رواية فتاة اوقعت قلبي الفصل التاسع 9 - بقلم سماح عزت

الجد عبدالله: لازم نوصله في أقرب وقت، عشان ممكن يأذيهم. أحمد: مش هسمح له إنه يأذيهم. مراد: ما تقلقش يا باشا، إحنا هنعرف مكانه. وبعدين بما إن الصقر خطفهم يبقى هيطلب مننا حاجة وهيأمرنا ننفذها، لأني ما أظنش إنه هيأذيهم. الصقر لحد دلوقتي ما قتَلش. أحمد بعصبية: أنت نسيت إنه حاول يقتل أمي؟ مراد: يا أحمد، ما فيش حاجة تثبت إنه الفاعل. أحمد وهو يقطع كلامه: مراد بس، مش عايز أتكلم في الموضوع ده.

مراد: لأ لازم نتكلم، لأنك بتهرب من الواقع. أنا ما أصدقش إن فهد ممكن يقتل. أحمد: وأديه قتل! فهد حاول يقتل أمي اللي اعتبرته ابنها، ولحد دلوقتي في المستشفى... في غيبوبة ولا أنت نسيت؟ مراد: بس يا أحمد... الجد عبدالله: من غير بس يا مراد. أنا أصدق إن ابن إبراهيم يعمل أكتر من كده. مراد: بس ده مش ابن إبراهيم، وكلنا عارفين إن إبراهيم متبنيه. الجد عبدالله: بس اتربى في بيته وعاش في حضنه وهو اللي رباه، لازم يطلع زيه.

مراد: اللي ربى فهد ماما صفاء مش إبراهيم. أحمد: وأهو بسببه ماما صفاء في المستشفى بقالها تلات سنين. مراد: يا أحمد، لازم تحاول تفهم الموضوع وتشوفه من جهة تانية. أنا متأكد إن فهد عمره ما يعملها. أحمد: إذا كان الطلقات كانت من مسدس فهد! مراد: وما قدمتش الدليل للنيابة ليه؟ أحمد: لأن الدليل اختفى، حد خفاه وسرقه. مراد: الحقيقة إنك جواك جزء بينكر إن فهد القاتل، وعشان كده مستني أي حاجة تثبت إنه مش هو. أحمد: عمري ما هنسى كلمة

أمي وهي بتحذرني وبتقولي: "خد بالك من فهد". مراد: وليه ما فهمتهاش إنها بتوصيك عليه، لأنها أكيد عارفة مين القاتل وعرفت المخطط كله؟ أحمد: خلاص قفل على الموضوع ده. مراد: أنا عارف وأنت عارف إنك مش بتسعى لأنك تسجن فهد، أنت بس عايز تخوفه عشان يبعد عن السكة اللي ماشي فيها بسببك، وعايز تخوفه بس الكلام ده عمره ما هيحصل، لأن فهد عمره ما هيخاف. وعارف كمان إنك لو قبضت عليه إن فهد هيطلع نفسه منها زي الشعرة من العجين. أحمد: بسببي؟؟

مراد: أيوه بسببك، لأنك جرحته ولا نسيت؟ أحمد: أنت عارف إني ما عملتش كده. مراد: زي ما عارف إن فهد ما عملش كده. أحمد بعصبية: بكرة تصدق إن فهد اللي عمل كده، ولحد ما أثبتلك إن هو مش عايز أعرفك تاني. مراد بحزن: مش عايز تعرفني بسهولة كده؟ هتبيعني أنا كمان؟ الجد عبدالله: بس بقى! أنا دلوقتي عايز أنقذ بناتي، مش مستني أشوف مين صح ومين غلط. "عند نور" ريم: جسمه سخن أوي، لازم أعمله كمادات. "في الصباح"

ريم: الكمادات مش جايبة نتيجة، أنا هروح أصحي بهاء. ريم: بهاء اصحى! بهاء بفزع: إيه؟ فهد حصله حاجة؟ ريم: فهد جسمه سخن أوي وعملتله كمادات ومفيش نتيجة. بهاء: طب هنعمل إيه؟ ريم: الحل إني هكتبلك على شوية أدوية وأنت تروح تجيبهم بسرعة من أي صيدلية. بهاء: ماشي أنا هروح بس هتأخر شوية عشان مفيش صيدليات قريبة من هنا. ريم: لحد لما تيجي هفضل أعمله كمادات. "ذهب بهاء ليحضر الدواء" نور: هو فهد ماله؟

ريم: جسمه سخن وبيهلوس، وبعمله كمادات مفيش نتيجة، وبعت بهاء يجيب شوية أدوية من الصيدلية بس هو بيقول هيتأخر. نور: طب أنا عندي فكرة لحد لما بهاء يجي. ريم: إيه هي؟ نور: إحنا لازم نخلع كل ملابسه عشان جسمه ياخد هوا، ونعمله كمادات على جسمه نفسه. ريم: طب ما كده هنستنى بهاء لما يجي. نور: لأ طبعًا، إحنا اللي هنخلع هدومه. ريم بإحراج: أنا مستحيل أعمل كده. نور: ده دلوقتي مريض، ولو أنتِ في مستشفى ولازم تخلعي هدوم مريض مش هتخلعيها؟

ريم: بس... نور: من غير بس، إحنا هنخلع له القميص بس. ريم بتردد: امم ماشي. نور: يلا. "وبعد أن خلعوا قميصه حست ريم بالإحراج الشديد" نور: ودلوقتي حطي له كمادة تحت إبطيه، وحطي واحدة على بطنه. فهد وهو يخرف: أنتِ شبهها أوي. نور: أنا شبه مين؟ فهد: نور. نور: لا ده أنتَ شكل السخونية أثرت عليك. "بعد شوية" ريم: الحمد لله السخونية نزلت خالص. بهاء: آنسة ريم، الدوا أهو.

ريم: هات أما أديله الدوا. هي السخونية نزلت الحمد لله، بس هديله الدوا عشان ما ترفعش تاني. "في وقت الغروب استيقظ فهد" فهد: ريم. ريم: اممم. فهد: قومي أنتِ نايمة كده ليه؟ بهاء: كانت بتعملك كمادات، ده ما سابتكش طول الليل والنهار. فهد: خايفة عليا ولا إيه؟ ريم: ده واجبي إني أساعد الناس. بهاء: فهد، تحب أجيبلك إيه تأكله؟ فهد وهو يبرق بعينيه: فهد إيه؟ أنا اسمي توفيق. ريم: إحنا عارفين إنك اسمك فهد مش توفيق.

نور: ما أعرفش ليه بتخبي اسمك، مع إن فهد أحسن من توفيق. فهد وهو ينظر لبهاء: أنتَ قولت لهم إيه؟ بهاء: ولا فتحت بقي. ريم: إحنا عارفين من أول يوم. فهد: عرفتوا منين؟ ريم: أصل أول يوم ما كانش جاي لينا نوم، فقعدنا نلف في البيت وشوفنا الصندوق اللي هناك ده وفتحناه، شكله كده ما اتفتحش بقاله سنين، وشوفنا رسايل حبيبتك وهي بتنادي ليك "فهد" وشوفنا صوركوا مع بعض.

نور: أظن مادام مخبي الحاجات دي هنا يبقى اتجوزتوا، عشان كل شوية تفتكر غلطتك إنك اتجوزت. فهد: لا ما اتجوزناش. ريم: وإيه السبب؟ فهد: خانتني مع أعز أصدقائي وكسروا قلبي.