رواية ضائعة في قلب ميت(1 الفصل العاشر 10 - بقلم كان لي

سيف: طلع مش ابني يا ديما... طلع مش ابني. سكتت ديما ولم تعرف ماذا تقول من الصدمة. وبعد قليل قالت: سيف، انت لسه معايا؟ سيف: أيوه. ديما: هتيجي امتى يا حبيبي؟ سيف: طيارتي كمان ساعتين. ديما: طب يا حبيبي خلي بالك على نفسك. سيف: ... ديما: سامعني يا سيف؟ سيف: ديما، أنا بحبك أوي. ديما: وأنا كمان بحبك أوي.

اتصل مازن بخالد بالمنصورة واتفق معه على ميعاد للزيارة، على أن تكون الزيارة بمفرده لأول مرة، وبعدها المرة القادمة ستكون مع أهله. وصل مازن إلى المنصورة وهو يشعر بالغبطة والفرح، فأخيراً سيحصل على الفتاة التي سرقت قلبه. وصل مازن إلى منزل مي وطرق الباب، وفتح له الشيخ خالد. تعرف مازن على حسن والد مي ووالدتها نعمة. طلب مازن الاقتران بمي وأخبروه أن الرد سيكون بعد رأي مي.

وافق الشيخ خالد أخو مي على أن يجلس مازن مع مي قليلاً حتى تستطيع أن تكون رأيها. دخلت مي بجمالها الهادئ ولباسها المحتشم الذي يزيدها جمالاً. جلست مي على كرسي بعيد عن مازن ورأسها لأسفل. استأذن خالد للخروج من الغرفة لترك المجال لهم حتى يتحدثوا بحرية. مازن وقد لاحظ أن مي لا تنظر له وتفرك في يديها بعصبية. جلس مازن على كرسي أقرب لمي وقال: أزيك يا مي؟ مي بخفوت: الحمد لله. مازن: هو فيه حاجة واقعة منك تحت؟ مي: إيه؟ لأ، ليه؟

مازن: أصل شايفك باصة للأرض. مي بخجل: لأ، أصل ماينفعش، يعني... مازن: ماينفعش إيه؟ مي: احم، ماينفعش أبصلك. مازن: ليه شكلي وحش للدرجة دي؟ مي: بالعكس... سكتت وقد تداركت خطأها: أقصد يعني مش عشان كده. ابتسم مازن وقال: على العموم، أنا عايز أقولك كلمتين وعايزك تسمعيهم كويس، عشان وانتي بتكوني رأيك عني يكون الكلام ده في حسبانك. مش حابب أكدب عليكي عشان ربنا يبارك لنا في حياتنا. ابتسمت مي: وأنا سمعاك.

مازن: بصي يا ستي، أنا كنت بني آدم مستهتر، كان كل اللي في دماغي الشرب والسهر والبنات. نظرت له وهي تفتح عيونها.

مازن مكملاً: ما تبصيليش كده، أنا قلت هقولك الصراحة، وهو ده اللي حصل فعلاً. أنا كنت بعمل كل ده، بس الحمد لله من يوم ما شفتك وعرفتيني طريق الجنة وأنا بطلت كل ده. وصدقيني لو قلت لك إني الأول كنت بجرب حاجة جديدة، أو يعني كنت بحاول أقربلك، بس لما ابتديت أصلي وأبعد عن كل الغلط اللي كنت بعمله حسيت براحة غريبة، حسيت إني لقيت نفسي اللي كانت ضايعة مني. عشان كده وافقتي أو ما وافقتييش أنا مش ناوي أرجع تاني زي ما كنت أبداً.

ابتسمت مي ولم ترد. مازن: طيب بما إني شكلي كده المتحدث الوحيد في القعدة دي، فحابب أقولك حاجة كمان. بالنسبة لبابايا ومامتي، والدي طبعاً هو الوزير جمال الوكيل وماما تقدري تقولي عليها سيدة مجتمع. المكانة اللي هما فيها بتخليهم يتعاملوا مع الناس بتكبر شوية. أنا عارف إن دي حاجة وحشة بس غصب عني مش هقدر أمنعها، فبطلب منك إنك تتحمليهم معايا وما تزعليش منهم، لأنهم والله ناس طيبة بس الوضع فرض عليهم يبقوا كده.

مي: ما تخافش، عمري ما هزعل منهم. ابتسم مازن: أفهم من كده إن دي موافقة؟ مي: ... مازن: على العموم، أنا مش هستعجلك، هسيبك تفكري براحتك، بس أنا حبيت أفهمك كل حاجة عشان نكون على نور. وصحيح أنا نزلت شغل في المكتب مع سيف، واللي ما تعرفيهوش إن دي أول مرة أنزل أشتغل فيها وعمري ما اشتغلت قبل كده. نظرت له مي باستغراب. مازن: حاجة غريبة صح؟

مش قلت لك كل حياتي اللي فاتت كانت غلط، بس أنا ناوي أصلحها. يمكن هعتمد على والدي يساعدني في الأول عشان أجيب شقة وأفرشها، بس بعد كده هنعيش على مرتبنا وبس، وده أكيد مش هيخلينا عايشين في مستوى عالي زي اللي هيكون فيه أبويا وأمي أو أخويا سامر، بس أنا حابب إني أنا اللي أصرف على بيتي من شغلي ومش بمساعدة حد، ده لو ما كانش يضايقك.

مي بخجل: لأ طبعاً ما يضايقنيش، بالعكس دي حاجة تبسطني، وطول ما أنت بتتقي الله فيه مش مهم أي أمور مادية. مازن: يعني كلامي ده ما ضايقكيش؟ مي: بالعكس، ده خلاني أكون صورة صحيحة عنك. زفر مازن بارتياح: ريحتيني. مازن: طب هحكيلك حكاية صغيرة كده عشان أكون قلت كل حاجة. مي: اتفضل.

مازن: الحكاية دي واحنا صغيرين أنا وسامر أخويا كنا بنلعب بالعربيات بتاعتنا، وكان سامر بيتخانق معايا على عربية حمرا، هي كانت بتاعتي في الأساس بس هو كان عايزها. لما مارضتش أديهاله، زعل مني ونزل يلعب بعجلته في الجنينة. أنا زعلت عشان هو زعل مني ونزلت عشان أديهاله، بس هو مارضيش ياخدها وقالي نادي لوليد جارنا يلعب معانا. وليد ده كان غريب، بيحب يلعب بالعرايس زي البنات. جه وليد ومعاه عرايسه كالعادة، وسامر قعد يتريق عليه ويقوله انت شبه البنات. زعل وليد وراح بيته معيط، وأنا طلعت نمت.

كانت مي تستمع لمازن باهتمام وتركيز. وعندما سكت، استحثته قائلة: ها وبعدين؟ مازن: بعدين إيه؟ مي: بعدين إيه اللي حصل؟ مازن: خلاص الحكاية خلصت. مي: مش فاهمة، المفروض أفهم إيه من الحكاية دي؟ مازن: ولا أي حاجة، أنا بس كنت عايز أتكلم معاكي. نظرت له مي وغصباً عنها ضحكت، فوضعت يديها على فمها حتى تمنع صوت ضحكاتها. نظر مازن لمي وهي تضحك وسرح في جمالها البريء. تداركت مي نظرات مازن فخجلت وقامت وقفت.

أنا هقول لخالد ييجي بقى. قالت ذلك وخرجت مسرعة من الغرفة. ابتسم مازن وانتظر خالد واتفق معه على أن يرد عليه، وأن حصل على موافقتها يحضر والدته ووالده في أقرب وقت. جلست ديما في غرفتها بعدما نقلت ملابسها من جناحها هي وسيف إلى غرفة أخرى. انتظرت وصول سيف إلى أن سمعت صوت سيارة تقف أمام الفيلا. وعندما نظرت من الشرفة وجدته يدخل الفيلا. وصل سيف إلى الفيلا وصعد إلى الطابق الأعلى فوجد ديما تنتظره أمام غرفتها.

وقف أمامها وشعر وكأنه فارقها من سنين وليس من يوم واحد فقط. أحتضنها سيف بقوة حتى كاد أن يمزق ضلوعها. ديما: سيف، أه! أنت كده هتموتني. انتبه سيف لنفسه فأبعدها عنه برفق ولكنه مازال محتفظاً بها بين ذراعيه. سيف: بعد الشر عنك يا حبيبتي، بس كنت وحشاني أوي. ديما: وأنت كمان وحشتني أوي، كنت قلقانة عليك أوي. سيف: تعالي ندخل نتكلم جوا. أمسكها سيف من يديها ودخل الغرفة، أجلسها على الكنبة ووضع رأسه على ركبتيها.

سيف متنهداً: ضربتها، كنت عايز أموتها. ديما: ليه كده بس يا سيف؟ سيف: عشان ضحكت عليه، كانت عايزة تدمر حياتي. لولا إن مازن قدر يكشف كانت بتعمل إيه؟ كان زماني اتدبست فيها من تاني. ديما: قول الحمد لله. سيف: الحمد لله. ديما: أنت مضايق عشان سبتها يا سيف؟ رفع سيف رأسه من على ركبتيها ونظر لها وقال: دي الحاجة الوحيدة الكويسة في الموضوع إن اللي حصل ده خلاني أقدر أسيبها بكل سهولة وكمان ماتقدرش تهددني ببنتي.

ديما: خلاص يبقى مضايق ليه؟ سيف: افهميني يا ديما، مهما كان أنا راجل وهي كانت مراتي وشايلة اسمي وعملت كده وهي على ذمتي. هو ده اللي مضايقني، لكن هي ولا تفرق معايا. ديما: طب خلاص ما تضايقش نفسك وانسى بقى. عايزك تفوق لشركتك وكمان عشان نفرش بيتنا الجديد سوا، ولا رجعت في كلامك؟ سيف: بصراحة رجعت. ديما: نعم؟ سيف: بس مش في كل الكلام، رجعت بس في حتة إن كل واحد فينا ينام في أوضة. خلاص أنا هنام هنا.

ضحكت ديما: ههه، انسى دي. ماما رجاء عرفت وأنا فهمتها كل حاجة ومش ممكن تقبل إنك تنام هنا أبداً. سيف: هي فيها ماما، أنا اللي جبته لنفسي. ديما: طب يالا قوم على أوضتك. سيف: طيب بس فيه حاجة. ديما: إيه؟ سيف: بصي يا ستي، أنا هكلم خالك وطارق ابن خالك الرخم ده يحضروا. ديما: ماشي. وأنا هكلم مي، رغم إني عارفة إنها ملهاش في جو الحفلات بس هحاول أقنعها... آه صحيح، عرفت إن مازن راح خطبها.

سيف: على طول كده، ده الواد مابيضيعش وقت. ماشي، كمان عايز أكلم ياسر أخوكي ييجي. مرت سحابة حزن على وجه ديما وقالت: بمناسبة ياسر، أنا فيه موضوع كنت مأجلاه، بس لازم تعرفه. اعتدل سيف وقال: فيه إيه؟ قلقتيني. ديما: كارما. سيف: مالها كارما؟ ديما: أنا من فترة كده بعت الأشعة بتاعت كارما لياسر، وهو قالي... سيف: قالي إيه؟ ديما: حالة القلب متأخرة أوي، ولازم لها عملية زرع قلب. ظهر

الوجوم على وجه سيف وقال: بتدفع تمن شيء هي ما عملتوش. وضعت ديما يديها على كف سيف. ديما: سيف، ما تفكرش في اللي فات. ياسر طمني وقالي إن عمليات زرع القلب بقت بسيطة، مابقتش زي الأول، وإن شاء الله هتخف وترجع تاني زي الأول. سيف: بجد ياديما؟ أنا مش عارف أقولك إيه، إنتي بتفكري في بنتي أكتر مني. ديما: وأنت كمان بتفكر فيها، بس أنت عليك ضغط جامد وعشان كده مش عارف تفكر صح.

سيف: ربنا يسهل. اديني رقم ياسر أكلمه وبالمرة أعزمه عشان ينزل. ديما: مفيش داعي يا سيف، ياسر طول الوقت مشغول. سيف: هنوضب أمورنا على اليوم اللي يقدر ينزل فيه. أنا عايز اليوم ده يكون فيه كل الناس اللي بيحبونا حوالينا. ابتسمت ديما. وضع سيف يديه على خدها وقال: عايز نبدأ حياتنا صح، ويكون العالم كله شاهد علينا. ديما: ... اقترب سيف من ديما وكان سيقبلها، ولكن رجاء فتحت الباب وصاحت: سيف، أنت بتعمل إيه هنا؟

سيف بصوت واطئ: مش كنا بطلنا العادة دي وسلكت معانا. رجاء: ما بتردش ليه يا ولد؟ رجاء: أنا بقول لديما تصبحي على خير. رجاء: وقلت، اتفضل قدامي على بره. سيف: حاضر يا ماما، حاضر. خرج سيف غاضباً من الغرفة وهو يتمتم. غمزت رجاء لديما وقالت: أحسن، خليه يتربى. ابتسمت ديما. ذهب سيف وديما إلى منزلهم الجديد وأعجب سيف جداً بالفيلا، واتفقوا مع الشاري على سعرها ومضوا العقد.

مرت الأيام وسيف منشغل بافتتاح شركته، وديما منشغلة بالإشراف على توضيبات الفيلا تحت إشرافها وإشراف سيف. انتظمت ديما على جلساتها مع الدكتورة رضوى، وأصبحت على انفتاح أكثر معها وقصت لها عليها كل شيء عن حياتها. حكت ديما للدكتورة رضوى عن الحلم الذي يراودها دائماً، خصوصاً بعدما تكرر عليها كثيراً في الأيام الأخيرة. استمعت لها الدكتورة رضوى باهتمام وقالت لها: إنتي ليه فسرتيها على إن آدهم زعلان منك؟ ديما: عشان بيبعدني عنه.

رضوى: ديما حبيبتي، آدهم بيبعدك عنه قاصد إنك تشوفي حياتك، مش عايزك تفضلي معلقة نفسك بالماضي، وتحسي نفسك مذنب لأنك هتتجوزي. ديما مفكرة: تفتكري يا دكتورة؟ رضوى: ملهاش تفسير تاني يا ديما، إنتي حاسة بالذنب صح؟ ديما: آه، حاسة إني ما حافظتش على وعدي ليه. رضوى: طب يا ستي، هو بيحلك من الوعد ده وبيقولك عيشي حياتك يا ديما. ديما: ... بس أنا خايفة من حاجة تانية. رضوى: من سيف، صح؟ أومأت ديما بالموافقة.

رضوى: ديما، سيف غلط بس محدش فينا معصوم من الخطأ. ديما: أنا سمحته بس خايفة، خايفة لما ييجي تاني جنبي ما أقدرش وأفتكر اللي عمله زي المرة اللي فاتت. رضوى: بصي يا ديما، أول ما تفتكري اللي حصل، استبدلي الصورة. ديما: إزاي يعني؟ رضوى: يعني حاولي تفتكري أكتر موقف خلاكي حبيتي سيف وحسيتي إن هو ده الراجل اللي ممكن تعتمدي عليه. ديما: اممم، وتفتكري ده الحل؟ رضوى: أكيد.

انتهت ديما من جلستها مع رضوى وكالعادة كل مرة تشعر بأنها أفضل من المرة السابقة. ذهبت ديما إلى منزلهم الجديد للإشراف على العمال، فقد أصبح هذا شغلها الشاغل هذه الأيام، وخصوصاً بعد عودة سمية إلى المكتب، وبذلك أصبحت لا تذهب الشركة. وصلت ديما إلى منزلها وهي تشعر بالسعادة، وهذا هو حالها كل مرة تدخل فيها إلى المنزل، وذلك لإحساسها أنها في مملكتها الخاصة.

دخلت ديما إلى المنزل وتفاجئت بوجود سيف مع العمال. ظلت واقفة تراقبه دون أن يشعر بها، واعترفت أنها أفتقدته في الأيام السابقة نظراً لانشغاله الشديد وانشغالها، وأيضاً أوامر السيدة رجاء. نظر سيف فوجد ديما تراقبه، فابتسم لها واستأذن من المهندس المسؤول عن نظام الإضاءة بالمنزل وذهب إليها. سيف: على فكرة، إنتي وحشتيني أوي. ديما بابتسامة: وأنت كمان. سيف: والله ماينفع، يعني تبقي مراتي وماما ما تخليناش حتى أكلمك.

ديما: أنا خطيبتك، مش أنت قلت كده؟ سيف: أستاهل ضرب الجزمة. بقولك إيه، ما تجيبي بوسة. ضربته ديما في كتفه: اتلم. سيف: أكتر من كده والله حرام. ديما: هانت يا سيف، كلها 3 أيام ونتجوز. سيف: هانت. قولي لي، كنتي فين؟ ديما: كنت عند رضوى. سيف: عزمتيها؟ ديما: طبعاً، وقالت لي جايه. سيف: وياسر أكد لي إنه هينزل، وخالك وطارق الغتت هيجيبوه هو وأخوه ومرات خالك وييجوا. ديما: كده تمام، مش ناقص حد. سيف: لأ مش ناقص. طمنيني، جبتي الفستان؟

ديما: آها. سيف: طب وريهولي. ديما: لأ طبعاً. سيف: طب لونه إيه؟ ديما: تؤ تؤ. سيف: عشان الكرافت بتاعتي يا ديما. ديما: بجد؟ أنت هتلبس كرافت لون فستاني؟ سيف: آه. ديما: أياً كان لونها؟ سيف بثقة: طبعاً. ديما: سيمون. سيف: مين؟ ديما: هو إيه اللي مين، الفستان يا سيف لونه سيمون. سيف: لأ مش لاعب، عايزاني ألبس كرافت سيمون. عقدت ديما ذراعيها حول صدرها وقالت: هتلبس يا سيف، أنت قلت.

سيف: قلت، أظاهر إن كل حاجة بقولها بتطلع على دماغي بعد كده. ديما: تبقى زي الشاطر تلبس الكرافت. جاء اليوم الموعد الذي ينتظره الجميع، يوم افتتاح شركة الديما للديكورات، فقد أسماها سيف على اسم زوجته وحبيبته ديما، وأيضاً يوم إعلان زواجهم.

حضر الحفل كلاً من ياسر فقد عاد من أمريكا ليعوض أخته عدم وجوده المرة السابقة، وخال ديما وأسرته، وأسرة مي ومازن صديقه ووالده ووالدته، وبالطبع أسرة سيف وكارما، والمهندس ماجد الذي اصطحب معه مريحان، وكل العاملين بالشركة، وبعض رجال الأعمال أصدقاء أشرف والد سيف. أقيم الحفل بقاعة كبيرة بأحد أكبر الفنادق بالقاهرة. وأصر سيف على حجز غرفة لديما لتتجهز فيها.

وقف سيف أسفل السلم بانتظار ديما بعدما أعلمته أنها انتهت وفي طريقها إلى الأسفل.

نزلت ديما السلم وهي تتهادى بفستانها السيمون الطويل بحمالة واحدة من الجهة اليسرى والكتف الآخر عارٍ غطته بشعرها الأسود الحريري، فقد جمعته كله لينزل على الجانب الأيمن. حمالة الفستان اليسرى كانت تتزين بفصوص فيه وأيضاً فصوص من عند الخصر لينزل بعدها أوسع إلى الأسفل، وارتدت صندل من نفس لون الفستان ووضعت أقراط من نفس لونه أيضاً، وارتدت في عنقها سلسلة سيف الذي أهداها إياها قبل الزفاف بدلاً من السلسلة الأخرى التي تحمل ذكريات أليمة لكلاً منهما.

أمسك سيف بيد ديما وطبع قبلة على باطن كفها. كانت عيون تلتهم تفاصيلها الجميلة بنظرات مليئة بالإعجاب. سيف: أنا مش مصدق إن القمر ده بتاعي أنا وبس. خجلت ديما من كلامه ونظراته، فحاولت أن تغير الموضوع. ديما: حلو أوي الكرافت عليك يا سيف. سيف وهو يعدل ربطة عنقه: الكرافت بس؟

فنظرت له متفحصة من أعلى رأسها المصفف بعناية وممشط بطريقة جذابة للخلف إلى بدلتها السوداء الجميلة وقميصها الأسود والكرافت السيمون، كانت ببساطة وسيمة جداً وجذابة جداً. ديما: لأ مش الكرافت بس، كلك تحفة. سيف: إنتي بتعاكسيني بس للأسف أنا مرتبط... واقترب منها وقال: وبموت في مراتي. ضحكت ديما وتأبطت ذراعه وقالت: طب يالا ندخل عشان الناس. سيف: تحت أمر مولاتي.

دخل سيف وديما إلى القاعة فساد الصمت على الجميع. الكل ينظر إليهم وإلى جمال ديما وروعة فستانها، وإلى سيف ووسامته وجاذبيته. وبدأت الموسيقى معلنة ابتداء الحفل.