رواية دواء القلب الفصل الخامس والعشرون 25 - بقلم مصطفى محمد

لا توجد راحة، نعم مع الحياة لا توجد راحة، ولكن يوجد أمل وهو ما يجعلنا نصمد ونستمر. ذلك الأمل إما ينمو ويضيء مع مرور الوقت أو ينطفئ ثم يختفي. وبالنسبة لسارة فقد أضاء الأمل بداخلها من جديد بعد أن شعرت بقبضة قاسم تضم يدها وكأنه يتشبث بها حتى وهو فاقدًا لوعيه يريدها بجواره. غمرها شعور السعادة وبدأ قلبها يشعر بالراحة والطمأنينة، ولكن سرعان ما تبدل هذا الشعور إلى الذعر والقلق عندما سمعت تأوهاته المتألمة. شعرت بالذعر وهي لا تعلم ما الذي يحدث وماذا يجب أن تفعل. حاولت الخروج ومناداة أحدهم ولكن لم يتركها وبقيت يده متشبثة بيدها لتتوتر بشدة ولم تعلم ماذا ستفعل.

ولكن بعد لحظات قليلة فتحت الممرضة الباب لتلتفت إليها سارة بعيون دامعة وكأن القدر أرسل هذه الممرضة لها. سارة بدموع: لو سمحتي ألحقيه بسرعة مش عارفة ماله. الممرضة مُسرعة: اتفضلي برا علشان أعرف أشوف شغلي. وضغطت على زر متواجد بجوار الفراش لتنادي الفريق الطبي ليأتي بعد لحظات الطبيب ومع لفيف من الممرضين والممرضات. كانت سارة تقف في زاوية الغرفة وهي تضع يدها على فمها وهي تنتحب بصمت ليلتفت إليها الطبيب ويقول:

الطبيب: اتفضلي برا يا آنسة لو سمحتي. شعرت سارة أن قدماها أبت التحرك من مكانها وهي تنظر إليه وهو بهذه الحالة المزريّة ليقول الطبيب: الطبيب بإنفعال: خرجوها برا وجهزوا غرفة العمليات بسرعة. أمسكت الممرضة يدها وساعدتها على الخروج من الغرفة لتجد يوسف ورندا يقفان بالخارج وحالتهما يرثى لها لتقترب منها رندا وتقول: رندا بهلع: سارة في أي... أي اللي حصل؟ لم تستطع سارة التحدث فدموعها لم تترك لها المجال.

يوسف: يا سارة أي اللي حصل وقاسم جراله أي؟ سارة بدموع: مش عارفة بيقولوا هيجهزوا أوضة العمليات مش عارفة في إيه. لحظات ووجدوا الطبيب يخرج ومع الممرضين يدفعون قاسم على السرير المتنقل ويأخذوه إلى غرفة العمليات. يوسف بهلع وهو يوقف الطبيب: في أي يا دكتور أخويا ماله؟ الطبيب على عجلة: خير إن شاء الله ادعي له انت بس. يوسف بإنفعال: خير إزاي يعني وانتوا واخدينه على أوضة العمليات قول لي في إيه؟

الطبيب: حصله نزيف حاد ولازم عملية علشان نوقفه عن إذنك علشان أشوف شغلي. ذهب الطبيب وترك يوسف في حالة ذهول. دخلت الأمور في وضع خطر وشعر بأنه سيفقد أخاه. ظل هكذا للحظات ولم يفق إلا على صوت زوجته المذعورة وهي تناديه لينظر لها ويجد سارة ملقاة على الأرض وهي فاقدة لوعيها من جديد. نعم ليلة مليئة الذعر والقلق. يبدو أنها لن تمر بسلام.

بعد ما يقرب من ثلاث ساعات على الأحداث الماضية خرج قاسم من غرفة العمليات ونُقل إلى غرفته مجددًا لتُسرع رندا إلى الطبيب وتتحدث قائلة: رندا: خير يا دكتور حالته أي؟ الطبيب: صعبة.. صعبة جداً بدأ يحصله مضاعفات في باقي أعضاء جسمه نتيجة ضعف عضلة القلب وكل ما تأخر أكتر في إجراء العملية هيحصل مضاعفات أكتر ومش عارفين ممكن نوصل لإيه. رندا بتساؤل: يعني هو محتاج نقل قلب يا دكتور ولا إيه مش فاهمة؟

الطبيب: لا إحنا موصلناش للمرحلة دي ودا اللي إحنا بنحارب علشان نتجنبه. العملية اللي هنعملها علشان نوسع شرايين وكمان فيه مشاكل في عضلة القلب زي ما حضرتك عارفة وكمان فيه شوية مضاعفات في باقي أجهزة القلب وبدون ما أدخلك في تفاصيل كتير. حضراتكم لازم تقنعوا بالعملية هو أي نعم ممكن يحصله مضاعفات بعد العملية ولكن إحنا مقدمناش حل تاني أظن حضرتك فاهمة كدا. رندا وهي تحرك رأسها: فاهمة يا دكتور. طيب هو هيفوق إمتى؟

الطبيب: مش أقل من 12 ساعة. على فكرة انتوا ممكن تمشوا وتيجوا بكرة يعني قعدتكم هنا هنا مش هتغير حاجة. رندا: إحنا مش هنمشي من هنا غير لما نطمئن على قاسم. الطبيب بتفهم: طيب أنا فضلتلكم الأوضة دي علشان تقعدوا فيها هو ممنوع بس أنا هتصرف. صحيح هو فين يوسف؟ رندا: تعب فأقنعته يريح في الأوضة دي علشان كان مجهد جداً. الطبيب: طيب عن إذنك. رندا: اتفضل يا دكتور.

تنهدت رندا بتعب ودخلت الغرفة المتواجد بها زوجها وجلست على كرسي بجوار سريره. شعر بتواجد أحد بداخل الغرفة ففتح عينيه ليجد زوجته جالسة على الكرسي المقابل له ويبدو على وجهها علامات الإجهاد ليعتدل ويقول: يوسف: رندا!! خير الدكتور قالك أي؟ نهضت رندا وجلست بجواره وقالت: هيبقى كويس. الدكتور قال هيبقى كويس.

رأى يوسف علامات الإجهاد البادية على وجهها فلم يطل الحديث وأفسح لها لتستلقي بجواره وتضع رأسها بين أحضانه وتغفو بتعب وإرهاق ليشاركها زوجها غفوتها بعد لحظات. في صباح اليوم التالي. فتح عينيه ببطء ليجد الجميع يقفون وينظرون له. تفاجأ بوجود رغدة ومازن في المكان. التفت إلى الجهة الأخرى ليجد سارة جالسة بجواره. نظر إلى يدها الممسكة ليده وشعر بسعادة جاهد ألا تظهر على وجهه. يوسف: الحمد لله على سلامتك. قاسم: الله يسلمك.

رغدة: الحمد لله على سلامتك يا قاسم و.. أنا آسفة على اللي حصل مني قبل كدا. يوسف: رغدة مش وقته الكلام دا. رندا: حاسس بأي يا قاسم أحسن من امبارح؟ قاسم: أحسن شوية الحمد لله. رندا: طيب الحمد لله. الطبيب: بعد إذنكم يا جماعة لازم نسيب قاسم يرتاح علشان هنعمله شوية تحاليل كمان شوية. يوسف: طيب يلا بينا يا جماعة. مازن: الف سلامة عليك يا قاسم. قاسم: الله يسلمك شكراً.

بدأ الجميع في الخروج من الغرفة بناءً على تعليمات الطبيب، فنهضت سارة لتخرج أيضاً ليسرع قاسم ويمسك يدها ويقول: قاسم: اقعدي متمشيش. سارة: الدكتور قال لازم ترتاح و.. قاسم مقاطعاً: متتعبينيش معاكي قولتلك اقعدي. أنا عايز أتكلم معاكي. ابتسمت سارة وجلست بجواره وقالت: نعم. عايز تقول أي؟ قاسم: بتعملي أي هنا؟ سارة بتعجب: أي بعمل أي هنا إزاي يعني؟ قاسم: يعني بتعملي أي هنا؟

سارة: قاسم انت بتقول أي أنا جاية علشان أطمئن عليك انت إزاي تسألني سؤال زي دا؟ قاسم: هو أنا مش قولتلك مش عايز أشوفك تاني. سارة: وأنا اعتبرتك مقلتش حاجة علشان عارفة انت قولت كدا ليه. علشان الرسالة اللي جاتلك على تليفونك مش كدا؟ قاسم: انتِ مسكتي تليفوني مش كدا؟ سارة: أيوه مسكت تليفونك ومش مصدقة إنك كنت هتتخلى عني علشان مجرد موقف حصل ومن غير ما تفهمني أصدرت قرارك.

قاسم وهو يتنهد بألم: سارة الرسالة مش هي الشيء اللي خلاني أقولك الكلام دا. سارة بتساؤل: لما مش بسبب الرسالة أمال بسبب أي. قول. قاسم: سارة افهميني.

سارة مقاطعة: افهمني انت يا قاسم انت مش عارف أنا حصلي امبارح أنا مريت بأسوأ ليلة في حياتي وأنا حاسة إنك ممكن تروح من بين إيديا ودلوقتي مش عايز تقول لي انت كنت هتبعد عني ليه. انت مش فاهم أنا بيحصل فيا أي دلوقتي ومش فاهم أنا ممكن يحصل فيا أي لو معرفتش الحاجة اللي بسببها عايز تبعد عني من فضلك قول لي. أرجوك قول لي.