رواية فتاة الرصيف الفصل الثاني 2 - بقلم اسماعيل موسي

مكنش معايا فلوس كفايه. قلت طيب استنيني هنا اجيب فلوس. بعدها نشوفلك اوضه او شقه تقعدي فيها لحد ما تدبري حالك. البنت اترعشت قالت خايفه يرجعو تاني، أنا اتعذبت. قلتلها متخفيش، انتي هنا وسط الناس لو حسيتي بحاجه صرخي. متسبنيش أنا خايفه، حاسه روحي هتطلع. لاحظت ان هدومها الدم بدأ يظهر عليها، كانت بتنزف. قلتلها لازم نتحرك من هنا. بعد ما مشينا بصيت ورايا لقيت الرصيف كله دم. قلتلها جعانه؟ قالت لا.

بس كان باين عليها انها هتقع من طولها. اشتريت فطيرتين، خدت واحدة وأنا واحدة. قلتلها خطفوكي ازاي؟ قالت أنا لي يومين بتعذب، أنا مخطوفه من تلت أيام. قلت يا ولاد الـ... خدتها على حمام عمومي، غسلت نفسها والدم وأنا كمان غسلت نفسي. قالت أنا عايزه مقص. قلتلها هتعملي ايه؟ هات مقص من فضلك محتاجها. هتقتلي نفسك؟ سألتها. قالت بحزن: أنا جبانه، لو هقتل نفسي كنت قتلتها قبل ما شرفي يروح. قبل ما يغتصبوني. قالت متتأخرش. قلت حاضر.

وصيت صاحب القهوه عليها ومشيت. بعد ما مشيت البنت دخلت الحمام، قصت شعرها كله واترجت صاحب القهوه يديها جلابيه من عنده. قالت لما يجي صاحبي هيدفعلك الفلوس. لما حكيت لوالدتي على اللي حصل مقلتش نروح للمستشفى نخيط جرحك، لا قالت: سبت البنت فين؟ قلت في المكان الفلاني. غيرت هدومها وقالت: تعالي معايا لازم نجيبها قبل ما تعمل في نفسها حاجه. غيرت قميصي، ربطت الجرح عشان مينزفش وخدنا تاكسي بسرعه للقهوه.

بعد ما البنت خدت الجلابيه من الراجل، لبستها في الحمام. كانت حالقه شعرها وكان جسمها نحيل، اللي يشوفها يقول شاب أو راجل مسن. يدوبك خرجت من القهوه كان فيه بوكس واقف بيلم الشباب. أمين الشرطه شافها ماشيه. قال: تعال انت هنا، اركب البوكس. البنت لقيته بيكلمها كأنها ولد، ارتبكت، كانت خايفه أصلاً. كانت هتقوله أنا بنت، لكن كانت هتتعرض لسين وجيم، مكنش معاها بطاقه. أمين الشرطه مسكها من قفاها، زقها في البوكس.