رواية بئر كندراش الفصل الرابع 4 - بقلم نورهان اسلام

نجمة بصتله بصدمة وقالت: انت لسه شاكك إني قمر؟ آدم: عايزني أعمل إيه؟ حياتي واقفة عليكي، لإن لو طلع شكي صحيح... راسي هتتقطع. نجمة: صدقني مش هكدب عليك، أنا نجمة مش قمر، هي شبهي لإنها أختي مش أكتر. آدم اتنهد وبصلها وبعدين بص للخشبة اللي في إيده وهو بيقول: طلعتيلي منين بس إنتي! ساعة كاملة من الصمت المتواصل بينهم. خبط الباب. بصوا لبعض للحظات وبعدين آدم قال: مين على الباب؟ ردت ماندريانا وهي بتقول: أنا يا آدم، ماندريانا.

آدم اتنهد بعمق وهو بيفتح الباب وبيدخلها وقال: عملتي إيه؟ ماندريانا بصت لنجمة اللي قاعدة على الأرض وقالت: هعمل إيه يعني، اشتريت أكل وقلت أشارك معاكم، بما إنها لسه جاية ومتعرفش الأكل بتاعنا. قعدوا ياكلوا وسط استغراب نجمة الشديد من الأكل الغريب اللي بياكلوه، واللي طعمه أغرب. أكلات هي عمرها ما سمعت عنها أو أكلتها قبل كده. آدم ناولها حاجة من الأكل وهو بيقولها: دوقي كده ده!

نجمة بصتله وهي على وشها علامات القرف من الأكل ودقت طعمها. بعدين بصتله وعينها مبرقة وقالت: إنت أكلتني إيه؟ آدم كمل أكل منه وهو بيقول: ده "دومادوا". نجمة فضلت مبرقة وهي بتقول: يعني إيه؟ ردت ماندريانا وهي بتاكل وقالت: ده ثعبان من غير لحم... الجلد بتاعه، ومحشي أنواع سمك كتير أوي. نجمة سمعت الكلام ده وقامت رجعت كل الأكل اللي أكلته. ماندريانا: كده تتأكد إنها نجمة فعلاً مش قمر. آدم:

قمر متعودة على الأكل ده، قبل ما الإمبراطور يشوفها. ماندريانا: فكرت في اللي قولتهولك يا آدم. آدم ساب الأكل وبصلها نظرة طويلة وبعدين قام وساب الأكل. ماندريانا قامت وراه وهي بتقول: دي فرصة مش هتتعوض يا آدم، صدقني، إحنا هيبقى معانا قدرة نشتري خدمات كتير أوي. آدم بص لماندريانا وقال: علشان كده جبتيها؟ ماندريانا بصتله وقالت: في الأول مكنتش الفكرة دي في دماغي، بس ليه لأ! دخلت نجمة وهي تعبانة وبتقول: إنت أكلتوني إيه؟

إيه الأكل المقرف ده؟ آدم بص لنجمة وقال: بكرة تتعودي يا نجمة. نجمة بصتله وركزت إنه قال نجمة مش قمر، بس سكتت وقالت: الأكل ده غريب، أنا عمري ما أكلت أكل مقرف كده. ماندريانا: دي أغلى الأطباق هنا. نجمة: إزاي بتدفعوا فلوس عشان تاكلوا القرف ده؟ ماندريانا بصت لنجمة باستغراب وقالت: فلوس إيه؟ نجمة: أومال اشتريتي الأكل ده إزاي؟ ماندريانا:

لما تقعدي معانا هتفهمي كويس إحنا بنتعامل إزاي، عندنا البيع والشراء عبارة عن خدمات زي ما بتقولوها بالعربي. نجمة: اممم... هتعلم كل ده إمتى؟ آدم: قولتلك لما تثبتي نفسك في أرض كندراش، أي حد بيجي الأرض لازم يروح للوزير ويثبت نفسه إنه من ضمن أهل الأرض. ماندريانا ردت وقالت: بس هي أثبتت نفسها فعلاً يا آدم. آدم: إزاي؟ دي لسه جاية النهارده. ماندريانا:

إنت نسيت إنها شبه قمر، يعني ممكن لو دخلت القصر مكان قمر هتكون ثبتت نفسها فعلاً، ده غير إن الوزير لو شافها هيقول إنها قمر مش نجمة ومش هيصدقها. آدم بفهم: طب والحل؟ ماندريانا: نجمة تدخل تشوف قمر من غير ما الإمبراطور ياخد باله، ولو حد شافها في القصر مش هيشك إنها قمر أصلاً. آدم: وهتدخل إزاي؟ ماندريانا: ما هو ده الحل اللي لازم نفكر فيه، بس لازم في الأول تتعلم لغة أراسي علشان تعرفي تتكلمي قدام الإمبراطور. نجمة

وعيونها بتدمع من الفرحة: يعني أنا هشوف قمر وبابا! آدم: استني لما نشوف هتدخلي إزاي الأول. نجمة بثقة: أنا مستعدة أعمل أي حاجة عشان أدخل القصر. *** لغة أراسي كانت شبه اللغة العربية، لإنها كانت بتبدأ بـ "كند" وبتنتهي بـ "راش". نجمة اتعلمتها بسهولة، وآدم اشتريلها لبس غالي عشان تقدر تدخل بيه القصر من غير ما الحراس يشكوا فيها. *** آدم: جاهزة؟ نجمة: إن شاء الله. آدم: لو حبيتي تقولي "جلالة الملك" هتقوليها إزاي؟ نجمة:

كند جلالة راش... كند الملك راش. آدم: أهم حاجة متتوتريش وإنتي بتتكلمي مع الإمبراطور، وعشان تتواصلي معايا هيكون عن طريق الدماغ. نجمة باستغراب: إزاي؟ آدم: فكري فيا، ورددي اسمي 3 مرات، وهتلاقيني معاكي. نجمة بصت لآدم وابتسمت وهي بتقول: أنا مش عارفة أقولك إيه يا آدم. آدم بصلها وقال: كند بالتوفيق راش نجمة. نجمة خرجت من الكوخ فنادى عليها آدم وهو بيقول: نجمة. لفت بسرعة وهي بتقول: نعم. قال: الإمبراطور اسمه "راناش".

ابتسمت وهي بتطير ناحية القصر. اتنفس آدم بارتياح وخرج من الكوخ. فضل ماشي في الأرض مش عارف يعمل إيه. هو عمل اللي عليه عشان نجمة توصل لأختها وأبوها، بس مش مرتاح لأفكار ماندريانا. وهو ماشي قابل صديقه كريم من أهل الأرض. بصله وابتسم وهو بيقول: كند إزيك راش. كريم: كند بخير راش. فضلوا يتكلموا ربع ساعة.

في مكان تاني، نجمة طايرة وشايفة ناس زيها طايرين في السما. بتحاول تداري وشها زي ما آدم قالها. بتتفرج على المناظر الجميلة الموجودة في الأرض. شافت قصر صغير مكتوب عليه "قصر أرواح كندراش". فضولها أخدها إنها تدخله، لكن كل ما تفتكر إنها هتشوف أخيرًا أختها وأبوها، كل فضولها بيروح اتجاه القصر. *** عند آدم، كان بيتكلم مع كريم فشاف ماندريانا بتجري عليه وهي بتقول: آدم! نجمة كند مش راش كند هتدخل راش كند القصر راش.

آدم باستغراب من كلامها: كند ليه راش؟ ماندريانا اتكلمت عربي وهي بتقول بسرعة: مش على إيدها ختم الإمبراطور يا آدم، هتعلق في الساتر السحري. *** نجمة واقفة قدام القصر وهي طايرة في المكان وبتستعد عشان تدخل القصر. بصت بفرحة للمكان ولأنها أخيرًا هتشوف أختها ووالدها. استعدت وهي بتبتسم وبتدخل القصر. لكن لقت إن فيه حديد حاوط إيدها ورجلها. *** كان آدم بيطير مع ماندريانا وبيقولها: إزاي مفكرتنيش بالموضوع ده؟

الإمبراطور لو شافها وسألها عن اللي ساعدها وقالت هنتقتل. ماندريانا: مجاش في بالي موضوع الساتر السحري، أهم حاجة نلحقها، اسرع شوية. وصلوا عندها في الوقت اللي دخلت فيه في الساتر السحري. كانوا بيحاولوا يفكواها لكن معرفوش. ماندريانا حاولت تستخدم السحر بتاعها لكن أساور كندراش غير قابلة إنها تتسحر. لحد ما سمعوا صوت الإمبراطور والوزير بتاعه. استخبوا في مكان قريب من القصر وهي فضلت مكانها مش عارفة تتحرك. ***

الوزير والملك كانوا بيتناقشوا في أمور الأرض. الملك عمل حركة بإيده ودي معناها إن الوزير يوقف عن الكلام. سكت الوزير والملك فضل ماشي والوزير ماشي وراه لحد ما وصل لسور القصر اللي دخلت منه نجمة. من أول هنا تبدأ الحكاية.