رواية غرام الادهم الفصل الثاني 2 - بقلم ايمان

بتبص غرام بصدمة ونظرات كلها كره وحقد. تطلع من المحاضرة. بعد ما تطلع غرام، بيكمل هو المحاضرة. المحاضرة بتخلص وبيطلع، يلاقيها قاعدة زعلانة. أول ما يطلع بتبص عليه، تلاقيه بيبصلها وبيغمزلها ويمشي. بتشتمه غرام في سرها. بعدين بتلاقي ندى. ندي: أنا آسفة يا غرام، كله دا بسببي. غرام: انتي ملكيش ذنب يا ندى، هو اللي بني آدم مغرور وشايف نفسه. ندي: خلاص متزعليش، أنا كتبت المحاضرة عشان نذاكر سوا.

غرام: ربنا يخليكي يا حبيبتي. يلا نتمشى شوية. وهما بيتمشوا سوا، بيلاقوا حمزة بيشاور لغرام. ندي بتغمزلها وبتقولها: روحي شوفيـه، وأنا هستناكي هنا عشان نروح سوا، بس متتأخريش عليا. غرام: اشطاااا يا قلبي. تروح غرام لحمزة وبتسلم عليه. حمزة: وحشتيني. غرام: وانت كمان وحشتني. حمزة: متيجي نخرج سوا النهاردة. غرام: مينفعش النهاردة يا حبيبي، أنا وعدت ندى إني هروح معاها، وكمان مقولتش لبابا حاجة.

بيزعل حمزة وبيقولها: خلاص خليها مرة تانية. غرام: أوعدك هعوضهالك مرة تانية، بس متزعلش، أنا مبحبش أشوفك زعلان مني. وتمسك إيده. وهي ماسكة إيده، بيشوفهم أدهم. أدهم: ويبص لها نظرة احتقار ويمشي. حمزة: ماله دا وبيصلنا كده ليه؟ غرام: سيبك منه يا حبيبي، دا الدكتور بتاعنا. حمزة: خلاص ماشي، يلا أشوفك بعدين عشان عندي محاضرة دلوقتي. غرام: خلاص ماشي. حمزة: باي يا حبيبتي. ندي: كل دا يا بنتي؟

أنا قولتلك متتأخريش، ولا هو مين لقى أحبابه؟ غرام: بتضربها هزار وبتقولها: يلا يا لمضة نروح. بتوصل غرام البيت، وبتفضل تخبط. أول ما تدخل بتقول بصوت عالي: يا أهل الداااار أنا جيت. بتطلع أمها على صوتها وهي مخضوضة وبتقولها: مالك يا بنتي؟ في حاجة حصلت؟ بتضحك غرام وبتقولها: لا بس وحشتوني. بتضربها أمها بفردة الشبشب وبتقولها: طيب يلا غيري وتعالي ع المطبخ عشان انتي كمان وحشتيني. غرام: إيه مطبخ إيه بس يا ماما؟

أنا أصل مبعرفش أعمل كوباية شاي، عاوزاني أدخل أعمل معاكي الأكل؟ أنا هروح أنام ولما تخلصي ابقي صحيني. و بتطلع غرام تجري قبل ما فرده الشبشب تيجي فيها، وبتقول لأمها: مجتش فيا. و بتضحك وبتقفل الباب. أمها: ربنا يشفيكي يا حبيبتي، مخلفة طفلة. بتفتح غرام الباب مرة تانية وبتقولها: أومال فين بابا؟ يعني مش باين. أمها: نزل الشغل يا حبة عيني من الصبح ولسه مرجعش. غرام: وأنا أقول البيت ملوش حس ليه. أمها: بتقول إيه يا بت؟

غرام: بقول أروح أكمل نوم لحد ما ييجي. بقالي حوالي ساعة، الباب بيخبط. أمها: أيوا مين بيخبط؟ أنا جايه. بتفتح الباب، وأول ما تفتح بتلاقي حد شدها لجوا وبيقولها: وحشتيني، مش عارف أشيلك من بالي حتى وأنا بشتغل، متجيبي بوسة. أم غرام: ياراجل اختشي، دي بنتك على وش جواز، وأنت بتقولها عاوز بوسة. والد غرام: ياستي متكبريش الموضوع، هي بوسة واحدة قبل ما تصحي. ولسه هيقرب منها. بتقول غرام: استغفر الله، إيه اللي بيحصل دا!

البيت ده طاهر وهيفضل طول عمره طاهر، عشت وشوفت أبويا وأمي مع بعض في وضع مخل، أهي أهي. بتمسك أمها الشبشب وتقولها: يلا يا جزمة من هنا، بدل ما أخليكي تعيطي بجد. تجري غرام من قدامها وتقولها: على إيه؟ الطيب أحسن. و بتغمز لأبوها وتقوله: البيت بيتك يا أبو حميد، خد راحتك. بيضحك أبوها ويقول: بنت مين دي؟ أمها: بنتك يا خويا، جاتها نيلة اللي عايزة خلفي.