رواية بئر كندراش الفصل الثالث 3 - بقلم نورهان اسلام

وصل آدم وعلى وجهه علامات الخوف وقال: حاولت ألف حوالين قصر الملك، لكن ما لقيتش أي حاجة تدل على إن فيه أي حدث مثير حصل. الحراس واقفين زي ما هما، وأنا حاولت ما أطولش لحد يشك فيا. نجمة: ينفع أنا أروح؟ آدم: انتي الوحيدة اللي مينفعش تروحي. انتي مش شايفة وشك. ماندريانا: هتقعد فين نجمة؟ آدم: وأنا مالي. أنا ما صدقت عرفت أعمل كوخ لنفسي. ماندريانا: مش هتعرفي تعيشي معانا. انتي شبهه ليها شوية، خليها قاعدة معاك. آدم بضيق: طيب.

ماندريانا: أنا همشي دلوقتي. *** آدم قاعد وماسك خشبة وبيشكل فيها، ونجمة قاعدة متوترة ومش عارفة تعمل إيه. فقالت: ماندريانا قالت لي إنك كنت من القرية. للحظة، وقف آدم عن اللي هو بيعمله. بص لها، وبعدين بص للشجرة وكمل وقال: آه، كنت فعلاً. الفضول أخذها فقالت بتلقائية: وجيت هنا إزاي؟ آدم بص لها وقال: موضوع طويل. نجمة: ممكن أساعدك؟ آدم: ولعي النار في الحطب اللي هناك ده. نجمة راحت وقعدت تدور على كبريت وولاعة. ما لقيتش،

فقالت بسؤال: هو ما فيش هنا كبريت أو ولاعة؟ آدم سمع "كبريت وولاعة" وقعد يضحك وهو بيقول: يااااه، كبريت وولاعة. انتي عارفة أنا مشفتش الحاجات دي من إمتى؟ من 17 سنة قبل ما أجي هنا. كبريت وولاعة. نجمة: انت ابن مين في القرية؟ آدم: توفيق الزناتي. نجمة بحزن: عمو توفيق الله يرحمه. آدم وقف تاني اللي كان بيعمله وقام من مكانه وهو بيقول بحزن واضح في عينه: هو مات؟ نجمة بحزن: آه. من سنتين. آدم غمض عينه بحزن وهو بيقول:

كان نفسي أشوفه. نجمة: كانوا بيقولوا إنه دور عليك لحد ما شعره شاب. ناس قالت إنه مات من الحسرة على فراقك. و... آدم: انتي جيتي بنفسك! صح؟ اتوترت ودموعي بانت في عيني مهما حاولت أخبيها. مقدرتش أقول أي حاجة. لكن دموعي نزلت. قرب مني بورق شجر بس طري زي المناديل وقالي: امسحي دموعك. مسكتها ومسحت دموعي وهو قال: يبقى توقعي صح. انتي نطيتي هنا. هزيت راسي ولسه دموعي نازلة وقولت:

كنت نازلة البير بارداتي لحد ما سمعت أذان الفجر. استغربت للي كنت هعمله في نفسي. بس وأنا راجعة شوفت مجموعة كلاب واقفة تحت البير. خوفت ورجعت خطوة لورا. وما كنتش متخيلة إن الخطوة دي هتكون لهنا. قال: أنا من القرية زي ما انتي عارفة. لكن ما نطيتش زيك بإرادتي أو وقعت غصب عني زي ما حكيتي. أنا اتررميت. الدهشة والاستغراب زادوا في عيني وهو كمل وهو بيقول:

أنا كنت عايش مع أمي وأبويا. لكن أمي بعد ما ولدتني بـ 5 سنين ماتت. وأبويا اتجوز واحدة في الأول كانت بتهتم بيا. وبعد ما خلفت بقت تتعصب مني على أقل غلطة أعملها. لحد ما في يوم وأنا نايم، أخدتني وحدفتني هنا بدون رحمة. وبعدين معرفش إيه حصل. كنت طفل عنده 9 سنين. حياتي ماشية عادي لحد ما صحيت ولقيت نفسي هنا. حاولت أتعايش مع الأمر. وأهو زي ما انتي شايفة. نزلت نجمة راسها بحزن ومتكلمتش. آدم بص لها وفهم هي هتقول إيه. وهو بيقول:

كان نفسي أرجع له. حاولت كتير، بس معرفتش. نجمة: محدش بياخد كل حاجة. أنا مثلاً، حققت حلم بابا واشتغلت في شركة كبيرة وأخويا بقى رائد في القوات الخاصة. لكن الدنيا مش بتنصف حد. وماحدش بياخد منها كل حاجة. آدم: عندك حق. بس أنا ملحقتش آخد منها حاجة، علشان هي تاخد مني. وبعدين كمل بحزن وقال: زمان كانوا بيحذروا أي حد إنه يقرب للبير، لاعتقادهم إن اللي بينزل تحت مش بيطلع. نجمة سكتت وكذلك آدم. آدم حاول يبدأ حوار تاني وقال:

نفسك ترجعي القرية؟ نجمة وهي باصة في الفراغ: تؤ. آدم باستغراب: ليه؟ نجمة: قولتلك الدنيا مش بتدي لحد كل حاجة. آدم: تقدري تعيشي معايا هنا. ممكن أقسم الكوخ ده بينا، مع إني لسه بانيه من سنة. نجمة: انتوا بتعيشوا هنا إزاي، وبتاكلوا إزاي، بتعملوا إيه، بتشتغلوا إيه؟ آدم: اهدى الأول وأنا هقولك كل حاجة. أولاً، إحنا مش بنموت هنا إلا بقطع الراس، وبيكون بأمر الإمبراطور. والأكل بيكون محدود على حسب الفرد. لازم تسجلي في أرض كندراش.

نجمة أول ما سمعت سيرة كندراش، عيونها لمعت وافتكرت كل ذكرياتها زمان وقالت: نفسي أرجع لو معاهم. آدم: ما تبنيش لنفسك أمل ممكن يتهد قدامك، وساعتها هترجعي لنقطة الصفر من تاني. نجمة: الأرض دي اتعملت إزاي؟ يعني مين أسسها مين بناها؟ فيه أساطير كتير بتتكلم عنها في القرية، بس بعد اللي شوفته هنا، معتقدش إن الأساطير دي حقيقية.

آدم: سمعت من ساكني الأرض الأصليين، إن لما الساحر كندراش نط في البير، الجن اللي كانوا معاه هما اللي أسسوا الأرض دي. وعملوا تهجين بين صفات البشر وصفات الجن، من حيث الشكل. لكن اختلفوا معاه على شيء فحكموا الأرض دي. اليوم هنا بنص يوم الأرض. فمع شروق شمس جديد على أرضنا، بيكون عدى 12 ساعة في الأرض. يعني اليوم هنا 12 ساعة مش 24 ساعة. نجمة: عايزة أتعلم لغة أراسي.

آدم: لازم تثبتي الأول إنك من أهل كندراش. الساحر قبل ما يموت أو يتقتل من الجن، عمل تعويذة إن اللي يدخل الأرض يتهجن ويكون نصه جن ونصه إنس، زي الحال اللي عليكي دلوقتي. ولو حابة تتعلمي لغة أراسي هتتعبى جامد. نجمة: عايزة أتعب. عايزة أنسى اللي حصل. آدم بشك: بس اللي حصل مش هيتنسي يا نجمة. وبعدين بص في عينها وقال: ولا نقول قمر! نجمة بصت له بصدمة وقالت: لسه عندك شك في كلامي إني نجمة!