رواية جوازة صعيدي الفصل الرابع عشر 14 - بقلم رحمة محمد

هنا: أيوه بقى، لا تقولي بنيه ولا مكرونة، البتاع ده اختراعي. يونس: انتي لحقتي تطبخيه؟ هنا: أومال يا أستاذ يونس، اقعد بس ودوق وهتدعيلي. يونس: طيب، هو إيه ده؟ هنا: العلم عند الله يا خويا، أنا فتحت اليوتيوب لقيت الحلقة بتاعت الست الله يكرمها في نصها، والباقي مرضيش يحمل. حمدت ربنا على الرزق ونفذت الخطوات. يونس: ليه طيب مطبختيش حاجة تعرفيها؟ هنا: لا أبداً، عشان تحلف بقى إن طبيخي أي كلام. يونس: طيب يا هنا، ماشي.

بعدها أكل: استغفر الله العظيم، كح كح، إيه ده، الأكل ني؟ هنا: منا بقولك، كانت نص الحلقة، يمكن دخلتها الفرن في النص اللي محملش. يونس: بتفكري يا دي النيلة عليا. بعدها مسكها وفضل يحرك فيها: بقى يا بت يا أم بيض أسود وعيش متزوق، ما تقولي عايزة أزور المطبخ زيارة، عارفة هعمل فيكي إيه؟

هنا: أولاً هدومي دي بفلوس، حرام عليك، ده مال أيتام اللي انت بتعمل فيه كده. وثانياً بقى انت اللي مبتفهمش في الأكل أصلاً يا بني، أنا موهبة كبيرة في الطبخ، أنافس نجلاء الشرشابي وكل نجوم الطبخ، بس انت كدا من الناس اللي بتغير من نجاح ستاتها، اعترف. يونس: ده أنا تصدق بالله مش عارف أعمل فيكي إيه، وبعدين يا بت انتي مش طالبة الطلاق، هي دماغك اللي متركب فيها شبشب دي نظامها إيه؟ هنا فلتت منه بصعوبة

وجرت وقفت على الكنبة: بص يا كبير، أصل شغل إني أبقى البت اللي بضحي الكيوت اللي تحس عندها شلل المشاعر دي مليش فيها. الولية نادية جات وقالت إنك معلش يعني طمعان فيا، خصوصاً إني حلوة وغنية وعسلي. يونس: لا والله؟

هنا: عديها، خليني أكمل. قمت أنا أي بقى شوحت بأيدي وقلت لا، يونس ميعملش كدا. اينعم هو تنح شوية وغتت، بس لا مش كدا. المهم بقى هي قالت إني لو مبعدتش عنك هتخلي الولية الهبلة اللي اسمها كوثر اللي كانت معايا تعيد موضوع مامتك في البلد تاني، وهي الصراحة ست فلة، وأنا ظبطها، متخافيش يا بيضة. يونس: هي قالت كده؟ هنا: يعني أنا هكذب عليك يا جوزي برضو؟

بس والله فعلاً هو ده اللي حصل، وعشان كدا حبيت إن موضوعي يخلص ومكنش سبب في مشاكل لحد. يونس: تمام، شكراً. وأنا موضوعك قرب يخلص، متخافيش. انتي من أول ما وصلي بيتي وأنا شغال عليه. أنا خارج. هنا مسكت إيده: رايح فين يا يونس؟ أنا عارفة إن جوازنا مش حقيقي، بس على الأقل أكون صديقة ليك وتقدر تحكي معايا. يونس: بس انتي عايزة تسبيني يا هنا؟ هنا: حتى بعد الأكل ده.