رواية بين الحقيقة و السراب الفصل الخامس 5 - بقلم فاطيما يوسف

من انتي تلك الحسناء التي تراود خيالي كل وقت وحين؟ كالفراشة العابرة حين يمر طيفك في بالي وأحس بالحنين. ولمحة الحزن في عينيكي تشغل عقلي وحينها أشعر بالجنون. وعندما أعود إلى رشدي أعاتبه لما تسأل عن المكنون. فيجيب قلبي أن طيفك يستحق الانشغال ويجمع عقلي الظنون. وأعود أفكر في المكنون بكل إحساسي وتشتاق الجفون. خاطرة رحيم المالك في منزل راندا المالكي عصراً. يجلس إيهاب متكئاً على تخته ومحتضناً زوجته وحبيبة أيامه راندا مردداً

لها بحزن: على قد ما أنا كنت جاي الأجازة دي حزين علشان باهر الله يرحمه. على قد ما أنا حسيت إن طاقتي اتجددت. أنا روحي هنا معاكم وفي وسطكم. هناك حاسس إني شريد وغريب وحياتي مفتقدة طعم الحياة ودفا البيوت. ثم أمسك يديها وقبلهما مردداً وهو ينظر داخل عينيها بحب: واكتر حاجة هفتقدها حرماني منك يا حبيبة القلب والروح يا ساكنة الوجدان. ما تتصوريش لما بسافر وأسيبكم أول أسبوع بيعدي عليا إزاي.

الأكل مالهوش طعم والنوم بالعافية والدنيا وحشة جداً. لحد ما أحس إني خلاص اتأقلمت واخدت على كده وأمشي في دوامة الحياة. تجمعت غشاوة الدموع في مقلتيها وأحست بمدى العذاب الذي يعيش فيه زوجها في غربته. فهي مهما كان تعيش مع أبنائها وفي وسط عائلته يخففون عنها القليل من الآلام. أما هو فلا جليس ولا أنيس يمرر ثقل الأيام والوحدة. وتحدثت بحزن عميق: يا حبيبي بجد كلامك بيقطع في قلبي وبيحسسني إننا جانين عليك.

وإنك جاي على نفسك زيادة عن اللزوم علشان خاطر تسعدنا كلنا وتوفر لنا حياة كريمة نعيش فيها. بجد أنا نفسي إننا نفضل معاك هناك على طول وما نسيبكش خالص. بس هعمل إيه. تعليم الأولاد صعب هناك جداً. وكمان بابا وماما ما يقدرش ما يشوفونيش كل سنتين مرة. بجد عناء الغربة صعب علينا جداً بس هنعمل إيه. ادي الله وادي حكمته. واسترسلت حديثها وهي تنظر داخل عينيه بحب: بس انت عارف لما بكون جايلك بحس إني عروسة رايحة لعريسها يوم فرحها.

وإن الفرحة مش سايعاني إني خلاص هترمي في حضنك وأشم أنفاسك وأتمرمغ جوه حضنك وأطفي الاشتياق اللي بيسببه بعدك عني. ابتسم بحب على كلامها وشدد من احتضانها وتحدث بوحشة: ياه يا راندا ما تتصوريش لما بتكوني في حضني زي دلوقتي كده ببقى مش عايز الوقت يمشي غير لما أشبع من حضنك. ولو إني واثق ومتأكد إنه ما يتشبعش منه أبداً. حضنك بالنسبة لي الكتف اللي بيسندني من الشقاء. واللي بيديني طعم للحياة من صراعاتها اللي ما بتنتهيش.

أنا بعد الأيام والسنين علشان خاطر أقول قربت ونتجمع أنا وانتي والأولاد.