رواية دوار العمده الفصل الحادي والعشرون 21 - بقلم ميار بدر

شقة وائل كامليا: وبعدين معاك يا وائل؟ أنا عندي امتحانات ومش فاضية بصراحة، كل شوية تتصل وتبقي عايزني أقابلك. وائل: أنا عايزك عشان أقولك بعد كده هنتقابل في شقتي القديمة. كامليا: ومراتك؟ وائل: عند باباها. كامليا: يعني هتطلقها؟ وائل: معرفش، لسه ماخدتش قرار. كامليا بانفعال: يعني إيه؟ ماهو لازم تبقى عارف هتطلقها ولا هتفضل على ذمتك؟ وائل: كامليا، إنتي بتشكي في حبي ليكي؟

كامليا: بصراحة، هو مش شك، أنا بدأت أتأكد إنك عمرك ما حبيت أصلاً، لا أنا ولا غيري. وائل: أخص عليكي يا كامليا، إزاي تقولي كده؟ كامليا: وائل، أنا إيه بالنسبة ليك؟ وائل: مراتي وحبيبتي، ولعلمك مفيش واحدة عملت معايا اللي إنتي بتعمليه ده، وكمان أديني صابر عليكي، أما أشوف آخرت الدلع ده إيه. كامليا: آخرته إنت اللي هتقررها. وائل: يعني إيه؟

كامليا: إنت قلتلي إنك مبتحبش مراتك وهتطلقها قريب، وأنا قلت خلاص ماشي، نتجوز عشان نقدر نشوف بعض، لكن واضح إنك لسه بتحبها، وأنا مش عايزة أظلمها. وائل: بعد كل اللي قلتهولك عنها، شايفة إن أنا اللي ظالمها؟ كامليا: لما تقرر وتشوف هتعمل إيه، نبقى نتكلم. سلام، أنا رايحة الجامعة، وسيبني بقى اليومين دول عشان أخلص من الامتحانات دي. وائل: حاضر، بس ابقي خليني أكلمك وأطمن عليكي. ............... في النادي

شروق: إيه يا بنتي الغيبة الطويلة دي؟ أنا قلت نسيتي الطريق ولا حاجة. بثينة: معلش، ظروف. شروق: مش تباركيلي؟ بثينة: اتخطبتي، صح؟ شروق: واتكتب كتابي كمان. بثينة: أخص عليكي، متعزمينيش. شروق: حضرتك مختفية ومغيرة رقم تليفونك، أتواصل معاكي بقى إزاي؟ بثينة: يعني متعرفيش عنوان شقتي؟ شروق: بصراحة بقى، أحرجت أروحلك هناك عشان جوزك. بثينة: ابقي تعاليلي عند بابا.

شروق: هجيلك، بس كنت عايزة أعرف، هو ليه جوزك لما روحتلك قبل كده الشقة اضايق؟ وكان خلاص شوية وهيطردني. بثينة: هو إنسان كده، كاره نفسه. شروق: إيه ده؟ إنتوا اتخانقتوا مع بعض؟ بثينة: لأ، أنا هخلعه. شروق: إيه؟ خلع إيه بس يا بثينة؟ اهدي يا حبيبتي، مش كل واحدة هتتخانق مع جوزها تطلقوا. بثينة: بس ده لو كان زوج بجد، لكن ده واحد استغلالي، أخد مصلحته، خلاص مبقاش ليه لازمة. شروق: إيه ده؟ هو أخد منك فلوس؟

بثينة: مش مهم حصل إيه، المهم أخلص منه. شروق: تعرفي إن هيثم بيسأل عليكي دايماً؟ بثينة: ودا عايز مني إيه؟ هي نقصاه هو كمان. شروق: واضح كده إنه لسه بيحبك. بثينة بسخرية: حب؟ ههههه. شروق: جرى إيه يا شروق؟ ما إنتي عارفة كل حاجة وكنتي معايا دايماً، وحكيتلك على كل حاجة. شروق: بس واضح إنه ندمان بجد. بثينة: أنا مش فاوقة ليه هو كمان. شروق: استني، شوفي مين جاي. تتلفت بثينة تلاقي هيثم جاي من بعيد.

بثينة: بقولك إيه، أنا همشي، ورايا مشوار مهم. شروق: استني، مشرربتيش حاجة. بثينة: مش عايزة أشرب حاجة، كفاية اللي أنا شارباه. تسرع بثينة في خطواتها لتخرج من النادي. هيثم: مش معقولة بثينة! إزيك؟ تتركه بثينة وتخرج. شروق: معلش، أصلها مضايقة شوية. هيثم: أنا عارف إنها زعلانة مني. شروق: خلاص يا دكتور، كل شيء انتهى. ............... في الصباح في منزل العمدة شوق بتمسح السلم وهدي نازلة من شقتها. شوق: صباح الخير يا هدي.

هدى: صباح الخير يا شوق، بتمسحي السلم ليه؟ هي رسمية مش تحت؟ شوق: تحت يا أختي، بس حماتك مانعاها إنها تعمل حاجة عندنا، آخرها مدخل البيت وشقة حماتك. هدى: إيه حكاية حماتك حماتك؟ هي مش حماتك إنتي كمان؟ شوق: حماتي! اسكتي وخليني ساكتة. هدى: الحاجة قلبها طيب وبتصفي على طول، انزليلها بس بالعيال وإنتي تشوفي هتعمل إيه.

شوق: اللي بتقولي عليها قلبها طيب دي رافعة قضية على جوزي وبتتهموا بالتزوير، وإنتي عايزاني أنزلها بالعيال وهي عايزة تدخل أبوهم السجن؟ هدى: أنا مليش في الكلام ده، إنتوا أحرار مع بعض، عن إذنك أنا نازلة تحت. شوق: طول عمرك يا هدي ذكية وبتحبي تلعبي على الحبلين. هدى بسخرية: ذكية مين؟ ههههه. فوتك بعافية يا أختي. مي خارجة من الشقة. شوق: إنتي يا بت لسه جوه؟ مي: كنت بلبس يا أمي، إيه هروح بلبس النوم؟

هدى: إنتي متأكدة إنك رايحة المدرسة يا مي؟ شوق: مالها يا أختي؟ هدى: إنتي مش شايفة اللي لابساه؟ مي: لابسة إيه يا طنط هدي؟ دا طقم المدرسة. هدى: والشعر اللي خارج من الطرحة ده إيه؟ وبعدين معندكيش بلوزة أطول من دي بنص كم؟ مي: هي الموضة كده يا طنط. هدى: موضة؟ طيب ابقي وسعي الجيبة شوية، إنتي بتتحركي بيها إزاي؟ شوق: روحي يا بنتي على مدرستك هتتأخري. تنزل مي. هدى: بنتك حاطة إيه في وشها يا شوق؟

شوق: مليكيش فيه يا هدي، ابقي اعملي مع بنتك اللي إنتي عايزاه، حتى لو لبستيها خيمة محدش هيقولك حاجة. هدى: خيمة! هي الحشمة دلوقتي بقت اسمها خيمة؟ شوق: يا أختي اسكتي بقى وخللي العيال يعيشوا سنهم. هدى: طب إنتي عارفة الشباب لما شافوا بنتي قالوا إيه؟ وهمست شوق في ودنها وضحكت بصوت عالي. هدى: مبسوطة إن بنتك بتتعاكس يا شوق؟ شوق: لأ، مبسوطة إن بنتي حلوة، وملكيش فيه بقى يا هدي، وانزلي يا أختي شوفي وراكي إيه.

هدى: طيب نازلة. بس افتكري إني قولتلك خلي بالك من بنتك، إنتي حرة. شوق: طيب يا أختي، متشكرين على النصيحة. ............... كامليا: لو في البيت هجيلك، عايزة أتكلم معاكي شوية. هنادي: إني في البيت، خلصت امتحانات امبارح وقاعدة زهقانة، تعالي. كامليا: ونرمين عندك؟ هنادي: لأ، في الجامعة وهتتأخر شوية، ومتقلقيش، طارق كمان في المدرسة مش جاي قبل الساعة اتنين. كامليا: طيب، أنا جايه. جرس الباب يرن.

هنادي: هقفل عشان أشوف مين على الباب. تقرب هنادي وتفتح الباب. بثينة: صباح الخير يا هنادي. هنادي: بثينة، اتفضلي. بثينة: معلش، جايلك الصبح، شكلي صحيتك من النوم. هنادي: لا، إني صاحية، ادخلي. تدخل بثينة: في حد هنا؟ هنادي: لأ، أنا قاعدة لوحدي، اقعدي هنا، هدخل أعملك حاجة تشربيها. بثينة: لا، متتعبيش نفسك، أنا بس كنت عايزة أكلمك في موضوع. تقاطعها هنادي: هجيب حاجة نشربها الأول. تدخل هنادي المطبخ تتبعها بثينة.

بثينة ممسكة بيد هنادي: تعالي، بس أنا مش عايزة أشرب حاجة. هنادي: مالك يا بثينة؟ في حاجة؟ وائل كويس؟ بثينة: كويس ولا وحش، مبقاش يهمني. هنادي: إنتوا اتخانقتوا؟ بثينة: أخوكي ضربني وبهدلني. توريها بثينة آثار الضرب. هنادي: مش معقول، وليه وائل يعمل كده؟ بثينة: خلاص، أخد اللي هو عايزه ورماني، بقي مليش لازمة. هنادي: إني مش فاهمة حاجة. بثينة: قوليله يسيبلي الشقة أعيش فيها وياخد هو كل حاجة، أنا موافقة.

هنادي: هي مش شقتك إزاي يسيبك تعيشي فيها؟ بثينة: اتنازلت لأخوكي عنها. تنظر هنادي بدهشة. بثينة: مش الشقة بس، دي الشقة والعربية ومجوهراتي والفلوس اللي كانت في البنك. هنادي: ليه دا كله؟ بثينة: عشان المصنع اللي عمله ده كان كله من فلوسي، ودلوقتي سابني ومش عايز يطلقني. تعيط بثينة. هنادي: طيب، بس اهدي، ادخلي اغسلي وشك وهنلاقي لها حل إن شاء الله.

بثينة: أنا فكرت أكلم والدك، بس قلت أكلمك إنتي الأول، يمكن يكون ليكي تأثير عليه، بس لو فضل معاند، أنا هكلمه. هنادي: متخافيش، هيرجعلك كل حاجة. بثينة: أنا مش عايزة غير الشقة، مش قادرة أعيش عند بابا أنا ومرات بابا مبنرتاحش مع بعض. هنادي: تحبي أتصل بيه دلوقتي ييجي؟ بثينة: لأ، كلميه بينك وبينه. فين الحمام بس؟ أدخل أغسل وشي عشان أمشي. هنادي تشاور لها على الحمام. هنادي: بس مش هتمشي، هنفطر مع بعض. جرس الباب يرن.

كامليا: صباح الخير. هنادي: إنتي مش لسه مكلماني دلوقتي وقولتيلي صباح الخير فوق الخمس مرات؟ كامليا: أدخل ولا هتفضلي ترغي كتير؟ هنادي: لأ، اتفضلي. كامليا تقعد. هنادي: هتفطري معايا؟ كامليا: أنا جايلك في كلمتين عشان عندي امتحان الساعة اتناشر ومش عايزة أتأخر. هنادي: خير. كامليا: وائل. هنادي: وائل مين؟ أخويا؟ كامليا: هو فيه غيره. هنادي: أنا عارفة إني غلطانة، بس أنا عايزة أخلصيني منه. هنادي: ليه؟ هو عمل إيه؟

كامليا: أنا ووائل اتجوزنا. تخرج بثينة من الحمام. هنادي تنظر بدهشة لهما.