رواية بين برجل ونبوت الصعيد الفصل الخامس عشر 15 - بقلم اسماء حبيب

فرح… طيب قول سؤال تاني وأنا هعوض فيه. أمير… بتحبيني يا فرح؟ فرح وقفت مصدومة من السؤال، وهنا أمير جه من وراها ووقف قدامها. وهنا فرح حست إن الكون كله وقف والدم هرب من عروقها. أمير قفل الموبايل وحطه في جيبه. أني خابر إنك مش هتجاوبيني على السؤال ده كمان. فرح حطت إيديها على راسها. هو أنا بحلم ولا إيه؟ أمير… ما أنا قدامك أهوه. فرح… إنتَ أصلاً هنا إزاي؟ هو في إيه؟ أنا حاسة إني بجد بحلم! أكيد ريم عملتلي حاجة.

أمير… استغفر الله العظيم. فرح خبطت أمير على راسه. أمير… آآآه طييييب ليه كده؟ إنتِ جرا لعقلك إيه؟ فرح… ينهار أزرق أنا مش بحلم. أمير… طيب بما إنك الحمد لله خابرة زين إنك ما بتحلميش، ممكن تجاوبي على سؤالي. فرح… هنُه. أمير… بتحبيني يا فرح؟ فرح… إنتَ بتكلمني أنااااا؟ أمير… أمال بساير خيالي. فرح… يعني إنتَ كده رسمي فهمي نظامي بتحبني؟ أمير… الله يرضي عليكي يا فرح، ما تنقصيش غباء. فرح… احممم ماشي. أمير… أيوة إيه بقى!

فرح… إنتَ مش شايفني عاملة مكسوفة، كلك نظر بقى. أمير… يعني أفهم من كلامك إنك بتحبيني زي ما أنا بحبك. فرح… أنا قولت كده. أمير… فرااااااح. فرح… إشششش، هتلمي علينا الناس. أمير… ما إنتِ قاعدة تستعبطي. فرح… خلاص يا عم، أيوه بحبك، إيه الطريقة المنيلة للاعتراف دي؟ بدل ما تجيب لي ورد وتعملي جو رومنسي. أمير… أنا مبسوط قوي إنك بتحبيني. فرح… أيوه بقى عم الحج هيجي يقابل أخويا إمتى؟ أمير… مش دلوقتي.

فرح… لا بقولك إيه، مش فرح اللي يتلعب بيها كورة. أمير… إنتِ أصلاً ما دريتيش باللي جرا. فرح… هو حصله حاجة باباك؟ أمير… أبويا طردني يا فرح وعرف كل اللي إحنا عملناه. فرح… ينهار أبيض، إيه الحظ ده بس. أمير… بس متقلقيش، أخويا هيعرف يتفاهم وياه ويخليه قلبه يحن عليا أشوي. فرح… أخوك… آآآه صحيح، أنا قابلت أخوك، إنتَ متعرفش ده؟ طلع ظابط، بس إنتَ أحلى منه. أمير… الله يستر عرضك، بس ده مش وقته غزل. فرح… إيه اللي بتقوله ده يا أمير؟

إنتَ عايز كورس رومانسية؟ إنتَ كده مش نافع، بصلة حتى. أمير… ما بعرفش أقول كلام متزوق. فرح… لا ما هو واضح أوي. أمير… أنا هكلم أخوكي وأجيله أنا وحازم لحد ما نشوف أبوي هيرسي على إيه معايا. فرح… تؤ، إنتَ لازم تحل مشكلتك الأول يا أمير، مش لازم تكنسل موضوع مهم زي ده. أمير… خلاص اللي إنتِ شيفاه. فرح… إنتَ عرفت إني هنا إزاي؟ أمير… حازم عرف من بنت عمك اللي اسمها ريم دي. فرح… بنت عمي ريييييم.

أمير… خلاها تراقبك وتعرف بتروحي فين وتنقل أخبارك. فرح… ترااااقبني كمان؟ بقت مجندة عليا، بنت مرفت؟ آآآه كمل. أمير… وقالت إنك بتحبي تيجي هنا لما تكوني مضايقة. فرح… طيب طير إنتَ علشان أنا لازم أخلص تار كده. أمير… إنتِ زينة؟ مال وشك أحمر ليه. فرح… وسع كدااا يا أميير. فرح مشيت بسرعة. أمير… هي مالها اتقلب حالها كده لي! أمير ركب العربية وفضل ماشي براحة لحد ما اطمن إنها رجعت البيت، وبعد كده روح.

دخل أمير لقي حازم وشه مقلوب. جرالك إيه إنتَ التاني؟ مال وشك عامل كده لييي؟ حازم… أمير، هو حصل حاجة كده؟ أحم، مش عارف أجبهالك إزاي. أمير… بقولك إيه، قبل ما تجيب وتودي، كلمت أبوك؟ حازم… مستعجل على إيه؟ ما أنا كنت داخلك اهو في صلب الموضوع. أمير… يعني كلمته ولا لأه. حازم… أه كلمته. أمير… هااا قالك إيه! حازم… قفل في وشي، ودي أول مرة بابا يعملها معايا. تقريباً كده أبوك هيتبرى منا إحنا الاتنين بسبب أم الجيتار ده.

أمير… هي مالها اتقندلت على نفوخنا لي كده. حازم… عملت إيه مع فرح. أمير… وافقت زي ما إنتَ قولت. حازم… ريم دي تنفع أوي في المخابرات، والله بنت كده نينجاااا، بس قلبها رهيف. أمير… جرا إيه يا عم الحساس؟ هنعمل إيه دلوقتي مع أبوك. حازم… مهو مفيش غير حل واحد يا نجم، وده اللي هحط فيه الأمل كله. أمير… إيه ده؟ قول بسرعة. حازم… لازم نرجع البلد يا أمير ونقابل أبوك ونتفاهم معاه بشكل ودي. أمير… وإنتَ فاكر هيسمعني؟ حازم… الصراحة لأ.

أمير… الله، أمال هنروح نهبب إيه؟ حازم… سيبها على الله، ومن حسن حظك إني واخد 3 أيام مكافأة إجازة، اهو ننزل البلد ونحاول مع أبوك ونقنعه براحة. أمير… وفي الآخر ممكن حتى يقتنع. حازم… لأ برضوا. أمير… الله، جرا إيه يا حازم؟ إنتَ قاعد تكسر مقاديفي ليه؟ طيب. حازم… ما إنتَ عارف دماغ أبوك مش سهلة. إحنا هنحط أملنا في ربنا بقى، ثم في أمك، دي والله وحشاني أوي.

أمير… باين كده، لا فيها صلح ولا حتى جوازة، ولا نافع حتى في شغلانة. إني تعببببت. حازم… يا عم وحد الله في قلبك، مش كده. والله مسرها هتتعدل، بس اهدي. أمير… إني داخل أنام. حازم… أنا طالب أكل، مش هتاكل! أمير… مجاليش نفس. حازم… يا عم روّق دمك كده وتعالى اقعد بس. أمير… عظيم، بيمين ياااا حازم، لو ما خليت عن دماغي الساعتي، لـ"أطربق" الدار دي على اللي فيها، بقولك اهاااه. حازم… إذا كان كده، تصبح على خير.

أمير دخل ينام، أو بمعنى أوضح، دخل يقعد مع نفسه. أما في البيت عند ريم، كانت قاعدة بتسمع فيلم كرتون، وفجأة يتفتح باب الشقة بعصبية وتدخل فرح. رييييييييم. ريم وقفت بخضة. فييي إيه يا بنت الملبوسة؟ خضتيني. فرح… تعاليلي، ده أنا هطلق كل عفريتي عليكي دلوقتي، بقي يا بت أناااا تسرحي بيا وتنيميني ننا؟ أنا تلعبي عليا المحقق كونان وتسربي معلوماتي لحازم بيه. ريم… ينهار أبيض، هو فتن عليا ولا إيه. فرح… يا ترى واخده كام هااا؟

ولا طفحك إيه علشان تعملي فيا كده؟ هههه، لا وداخله عليا وتقوليلي مفيش مصالح. يا بت، ده إنتي المصالح تضرب لك تعظيم سلام. ريم… أهدي بس ووحدي الله في قلبك. فرح… لا إله إلا الله، بس برضوا أنا هربيكي، يعني هربيكييي يا ريم، على عملتك دي. إنتي مفكراني هعديها بالساهل. ريم… من غير ضرب، عايزة إيه أعملهولك تعويض! فرح… تعويض؟ هي مشاعر أمي بتلعب معاكس صابواي يا بت. ريم… طيب يا ستي، شوفي أي اللي يرضيكي وأنا هعمله.

فرح… إنك متطلعيش بنت عمي. ياآآآه، دي أمنية حياتي. ريم… لا دي تتكلمي فيها مع أبويا، مش ليا دخل فيها. فرح… يعني يوم ما ألاقي الغدر يطلع منك إنتي. ريم… لي مش قد المقام ولا مش قد يا عنياااا. فرح… طيب أنا هقولك تعملي إيه. ريم… أه، ادخلي في الموضوع سكة ودغري كده. فرح… تخدميني النهارده لحد ما يجيني نوم وأنام في أوضتك، بعد ما تفرشيها من عندنا علشان مش بستنضفك. ريم… ده في أحلام اليقظة عندك يا بت، مستحييييل، قال أخدمك قال.

بعد ربع ساعة. كانت ريم بتقلي بطاطس في المطبخ. حسبي الله ونعم الوكيييل. فرح بتتفرج على التلفزيون. انجزي ومتحرقيش البطاطس، لتعملي خيرها ومش تنشفي عليها، وغرقيها في الكاتشب وعايزاها طرية من جوه. ريم… مااااشي. فرح… أيييح، كان فين اليوم ده من زمان. موبايل فرح رن. شهد. وأيه اللي فكرها بيا دلوقتي؟ الووووو شهودي، إزيك يا روح قلبي؟ أخبارك إيه! شهد… والله وحشتيني أوي أوي أوي يا فرح.

فرح… يا نصابة، ده إنتي مش بتشوفي خلقتي قدامك. هوحشك كده فجأة. شهد… اللي فاهماني. فرح… ادخلي يا شهد في الموضوع من غير مقدمات، الله يسترك، علشان بتابع مسلسل دلوقتي. شهد… خطوبتي بعد بكرة. فرح… يا اللف نهار أبيض، ومين اللي أمه دعت عليه في ساعة مغربية ده. شهد… البشمهندس عمر يا بت، ههههه. فرح… يا بنت اللعيبة، ده إنتي مش بتضيعي وقت خالص، وجبتيه من رجله. شهد… أمال إحنا بنلعب ولا إيه؟

المهم، أوعي متجيش، عايزكي تجي كده تهيصيلي. فرح… من عينياااا، أنا قدام في هيصة لازم أكون موجودة. الله يبارك يا قلبي، وربنا يتمم لكم على خير. شهد… عقبالك بقى إنتي والبت سارة، أما أسفكم في الكوشة. فرح… احتمال قريب كده. شهد… اللي صحيح، أمير أخباره إيه؟ أنا بحاول أرن عليه، تليفونه مقفول، والبيج عنده واقفة! فرح… ياآآآه، ده حصل معاه مشكلة كبيرة. شهد… لا بقى، ده أنا كده لازم أسمع وبالتفصيل الممل. فرح… خليكي معايا. رييييم.

ريم… ربنا يريحها من وشك. عااايزة إيييي. فرح… كوباية قهوة بوش سالك كده، مش زيك يا أم وشين. ريم كتمت غيظها. أهدي يا ريم، مش دي اللي تخشي بسببها السجن وتلبسي أحمر، ده حتى مش بيلبق على بشرتك. عدا الوقت، وكانت الساعة داخلة على 3 الفجر. حازم خبط على أوضة أمير. صاحي، ادخل. أمير… ادخل. حازم دخل. نمت كويس! أمير… ومنين هيجيلي نوم بس. حازم… طيب يلا ننزل نصلي الفجر، يمكن ربنا يعدلها. أمير… يلا.

حازم وأمير نزلوا الجامع وأدوا الفريضة. كان أمير بسجد وبيطول في السجود، بيتكلم مع ربنا وبيشكيله ضيق الحال وبيسأله الفرج القريب. حازم… حرما. أمير… جمعا إن شاء الله. حازم… أنا بقول تروح تنام، وأنا هجهز شنطة السفر. أمير… قلبي حاسس إن في حاجة هتحصل. حازم... بقولك إيه يا أمير، بالله عليك مش ناقصة توتر. فوض الأمر لله، يلا بقى. أمير وحازم رجعوا البيت، وأمير فعلاً نام من التعب. حازم بيجهز الشنطة ونزل يشتري شوية طلبات للفطار.

في البيت عند فرح... كان عبدلله نايم في أمان الله. دخلت فرح تتسحب، راحت نطّة عليه... عبدااااااالله! عبده قام مفزوع... روحي يا شيخة! في إيه يا أمي؟ فرح... طيب يلا يا ستي الحجة، تعال الفطار جاهز. عبدلله شال الغطا من عليه وطلع يجري ورا فرح، بس سمعت صوت رسالة جاتلها... استنى، وقف الماتش. عبدلله... طيب على ما أغسل وشي وأفوقلك. فرح... ده أمير! "إني معاود البلد، أحلى مشكلة اللي مع أبويا، ادعيلي بقى." فرح... يا رب!

اقف جمبه وسهّله يا أمور، يا رب. حازم شايل الشنط ونازل... خلصت لبس يا أمير. أمير... آه، يلا، إني جاي أهو. حازم... إشطا. حازم نزل ودخل الشنط العربية، وأمير ركب. لسه هيشغل العربية، الموبايل رن... حسين... طيب ثواني يا أمير... الووو! إيه؟ حسين قطع كلامه... مصيبة يا حازم بيه، خالد هرب. حازم... هرررب! إزاي؟ أمّال إنتوا فين؟ كنتوا نايمين على ودانكم. أمير... جري! إيه يا حازم؟ حازم... إقفل أنا جااااي. أمير... هو في إيه؟

حازم خرج من العربية... واحد كنت ماسكه هرب، لازم أرجع الشغل حاااالا. أمير... طيب اطلع غير هدومك. حازم... منا طالع أهو. حازم طلع بسرعة ودخل الشقة، وبدأ يلبس البدلة. لقي ريم بترن عليه... ودي عايزة إيه؟ مش وقتها خالص. قفل حازم ومردش. أمير دخل بالشنط وحازم نازل... أمير... خلي بالك من روحك. حازم... سيبها على الله. حازم ركب العربية، ولقى ريم بترن تاني... يووووه... الووو! إيه؟ قطع كلامه صوت خالد...

آسف يا باشا، ده أنا خالد. معلش، قولت أرن عليك من موبايل حد عزيز، يمكن تسمعني. حازم... ريييييم فين؟ انت عارف لو عملت فيها حاجة. خالد... لا، اتكلم عدل. ولو عايز ميحصلهاش حاجة، تنفذ اللي هقولك عليه.