رواية بين يدي الغامض الفصل الخامس 5 - بقلم رقية

رفعت عيني على اللي قاعد على حرف السفرة. أسماء مغلطتش في وصفه، هو فعلًا زي ما قالت، جسم رياضي، شعر ناعم، ملامح حلوة، دقن تقيلة، عيونه سودا خالص، كإنه بطل من مسلسل تركي. تكلمت وإيدي بترتعش: أهلا مستر جواد. لقيته غمض عينه وبصلي: أهلا آنسة إسراء، شرفتي، تعالي اتفضلي. قعدت على الكرسي، كان فاصل بيني وبينه كرسي واحد. = إيه رأيك في نظام شركتنا؟ _كويس. ساد الصمت لمدة ٥ دقايق.

رفعت عيني عليه، لاقيته بيبصلي، نزلت عيني بسرعة على طبقي. قطع الصمت ده صوت مايا المستفز: حبيبي چواد تاكل ستيك ولا بانيه؟ بصتلها بقرف من أسلوبها ولبسها. = مبتاكليش ليه يا إسراء؟ بصيتله: ماليش نفس. = تحبي تاكلي أي حاجة تانية؟ _لا لا شكرًا، مش عايزة. عينه تقريبًا مكانتش على الطبق، عينه كانت عليا طول القاعدة، أو أنا اللي بوهم نفسي. الحمد لله خلصوا أكل. ولقيته بينادي عليا: إسراء عايزك في المكتب. كانت اللازقة دي جايه معاه.

_إسراء بس يا مايا. لاقيتها بصتلي من فوق لتحت ومشيت بعصبية. دخلت المكتب وسيبته مفتوح: اقفليه وتعالي. خوفت جدًا، قفلته ودخلت. = أنتي طبعًا عارفة انتي هتكوني فين بكرة؟ = آه أكيد. = بكرة هتقدمي الإيفنت، وإنتي اللي هتتكلمي، وطبعًا إنتي مجهزة كل كلامك؟ = مجهزة كل حاجة، متقلقش. = مش عايز أوترك، إن شاء الله هتقدري تثبتي ده بكرة، الموضوع بسيط خالص، ومستر عيسى واثق فيكي جدًا. = شكرًا جدًا. = تقدري تتفضلي. = عن إذنك.

طلعت وأنا بمشي بسرعة على الأوضة. دخلت على السرير عمالة أتنفس بصوت عالي. مسكت التليفون رنيت على مريم. _إيه يابت؟ برن عليكي تليفونك غير متاح ليه؟ = مريم، أنا شفت مستر جواد. _بتهزري، إنتي فين دلوقتي؟ = أنا في القصر بتاعه. _قصر؟ آومال إيه فندق رويال ده؟ = آه والله، ماهو أنا البنت الموجودة فيهم، والباقي شباب، فهو بعت البت الحربوقة بتاعته تجيبني للقصر. _احيه، هو متجوز؟ = لا شكلها رفيقته.

_احيييه يالهويَ، وعاملة إزاي دي ياختي؟ = هي من أمريكا، واسكتي، مستفزة ومش طايقاني خالص، لابسة قمصان نوم حرفيًا، وجسمها كله باين، وبيييضة أوي يابت. _مش عارف يحكم مستر جواد، وبعدين شكلها خايفة منك لتسرقي جواد منها. = بطلي هبل. _وقوليلي يابت عامل إزاي؟ = اسكتي يا مريم، متوقعتش إنه كده بصراحة، أنا قولت مخبي نفسه من الصحافة والناس علشان وحش، بس لا لا حقه بجد. _لي ياختي، توم كروز في نفسه؟ رديت باستهزاء: وأحسن كمان.

= اتنيلي. _وايه المزة بتاعتنا، موقعتوش؟ = لا مزة إيه بقى، كفاية الوتكة اللي معاه دي. _ششش، بس بس، وتكة قال؟ هتجيبي الجمال المصري للجمال الأمريكي، هتلاقيه زهق منها عايز يجدد بقى. = يعني إيه؟ مش فاهمة. _فكك، كملي كملي، كنتي لابسة إيه لما قابلتيه؟ = عباية عادي. _رايحة تقابلي المدير بعباية؟ ياللي تتوكسي! مافيش فستان قصير كده ورجلك باينة زي مايا هانم دي، وتوريها إنك بيضة وجميلة زيها وهو يقارن بقى.

= بسسسس اسكتي يخربيتك، فستان قصير إيه ورجل إيه؟ روحي نامي يا مريم، أنا غلطانة إني كملتك. _وانهي عباية دي يابت؟ = اللي كمها واسع ومفتوحة من الرقبة دي، مش عارفة، مش لاقية غير دي. = واجبها يالا بقى. _اوف بقي، مش دي اللي بتبين رقبتك فيها وضيقة من ورا كمان؟ هتلاقيه اتخيل حاجات سافلة. = مريم، إنتي قليلة أدب، هقفل والله. _هههه، خلاص والله خلاص، كملي.

= مش عارفة، أنا كنت متوترة لما شوفته، ونظراته اللي متشالتش من عليا دي، أنا كنت هموت وبدعي الأرض تتشق وتبلعني. _هتلاقي كان بيتخيل وهو بيبوسك. = مريم، إنتي متحرشة وقليلة الأدب، سلام. قفلت في وشها وبعدين قعدت أضحك من مناغشتها. كنت هنام بس افتكرت إني مكلمتش ماما وأقولها إني وصلت. = ازيك يا ماما، عاملة إيه؟ = إيه ياحبيبتي، وصلتي؟ = آه وصلت أهو. = إنتي فين كده؟ = أنا أنا في الفندق أهو.

= طب خلي بالك من نفسك يا إسراء بالله عليكي، واقفلي وراكي بالمفتاح، واقفلي الشبابيك وكل حاجة يابنتي، ربنا يسترها عليكي. = حاضر يا ماما، ادعيلي إنتي بس. قفلت معاها ونمت. مارديتش أقولها إني في قصر جواد علشان ميحصلش مشاكل. *** = إسراء يا إسراء. = مين؟ = أنا أسماء، قومي يالا علشان تروحي الشركة، مستر جواد مستنيكي تحت. = حاضر، قايمة أهو، شكرًا جدًا إنك صحيتيني. = قومي يالا، جهزي نفسك بسرعة. قومت غسلت وشي واتوضيت وصليت.

ولبست بدلة بنطلون وجاكيت أسود وتحته بيزك أبيض. سبت شعري مفرود، حطيت ميكب بسيط ورشيت برفان. ونزلت. شربت كوباية قهوة علشان أفوق، وكان معايا الورق، كنت براجع منه. لاقيته نازل لابس بدلة ومسرح شعره وراشش برفان ريحته فخمة جدًا. = صباح الخير، يالا بينا؟ = يالا. ركبت جنبه في العربية. كنت براجع أكتر من مرة علشان منساش الكلام. كنت ببصله من وقت للتاني، كان ساعات الاقيه ماسك اللاب شغال عليه، يا أما بيبص على المناطق برا.

وصلنا مقر الشركة في كندا، لاقينا ناس كتير بترحب بيه، وكان فيه صحافة بتصور. لاقيت اتكلم بصوت عالي بالانجليزي: (I’m sorry, stop taking pictures, I don’t show any social media, respect my opinion) (أنا آسف، قوموا بتوقيف أخذ الصور، أنا لا أظهر على أي مواقع تواصل اجتماعي، احترموا رأيي) لاقيت الصحافة وقفوا تصوير ومشوا. دخلنا الموقع.