقى: هو ينفع عمر يتجوز بيان؟

ـــــــــــــــــــــــــــــــــــــــــــــــــــــــــ عدى وقت وعمر قلق عليها، أو الأصح مقدرش يقاوم فضوله عايز يعرف هي بتعمل إيه جوا كل ده. مشي بخطوات بطيئة ناحية البيت لقى الباب موارب. بيحاول يبص جوا البيت عشان يشوفها، لقاها قاعدة ع الأرض وقدامهم أكل وبيأكل راجل كبير في السن بدقن بيضا، وبتتكلم وهو بيسمعلها بإنصات. حاول يسمع هي بتقوله إيه بس غصب عنه كح وهي بصت وراها لقيته واقف.

قادته نظرة بعينيها ورجعت كلمت الشيخ عثمان. بيان: اعذرني ياعمي لازم أمشي عشان معايا حد. الشيخ عثمان: مين ده، خليه ييجي. بيان: لا لا معلش، مرة تانية بس هو عشان مستعجل، الأكل الباقي اهو جنبك وكل حاجة متوضبة. الشيخ عثمان: ماشي يابنتي ربنا يحفظك، وزي ماقولتلك تخلي بالك كويس. بيان: حاضر يعمو، ادعيلي بالله. الشيخ عثمان: هو أنا عندي غيرك عشان أدعيله، ربنا يابنتي يحفظك وينورلك طريقك ويبعتلك اللي يصونك ويحافظ عليكي.

ـــــــــــــــــــــــــــــــــــــــــــــــــــــــــــــــ في العربية. بيان: أنا قولت إيه؟ عمر: انتي اللي طولتي أعمل إيه! بيان: بس أنا قولتلك إني هطول. عمر: أنا مش عارف انتي متضايقة ليه، هو أنا دخلت أكلت معاكوا! بيان: يخفة، وبعدين مكملتش نص ساعة. عمر: بقولك إيه، هو مين ده؟ بيان: ليه؟ عمر: بسأل. بيان: متسألش، ويلا عشان متتأخرش على مشوارك. عمر: ماشي، ماشي ي بيان. ساد بينهم الصمت اللي قطعه صوت عمر.

عمر: تحبي تروحي ولا تيجي معايا؟ بيان: أروح معاك فين؟ عمر: يعني رايح أصيع. بيان: تصيع! عمر: آه. بيان: وده إزاي بقى، أي نوع من أنواع الصياعة؟ عمر: لا صياعتي مختلفة شوية. بيان: مختلفة إزاي يعني؟ عمر: تحبي تشوفي؟ بيان: أشوف إيه؟ عمر: الصياعة. بيان: إزاي؟ عمر: أقولك. بعد نص ساعة وصلوا المكان، عمر نزل من العربية وطلع شنطة الضهر بتاعته لبسها وقفل العربية. عمر: يلا. بيان: إيه ده؟ عمر: إيه؟ بيان: إيه المكان ده؟

عمر: مش بتحبي تغامري! بيان: بحب آآه. عمر: طب يلا، أتمنى يكون قلبك جامد. بيان: جامد، بس هي دي غابة؟ عمر: شايفة إيه؟ بيان بصوت واطي: فيها حيوانات؟ عمر: كل حاجة. بيان: تعابين! عمر: كل حاجة. بيان: عقارب! عمر: كل حاجة. بيان: إيه أصله ده، جايبني هنا ليه، انت مجنون! عمر: لا إله إلا الله، مش قولتي أجي معاك! ، ومش قولتي قلبك جامد! ، ومش قولتي بتحبي المغامرات! بيان: آآه قولت، بس كده انت عايز تموتني. عمر: أموتك ليه؟

بيان: أماااال جايبني هنا ليه، وبعدين إيه المغامرة في مكان زي ده؟ عمر: والله يا آنسة بيان هي دي مغامراتي، وقولتلك تحبي تجربي قولتي آآه. بيان: طيب روحني. عمر: يفتح الله. بيان: نعم. عمر: أنا بقول الحاجة مرة واحدة، وسألتك تروحي ولا تيجي معايا قولتي تيجي معايا، يبقى زي الشاطرة كده تيجي معايا وانتي ساكتة، أو تركبي العربية وتستني فيه. بيان: بتحطني قدام الأمر الواقع يعني. عمر: مظبوط. بيان: طيب بص، روحني عشان أعملك البشاميل.

عمر: مامتك بتعمله. بيان: أووف، طب انت ترضالي إني أقعد في العربية في المكان المقطوع ده لوحدي؟ عمر: آآه عادي. بيان: يبايخ أنا مش بهزر. حط شنطته ع جنب وبدأ يغير هدومه. بيان لفت وشها وهي بتصوت. بيان: بتعمل إيه ي منحط انت. عمر: بغير. بيان: انت مجنون والله. عمر: لفي خلصت. بيان: على فكرة انت إنسان غير آدمي. عمر: وااو، آدمي مرة واحدة. بيان: اجلع. عمر: وعارفة معناها؟ بيان: مش بقولك بايخ، عمر لو سمحت روحني.

عمر: بصي، لو خدتك عشان أروحك يعني هضيع وقت كتير لحد ما أرجع هنا تاني، مش كفاية إنك أخرتيني أصلاً بحاجاتك دي، ودلوقتي مش عايز صداع، هتيجي معايا ولا تقعدي جوا العربية وأقفل عليكي لحد ما أطلع! بيان: لا هقعد يا أخويا، وبعدين صحيح، افرض مخرجتش من جوا، هعمل إيه أنا، هروح إزاي؟ عمر: إيه ده ثانية واحدة، انتي هامك هتروحي إزاي ومش هامك إنّي مخرجتش أصلاً! بيان: وأنا مالي، أنا قولتلك متدخلش وانت اللي عايز، اتحمل المسؤولية بقى.

عمر: دي ندالة؟ بيان: أيون. عمر: طيب بص أنا احتمال أطول، لو زهقتي وحبيتي تروحي معاكي العربية، ومتقلقيش، سواء بتعرفي تسوقي أو لأ مش هتعرفي تطلعي من هنا لأننا تقريباً في الغابة ومفيش حاجة مضمونة. بيان: انت أهبل! عمر: إيه! بيان: ماهو ده ميطلعش من حد عاقل، انت مجنون بجد. عمر: بقولك إيه، انتي كلتي دماغي أنا ماشي. بيان: طب استنى استنى، طب ماهو يا عمر مش هعرف أقعد هنا لوحدي. عمر: خلاص ادخلي معايا. بيان: لا العمر مش بعزقه.

عمر: خلاص خليكي هنا. بيان: ماهو هنا العمر مش بعزقه برضه. عمر: خلاص تعالي معايا. بيان: مش بقولك خفة، ينفع تاخد كلامي جد شوية؟ عمر: هما دول الحلين، اختاري منهم وانجزي عشان ضيعتي وقتي. بيان: هقعد في العربية وأمري لله. قعدت جوا العربية وقفل. على نفسها وهو بصلها وابتسم ابتسامة جانبية قلقتها أكتر، كان لابس شورت لحد الركبة وتيشرت كت وفي ودنه السماعة. دخل جوا وهي فضلت مراقباه لحد ما اختفى من قدامها.

طلعت فونها لعبت فيه شوية عشان تضيع وقت. حاجة خربشت بره العربية بس هي طنشت. شويه وحاجة خبطت جامد. بلعت ريقها وكملت تقليب في الفون. شويه وسمعت صوت غريب. بيان: لا بقى، لا بجد كدا كتير. كل شوية الصوت بيزيد وهي بتخاف أكتر. فضلت لحد ما حاجة خبط*ت في العربية جامد وهي صوتت. فضلت تقرا قرآن وتقول أذكار. بيان: هو عفريت؟ ، لا برضو الأذكار حلوة، لا ماهو مش هينصرف، طب أعمل إيه دلوقتي، أنزل! ، وتعرضي نفسك للخطر يا غبية؟

، طب أعمل دلوقتي، ياريتني روحت معاه، ع الأقل لو حصل حاجة كان هيتصرف، وهي يعني رجولة يسيبك كده لوحدك! ، صح، عندك حق، دي مش رجولة خالص، دي ندالة، طب، إيه ده، أنا بكلم نفسي! عمر كان ماشي بيدندن، وهو بيتفرج ع الأشجار. بص جنبه لقى بيان جنبه وبتنهج. ابتسم وبص قدامه تاني. بيان: اقف ياعم انت شوية. وقف وبصلها من غير ما يرد عليها. بيان: انت شايف إن دي رجولة؟ عمر: آآه. بيان: جاتك هواء.

عمر: بت، أنا سايبك تغط لي فيا من بدري، صدقيني لو غلطتي فيا تاني هسيبك هنا. بيان: ماهو انت مش عارف اللي حصل، سمعت أصوات غريبة، جيت جري الحمدلله إني لحقتك، بس انت مبعدتش يعني. جاتلها لحظة إدراك. بيان: عمر. عمر: إيه؟ بيان: انت اللي كنت بتعمل الأصوات دي، صح! عمر: لا. بيان: عمر. عمر: انتي عبيطة! ، مانا ماشي قدامك، لحقت أرجع امتى، وليه هعمل كده؟ بيان: معرفش، أماال إيه الأصوات دي؟ عمر: بصي حواليكي كده! ، انتي في غابة.

بيان: آآه أنا خدت بالي. عمر: مدخلتيش غابة قبل كده؟ بيان: لا. عمر: ولا كان نفسك تجربي؟ بيان: يعني، كنت عايزة أعرف في إيه جواها وكده، بس مجربتش. عمر: ودلوقتي؟ بيان: دلوقتي إيه؟ عمر: واثقة فيا؟ بيان: هاهووووو. ماسكة في حبل متدلي من أعلى جرف وبتصرخ. وعمر واقف فوق وحاطط إيده في وسطه وبيضحك. نزلت تحت وهو مسك الحبل بعدها ونزل. عمر: صدقتي! بيان: بصراحة! ، التجربة حلوة، بس برضو لسه مش مطمنة. عمر: العمر لحظة.

بيان: أعيشها في بيتنا يا خوي. بصلها بطرف عينيه وكمل بخطوات لقدام. بيان: بس أنا هدومي كده هتبهدل. عمر: هديكي هدومي حاضر. بيان: الله، أنا مش بهزر. عمر: أيوه أعملك إيه يعني، أقلعلك الشورت؟ بيان: ماتحترم نفسك. عمر: بقولك إيه يا بيبو، بصي حواليكي كده. بيان: بيبو؟ ، اسمي بيان، متدلعني. عمر: وأنا مش عايز أدلعك يا وجه البومة انتي، المهم بصي حواليكي. بيان: بصيت.

عمر: إحنا في غابة، يعني أشجار ومناظر طبيعية وحاجات كده، يعني نتأمل، يعني نسكت، يعني نقفل الراديو ده، وصلت؟ بيان: هي إيه؟ تنهد وهز دماغه يمين وشمال بفقدان أمل وسابها ومشي. بيان: انت بتيجي هنا على طول؟ عمر: ...... بيان: إزاي وانت مسافر أصلاً؟ عمر: ...... بيان: وإزاي واثق إن مفيش حاجة هنا، ماهي دي غابة، يعني لو مثلاً مثلاً فيها حيوانات مفترسة، أسد مثلاً، وهجم عليك هتعمل إيه؟ عمر: ......

بيان: هو انت جسمك حلو أكيد وهتعرف تدافع عن نفسك، بس مش لدرجة أسد يعني، ولا تعبان، ولا أي حاجة، هتتعامل إزاي؟ عمر: ....... بيان: هي الشنطة اللي معاك دي فيها إيه؟ عمر وقف: بسسسس. اسكتي شوية، آييييه ياشيخة، افصلي لله. بيان: الله. عمر: الله ياخدك. بيان: على فكرة دي مش طريقة تتعامل بيها بنت دي. عمر: بنت إيه، بنت إيه ي بيان، لو البنات كده ربنا ياخدهم ياشيخة. بصتله بزعل وسابته ومشت.

عمر: أووف، طب استني بس، خلاص ياستي أنا آسف، بس بجد افصلي شوية، اتفرجي يماما، شوفي الحاجات اللي حواليكي دي والحشرات دي، ولا القرود دي، ولو إن مفيش فرق بينكم يعني. بيان: اتلم. عمر: ماشي هتلم، المهم دلوقتي شايفة البحيرة دي! بيان: آآه مالها؟ عمر: هنعديها. بيان: إزاي ومفيش قارب؟ عمر: لا ماهو في حبلين فوق أهم. بيان: أيوا إزاي بقى؟ عمر: شايفة المساكتين اللي في الحبلين دول! بيان: آآه. عمر: هنمسك فيهم ونعدي. بيان: لا والله.

عمر: آآه والله. بيان: يعني هنتزحلق بالحبلين دول لحد الناحية التانية؟ عمر: الحمدلله وصلت. بيان: وافرض وقعت؟ عمر: أنا عن نفسي مش هقع، شوفي انتي. بيان: هو إيه اللي شوفي إيه، افرض وقعت، هغ*رق، اعععععع. عمر بخضة: إيه؟ بيان: تمساح، تمساح هناك اهو، اهو يا عمر بسرعة. عمر: بسرعة أعمل إيه؟ بيان: أضر*به ولا، أقولك يلا نمشي قبل ما ييجي. عمر: انتي عبيطة يابت انتي. بيان: بقولك تمساح. عمر: أيوا فيها إيه؟

بيان: فيها إيه إزاي، هييجي يا عمر يلا، أي دا ثانية، التمساح في المايه، انت عايز تقول إننا هنعدي فوق المايه دي والتمساح ده موجود؟ عمر: احم، آآه. ـــــــــــــــــــــــــــــــــــــــــــــــــــــــــــــــ هند: تفتكري نقلت؟ ، ولا طلعت خالص؟ مها: غريبة، هتنقل إزاي واحنا داخلين على امتحانات؟ هند: ماهي مش بتيجي، أكيد طلعوها. مها: ممكن. سما صاحبتهم جاية تجري. سما: بنات بنات، الحقوني. هند: في إيه؟

سما: متعرفوش اللي شوفتوه. مها: شوفتي إيه قولي. سما: استني بس آخد نفسي. مها: ياست انجزي. سما: بيان. هند: قطيعة، مالها؟ سما: مش هتصدقوا شوفتها مع مين. هند: مع مين؟ سما: عمر. مها: عمر مين؟ سما: أخو كرم، عمر المنياوي. هند: بتعمل إيه معاه؟ سما: معرفش، شوفتها الصبح كانت راكبة معاه العربية. مها: العربية كمان؟ سما: آآه والله زي ما بقولك كده، أنا مصدقتش عيني لما شوفتها.

هند: يابنت الـ ، شايفين اللئيمة، لعبت ولفت عالواد لحد ما وقعته. مها: إزاي وهو أصلاً بيحب واحدة تاني، اللي اسمها رولا دي؟ سما: آآه يابنتي صورهم في كل حتة مع بعض. هند: وهي دي هيفرق معاها إذا كان عنده حبيبة ولا لا، لعبت عليه لحد ما جابته في حجرها، آآه منها بيان، يعني الظيطة دي كلها طلعت بفائدة ليها. سما: حظوظ. هند: لا حظوظ إيه، دي مخططة كويس، بس على مين، مش هخليها تتهنى بيه ولا توصل للي في دماغها.

ـــــــــــــــــــــــــــــــــــــــــــــــــــــــــــــــ تقى بملل: يماما هتيجي امتى أنا زهقت من القعدة لوحدي. مامتها: معرفش يابنتي مقالتش راجعة امتى، وبعدين مانتي قاعدة بتلعبي أهو. تقى: قولتلك كنت عايزة أروح معاهم. مامتها: استني بس لما نشوف آخرتها إيه. تقى: طب رني عليهم. مامتها: ادخلي هاتي التليفون من جوه. تقى: ماشي. ـــــــــــــــــــــــــــــــــــــــــــــــــــ أمجد: مش لاقيلهم أثر، معرفش راحوا فين.

مامته: ماتشوف عمر ده مش هما راحوا معاه؟ أبو أمجد: مش معانا رقمه، رقمه كان مع الست هانم، هي أكيد معاه. أمجد: أنا مش مصدق بجد، يروحوا معاه كده من غير ما يبلغوا حد؟ مامته: آآه أما إيه، قلة حياء، انتوا متعرفوش الناس بتقول إيه في البلد، يالهوي ع اللي بيتقال يالهوي، ليه يجيبوا لنفسهم الكلام كده، نسوان مش لاقية حد يلمها صحيح. أبو أمجد: قابلت عم محمد وأنا طالع من الجامع، عمال يسألني وأنا مش عارف أرد أقوله إيه، الناس كلت وشي.

أمجد: أما أنا أعمل إيه، بس وديني لأكس*ر عضمها لما أشوفها. مامته: وانت هتشوفها فين بقى، ما خلاص. أمجد: خلاص إيه، هجيبها. مامته: وبعد ما تجيبها، هتقدر عليها يعني؟ أمجد: آآه هقدر، هتجوزها وأكس*ر رقبتها وتبقى توريني هتمشي إزاي. مامته: يالهوي، تتجوزها؟ ، تتجوز مين ياخويا؟ أمجد: بيان. مامته: لا طبعاً، انت اتجننت ولا إيه، بعد ده كله ولسه عايز تتجوزها؟

أمجد: أيوا، في الأول كنت هتجوزها عشان بحبها، دلوقتي هتجوزها عشان ألمها، عشان أعرف أمشي وسط الناس. مامته: وانت مالك ياخويا، انت كنت ولي أمرها؟ أمجد: أنا مش عارف انتي بتفكري إزاي، عايزاني أسيبها كده؟ ، وبعدين لسه بحبها. مامته: يامري يانا يامري، عوض عليا يارب. ــــــــــــــــــــــــــــــــــــــــ بيان وهي متشعلقة في الحبل: اعععع، أشوف فيك يوم على اللي عامله فيا. عمر قاعد يضحك على منظرها وهو متشعلق قدامها.

بيان بصريخ: بتضحك على إييييييه؟ عمر بضحك: هموت يخربيتك اسكتي. بيان: منك لله، روحنيييي. عمر بضحك: التماسيح بتضحك عليكي. بصت تحت لقت تماسيح كتير متجمعة وفاتحين بوقهم. بيان بصريخ: اعععععع، قسماً بالله مجنون، وأنا غبية عشان طاوعتك، يبني انت أهبل هنموت. عمر: طول ما انتي بتعملي كده مش هتعرفي تتحركي، سيبي نفسك وانزلي. بيان: يا عمر لو وقعت هيا*كلوني. عمر وصل آخر الحبل ونزل. عمر: شوفتي! ، أنا نزلت أهو، يلا بقى.

بيان: أعملها إزاي دي؟ عمر: سيبي نفسك وغمضي عينيكي وانتي هتتزحلقي متقلقيش. غمضت عينيها وسابت نفسها وهي بتصرخ لحد ما وصلت عنده ووقعت ع الأرض. بيان: كلوني، كلوني صح. عمر: لا، بس لو مجريتيش دلوقتي حالا هيعملوا كده. خلص جملته وطلع يجري، بصت ناحية البحيرة لقت التماسيح جاية ناحيتها، قامت طلعت تجري وراه وهو بيضحك. بيان: اعععع، يابن الغدارة، انت مجنون يا عمر؟ عمر: أنا عملت حاجة.

بيان: انت بتستهبل أكيد، ده مش منطقي فعلاً، ده موت يا عمر موت. عمر: أعوذ بالله، مالك يابنتي مانتي كويسة أهو. بيان: انت يبني أهبل؟ ، دهنت كنت خايف تخليني أدخل الشارع لوحدي وتقولي عاطي مامتك وعد إني أحافظ عليكي، ودلوقتي جاي تموتني! عمر: لا إله إلا الله، مانتي سليمة أهو يا ست حد جه جنبك. بيان: هو انت ليه محسسني إن المشكلة من عندي؟ عمر: عشان هي من عندك. بيان: ليه هي التماسيح دي بلاستيك ولا إيه؟

عمر: لا يخفة، بس الإنسان عنده عقل يفكر بيه. بيان: انت آخر واحد يتكلم عن العقل، وأنا اللي كنت بقول إزاي ده مختلف عنهم كده، طلعت أسوأ. عمر: لا لو سمحتي، أسوأ في الجنون ماشي، إنما في قلة الأدب لا، أو آآه عادي لا ليه. بيان: طيب واستاذ عمر ناوي يروحني ولا لا؟ عمر: البحيرة عندك أهي والحبل أهو، عايزة تروحي اتفضلي. بيان: إحنا هنعدي ده تاني؟ عمر: تؤتؤ، هتعدي لوحدك، أنا مكمل. بيان: أوووف.

كملوا مشي وهي لازقة فيه وكل ما حاجة تلمسها تصرخ. بيان: استنى ماما بترن، أقولها إيه؟ عمر: وقليلها إنك معايا. بيان: ماهو أكيد معاك، بس معاك فين؟ عمر: قولييلها إنك معايا في الجامعة وخلاص. بيان: لا مبكدبش أنا. عمر: يابت. بيان: إيه هو ده، مبكدبش والله. عمر: خلاص براحتك قولييلها في الغابة ولسه معديين من فوق بحيرة تماسيح. بيان: قولتلك قبل كده إن دمك خفيف.

عمر: قولتي خفة بس مقولتيش إن دمي خفيف مباشرة كده، بس يعني أنا عارف مدى خفة دمي وظلي اللي بيضيف بعض من اللطافة على الجو. بيان: بس بس، إيه هو ده، أخلص أقولها إيه؟ خد منها الفون. عمر: أيوا يا طنط. بيان: طنط. عمر: اشش اسكتي، أيوا هي معايا متقلقيش خالص، ارتاحوا ومتفكروش في حاجة، إحنا بنلف شوية عشان قولت يعني أعمل فيها خير ونغير جو عشان أنا محتاج أكسب ثواب شوية الفترة دي. بيان: يالهوي ع السكر.

مامتها: ماشي ياحبيبي هي لسانها طويل حبتين بس انت قدها. عمر: لا متقلقيش هنقص*ه. بيان: هو إيه ده اللي هنقص*ه؟ عمر: لما تروحي ابقي اسأليه. بيان: اسألها على إيه؟ عمر: ع اللي هنقصه. بيان: طب قولي إيه هو. عمر: يلا. مشي وهي مشت وراه. بيان: عمر، عمر، عمر. عمر: إيييه؟ بيان: عايزة أكل. عمر: انتي عبيطة يابت. بيان: مانا مأكلتش الصبح، الله. عمر: أعملك إيه أنا يعني؟ بيان: أكلني. عمر: ياكلك قطر ياشيخة. بيان: بعد الشر عليا، أهو انت.

عمر: مش معايا أكل. بيان: أماااال الشنطة دي فيها إيه؟ عمر: آآه قولي كده بقى، عينك ع الشنطة بتاعتي. بيان: يا عم اتنيل، أخلص شوفلي حاجة آكلها. عمر: طب اسمعي كلامي وامشي معايا للآخر، يلا. ـــــــــــــــــــــــــــــــــــــــــــــــــ أم أمجد: رايح فين؟ أمجد: عرفت مكانهم. أم أمجد: فين؟ أمجد: في شقة عمر. أم أمجد: يالهوي. أمجد: شوفتي قلة الأدب. أم أمجد: قاعدين في شقة راجل غريب يامري، ده إيه ده، إمتى بقوا بالوقاحة دي.

أمجد: هجيبهم وأحاسبهم هنا. أم أمجد: وعرفت مكانهم إزاي؟ أمجد: عرفت بطريقتي، وكمان حطيتلها حد يراقبها لحد ما وصلها. أم أمجد: طب خد أبوك معاك. أمجد: لا، هيقعد يقولي عيب ومش عيب، وأنا ناوي أجيبها من شعرها من هناك لحد هنا. ـــــــــــــــــــــــــــــــــــــــــــــــــــــــــــــــ تقى: إيه يماما كل ده، مين هياكل كل الأكل ده؟ مامتها: اسكتي يابت الواد مش شايفه عمر هفتان إزاي.

تقى: هفتان إيه يماما انتي مش شايفة عضلاته عاملة إزاي، مش زي أمجد. مامتها: يابنتي شكله مش بياكل أكل بيتي، مش شوفتي أمه عاملة إزاي، معتقدش إنها بتطبخ وتقف في المطبخ زينا كده. تقى: دي هانم يا ختي. مامتها: وامك مش هانم ولا إيه يا ختي؟ تقى: لا مش قصدي، بس دول ناس أغنياء وبيبقى عندهم شغالين. مامتها: اسمهم مساعدين. تقى: فرقت إيه؟ مامتها: نقي كلامك، مش هتخسري حاجة. تقى: حاضر، المهم أنا عايزة أخرج دلوقتي.

مامتها: بت، غوري من وشي. ـــــــــــــــــــــــــــــــــــــــــــــــــــــــــــــــ عمر: جاهزة؟ بيان: آآه يلا. مد ايده وشال ستار من الحشائش المتداخلة. بيان: وااااو، إيه ده. عمر: إيه رأيك؟ بيان: عمر إيه ده؟ عمر: لسه عايزة تروحي؟ بيان: لا طبعاً أروح إيه، يلا ننزل بسرعة. شاورلها على طريق النزول، نزل قدامها وهي مشت وراه وهي مبهورة بشكل المكان. بيان: هو إزاي المكان ده منعرفوش؟ عمر: إزاي؟ بيان: يعني ليه محدش ساكن هنا؟

عمر: يسكنوا في غابة؟ بيان: المكان تحفة يا عمر، طيب مكان للسياحة مثلاً. عمر: إيه في بلدك عدل يابيان، مكان زي ده كفيل يخلي بلدنا فوق، بس محدش فاضي يستغل الحاجات الحلوة الموجودة، كلهم مشغولين في ال*نهب. بصتله بصه غريبة. عمر: بتبصيلي كده ليه؟ بيان: مستغرباك. عمر: ليه؟ بيان: يعني، واحد زيك يقول كلام زي ده، غريبة. عمر: مش فاهم. بيان: أصل لو هكلمك بصراحة فأنت ابن حد من الناس اللي بت*نهب. عمر: آآه. بيان: آآه؟ ، معترف يعني.

عمر: أنا إمتى أنكرت ده؟ بيان: لا بس في العادة محدش بيقول كده. عمر: أبويا بي*نهب وبيعمل حاجات وحشة دي حاجة ترجعله، أنا مسؤول عن نفسي، هل أنا بن*هب ولا لأ؟ بيان: انت مش رجل أعمال؟ عمر: آآه. بيان: ليه بتقول إنك مش بت*نهب؟ عمر: هما كل رجال الأعمال بينهبوا؟ بيان: تقريباً. عمر: محتاجة تعيدي حساباتك تاني، أنا عايش بره، وبره مش زي هنا، صحيح في كل مكان في حاجات وحشة، لكن بره أفضل بكتير، وغير كل ده الموضوع موضوع مبادئ.

بيان: مين حط لك المبادئ دي؟ عمر: إيه السؤال ده؟ بيان: ماله؟ عمر: سوري بس سؤال غبي، مين اللي المفروض يحط للإنسان مبادئه؟ بيان: الإنسان بيحط لنفسه، بس في ناس بتحط لولادها وبتزرع فيهم مبادئ معينة.

عمر: غلط، الدين هو اللي من خلاله تحط مبادئك، مينفعش انت تمشي وتقول أنا هتعامل على هذا الأساس وهذا الأساس لا من نفسي، لازم حاجة تحطلي ضوابط وتوضحلي الصح من الغلط، إنما لو هعتمد على حد غيري يحطلي مبادئي فده غلط، ولو هعتمد على نفسي فده غلط أكبر، لأن النفس البشرية أمارة بالسوء، شوف دينك بيقول إيه، وتمشي عليه حتى لو مش على هواك. بيان: واو، متفلسف قد الدنيا.

عمر: بعيداً عن إنك بتتريقي، بس أنا مقتنع بكلامي جداً، ديننا مسبش حاجة غير واتكلم عنها وقالنا نتصرف إزاي ونعمل إيه، من هنا ناخد مبادئنا، أنا عارف إنك مستغربة إني إزاي أبقى ابن واحد زي المنياوي وأخو واحد زي كرم وأبقى مختلف عنهم، بس شكلك ناسيه إن عندنا عقل بنفكر بيه، عايزاني أبقى نسخة مقلدة منهم؟ بيان: أكيد لا، بس استغربت، في العادي ولاد الناس الأكابر بيكونوا مش كويسين خالص.

عمر: الغالب منهم كده، لكن ده لا يعنيني بالمرة، أنا عايش بمزاجي، وبصراحة مش في كل الأوقات ببقى مبسوط إني ابن المنياوي. بيان: ليه؟ عمر: كنت أتمنى أبقى ابن حد فقيه دين مثلاً، إمام مسجد مثلاً، راجل بسيط زي أي راجل من عامة الناس بس عنده أخلاق ومبادئ، إنما أبويا نفسه لو الموضوع بإيدي مكنتش هختاره. بيان: ده بجد؟

عمر: أنا بحبه أكيد، لأنه أبويا وده طبيعي، بس مكنتش أتمنى أبقى ضده في كل حاجة، كل حاجة بيعملها غلط، عايز يملك الدنيا، وكان عايزني أبقى زيه، بس للأسف، مش كل حاجة عايزها هيعرف يعملها. بيان: اممم، انت اتربيت لوحدك صح؟ عمر: مش بالظبط، عشت معاهم بس كنت منطوي شوية، ربيت نفسي بنفسي. بيان: وكرم؟ عمر: كرم ده مصيبة، عيل طايش شايف أهله بيدافعوا عنه في كل حاجة غلط بيعملها، بالتالي شايف إنه يقدر يعمل أي حاجة من غير حساب.

بيان: وانت مكنتش طايش وانت في سنه؟ عمر: مش عارف إيه وانت في سنة دي، أنا أكبر منه ب ٤ سنين مش أكتر، بس لو قصدك على فترة مراهقتي أو بداية الشباب يعني، فَ لا مكنتش زيه، كنت طايش جداً و متهور وعايز أجرب كل حاجة وأعمل كل حاجة بس مع نفسي، يعني متخطاش حريات وحدود الآخرين، يعني مثلاً عايز أسوق عربية بأقصى سرعة وأعمل شبح، أعمل كده في مكان فاضي، مش أختار مكان موجود فيه ناس وأعمل كده، كده أنا مش شبح، كده أنا قليل الأدب.

بيان: يعني معندكش مشكلة تضر* نفسك، إنما الآخرين لأ؟ عمر: وقتها آآه، عشان كده انطويت أكتر وبقيت بعمل كل حاجة في الأماكن المنعزلة بحيث لو اتهورت وعملت حاجة مأذيش حد، عشان كده حبيت الغابات والحاجات دي. بيان: ودلوقتي؟ عمر: دلوقتي إيه؟ بيان: لسه طايش؟ عمر: شايفة إيه؟ بيان: شايفة إن....