رواية بين يدي الغامض الفصل الثاني 2 - بقلم رقية

دخلت على الأكونت مفهمتش حاجة منه. الأكونت مجهول، مش معروف له هو مين ولا كام سنة. مش عارفة أنا شاغلة بالي ليه، بس أنا فضولية وبحب أعرف كل حاجة. يالا، مليش دعوة. أنا أنام أحسن عشان بكرة أنزل بدري. صحيت تاني يوم الساعة 8، فطرت وصليت ودعيت ربنا يوفقني في الشغلانة اللي ملهاش ملامح دي. وصلت أنا ومريم الشركة وقعدنا في المكتب بتاعنا. سمعت صوت مهموس بين بنتين جنبي. واحدة فيهم بتقول للتانية:

"سمعت إن جواد بيه هييجي المقر النهاردة." "بتهزررررري! بس هو محدش بيشوفه أصلاً." "ادعي يا أختي يختارنا في الإنترفيو ونشوفه. أصل هموت وأشوفه بصراحة. بيقولوا إنه وسيم أوي." "بصي يا مريم." "ها." "البنات دول عبيط ولا إيه؟ "ليه كده؟ "العيال هيموتوا ويشوفوا اللي اسمه جواد ده." "شكله حلو عشان كده هيموتوا بعضهم عليه." "يالا إحنا مالنا. قال يعني لو حلو هيسيب كل البنات المزز دي ويختار حد مننا."

"على رأيك. اشتغلي يا أختي اشتغلي." "إسراء معتز عبدالعظيم تيجي لمكتب مستر عيسى ضروري." "أستر يارب. أنا عملت إيييييي؟ دخلت على المكتب وأنا قلبي في رجلي حرفياً. "أهلاً مستر عيسى. حضرتك كنت عايزني؟ "أزيك يا إسراء؟ أخبارك إيه؟

أتمنى تكوني بخير. أنا متفائل بيكي خير من ساعة ما اختبرتك ولاقيت لغتك كويسة جداً والـ CV بتاعك ممتاز. هسيب لك كام ورق تخلصيهم في أسبوع وإن شاء الله هتقدري، عشان الأسبوع الجاي فيه إيفنت هيبقى في كندا مع مستر جواد بيه، بس أنا مش هكون موجود. انتي اللي هتبقي مكاني ومعاكي كام عميل من الشركة. أنا عارف إني اخترتك من البداية كده، بس تفكيرك عاجبني ولغتك المتقنة دي هترفع شركتنا بره بإذن الله. أتمنى متخذليش ثقتي فيكي وتكوني قد اختياري ليكي. موافقة؟

يا الله! إزاي ربنا حنين وكريم على عباده كده؟ مكملتش أسبوعين في الشركة وبقيت بدل شريك الشركة. الحمد لله على كرمه وفضله. "مش سامع رأيك طيب؟ آه ولا إيه؟ "لا لا، أنا موافقة جداً. أتمنى أكون عند حسن ظنك وإن شاء الله هعمل كل اللي أقدر عليه وزيادة. بشكرك على ثقتك فيا." "العفو على إيه. أتمنى تخلصي الورق اللي هديهولك وتسلميه قبل الإيفنت بإذن الله. تقدري تمشي دلوقتي، وقبل ما تروحي هبعتلك مصطفى بالورق."

طلعت وأنا مبسوطة. مش عشان هروح كندا، لأ عشان هقابل اللي اسمه جواد ده. "بت بت، بيقولوا جواد بيه في مكتبه دلوقتي." "فين مكتبه ده؟ "بيقولوا في الدور التالت شمال، مكتب كبير كده وسري. محدش بيدخله خالص من العمال غير أشخاص معينة." "بت يا مريم، انتي مش شاكة في اللي اسمه جواد ده؟ هو ليه هويته مختفية كده؟ حاسة وراه فخ كبير يا بت." "شاكة يا بت والله، بس إحنا مالنا بيه؟ مش هناخد فلوسنا في الآخر."

قطع كلامنا صوت البنات المسهوكة اللي جنبي. "عايزة أتلعلك وأعمل مشكلة عشان أطلع وأشوفه يا بت." "قال يعني لو عملت مشكلة هيهتم بيها ويحلها." "عاش من شافك يا جواد بيه. رامي نفسك انت برا وسايبني هنا طالع عيني." "مش عاجبك امشي، هجيب غيرك. قولي العمال الجداد فين الـ CV بتاعهم وأساميهم؟ "أهم يا سيدي. السيفيهات بتاعتهم وكل حاجة عنهم." "إسراء معتز عبدالعظيم." "حاسس إن الاسم ده مش غريب عليا."

"اسكت يا جواد، البنت دي دماغها ألماظ، هدية وجاتلنا من السما. تفكيرها تفكير 100 بني آدم." "بخاف من تعظيمك في شخص، وبنتخزوق في الآخر. اطلع شوف شغلك ونبقى نشوف إسراء دي بعدين. ابعتلي قهوة مع مازن. دماغي مصدعة." "مين قدك؟ مانتا سهران طول الليل مع مايا." "مش هرد عليك عشان مصدع. ولو قمت مش هخليك موجود من الأساس. أنجز، امشي."

كان فيه مجموعة عندهم مشكلة معينة في المبيعات بتاعتهم ومحتاجين مساعدة، بس ممنوع نهائي يلجأوا للمدير أو الشريك. ودي قوانين الشركة، لأن المشاكل دي بتعلمنا نشتغل على نفسنا أكتر ومنلجأش لحد. كذا حد حاول يحل معاهم المشكلة بس بيفشلوا. فقررت أشوف المشكلة في إيه. "فيه إيه هنا؟ "المبيعات نازلة خالص بسبب موقع اشتغلنا فيه ونزل شغلنا الأرض. بنحاول نحل المشكلة بس الموضوع بيسوق أكتر." "طب ممكن أجرب وأحل الموضوع ده." "ياريت بجد."

حاولت أشغل الموقع وبدأ يشتغل معايا، بس بيحتاج وقت كتير. وعلشان يتقبل الطلب بيقعد من يومين لـ 3. عملت الطلب وهنستنى بعد يومين أو 3. خلصنا شغل وروحت أنا ومريم. روحت لقيت…..