رواية فرصه تانيه الفصل الثاني عشر 12 - بقلم مارينا عبود

بدأوا كلهم يفطروا وراكان بص لروفان لقاها مركزة في طبقها ابتسم بخبث وقرب رجله من رجلها علشان يلمسها فبصت له بصدمة وبكل قوتها ضربته بالشوكة في رجله. آه ااااااااه يخرب بيتك. أهله بصوا له وهي حاولت تكتم ضحكتها على شكله. مالك يا حبيبي في إيه؟ بصلها وقال بغيظ. مفيش يا ماما رجلي اتخبطت في التربيزة. كلهم ضحكوا ودقايق واستأذن وطلع.

روفان طلعت الأوضة ووقفت في البلكونة بس اتفاجئت لما شافته راكب العربية ومعاه بيلا، اتنهدت ودخلت الأوضة وفضلت تقرأ ومن جواها إحساس أن بيلا مش مجرد صديقة عادية عند راكان. قفلت الكتاب وقامت راحت لجيهان. ماما ممكن اتكلم معاكِ شوية. تعالي يا حبيبتي. ابتسمت وقعدت قدامها، أخدت نفس عميق وقالت بتساؤل. هي البنت اللي اسمها بيلا مجرد صديقة عادية عند راكان ولا في حاجة ما بينهم؟ جيهان ضحكت وطبطبت على إيدها.

بيلا صديقة راكان من وهو عنده سبع سنين، وهي كمان زي بنتي، وبنوتة طيبة أوي، بس مش هخبي عليكِ في آخر فترة حسيت أن فيه مشاعر في قلبها لركان واتمنى ده يكون مجرد إحساس مش أكتر، عمومًا متقلقيش المهم أنكِ تحاولي بكل قوتك تخليه يتغير شوية بشوية وأنا واثقة أنه هيتغير بفضلكِ أنتِ. حاضر يا ماما أوعدكِ هحاول معاه. تسلميلي يا بنتي. روفان ابتسمت وعملت قهوة وطلعت أوضتها. *** أحد كافيهات القاهرة.

ممكن أفهم حضرتكِ مضايقة ومتعصبة عليا كده ليه؟ راكان أنتَ بنفسك قولتلي أنك هتتجوز البنت دي لمدة شهر بس علشان وصية جدك وبعدين هتسيبها وهتسافر صح؟ اتنهد وقال بهدوء. طيب ما هو ده اللي هيحصل! أو مال أنتِ فاكرة إيه؟ مش عارفة بس عندي إحساس أن البنت دي عجباك وأنتَ حبيت الموضوع. ضحك. نيههه يا بنتي أنا وروڤان عاملين زي القط والفار في البيت لا أنا طايقها ولا هي طايقاني. طيب هي تعرف إنه حضرتك هتسيبها بعد الوصية ولا لأ؟

اتوتر وفضل يبص حوليه بتوتر فتعصبت وخبطت على التربيزة وقالت بصوت عالي. مقولتلهاش صح. الناس بصت عليهم وهو اتعصب وبصلها بحده. بيلا أنتِ عارفة كويس أوي إني مبحبش حد يتحكم فيا أو يحاسبني على تصرفاتي ده أولًا، وثانياً دي أول وآخر مرة صوتكِ يعلىَ عليا بالشكل ده، وثالثاً والأهم سواء علاقتي بروفان هتكمل أو لا دي حاجة متخصكيش أنتِ دي حاجة ترجعلي مفهوم. بصت له بغضب وزعل وحاولت تخفي دموعها فاتنهد ومسك إيدها وقال بهدوء.

بيبو أنتِ صديقة طفولتي، وأحنا عمرنا ما اتخانقنا أو حصل بينا مشاكل، ف متخليش موضوع جوازي ده يأثر على علاقتنا وأنتِ عارفة ومتأكدة أن راكان مستحيل يحب روفان، أنا عارف أنكِ خايفة أحبها والكلام الفاضي ده، بس ده مش هيحصل، لأني مش بأمن بالحب ولا هقدر أكمل في الجوازة لأني أنا وروڤان فـ معلش يعدي الشهر ده وأحل الورطة اللي حطني فيها جدي وهرجع لندن وعَد. بصت الناحية التانية وقالت بحزن. تمام يا راكان بس أنا عاوزة أمشي دلوقتي.

اتنهد بتعب لأنه عارف إن جوازه من روفان هيعمل له مشاكل كتير أوي وخصوصًا مع بيلا وده لأنه بيلا بتغير عليه أوي. أخدها ووصلها لحد بيتها وراح قدم لروفان في جامعة القاهرة وبعد وقت طويل رجع البيت وهو مضايق. طلع أوضته بس ملقاش روفان، دخل البلكونة ولقاها قاعدة على الكرسي الهزاز ومغمضة عينيها، وحاطة الهاند فري في ودنها، ولابسة نظارة النظر. ابتسم ودخل قعد قصادها وقال بمرح. ناس قاعدة رايقة وناس بتعاني.

فتحت عينيها وبصت له بسخرية. إيه هي حبيبتك نكدت عليك ولا إيه. أوه أوه! ده أنتِ بقيتي عارفة تحركاتى بقاا. ابتسمت وقالت ببرود. شفتك وأنتَ طالع معاها الصبح. حط رجل فوق التانية وقال بخبث. والجميل غيران ولا إيه. ضحكت وحركت صباعها قدامه من فوق لتحت وقالت بسخرية. وأنا هغير عليك ليه. اتنهد وقال بهدوء. يعني لو جيت في يوم وفكرت أسيبكِ هتعملي إيه؟ قامت وبصت له بسخرية. أنتَ مش لسه هتفكر!!

أنا عارفة ومُتأكدة أنك كمان شهر وهلاقيك بتلم هدومك وتمشي بمجرد ما وصية جدك تتنفذ والمشكلة اللي أنتَ اتجوزتني عشانها تتحل. كان واقف بيبص لها بصدمة كبيرة، معقولة للدرجادي مش متمسكة بيه أو بجوازهم، معقولة عارفة ومش هاممها حاجة، لأول مرة يحس بخنقة كبيرة لمجرد أن بنت رفضاه، بس دي مختلفة، فيها حاجة بتشده، في حاجة مخلياه متمسك بيها. اتنهد وقرب شال نظارتها وقال بفضول. يعني معقول للدرجادي جوازنا مش هامكِ؟ ابتسمت وقالت.

لو القلب مش رايدني يبقى إزاي هتمسك بيه؟ قصدكِ إيه؟ أخدت منه النظارة ورجعت لبستها وابتسمت ابتسامة جميلة قادرة تخطف قلبه في لحظة وقالت. بص يا راكان، أنا عارفة كويس أن جوازك مني ده مجرد مصلحة وحاولت كتير أوقفه ومعرفتش فـ اضطريت أتقبل الأمر الواقع وأوافق رغم إني عارفة كويس أنك أكيد هيجي يوم وهتسيبني وهتمشي بدون ما تديني أسباب مقنعة، صدقني أنا لو عندي 1% تأكيد أنك عاوز الجواز ده يكمل وينجح ونكون لبعض!

صدقني هتلاقيني في ضهرك وهعمل المستحيل علشان أحافظ على جوازنا بس للأسف أنتَ مجبر على الجواز ده وعاوز المشكلة تتحل بكل الطرق لأسباب كتير، أولهم أنه قلبك بيحب صديقتك المقربة دي وده مش مجرد شك عندي ده تأكيد، ثانيا أنتَ عارف إنك علشان نكمل جوازنا ده فـ المطلوب منك تبطل كل الحاجات اللي مش كويسة اللي حضرتك بتعملها. قامت وفضلت تلف حواليه وتعد على صوابعها. اولهم قلة أدبك مع البنات وعينك الزايغة.

ثانيا سهرك للصُبح مع صحابك اللي مش كويسين. ثالثاً البارات اللي بتروحها والزفت اللي بتشربه. وقفت قدامه وقالت بهدوء. طبعاً حضرتك مش مستعد تبطل كل الحاجات دي علشاني وده لأنك مش متمسك بيا ولو حتى بنسبة 1% وعلشان كده أنا مش مستعدة أضحي وأعافر عشان قلب مش عاوزني ووجودي معاه مجرد وقت مؤقت وبس. اتقدمت خطوتين علشان تدخل بس هو مسك إيدها ووقف قدامها.

طيب مش خايفة من كلام الناس إنه جوزكِ سابكِ من أول شهر، مش خايفة الناس تقول عليكِ كلام مش كويس. ابتسمت وبعدت إيده عن إيدها وقالت بابتسامة.

أنا عمري ما كلام الناس فرق معايا، الناس اللي أنا هخاف من كلامهم دول مش هينفعوني لما حياتي تدمر بسبب جوازة فاشلة، وعمومًا متقلقش أنا فاضلي سنة وهتخرج وهفتح العيادة بتاعتي وصدقني هكون أفضل وأشطر دكتورة هنا وهحقق حلمي مهما كانت الظروف، ومن الأساس مكنتش عاوزة اتجوز فـ لو حضرتك عاوز تمشي امشي من دلوقتي كمان لو عاوز أنا مش همنعك.

سابته ودخلت وهو قعد مصدوم من كلامها، هو معترف أنه شاف بنات كتير من بلاد مختلفة بس لأول مرة يشوف بنت بقوة شخصية روفان، روفان بالنسبة له بنت مختلفة في كل حاجة، في حاجة فيها بتشده وتجذبه ليها وعلشان كده مش عاوز يخسرها، هو عارف أنه مهما شاف وعرف مش هيلاقي زيها، عنده فضول كبير يعرف ويتعمق في شخصيتها أكتر، عايز بكل الطرق يحاول يوصل لقلبها، إحساس الرفض منها مجننه، لأول مرة بنت ترفضه وده مخليه مش متقبل الموضوع.

ابتسم بخبث وأخد قرار إنه يوقعها في حبه بكل الطرق الممكنة وإنه مش هيسيبها غير لما يتأكد أنها خلاص حبته وده علشان يعاقبها على رفضها ليه. فاق من شروده على صوتها. العشاء جاهز تحب تأكل ولا أكلت بره. ابتسم وقام وقف قدامها وقال بمرح. لا طبعاً يا مراتي هتعشا معاكِ. بصت له بغيظ ودخلت الأوضة وهو دخل وراها واتعشوا سوا.

صحيح نسيت أقولكِ أنه صحابي جايين من لندن بعد يومين علشان يباركولنا فـ لو سمحتِ بلاش تعملي مشاكل قدامهم بما أنكِ بتعشقي المشاكل. أوكي مش هعملك مشاكل بس ده لو صحابك طلعوا محترمين! لكن لو صحابك مش محترمين هخربها عليك وعليهم. ضحك وقال بمرح. متوحشة. نيههه ظريف. بصلها بغيظ. طيب بالله كنت مجهز لكِ خبر حلو وهيفرحكِ مش قايلكِ عليه. ابتسمت وبصت له ببراءة وحماس كالأطفال. بجد! إيه الخبر الحلو؟ اترجي شوية.

قعدت على الكرسي وبصت له بزعل طفولي فضحك. خلاص هقولكِ علشان صعبتي عليا بس، النهاردة قدمت لكِ في الجامعة وتقدري تروحي تكملي عندهم من بكرة. بصت له بفرحة وعينيها لمعت ودي لأول مرة يشوفها فرحانة فابتسم على فرحتها. أنتَ بتتكلم بجد؟ أو مال بهزر. ضحكت ضحكة خطفت قلبه وقامت وفضلت تتنطط بفرحة. ميرسي أوي بجد. أووه أوووه! ده أنتِ بتحبي الدراسة يا بنتي ده أنا كنت بهرب من الجامعة عشان أطلع أفسح مع صحابي. ابتسمت وقالت بحماس.

دراستي دي هي حلمي وبحبها أوي. طيب يا دكتورة يلاه عشان ننام بكرة هاخدكِ وأوصلكِ الجامعة. ماشي. جريت من قدامه ودخلت لبست بيجامة ستان لونها غامق وهو غير هدومه وكل واحد راح نام في مكانه بدون مشاكل. تاني يوم راكان أخدها ووصلها لحد الجامعة. لما تخلصي كلميني هاجي أخدكِ ولو مقدرتش هبعت لكِ السواق المهم متطلعيش لوحدكِ. ماشي. فتحت الباب عشان تنزل بس هو مسك إيدها، بصت له فابتسم. خلي بالكِ من نفسكِ. ابتسمت. حاضر وأنتَ كمان باي.

باي. نزلت ودخلت الجامعة وهو راح لبيلا عشان يصالحها وبعد معاناة قدر يصالحها وطلعوا يتفسحوا سوا وبعد وقت خلص ورجع البيت وهو بيدندن بس اتصدم أول ما شاف روفان قاعدة ضامة نفسها وبتعيط، رَمى مفاتيح العربية وجري عليها وو....