رواية جنون العشق الفصل الرابع 4 - بقلم كيان كاتبة

ملحقش ادم يرد عليه بسبب الصوت اللي جه من وراه، وكان صوت طفلة: "بابي" لف ادم لمصدر الصوت ولقي بنت عمرها ما يتعداش ست سنين واقفة وراه وبتضحك. جريت ناحيته. ادم فجأة حس إن الدنيا وقفت حواليه، بس خاب أمله لما لقي لسه مكملة في الجري وعدت من جنبه. بص وراه، لقاها حاضنة اسلام من رجله: "وحشتني يا بابي" بص اسلام لادم بتوتر وقال وهو بيقعد على ركبته: "وانتي أكتر يا قلبي" بابي رجع بص لادم وقال: "جني بنتي" ادم بهدوء غريب: "من امتى؟

مش نادين مكنتش بتخلف؟ اتنطق صوت من الخلف: "والحمد لله ربنا كرمني وبقيت أخلف" رجع بص ادم لمصدر الصوت، وده كان صوت نادين. أكملت كلامها بخبث: "على قد ما أنا فرحانة إنك قمت بالسلامة، على قد ما أنا زعلانة عليك بسبب اللي حصل" نسرين بغضب: "نادين" قرب ادم منها ببرود: "بتخافي انتي على زعلي يا مرات أخويا؟

بس متزعليش، أنا مش زعلان. بس عرفت مش كل اللي بيجي من الشارع نضاف زيك كده. بس إن شاء الله المرة دي هخليكي تجيبي لي واحدة من المكان اللي انتي جايه منه" احمرت عيون نادين والغضب بان عليها. مشي ادم ببرود وراح على أوضته. ليل، في الحفلة كان الكل موجود ما عدا ادم. اتصل بيه مالك بس مكنش بيرد. كان لسه هيتصل بيه تاني بس لقي الصحافة جريت على الباب. عرف إنه هو جه.

دخل ادم بكل هيبة، هو لابس بدلة سوداء وحاطط إيده في جيبه. والكل كان بيرحب بيه ما عدا علي اللي كان واقف هو وحامد بغيظ منه. قرب عليه مالك: "اتأخرت كده ليه؟ ادم ببرود: "الوفد الأمريكي جه" مالك بهدوء: "آه، وصاحبة الشركة كانت مستنياك عشان تلقي خطاب... ملحقش مالك يخلص كلامه، وكان النور اتطفى وسمع ادم صوت في المايك هو يعرفه جيدًا: "مساء النور، أحب أعرفكم بنفسي" النور رجع تاني اشتغل وكانت الصدمة للكل. أكملت بهدوء:

"أنا مرام الحديدي"