رواية جعلتني اقوى الفصل الثالث عشر 13 - بقلم شيماء صبحي

قرب منها وقال بهدوء: "ممكن نتكلم! روح بصتله بضيق وحركت راسها بلا. يونس ضغط على ايديه بغضب وقال: "في موضوع ضروري لازم أقولك عليه! روح قامت من جمبه وراحت قعدت جمب والدتها. هوا فضل باصصلها ومستغرب تعاملها معاه. الجرس رن وطلبت ماجدة من روح إنها تفتح، ولاكن يونس منعها وقام هوا يفتح. روح كانت بصاله بغيظ علشان هيا بتحب تفتح الباب دايما، ولاكنها فضلت باصة في الأرض وساكتة لحد ما سمعت صوت هيا عارفاه كويس بتقول: "روح؟

كل اللي موجودين رفعوا عينيهم، ولاكن روح وقفت بصدمة وهيا بتقول: "عبير؟ عبير كانت بصالها بصدمة ومستغربة إنها رجعت تتكلم. وقبل ما تسألها إزاي اتكلمت، روح جريت عليها وحضنتها وهيا بتعيط وبتقول: "عبير انتي وحشتيني أوي، انتي عاملة إيه وهربتي إزاي من منصور؟ عبير كانت فرحانة جداً إنها قدرت تشوفها تاني وضغطت على حضنها وهيا بتقول: "انتي اللي وحشتيني قوي يا قلب عبير! عبير بعدتها عن حضنها وهيا بتتفحصها وبتقول:

"طمنيني انتي عاملة إيه، حصلك حاجة؟ روح ابتسمت وهيا بتهز راسها بلا وقالت: "أنا كويسة الحمد لله، انتي عارفة يا عبير أنا لقيت ماما! عبير بصتلها بصدمة وغل ورفعت حاجبها وقالت: "وهي فين ماما دي؟ عبير كانت بتبص على نادرة وماجدة وهيا بتقول: "هي فين! روح لفت علشان تشاورلها على نادرة وعبير وقتها كانت باصة على ماجدة. نادرة كانت مستغربة مين البنت اللي روح حاضناها دي ووقفت علشان تسلم عليها وهيا بتقول: "أنا نادرة يا بنتي أم روح!

عبير بصت لروح علشان تتأكد من كلام الست دي. وروح هزت راسها وقالت: "أيوه يا عبير هيا تبقي ماما! عبير بصت للست نادرة بغضب وقالت: "وحضرتك بق كنتي فين كل السنين دي وسايبة بنتك في مكان زي دا؟ انتي عارفة هي مرت بإيه هناك؟ يونس ومراد كانوا بيتفرجوا عليهم. ومراد مكنش فاهم إيه علاقة عبير بالبنت اللي في بيت يونس. لاكن اللي صدمه أكتر إن عبير بتزعق للست دي. نادرة بصت لعبير وقالت بحزن:

"أنا مليش يد في أي حاجة يا بنتي، أبوها هو السبب، هو اللي حطها في الدار دي وكان مفهومهالي إنها تاهت! عبير دمعت وهيا بتبص لروح وبتضمها ليها وبتقول: "متخافيش يا حبيبتي، أنا خلاص رجعت وأوعدك المرة دي محدش هيقدر ياخدك مني مرة تانية! نادرة بصت لعبير بصدمة وقربت من عبير وقالت بغضب: "تاخدي مين؟ دي بنتي أنا، محدش هيقدر ياخدها مني مرة تانية! مراد بص ليونس والاتنين قربوا منهم. ومراد خد عبير ويونس وقف قدام الست نادرة وهو بيقول:

"اهدوا علشان نعرف نتكلم! عبير كانت بتبص لمراد وبتقول بعياط: "دي روح يا مراد اللي حكتلك عنها، البنت اللي أنا ربيتها على إيدي دي وكنت بحبها أكتر من نفسي! مراد بص لروح وابتسم وقرب تاني من عبير وهمس في ودنها وقال: "خلاص يا حبيبتي اهدي، أنا عارف إنك بتحبيها بس لازم تهدي علشان نقدر نفهم كل الحكاية! عبير بصت لروح اللي كانت واقفة خايفة. وهيا بتقرب منها وبتقول: "قولتلك متخافيش، تعالي."

يونس بص للست نادرة وطلب منها تقعد. وقرب من عبير وطلب منها تسيب روح وتقعد. ومراد قعد. وكل ده وماجدة قاعدة تبصلهم وساكتة. يونس قرب من روح وضمها لصدره وهوا بيقول: "روح أنا عارف إنك كبيرة وعاقلة وتقدر تاخدي القرار الصح. مش عايزك تظلمي مامتك، هي ملهاش ذنب! روح بصتله وابتسمت لأنه قال عليها كبيرة. فقالت بهمس: "يعني انت شايفني كبيرة أهو، يعني ممكن نتجوز..! يونس بصلها وغمض عينيه وقال:

"الظاهر كده إنك عندكية ومحدش بيقدر يتناقش معاكي! روح ضمت حاجبها بغيظ. ويونس ابتسم وهو بيقول: "خلاص بق بلاش الضمة دي، أنا مش قدها! الست نادرة كانت بتبص لعبير بضيق. ولاكن عبير كانت بتبص لروح ومستغربة إزاي هيا موجودة في حضن الشخص ده ومبسوطة. مراد قرب منها وقال بهمس: "الظاهر كده إن في علاقة حب بين يونس وبنتك." عبير ضمت حاجبها وهيا بتقول: "علاقة إيه دي؟ لسا صغيرة. وبعدين مش ده قدك؟ مراد ابتسم على غيرتها

الواضحة على روح وقال: "لا ياستي أنا اللي أكبر." عبير هزت راسها وهيا بتقوم وبتقول: "ولو برضوا مينفعش يقرب منها كده، هو فاكر نفسه مين؟ مراد لسا هيشدها لقاها قامت بسرعة وقربت من يونس وشدت روح من حضنه وقالت بغضب: "إيه اللي بتعمله ده؟ دي لسا صغيرة على الكلام ده! يونس بص لعبير بضيق. وروح بصتلها بضيق وقالت بهمس: "بتعملي إيه يا عبير؟ منك لله، دانا مصدقت أقرب منه! عبير قرصتها من دراعها وهيا بتقول:

"مكنتش أعرف إنك اتعلمتي قلة الأدب. تعالي اقعدي جمبي! روح ضمت حاجبها ومشيت جمبها. ويونس بص لمراد وشاورله على مراته بضيق. ومراد ابتسم وشاورله ييجي علشان يفهمه إيه اللي بيحصل. يونس قرب منهم وبص لعبير وقال: "بصي يا عبير أنا عارف إنك بتحبي روح وإنك ربيتيها من وهي لسا ٦ سنين. بس ده ميمنعش إن ليها أهل هقابلهم في يوم من الأيام. وطبعاً هما اللي ليهم الحق ياخدوها! عبير بصت ليونس وهزت راسها برفض وقالت:

"بس روح تقدر تختار، هي معدتش طفلة. وأكيد مش هتختار غيري! يونس بص لها وعرف ليه روح طالعة عندية. روح كانت بتبص للست نادرة واللي كانت ملامحها حزينة وهيا بصالها. فلفت جسمها وهيا بتبص لعبير وشافت قد إيه خوفها عليها. فضلت روح قاعدة وهيا بتفتكر ذكرياتها مع عبير. وفي نفس الوقت هيا عايزة مامتها. روح وقفت وبصت ليونس وقالت: "يونس أنا عايزة أفضل مع ماما وعبير!

يونس بصلها وهوا فاتح عينيه وبص لنادرة وعبير اللي كانوا باصيين عليها بنفس النظرة وساكتين. ماجدة لاحظت اللخبطة اللي بتحصل قدامها ووقفت وهيا بتمسك روح من إيديها وبتقول: "روح هتفضل معايا هيا ومامتها كمان. وده قرار نهائي ومش مسموح للنقاش فيه! مراد بص لجدته وهوا مبسوط لأنها عملت معاه الصح. لأن لو روح كانت اختارت عبير بس، كانت عبير هتقرر تاخدها معاهم للبيت ومش بعيد تخليها تنام في حضنها.

يونس بص لجدته وابتسم لأنها كده حلت المشكلة. عبير كانت لسا هتتكلم. مراد شدها عليه وقال: "متسيبيها بق مع مامتها. انتي ناسيه إنك متجوزة وخلاص؟ يا ستي انتي عرفتي مكانها ابقي تعالي زوريها! عبير رفعت حاجبها برفض وقفت. ولاكن مراد شدها عليه تاني وقال: "مينفعشي اللي بتعمليه ده يا عبير. وبعدين انتي لسا معرفتيش روح إنك اتجوزتي! مراد قال جملته الأخيرة بصوت عالي علشان روح تنتبه ليه. وأول ما روح سمعت إن عبير

اتجوزت بصتلها بصدمة وقالت: "انتي فعلاً اتجوزتي يا عبير؟ عبير اتوترت وهيا بصالها وهزت راسها بأيوا وقالت: "بس كله علش... روح جريت عليها بفرحة وقالت: "مبروك يا عبير! انتي فكراني زعلت؟ بالعكس أنا فرحانة. وبعدين عمو ده شكله بيحبك! مراد اتحرج من كلامها ونظراتها ليه. وعبير كانت مستغربة إن روح قبلت جوازها بفرحة عكس توقعاتها. يونس قعد من التعب وهوا باصصلهم وسابهم يخلصوا كلام. وبص لجدته وقال: "خلاص كده يا نانا؟

كلمتك مش هتتغير؟ روح ومامتها هيفضلوا هنا! ماجدة هزت راسها بابتسامة وقالت: "أكيد مش هتتغير. المهم بس إنك تحل العبث اللي بيحصل ده." يونس بص لهم وهوا مبتسم وقال: "لا، هيا اتحلت لوحدها! مراد وقف وساب روح وعبير يتكلموا. وقرب هوا من يونس وقال: "هو ده الموضوع اللي قولتلي عليه؟ يونس هز راسه وقال: "هوا بس لسا ناقص حاجات بسيطة." مراد ضم حاجبه وهو بيقول: "حاجات إيه؟ يونس بص لعبير وقال:

"محتاج من مدام عبير إنها تحكيلي عن اللي كان بيحصل في الملجأ."