رواية بين يدي الغامض الفصل الرابع 4 - بقلم رقية

السفر بكرة بإذن الله. التجمع في الشركة الساعة 8 بالليل. الإقامة يومين في كندا في فندق رويال على حساب الشركة. منتظرين منكم تشرفونا وتعالوا بشركتنا. دي الرسالة اللي مستر عيسى بعتها على جروب الشركة. بابا أنا مسافرة بكرة. فين يا حبيبتي إن شاء الله؟ كندا. بطلي هزار يا حبيبتي، تسافري فين؟ بابا مش بهزر بجد، مسافرة بكرة إيفنت في كندا لمدة يومين. أنا مش هرد، هسيب أمك اللي ترد. حبيبتي سفر إيه ونيلة إيه؟

ويوم ما تسافري تطلعي برا مصر؟ أنتي أكيد مخك فيه حاجة. ماما أنا شغالة في شركة، طبيعي الاجتماعات بره مصر ولازم نحضرها. تحضريها بصفتك إيه؟ أنتي مالك أصلًا؟ أنتي مكملتيش أسبوعين في الشركة. يا ماما أنا الحمد لله عملت معاملات في الشركة وشغلي حلو جدًا لدرجة إن المدير اختارني بنفسه في الإيفنت ده. لما ييجي ميعاد السفر يبقى يحلها ربنا. ماما السفر بكرة؟ بكرة نبقى نشوف، ادخلي نامي دلوقتي وبكرة تتحل. ***

اليوم التاني بقيت قاعدة مش عارفة أعمل إيه. طول اليوم في أوضتي، مش عارفة أقوم أجهز الشنطة ولا أعمل إيه، وأقول لمستر عيسى إيه!!! قررت أطلع أكلمهم تاني يمكن يوافقوا. ماما قررتوا إيه؟ اسألي أبوكي. ها يا بابا. مش عارف أقولك إيه، بس هو ممنوع تسافري لوحدك. آمال أسافر مع مين؟ مع جوزك، هو معروف كده. ماشي، وأنا مش متجوزة أجيب جوز منين؟ خلاص استني لما تتجوزي. يعني ده يا بابا آخر كلام عندك؟ ده الكلام اللي المفروض يتقال. تمام.

دخلت أوضتي، كان متبقي 4 ساعات على السفر. *** هم هيقيموا في فندق رويال. طب فيه بنت بس وسط الشباب، مش هينفع تكون في فندق. افرض حصلها حاجة، دي أمانة في رقبتنا. لما نشوف يا عيسى. اقفل علشان عندي مشوار أعمله قبل ما أمشي. *** الساعة جت 7 ونص وأنا قاعدة بعيط وبندب حظي في الأوضة. لقيت الباب بيخبط. قومي جهزي شنطتك، بيقولك أبوكي. بجد يا ماما؟ بابا وافق خلاص؟

آه والله، بعد عناء معاه. بس اسمعي، تخلصي الاجتماعات دي وتيجي، أنتي فاهمة؟ حاضر حاضر والله. قومي يلا الحقي نفسك بسرعة. حاضر. هستناكي بره على ما تخلصي. قمت بسرعة غسلت وشي ولبست وحطيت برفان وميكب خفيف وظبطت شعري وجهزت الشنطة وخلاص خلصت. أنا خلصت. يالا علشان أوصلك. حبيبي يا بابا، ربنا يباركلي فيك يارب. بكرة جوزك هو اللي يقولك. لأ بقى مش أنا. ضحكت. أنت مصمم جوزي جوزي.

وصلنا لمكان التجمع. واتقابلت أنا والشباب. وكان فيه بنت اسمها مايا، صاحبة عيسى وجواد، أمريكية بس بتتكلم عربي مكسر. ركبنا الطيارة. وكنت أول مرة في حياتي أركب طيارة وأجرب الشعور ده. حسيت مع طلوع الطيارة كان روحي بتطلع. بس إحساس ممتع إني شوفت البيوت من فوق والسما شكلها جميل أوي بليل. عدى 4 ساعات كنا وصلنا الفندق. بصوا يا شباب، كل واحد ليه أوضة. أو شوفوا إنتوا هتقسموا إزاي. وانتي ياااا اسمك إيه؟ لقيتها بصتلي من فوق لتحت.

رديت ببرود. إسراء، اسمي إسراء ياااا مايا. تعالي ورايا يا إسراء. ركبت معاها عربية. بعد ربع ساعة كنا وصلنا لقصر، مش شقة ولا فيلا. دخلت أنا وهي. أهلاً أستاذة مايا. تحبي أبلغ مستر جواد إنكم وصلتوا؟ متشكرة يا أسماء. أنا طالعةله. لقيتها مشت خطوتين ورجعت بصتلي. هخلي أسماء توريكي أوضتك. اديها شنطتك تحطلك هدومك في الدولاب. اُمم طيب. أهلاً بحضرتك، أنا أسماء. وأنتي؟ بصيتلها لقيتها طيبة جدًا وجميلة. رديت عليها. اسمي إسراء.

تعرفي إنك جميلة أوي بجد. بجد؟ آه والله. ملامحك حلوة ومختلفة وعيونك ماشاء الله جميلة ورموشك دي صناعية ولا حقيقية. ضحكت بصوت عالي. لأ لأ مش للدرجاتي. لأ طبيعية يا ستي. ماشاء الله جميلة. بجد، شكرًا جدًا. أنتي اللي جميلة أوي على فكرة. بشكرك. تعالي معايا أوريكي أوضتك. طلعت معاها وأنا مبهورة بجمال القصر وتصميمه والألوان بتاعته. إزاي تحفة كده. دخلتني أوضة كبيرة فيها سرير واخد مساحة الأوضة كلها، وتسريحة بمراية ودولاب جرار.

يا خسارة، هقعد فيها يومين بس. ادعي كتير إنك كل اجتماع تبقي موجودة فيه. هو أنتي تعرفي مستر جواد؟ يعني مش قد كده بصراحة. هو حلو؟ مش عارفة ليه سألت السؤال الغبي ده، بس أنا فضولي أخدني أسألها. هيا أكيد شافته. سألتني. أنتي عمرك ماشوفتيه؟ ولا مرة. طبيعته كده. أنا أول ما جيت برضه مشوفتوش غير بعد شهرين شغل. عامل إزاي؟

جمييل اووووي. عامل زي الأبطال اللي في الأفلام. طول بعرض، بجسم رياضي. شعره ناعم. عيونه سودة خالص. ملامحه جميلة أوي. ضحكت على وصفها ليه. أنتي بتحبيه ولا إيه؟ ضحكت جامد وقالت. أحبه إيه بس؟ هيا البومة اللي معاه دي مخلية حد يجي جمبه. بصيت باستغراب. مين؟ اللي اسمها مايا دي. خلي بالك منها. دي عقربة. أنتي ارتحتيلي كده ليه؟ باين عليكي طيبة وأنا حبيتك. أنا أكتر والله.

طب علشان مطولش عليكي. أنا جهزتلك كل حاجة هتحتاجيها هنا أهي. لو عوزتي حاجة، نادي عليا. ماشي يا سكرة. عيوني يا أسماء. يسلم عيونك يا حبيبتي. عن إذنك. دخلت آخد دش علشان أريح جسمي من تعب السفر. طلعت لبست بيجامة وسرحت شعري وعملته ديل حصان ورشيت برفان. وكنت هطفي النور وأنام. لاقيت الباب بيخبط. مين؟ أنا أسماء. اتفضلي يا أسماء. بيقولك مستر جواد تعالي انزلي اتعشي. هو تحت؟ جاوبتني. آه. بعينيها. قلبي دق جامد وجسمي ارتعش. مالك؟

مش عارفة. البسي عباية أو حاجة طويلة وانزلي كلي. لقيتك جعانة. وحتى تشوفي مستر جواد. يعني أنا يوم ما أشوفه أشوفه على الأكل؟ هيا دي مقابلتنا سوا. معلش بقى حظك طيب. على رأيك. هو ده حظي. خلاص يا أسماء روحي، أنتِ هلبس وأنزل. لبست عباية واسعة بكمام واسعة مفتوحة من الرقبة. دي الوحيدة كانت معايا. سبت شعري زي ما هو ديل حصان. نازلة وأنا مش عايزة السلالم تخلص خالص. سمعت صوت خشن رخيم. أنتي خايفة تقربي يا آنسة؟

رفعت عيني على اللي قاعد على حرف السفرة.