رواية غرام الفصل التاسع 9 - بقلم زهراء الربيع

بدر برق بزهول وقال بصدمه شديده: … إيه.. مراتك… مراتك إزاي؟ عماد بص له ببرود وقال: … زي ما سمعت مراتي، كتبنا كتابنا من الصبح، ويلا ورينا عرض أكتافك. بدر بص له بغضب أعمى وشد غرام من إيدها كأنو مسمعهاش وقال بعصبيه شديده: … هدي لك 3 دقايق يا غرام تلبسي فيهم، وإلا والله ننزل زي ما إنتي كده. غرام بصت له باستغراب وقالت بخوف: … إنت مسمعتوش قال إيه إحنا اتجوزنا يا بدر. بدر بص لها بصه مرعبه وقال وهو بيضغط على كل حرف بعصبيه:

… أنا… قلت… يلا. غرام اتنرفزت جداً وقالت بغضب وزعيق: … بقول لك اتجوزنا.. اتجوزنا إيه مبتسمعش؟ هاجي معاك إزاي؟ هاجي معاك بأي صفة؟ بدر طلع ورقة من جيبه ورماها على وش غرام بعصبيه وقال: … الصفة دي كفاية، ولا عايزه صفة تانية. غرام مسكت الورقة بتقراها بزهول شديد واتسعت عينيها من شدة الصدمة وقالت بتهتهة: … إيه.. إيه ده؟ بدر بص لها بغضب وقال:

… قسيمة جوازنا يا هانم، إحنا متجوزين من أكتر من سنة، يعني في وضعك ده تحمدي ربك إنك لسه عايشة ومخلصتش عليكي… إيه كفاية كده ونخرج، ولا إيه؟ غرام كانت مصدومة وعماد بص لها وأخد الورقة قراها وقال باستفزاز: … الورقة اللي ضربتها دي، تبلها وتشرب ميتها، غرام مراتي وهتفضل معايا. بدر قرب عليه وابتسم بطريقة مرعبة وطلع سلاحه وقربوا عليه وقال: … هي هتخرج معايا، نطلع بهدوء وانت عايش، ولا آخدها وأقتلك؟ قلت إيه؟ غرام شهقت برعب لما

شافت السلاح وقالت بخوف: … نزل سلاحك يا بدر ونتفاهم، اهدى أبوس إيدك. بدر بص لها بغضب وقال: … اخرسي إنتي، ولآخر مرة هقول لك ادخلي البسي. غرام كانت هتدخل وهيه مرعوبة وقالت بخوف: … حاضر.. حاضر بس اهدى والنبي. عماد بص لها وقال: … إنتي بتقولي إيه؟ إنتي مش هتخرجي من هنا، إنتي مراتي، دا كداب وانت على جثتي تاخدها. إنت فاهم؟ بدر قال بطريقة ترعب: … آه فاهم.. وهاخدها على جثتك. وشد أجزاء السلاح. وغرام وقفت قدام عماد وقالت برعب:

… لا والنبي يا بدر سبهم، والنبي سيب. بس بدر كان مش سامعها، حتى من كتر غضبه شدها من إيدها، وقعت على الأرض وضرب عماد بطلقة في صدره، وقع جمب غرام سايح في دمه. غرام صرخت بشدة وقربت على عماد وهيه مرعوبة وبتتنفض وبقت تصرخ بحالة هستيرية وهيه بتقول برعب: … لا.. لا.. لا متسبنيش، قوم.. قوم يا عماد قوم والنبي. لكن عماد مكانش بينطق ولا بيتحرك أي طرف فيه.

غرام بعدت عنه بزعر لما شافت إيديها غرقانة دم، بقت تبكي ومبرقة بشدة، ولفت إيديها على رجليها ونامت على الأرض وهيه بترتعش بحالة صعبة جداً. بدر كان في قمة غضبه، بس وقف مكانه لما شافها بالحالة دي، بص لها بخوف شديد وقعد جمبها بيحاول يفك إيديها أو يكلمها، بس كانت بتصرخ ومتجمدة على حالتها.

غرام فاقت من شرودها والدموع على خدها، حطت إيديها على ودانها وهيه لسه سامعة صوت الرصاص بيرن في ودنها، حاسة بغضب شديد، كل ما تفتكر اللي حصل ومعاناتها بسبب بدر تكرهه قوي. بس فجأة قامت من مكانها ومسحت دموعها بقوة وهيه عازمة أمرها على شيء خطير. بدر رجع القصر بتعب، من ساعة ما خرج مع عصام الصبح وهو شاغل نفسه في كل الشغل المتأخر، عايز يهرب من كل أفكاره وينسى اللي حصل معاه اليومين اللي فاتوا من غرام.

طلع أوضته بتعب، بس وقف مكانه بزهول من شكل الأوضة. لقى الأوضة متزينة بطريقة جميلة، فيه ورود وطاولة صغيرة عليها عشا وموسيقى هادية وجو جميل جداً. دخل وقفل الباب باستغراب شديد وهو بيقول: … إيه ده؟ أوضتنا؟ طب فيه إيه؟ بس اتجمد مكانه بصدمة شديدة لما شاف غرام طالعة من الحمام لابسة بيجامة حرير رقيقة جداً ومبينة تفاصيل جسمها، وسايبة شعرها مفرود وشكلها كان قمر. بدر كان بيبص لها بإعجاب كبير واستغراب أكبر، وهي تقدمت عليه

ومسكت إيده وقالت بحنية: … كويس إنك جيت بدري، كنت مستنياك. بدر كان مصدوم من طريقتها ومستغربها جداً، قال وهو بيحاول يفهمها: … فيه إيه يا غرام؟ إنتي كويسة؟ غرام بابتسامة جميلة تسحر: … أنا تمام، فيه إيه مالك مستغرب كده ليه؟ بدر باستغراب: … لا أبداً، بس إنتي يعني غريبة شوية النهاردة، طريقتك ولبسك. وغرام قربت منه أكتر، بقت لازقة فيه وبصت في عينيه وقالت جمب شفايفه: … عاجبك؟

بدر بلع ريقه بتوتر من قربها، مع إن كان نفسه تفضل قريبة كده، قال بتوهان في عينيه: … أوي، عجباني أوي. غرام ضحكت بخفة وقالت: … طيب يا سيدي شكراً، يلا ادخل خد شاور على السريع، خلينا ناكل. بدر فضل متنح ومستغرب، بس حب يجاريها فقال: … حاضر. وخد هدوم ودخل الحمام. أول ما طلع غرام ابتسمت وقربت منه وشدته من إيده وقعدته على طاولة الأكل وقالت:

… أنا شايفاك مستغرب مني يا بدر، وحقك الصراحة، أنا زودتها معاك شوية اليومين اللي فاتوا، بس أنا قعدت مع نفسي وفكرت كتير، ولقيت إن اللي حصل حصل ولازم ننسى وندي بعض فرصة نعيش أيام حلوة معشمنهاش من زمان، وانت أكيد مش هتزعلني تاني، ولا إيه؟ بدر كان مستغرب كلامها قوي، بس نفسه يصدقه، قال بسرعة: … عمري ما هزعلك تاني، اديني فرصة وأنا هعوضك صدقيني. غرام ابتسمت وحطت إيدها على إيده وقالت:

… وأنا متأكدة. كفاية كلام بقى، خلينا ناكل، أصلي مأكلتش من الصبح. بدر ابتسم بسعادة وبقوا ياكلوا سوا، مع إن كان شاكك فيها، بس بيتمنى يكون اللي قالته حقيقي. بعد ما خلصوا أكل غرام قامت وقالت: … ثانية واحدة. وفتحت الثلاجة اللي في الأوضة وقالت: … نفسي قوي أشرب معاك، هعمل لنا كاسين. بدر قام وقعد على السرير وقال باستغراب: … إنتي هتشربي؟ من إمتى وإنتي بتشربي أصلاً؟ غرام قربت عليه وقعدت على رجله ومدت له كاس وقالت بدلال:

… النهاردة نفسي أشرب معاك. بدر بص لها بزهول من تغييرها المفاجئ، حط إيده ورا ضهرها وإيده التانية مسك الكاس منها. غرام حطت إيدها على كتفه وبقت تشرب من كاسها، وهو مسبت نظره على شفايفها وقلبه بيدق بسرعة وأنفاسه بتتسرع، بلع ريقه وشرب الكاس على بوق واحد. غرام ضحكت بدلال: … وقالت مالك؟ قلبك بيدق قوي. بدر بص لها وقال: … كل الجمال اللي قدامي ده ومش عا يزه يدق، دا كويس إنه لسه بيدق أصلاً. غرام ضحكت وقالت:

… كويس إنك مبسوط من نفسك. مش في أي حاجة تانية يا بدر؟ بدر قال: … نفسي أكون الكاس اللي في إيدك، منظره على شفايفك عاجبني قوي بصراحة، غيران منه. غرام ابتسمت وحطت الكاس على الطاولة وحاوطت رقبته بإيديها وقربت من شفايفه، وقالت: … النهاردة طلباتك أوامر. واتسعت عينيه بشدة لما قربت من شفايفه وباس.ته برقة، وكانت هتبعد بس شدها عليه أكتر وباس.ها بو.سة عميقة متمكنة سرقت أنفاسهم. بدر بعد عنها وهو بينهج وحط جبينه على

جبينها وقال بصوت مبحوح: … أجمل من ما كنت بتخيل بكتير يا غرام. غرام ابتسمت وبدر كان حاسس كإنه في الجنة وأول مرة يبقى بالسعادة دي، بس للأسف حس بمغص شديد ودوخة، وقال بتعب: … آآآه. غرام وقفت وقالت بتوتر: … مالك يا بدر؟ حاسس بإيه؟ بدر ماسك بطنه وبيتألم وقال بصوت ضعيف: … مش عارف يا غرام، بطني وجعاني قوي ودماغي هتنفجر. غرام فركت إيدها بتوتر وقالت: … طب.. طب بتوجعك قبل كده؟ بدر الألم بيشد عليه قال:

… لا، عمرها ما وجعتني كده، بس متقلقيش يا غرام، الصبح هبقى كويس. ابتسم بألم وقال: … تلاقي الفرحة زادت عليا مستحملتهاش. غرام بصت له بقلق شديد وقالت برعب وطريقة هستيرية: … لا صبح إيه؟ إحنا نتصل بدكتور حالا، معاك أي رقم دكتور بسرعة يا بدر؟ قول معاك، ولا أنزل أجيب أجندة التليفونات.. لا أنا أجيب الأجندة أحسن.. إنت استحمل شوية تمام. كانت هتمشي ناحية الباب بس بدر مسكها من إيدها، بص لها باستغراب وقال:

… اهدي يا غرام، أنا هكون كويس، دول شوية مغص وبس. غرام قاطعته وزعقت بدموع واندفاع وقالت: … مغص إيه؟ أنا سممتك، الكاس بتاعك مسموم ووووووو.