رواية جنون العشق الفصل السادس عشر 16 - بقلم دينا عبدالله

ياسين: مش ماشي غير لما أعرف جوري فين. كريم بنفاذ صبر: لا حول ولا قوة إلا بالله. ياسين بمكر: طيب، أنت عارف هي بتحب مين؟ بصله كريم. كمل ياسين بمكر: أنا. جوري بتحبني أنا. مسكه كريم من هدومه وقال بغضب شديد: متجبش اسمها على لسانك تاني. لو نطقتو تاني، أنا هقطعهولك. وأحسن لك تبعد عنها، أحسن أخليك تندم على اليوم اللي اتولدت فيه. بعده ياسين عنه بقوة وقال بسخرية: خوفت مني أنا كده؟

جوري مش هسيبها لك. هي اتخلقت ليا أنا، ومستحيل أخليك تاخدها مني. ضربه كريم لكمة قوية على وشه. نزف ياسين من بؤه من قوة الضربة. بص لـ كريم بغضب فرد له الضربة هو كمان. زادت الخناقة بينهم. اتلموا الناس وبعدوهم عن بعض بصعوبة، وكل واحد بيبص للتاني بغضب وحقد. ياسين بغضب: الأيام بينا وهتشوف. كريم بغضب شديد: لو لمحتك بتقرب منها، هدفنك في الحيا. ابتسم ياسين بمكر وقال: هنشوف.

بعدين سابه وراح ركب عربيته ومشي. بصله كريم بغضب شديد. طلع منديل من جيبه ومسح الدم اللي نزل من أنفه. رجع باسل وليد على بيته وساعده يدخل البيت. بص لـ أحمد وقال بابتسامة: عامل إيه دلوقتي؟ أحمد بابتسامة متعبه: الحمد لله بخير. رهف: عملتو إيه؟ قعد وليد وقال: اتحبس يستاهل الوسخ. حسبي الله ونعم الوكيل. باسل: طيب أنا لازم أمشي. رهف بسرعة: خليك اقعد كل معانا، الأكل جاهز. باسل: معلش، لازم أمشي. زعلت رهف.

بصله وليد وقال: أنت مش هتمشي غير لما تاكل معانا، ولا إنت مش بتعتبرنا زي أهلك ولا إيه؟ باسل: طبعًا أنتم زي أهلي وأكتر، بس... وليد: من غير بس. جهزي السفرة يا بنتي. رهف بابتسامة: حاضر. ومشت بسرعة. جهزت السفرة وقعد باسل معاهم، وكانوا مبسوطين كأنهم فعلاً جزء من أهله. رن جرس الباب. راحت كريمة فتحت الباب وابتسمت أول ما لقيت غادة. كريمة بابتسامة: أهلاً يا هانم، ادخلي، دا البيت بيتك. دخلت غادة. قفلت كريمة الباب.

بصتلها غادة بعتاب وقالت: يا ريت بلاش هانم دي. ناديني باسمي على طول، غادة، وأنا أقولك كريمة. إحنا بقينا أهل. ابتسمت كريمة وقالت: حاضر. قعدت غادة وقعدت جنبها كريمة. بصتلها غادة بابتسامة وقالت: والبيت دا بيتك أنتِ وجوري. أنا أول ما قالي كريم فرحت أوي. كريمة: ربنا يخليهولك يا رب وتفرحي بيه. غادة: يا رب نفرح كلنا. طلعت جوري أول ما سمعت صوت غادة وقالت بابتسامة: أهلاً يا طنط. قامت

غادة حضنتها بحب وقالت: إزيك يا بنتي، عاملة إيه دلوقتي؟ طمنيني. جوري: الحمد لله بخير. غادة بابتسامة: بصي يا كريمة، أنا قولت لـ كريم وفوزي إنهم يجوا ونتغدا مع بعض النهارده. وأنا اللي هطبخلكم. كريمة: إزاي؟ وإحنا روحنا فين؟ غادة: طيب، هنطبخ سوا أنا وأنتِ. جوري بابتسامة: وأنا هساعدكم.

غادة: لاااااا، أنتِ تروحي على أوضتك وتذاكري. أنا عرفت من كريم إن عندكم امتحانات الفترة دي. دا حتى كريم كان عايز يجي معايا، بس أنا زعقت فيه وخليته يقعد يذاكر. وأنتِ يلا روحي شوفي مذاكرتك، وأنا وكريمة هنحضر الأكل. جوري برقة: حاضر. راحت كريمة وغادة على المطبخ وبدأوا يجهزوا الأكل، ودخلت جوري وبدأت تذاكر لحد ما يخلصوا. باسل بصدمة: مشيوا ليه؟ حصل إيه؟

حكت له مرفت على كل حاجة حصلت من لما اتسممت جوري لحد ما طردوا سارة من البيت. مكنش مصدق إن كل دا حصل في غيابه. أسيل بدموع وحزن: أنا عايزة جوري. رجعولي جوري عندي. مسحت مرفت دموعها بحنان وقالت: متخافيش، هترجعي تشوفيها تاني. رجع ياسين البيت. اتخضت مرفت من شكله، أثر ضرب كريم ليه والدم اللي نزل على هدومه من بؤه. جريت عليه بخوف وقالت: مالك؟ حصل لك إيه؟ ياسين بضيق: متقلقيش، خناقة بسيطة. باسل: ومين دا اللي عمل فيك كده؟

أنت مش هتتعدل أبداً. ياسين بضيق: باسل، أنا مش ناقصك خالص. وسابهم وطلع على أوضته وهو بيتواعد لـ كريم. بصتله مرفت وقالت: ربنا يهديك ويصلح حالك يا ابني. جاء فوزي ومعاه كريم وقعدوا على السفرة. حطت غادة وكريمة الأكل. جت جوري رحبت بيهم باحترام وقعدت جنب كريمة. بصلها كريم وافتكر كلام ياسين. كان مدايق من اللي قاله، بس مبينش وابتسم لها. بعد ما خلصوا أكل، قعدوا في الصالة مع بعض. وفوزي شكر في الأكل لأنه كان شهي ومظبوط.

غادة: كريم قالي إنك مصرة وعايزة تشتغلي، صح؟ كريمة: أيوه، لأن قعدة البيت مش هتنفع. غادة: طيب بصي، أنا أخويا عنده مطعم، بس هو مسافر والمطعم مقفول. وقالي لو عايزة أفتحه في أي وقت براحتي. فـ أنا فكرت، إيه رأيك نفتحه أنا وأنتِ ونشتغل فيه سوا، وأهو نتسلى بدل قعدة البيت. وإن شاء الله اللي هنكسبه كل شهر هنقسمه بما يرضي الله ما بينا. ها، قولتي إيه؟ فوزي: والله فكرة مش كويسة. كريمة بابتسامة: وأنا معنديش مانع.

غادة: طيب، على بركة الله ننزل إن شاء الله من بكرة نجهز كل حاجة. اتفقنا. كريمة: اتفقنا. حس فوزي إن كريم مش واخد راحته، فقال: خد جوري واقعدوا اتكلموا سوا على راحتكم. هز كريم راسه بابتسامة. خد جوري وراحوا قعدوا في البلكونة. حست جوري إنه عايز يقول حاجة. لاحظت علامة في وشه مكان ما ياسين ضربه. جوري بقلق: أنت كويس؟ هوا أنت اتخانقت مع حد؟ بصلها كريم وقال: اه. عايزة تعرفي مع مين؟ بصتله جوري باستغراب من نبرة صوته وقالت: مين؟

كريم: ياسين. انصدمت جوري ومعرفتش تقول إيه. لاحظ صدمتها وقال: جوري، قوليلي بصراحة، في بينكم حاجة؟ اتوترت جوري، بعدين قالت: حاجة زي إيه يعني؟ كريم: أنتِ بتحبيه؟ بصتله جوري بشدة من غير ما ترد. قلق من سكوتها وقال: جوري، ردي عليا، وارجوكي متكدبيش، وقوليلي الصراحة. أنتِ بتحبيه ولا لأ؟ جوري: أنت جبت الكلام ده منين؟ كريم: ياسين قالي إنك بتحبيه وعمرك ما حبيتينى. وكمان هدني إنه هياخدك مني.

انصدمت جوري. مكنتش تتخيل إن ياسين هيعمل كده. مسك إيدها بحب وحزن وقال: ارجوكي قوليلي الصراحة، من غير كدب، أنتِ بتحبيه؟ بصتله جوري شوية بعدين قالت...