رواية جواز صالونات الفصل الثالث 3 - بقلم شهد احمد

محمد: يلا بقى يا حبيبتي قولي لي مين العروسة اللي عايزة تجوزيها ليزن؟ أم يزن: بنت واحدة صاحبتي، إنما إيه يا محمد! أدب إيه وأخلاق إيه! محمد: المهم إنها تعجب ابنك، طيب ما تكلميها وناخد معاد ونروح نشوفها الأول. أم يزن: حاضر يا حبيبي. عند عشق، كانت بتتكلم مع ورد في التليفون. ورد: بت يا عشق، أنتِ مش ناوية تاخدي خطوة في إنك تتجوزي؟ عشق: وبعدين معاكي يا ورد؟ إيه السيرة دي؟

ما إحنا كنا بنتكلم عادي ومفرفشين، ليه السيرة اللي تحزن دي؟ ورد: تحزن إيه يا بت؟ هو في أحلى من الجواز وفارس الأحلام؟ عشق: فارس الأحلام وأحلى من الجواز؟ بت روحي نامي واتغطي كويس، ما فيش الحاجات دي في الواقع، كلهم مصطفى أبو حجر وقلبهم زي الحجر. ورد: إيه ده يا عشق؟ ده اللي هيقعد يتكلم معاكي في الجواز ويسمع منك اللي بتقوليه مش هيتجوز. عشق: يا أختي أنا غلطانة اللي عايزة أنقذك بدل ما تاخدي على عينك، ده أنا بنوّر بصيرتك ههه.

ورد: قال بتنوّر بصيرتي قال، ده أنتِ بتطفيها. عشق: أتصدقي أنا غلطانة. ورد: يعني لو اتقدّم لك حد هتوافقي ولا لأ يا عشق؟ وإيه مواصفات الشخص اللي أنتِ عايزاه؟

عشق: امم بصي يا ستي، بالنسبة لي لو حد اتقدم وكده وهوافق ولا لأ، فسيبيها لوقتها. وبالنسبة للمواصفات أنا مش طالبة كتير، أنا عايزة يكون بيصلي دي أول حاجة، ويكون شخص كويس وبسيط، ويكون بيحب أهله ويراعي ربنا فيهم، لإنه زي ما هيعمل مع أهله هيعمل معايا يعني، ويتقي ربنا فيا، بس كده يعني. ورد: إن شاء الله يا قلبي يجي فارس أحلامك وبمواصفاتك. عشق: إن شاء الله، يلا بقى باي، هروح أشوف أكل.

ورد: ههه روحي يا أختي، على طول همك على بطنك كده. عشق: أعمل إيه طيب؟ هو الوحيد اللي بيسليني، أكمني ماليش حبيب ولا قريب وكده يعني هههه. ورد: بكرة يجي يا أختي، بس على الله تبطلي أنتِ أكل بس ههه، يلا باي. أم يزن اتصلت على أم عشق وقالت إنها عايزة تيجي هي وابنها يزن يشوفوا عشق ولو حصل نصيب وكده يتجوزوا. أم عشق: تنوري يا حبيبتي، البيت بيتك. أم يزن: تسلمي يا قلبي، يناسب معاكم بكرة بعد العصر؟ أم عشق: أكيد يا حبيبتي هستناكي.

أم يزن: تمام. يزن رجع من بره وقال: ازيك يا لولو. أم يزن: الحمد لله، جهز نفسك بقى علشان هنروح نشوف العروسة بكرة بعد العصر. يزن: إيه ده بسرعة دي كده؟ طيب ما كنتِ أجلتي أسبوع ولا حاجة أستريح من السفر وكده. محمد: معاه حق يا حبيبتي، خلي الولد ياخد نفسه شوية. أم يزن: يا محمد محسسني إنها هتكتم نفسه، ده بالعكس يعني هتهون عليه وكده. وبعدين يا يزن أنت رجعت في كلامك ولا إيه؟ يزن: لأ يا أمي، اللي تشوفيه.

أم يزن: يبقى على خيره الله، جهز نفسك بقى على الميعاد. يزن: حاضر. وطلع أوضته. محمد: يا حبيبتي ما تهدي على الولد شوية، ده لسه جاي من السفر وأكيد تعبان يعني. أم يزن: يا محمد عايزة أفرح بابني، وعلشان ما يسافرش تاني ويسيبنا، لما يتجوز أكيد هيقعد هنا ومش هيسافر. محمد: تفتكري يا لولو؟ أم يزن: أكيد يا حبيبي. أم عشق: بت يا عشق يلا قومي. عشق: في إيه يا أمي على الصبح؟ أم عشق: قومي يا بت نظفي البيت، عايزاه بيلمع كده.

عشق: حاضر، على الظهر كده هقوم وهعمل اللي أنتِ عايزاه. أم عشق: قومي يا بت، ظهر إيه؟ فيه ضيوف جايين بعد العصر كده مش هنلحق نجهز حاجة. عشق: ضيوف مين بس يا ماما اللي جايين؟ أم عشق: عريس يا حبيبتي جاي يشوفك. عشق: 😳😳😳😳 يا ترى رد فعل عشق إيه وإيه اللي هيحصل؟