رواية جرح الأيهم الفصل الخامس والعشرون 25 - بقلم أيلان

ياهوه الگالك عوف اهلك و روح تراب المگبرة بالليل بارد حضن امك الدافي بـ جمرة العوز يفكر بيك وين اليوم گاعد . مُلاذ تقدمت عليه أدحگه. مد ايده يسلم، سلمت عليهم. مُلاذ: أيمن مو؟ أيمن: أي. مُلاذ: انت مو اخو أيهم و باهر؟ شفتك بـ العرس. أيمن: أي صحيح. مُلاذ: منين تعرف اركان؟ قاطعنا ضرغام الواكف. ضرغام: لو نكعد و نسولف مو أفضل؟ مُلاذ: أي، اتفضلوا.

أشرت له على القنفة، اتقدم كعد. دخلت صافيناز تقدم أكواب الجاي. دحگت لـ أيمن يلي عينه عليها. التفتت الها و گلت: مُلاذ: شكراً. هزت راسها بـ قبول مبتسمه، طلعت تاركتنا. رجعت نظري على أيمن كعدت على القنفة الكدامه. ضرغام كعد على القنفة الثانية. مُلاذ: ضرغام. ضرغام: نعم. التفتت و بـ ايدي قلم افر بـيه. مُلاذ: اذا حجينا هنا أشياء ممكن تنجبر تسكت عنها، رح تسكت عنها؟

ضرغام: قبل لا تحجين جنت ناوي أروح. صحيح أريد أساعدكم بس ما أريد أخون شغلي. أيمن: لا تخافون، كل يلي صار ما رح يخليك بـ موقف تنجبر بي تخون شغلك أو يخليك تنجبر تسكت. رح أحجيلكم كل شي مثل ما هوَ. هزينا راسنا بـ قبول. مُلاذ: منين تعرف اركان؟ أيمن: جمعنا موقف يخص والدهم. مُلاذ: أكدر أعرف الموقف؟

أيمن: أبوه و أبوي يعرفون بعض، معرفة سطحية أو قوية ما أعرف. حضر وي أبوه بـ مرة و جنت موجود. تعارفنا على بعض وقتها و تبادلنا الأرقام. مُلاذ: شنو علاقة اركان بـ أبوك؟ أيمن: أجهل السبب مثلكم. مُلاذ: زين شنو سبب حضوره؟ أيمن: أبوي كان عازمهم بـ مطعم و شدد على أبوه يجي ابنه وياه. مُلاذ: سبب العزيمة؟ أيمن: مجهول. مُلاذ: ليش رحت؟ أيمن: بـ طلب من أبوي. حتى أيهم و باهر كانوا موجودين.

عگدت حواجبي مستغربة. بـ كل لحظة أنصدم بـ وجود أيهم. طلع أخو باهر و هسه أيمن اله علاقة بـ اركان. أيمن: هم ما اتعرفوا على اركان، بس انه اتعرفت عليه و قويت علاقتي بيه. مُلاذ: حلو، شصار بعد ما اتصل عليك بـ الليلة يلي قتل بيها أبو أو حاول قتله، و اتوقع تعرف السبب أو لا؟

أيمن: بعد ما اتصل رحت الهم و شفت أبو اركان رفعناه و اخذنا للسيارة و طلعنا بي للمستشفى و حتى أيهم العالجه. لكن أبو اركان دخل غيبوبة. اركان اجو اله الشرطة، اعترف بـ نفسه هو يلي طعن أبوه و اخذوه. بقيت يم أبو في حال يصحى بـ يوم. طلعت و رجعت لگيت أبو ماكو. سألت أيهم ما يعرف وينه. دورنا بالكاميرات لگينا طلع من المستشفى. هو يحجي و أنا أكتبر. رفعت عيني دحگت له. مسح على لحيته و كمل. أيمن: صورت فيديو راويته لـ اركان.

مُلاذ: شلون راويته اله و هو بالسجن؟ أيمن: دخلت تلفوني بدون ما يدرون. ضرغام: شلون دخلت تلفونك؟ أيمن: طرقي الخاصة. مُلاذ: اممم، حلو. اريد أشوف الفيديو. بس قبلها ليش راويته لـ اركان؟ أيمن: حتى أراوي أبو عايش، لأن ظن إنه أكذب عليه.

حجا و طلع تلفونه يدور بـ يديه. درت وجهي دحگت لـ ضرغام. ضرغام يدحگه بـ استغراب. فتح الفيديو و داره النا. قدمنا ظهرنا نشاهد الفيديو. دحگنا لـ الفيديو. ضرغام يريد يشوف رقم السيارة بس مو واضح كلش. لذالك اخذ أوصافها و اتصل بـ شخص و بدء يوصف الها. اخذت التلفون من أيمن، مدنكة و مركزه لحد ما گدرت أقرا رقم السيارة و الباقي ما گدرت أقراه بـ وضوح. گلت لـ ضرغام، گال للمتصل رقم السيارة أكد عليه حتى يلگونها. سد الاتصال. رفعت عيني لـ أيمن. اخذ تلفونه و رجع كعد بـ مكانه.

مُلاذ: ليش اتصل اركان عليك؟ أيمن: يثق بيه يمكن لأن علاقتنا قوية. ضرغام: بس تبقى جريمة سكتت عنها. أيمن: ما سكتت عنها و لا شاركت بيها. كل السويته نقلت والد اركان بـ سيارتي. مُلاذ: رح تشهد لـ صالح اركان؟ أيمن: لا. دحگت له مستغربة، ضجت. دَرت لـ ضرغام يلي اندار الي ودحگـ لي بـ نفس النظرات و نظرات اليأس. فزّينا على ضحكة أيمن بـ صوت عالي. أيمن: هههههههه شبيكم رح تبجوني؟ ابه طبعاً أشهد لـ صالحه، هذا هم سؤ.

حگيت راسي و ضحكت. ضرغام هم ضحك، بس نريد نبلع خرعتنا. بلغت أيمن بـ موعد المحكمة الجاية. أكد الي راح يجي و راح يشهد لـ صالح اركان. اتشكرناه و ودعناه تركنا و طلع. وكفت بـ مكاني و تخصرت. رفعت راسي. ذبيت نفس دلاله على الراحة. ضرغام: اتقدمنا خطوة. مُلاذ: و رح نتقدم بعد ألف خطوة لحد ما يطلع اركان من السجن و نلگا أهله. ضرغام: شنو غاية أبوه من سوا هيج؟

مُلاذ: الناس السيئين هواي بـ الحياة. مثل وجود الناس الزينين اكو مو زينيين. أبوك، أمك، اخوك، اختك ممكن يكرهوك. هاي مشاعر ما يكدرون يتحكمون بيها. ممكن يحقدون عليك بلا سبب. ممكن يغارون من صفاتك الزينة و يتمنون امتلاكها. رغبتهم هاي تعمي عيونهم عن منو انت! اتقدمت كعدت على الكرسي. كملت و أنا أقدم الكرسي على الطاولة.

مُلاذ: اركان واحد من الناس الزينين. كل جيرانهم و احنا من ضمنهم مدحوا اركان بس ما مدحوا أبوه. حبوا اركان بس ما حبوا أبوه. حزنوا و فرحوا لـ اركان بس ما سوو نفس الشي وي أبوه. حس بـ النقص و يمكن الغيرة من هذا الشي. حاول يخلي اركان بـ وضع سيء. كرهه يكون اركان مرتاح و الناس كلها وياه. أراد هو يكون ضده و يكون سبب بـ أذيته. و هسه كل فعلته هاي حتى يأذي اركان.

ضرغام: خوش فسرتيلي الموضوع. كلامج صحيح ١٠٠٪؜. العائلة مرات تكون مصدر أذيتك على الرغم همَ المفروض يحتوونك و يحبونك و يبعدون كل أذية عنك. لَكن المشاعر و الغيرة ما تعرف لا أبوه و لا أمومة و لا القرابة. مُلاذ: بالضبط. گام ضرغام وكف لبس بيريته، دگلي تحية. ضحكت ضحك وياي، گمت من مكاني و طلع ودعته و رجعت دخلت كعدت. رفعت عيني لـ صافيناز يلي دخلت. مُلاذ: شمالج اختفيتي؟ صافيناز: ما بعرف بس كعدت هناك.

مُلاذ: هههههه يول صايرة تحجين عراقي. صافيناز: تعلمت عاد خالة. مُلاذ: يولي يولي فداوي هههههه. ضحكت و راحت لـ المطبخ. مكاني هذا مو دائم و أدور على مكان زين حتى أخلي صافي مساعدتي بي. اجت صافي تحجيلي عن الموكلين و مواعيدهم. هزيت راسي بـ قبول و هي كعدت يمي. هكذا مر اليوم. رجعت بـ الليل لـ البيت. خليت المسواك ع الكاونتر. دخلت لـ غرفتي بدلت ملابسي. لميت شعري، دحگت لـ وجهي بـ المراية. "و في صبحٍ.. وقفت امام مرآتي

و قد بانت على وجهي خساراتي آرى شخصاً على المرآة يكرهني وما أقساه كره الذات للذات .."

درت وجهي كارهه شكلي. كارهه ملامحي و انعدام الشعور الي بداخلي. أفتقد نفسي القديمة. لَكن بـ داخلي شي يگلي ظلي هيج لا ترجعين و تحاولين. كانت المحطة الأخيرة من التعب و الخيبة. دخلت سبحت ظليت جوه المي صافنة. تنزل قطرات المي البارد على جلدي. تزيد من برودة جسمي بـ هذا الجو. مسحت وجهي، رفعت راسي. نزلت قطرات المي الغزير على وجهي. كملت سبح، طلعت من الحمام. رحت لـ أمي دحگتلها. كامت كعدت على حيلها. فيروز: شوكت رجعتي؟

مُلاذ: ما صار لي هواي. فيروز: شعرج منگع؟ مُلاذ: سبحت. فيروز: باردة عليج نشفي. مُلاذ: هو رح أنشفها. جيت أشوفج خاف تحتاجين شي. فيروز: لا يمه، رايدة سلامتكم. مُلاذ: الله يسلمج فوفو. ملاك شوكت نامت؟ فيروز: قبل شويه غفت. مُلاذ: باجر إذا ما كعدت من أول مرة، أخرطها من الجرباية و علي. فيروز: هههههه لا تكعد تكعد. مُلاذ: زين فوفو، يلا تصبحين على خير. فيروز: اجمعين عيني.

تركتها و طلعت أمشي گوه على رجليّ. فتحت اللفاف منهن و كل اليوم أفتر بـ الكعب. ظلن يوجعني و نزف كم جرح بيهن. دحگت لهن. ما أدري شسوي، ظليت صافنة و أدحگهن. لفيتها بـ باندج و عفتها، تمددت. ثاني يوم حاجيت ضرغام. گال بعدهم يدورون ع السيارة. بـ نفس اليوم اجونا أهل اسكندر. هم اتقدموا الي و أشوف أمه شلون ما عاجبها. هو چنه راس بصل كاعد بـ نصهم و يحاولون يقنعون بـ أمي بلا موافقتي.

مُلاذ: عمي شكم مرة أگول، ابنك أنا رافضته. هاي المرة الـ13. تعبت من كد ما رفضت. اسكندر: انتِ سدي حلگج. أعرف كلش زين تريديني! مُلاذ: أريدمن؟ أريدددددمن؟ أموت اسكندر أموت و ما أتزوجك. لو يصبوك من ذهب لو تنزل بيك. أيهما أقبل بيك و لا أريدك. اعتقني. علياء: شلون لسان زفر. مُلاذ: مثل لسان ابنك. فيروز: مُلاذ روحي لـ غرفتج. مُلاذ: ما أروح لـ غرفتي. ماااا أريدك، شسوووووي بعد؟ عوفني اعتقني كافي عااااد!

ملاك: طلعت من غرفتي أدحگلهم و أسمع صوت صياح مُلاذ بـ عصبية. فد أنقهرت عليها شكد ترفض. اسكندر منطيها الأذن الطرشة يرجع يتقدم الها. ألف مرة فشلتهم و گلتلهم رافضين. هم رجعوا و اجونا. قَبل كانت تجي بس أمه، هسه هو و أمه و أبوه و اخوه. أعرف عزيز جاي غصب. حتى ماله خلك يحجي و لا يجادل. عمو لازم اسكندر، مُلاذ تصيح و هو يصيح. كل ما علا صوت اسكندر علا صوت مُلاذ أكثر. مُلاذ: انت ما إلك أي علاقة بـيه! انت م..

قبل لا تنهي جملتها رد عليها بـ صياح. اسكندر: الي دخل و اكسر راسج!

اتقدمت صرت بينهم اسكندر و أمه. يفشرون على مُلاذ و أمي تعيط بيهم. مُلاذ اتجننت، اتقدمت رافعة ايدها و تصيح. رايدة تروح عليهم، لازمينها گوه. و هي لازمة بـ ايد أمي تريد تفلتها. أنا شبعت رفسات و كفخات. كل كفخة و الثانية تجيني منها بلا قصد. هي تحرك بـ ايديهامنفعله، أبلعها و أسكت. هسه تحطني تكتلني و علي، ابد ما بيها مجال. رجعت ردت هي تصيح و هو يصيح. أذاني صار بيها ارتجاج. مُلاذ: تكسر راس منو؟؟؟ مصدگ روحك انتَ؟؟

جاي تشستشرف بـ راسي! صاحت بـ صوت أعلى فززني. رافعة اصبعها تحجي بـ ثقة. مُلاذ: ما ولدته امه الي يمد ايده عليه. عبر اسكندر أبوه، نريد ندفعه. بـ حركة سريعة ضرب مُلاذ راشدي! أنا هنا انصدمت، عرفت القيامة رح تقوم على راسي و الطلابه رح تكبر أكثر. رفعت راسها نار تتطاير من عيونها. ايدها على خدها. أعرف مُلاذ ما تظل هيج مفهيه و مصدومة. تتصرف بـ ردة فعل سريعة. لذلك اخذت حذري ابتعدت من كدامه. لأن كفخة زايدة ما أتحمل.

فيروز: اسكنددددر اطلع برا. رجعت عيني على مُلاذ. قوة شخصيتها و تصرفاتها تخوفني مرات. أقوى المواقف ما تبجي بيهن. هذا الي يخليني مصدومة منها. أنا لو أحد رفع صوته عليه أبجي. بس هي مستحيل تنزل دمعتها!

إذا ما طلعت حرگة گلبها.. و اذا ما ردت الأذية أضعاف. هسه اذا وكفت كدامها يأنبني ضميري لأن ما طلعت حرگتها بـ اسكندر. أموت من حرگة گلبي اذا ما شفت مُلاذ تدوفه. رفعت نظري الها مبتعدة خطوات لـ وراهي هجمت ع اسكندر تصيح بـ حرگة أعصاب. رفعت تحفية من يمها شمرت اسكندر. وخر بسرعة طاحت بـ الحايط. أمي و عزيز لازمينها. دحگت لـ عزيز خطية، اندمغ دمغة معدلة. ذيج الي تردلك ذاكرتك إذا فقدتها، أو تفقدك الذاكرة إذا ما فاقدها. اجيت أضحك و تذكرت جدية الموضوع. حصرة الضحكة أصعب من حصرة البجيه. طربتني مُلاذ بـ غلطها ع أسكندر.

مُلاذ: لك اكسرها لـ ايددددك. انت منو نكره، طايح الحظ، ابو العرك. منو انت تضربني، حثالة!!! أبو اسكندر جر اسكندر يريد يطلعه. هذاك عكد حواجبه رد على مُلاذ سحل شعرها حيل. نبتت أظافيرها بـ ايده و بـ ايدها الثانية ضربته راشدي خدي كام يوجعني من يمي. مزت الوح شعره ملخته مثل ما ملخ أختي. عمي: لج ملاااااك عوفي شعره. انداريت عليه مبتسمة، گلت بـ برود. صوتي ما ينسمع من صياح مُلاذ على اسكندر. ملاك: شبيك عمو غير أوخره.

عمي: أيييي وخري وياي بنيتي. ملاك: من عيني. كمزت لزمت ياخته و جريته منها. شبعته تصفك على علبته عود أوخره. هو يتعارك وي مُلاذ و أنا أصفك بي. عزيز ساندني لزمنا بـ ياخته. هو يحجي و أسحل ياخته حيل بحيث القميص يخنك بلعومه و يختنك. بس هو صامل يكمل عرك. عاط بـ ألم لمن مُلاذ عبرت أمي و خرمشت وجهه من حلكه لحد حنجه.

ابتعدت خطوات لمن انكسرت مزهريه. ما أدري منو كسرها. رحت وكفت ألزم مُلاذ لأن حيل تأذت. أعرف هذا صياحها وجهها صار أحمر. دمصوتها راح و شحرج. تحول نظري على ايدها الي تصب دم. كلنا فزعنا بـ خوف. هي حتى ما مدركة لـ نفسها. تاركة ايدها تجري دم بـ غزارة. ملاك: مُلاذ مُلاذ ايدددج. ملاذ كافي اهدئي حبابه. أدحگلها على فد صيحة و علياء خبلتها. أمي تلزم بـ ايدها، تريد توكف الدم. مُلاذ تعت ايدها حيل و يزيد الدم.

فيروز: ولج مُلاذ ولج يمه ايدددج. گامت أمي تلطم على وجهها. دموعي تصب من خوفي عليها. مُلاذ: انت مالك علاقة بـيه! انت ما تكدر تدخل بيه! اسكندر: أدحس النعل بـ حلكج. أطلعلج گلب ثاني و الله أربيج على ايدي. مُلاذ: اكسرها لـ ايدك قذذذذر. ابو الـ**** ترباية إلياس تشرفك و تشرف عشرة مثلك. ربي روحك اوووللو تموت لو شما تسوي ما اقبل بيك. صاحت أمي على اسكندر.

فيروز: كافيييي كافي اسكت. ايدها راح تموت، يمه اروحلج فدوة اوكفي. الشك قريب على الشريان يمه مُلاذ لا تصيحين. انتبه اسكندر لـ ايدها، فتح عيونه بـ وسع. ركض يثبت مُلاذ، يريد يحط وصلة ع ايدها. دفعته و ضربته راشدي حيل خده صار طبع أحمر. شبعته راجديات و هو يتغاضى يرجع يخلي الوصلة. أبصم بـ العشرة خاف يصير بيها شي و تطيح بـ راسه. ما خايف عليها و لا علموده. مُلاذ: قذرررر وصخ انت منو تضررربني! منو تمد ايدك عليه اطلع مناااااا.

اسكندر: كافيييي اسكتي. ايدج لج ايدج كافي. عتت ايدها حيل صاحت بـ يم. مُلاذ: عوووووفني. دفعت صدره انضرب ظهره بـ الحايط. انتبهت الها شلون دارن عيونها، غمضتهن حيل. نزلت نظري لـ ايدها التنزف قبضتها قوي. نَفسها الي يتسارع وجهها أحمر. كل الدم اتجمع بـ وجهها عبالك. رگبتها مشخطه و تجري دم. كصتها بيها جرح واضح مال قبل أسبوع. راحت عليه بـ خطوات ثگيله گالت بـ حرگة دم توضح النار الي بـ گلبه.

مُلاذ: عساك ينحرك گلبك، عسى الله ياخذني و لا أكون بـ يوم إلك. كون تشوف تابوتي كدام عينك. گالت هالكلمات بـ كل صمود، تدحك بـ نص عينه. أنا وراها أريد أثبتها، أخلي وصلة على ايدها. أريد أشوف شبيها بس ما جاي تخليني. كل مرة تبعد ايدها و تنزعج و تعيط بيه. ابتعدت مُلاذ عن اسكندر. ركضنا وراها. سحبت سويجها من الميز. فيروز: مُلاذ يمهه وين رايحة؟ ولج يمه شجاي تسىوين بـ روحج اووووكفي.

قبل لا نلحگها طلعت من البيت. حتى حافية بلا أي شي تلبسه بـ رجلها. راحت سريع على السيارة. صعدت و قفلت باب السيارة. وخرنا اسكندر. وكف يدك جام السيارة عليها. اسكندر: مُلاذ بلا خباااال انزلي. لا تخليني انزلج گوه. فيروز: مُلاذ يمه بنيتي ايدج دتنزف. يمه انزلي علمودي يلا فدوة اروحلج مُلاذ.

أمي تبجي و تدك بالجامه، تتوسل بيها. يحاولون يفتحون الباب، يدكون الجام. يحاجوها و أنا من ضمنهم. شغلت السيارة بلا اهتمام، طلعت بيها. كل بالي ويا ايدها انضربت قريب الشريان. ركض اسكندر و عزيز على السيارة يلحكوها. طلع اسكندر ناسي السويج جوا. دخلت ركض أدوره ما موجود. گلبت البيت. دخلوا وراي يدورونه و لا لگينا. علياء كاعدة بـ مكانها و لا عبالك. اخذت تلفوني اخابر مُلاذ و مترد. جسمي كله يرجف. قطرة دم ما بقت بـ جسمي. طلعت مره

ثانيه دحگت لـ اسكندر. لمن خمش السويج من ايد أمه. طلعوا هو و عزيز بسرعة. بقينا احنا نلوب و عمو ما يقبل ياخذنا. اتخبلنا. خابرنا لـ جسار. كعدنا منتظرينه. أمي طردت علياء و عمي. بس ما راحوا و گالولها يروحون من ترجع مُلاذ. خبلونا ماكو هيج لزگه أفعالهم تفشل!

اجا جسار و گبت العركة بينه و بين عمي. مُلاذ اخابر عليها ما ترد. عزيز و اسكندر نتصل عليهم يگولون ما لگوها. اتخبلنا. ظلينا نلطم أنا و أمي. گلبي راح كد ما بجيت. أمشي و أدعي ترجع. جسمي كله يرجف. و جسار لعب بيهم لعب خلاهم طشارهم ماله والي. يظل عمي لا ياخذ و لا ينطي ساكت. اجا سلطان اتبعوه صفاء و اخوان سلطان. كعدنا كلنا ننتظر. طلعوا جسار و صفاء. بقى سلطان و الباقيين بقوا يمنا. اتقدم سلطان على أمي يهديها. انطاها گلاص مي ما قبلت تشرب. رجع انطاه الي هم رفضت.

مُلاذ: ما أدري وين أروح وين أشرد. أريد أخلص منه. أريد أخلص منه، كرهت حياتي بسببه. من أنا و صغيرة و هو ملاحكني ما تركني. كلشي سويت حتى يكرهني ما گدرت أتقبله. ما أكدر مو بـ إيدي. كلشي بيه رافض يتقبله. أسلوبه، شخصيته، تصرفاته المالها معنى. كلها ما توالمني و لا أريده. مستحيل أتخيل حياة وياه هادئة. مستحيل أتخيل أحبه و أتقبله و أغير نفسي علموده. هاي أنا بـ عصبيتي، بـ عنادي و بـ نفوري. بـ مقاومتي و هروبي و تعبي و قوتي. هاي اني. محد يقبل يتقبلني على هذي الهيئة!

نزلت نظري لـ ايدي يلي تنزف. رجعت ظهري ع الكشن. أطلع من شارع أدخل بـ شارع. ايدي يزداد احساسي اتجاهها بـ الألم تدريجياً. جسمي أحتر عيوني تشوش. لفيت السيارة بـ استدارة. رجعت راسي ع الكشن، متألمة من ايدي. غمضت عيوني بـ ألم، طاقتي تنتهي تدريجياً. حسيتني خلص رح أفقد. تلاصقت رموشي لمن شفت نفسي رون سايد. وسعت عيوني مصدومة، دحگت من الجامه الي يمي. لـ سيارة اجت سريعة عليه. رفعت ايدي ع الستيرن أريد ألزمه. صابني الهلع، طاحت

ايدي. بعد ما اندل البانزين. عيوني تشوش كلش. رجعت راسي ع الكشن. فتحت عيوني الذبلانات. لگيت سيارة كدامي. درت بـ عيوني. لگيت سيارة من جهة السايق، ثنينهم سريعات. دست بانزين ولفت بـ سرعة. نزلت راسي على ايدي. صار صوت ضربات قوية، غمضت. فتحت عيوني بـ صعوبة. دحگت الدنيا ظلمة، السيارة يطلع منها دخان. مضروبة بـ حايط، الباب مخلوع. شمرت روحي من السيارة، طحت ع الكاع. لزمت بـ مادري شنو، گمت على حيلـي. دا يخة و أفتر بـ مكاني أدحك.

رحت على سيارتي أعرج، أمشي بـ صعوبة. رگبتي توجعني، جريت تلفوني من السيارة. دخلت على الاتصالات اتصلت على اول رقم. ما أعرف منو يلي اتصلت عليه لَكن اتصلت. تمتمت بـ أشياء ما أتذكرها و عيوني بدت تنغلق. صحيت لگيت نفسي بـ المستشفى. ايدي ملفوفة و رگبتي ثگيله. دَرت بـ عيوني دحگت لـ أمي و جسار. رجعت غمضت ونمت. كعدت مره ثانية. دحگت لـ أيهم كاعد يمي. أمي و جسار كاعدين بـ الجهة الثانية بس غافيين. دحگلي أيهم لمن گلت.

مُلاذ: شتسوي هنا؟ اتقدم عليه بسرعة يسألني. وجهه أحمر و ايديه مجرحه. ظل يفحصني و يتطمن عليه. گلي رگبتي تاذت و ايدي لفوها. كصتي انجرحت فوگ الجرح الاول. ما أدري شلون أظل عايشة من بعد كل مصاب يصيبني! طلعت ثاني يوم من المستشفى. مالي طاقة أبقى بـ مستشفى و هوسة. رجعت لـ البيت. ركضت عليه ملاك تتطمن عليه و تبجي، هدأتها. دخلوا أيهم و جسار وراي، أمي ساندتني. أخذوني لـ الغرفة، تمددت علگولي مغذي و رجع أيهم يضربني ابر بـ الكانولا.

و هكذا مرت فترة. أمي معتنية بيه هي و ملاك. أيهم كَونه دكتوري و يعرف حالتي. بقى يروح و يرجع عليه و يضربني ابر. ما حجينا و لا نطقنا كلمة وحدة عدا لمن يفحصني. بعدين شالوا الي بـ رگبتي و فتح الشاش من ايدي، فتح الشاش من راسي هم. ضربني اخير ابرة بالكانولا و شالها. جسار دز سيارتي لـ التصليح. و حسب الگالته ملاك الي. أمي طردت بيت عمي من بيتنا. و جسار هددهم إذا يدخلون لـ بيتنه محد يطلع صاحي من البيت. كلهم يدرون جسار گول و فعل. أمي سولفتلي بالمستشفى. صايرة هوسة و معارك و مستغربة. لمن دخل اسكندر للـ المستشفى علمود يجيني و يشوفوني. أيهم هاجم عليه و كاتله. الشرطة رايدين ياخذونه بس ضرغام مانعهم و ما خلاهم يتدنون اله.

مرت ايام رجعت لـ صحتي تقريباً. انشلت نشله قوية و على طول أعطس و أكح. أيهم اتعود يتصل عليه و يسأل عن حالي. أجابوه على كد سؤاله و أسد الاتصال منه. بـ يوم خابرني گلتله مريضة. أيهم: رحتي لـ طبيب؟ مُلاذ: لا نشلة عادية. أيهم: نشلة عادية و هذا صوتج؟ انتظري جايج ساعتين و انه يمچ. مُلاذ: وين جايني أيهم!

سد الاتصال مني. گمت اخذت كانولا عدنا هواي و ضاميه. نشديت ايدي و كعدت أدور وريد. بعد كم دقيقة دخلت الكانولا بـ ايدي. صحت لـ ملاك، اجتني، دخلت دحگتلي. اختنعت لمن شافتني شاده لـ روحي كانولا. گلتلها تكطعلي بلاستر گطعتلي بسرعة. شديت الكانولا بـ ايدي. طلعت جبت علاجات و ابر و رجعت. كعدت على الجرباية أدحك لـ ايدي. صار نص الليل. أيهم بعده ما اجا. أمي و ملاك ناموا. التفتت لمن سمعت طقطقة على الشباك مره، مرتين. گمت من مكاني أتقدمت على الشباك مالي حيل. جسمي أحسه بايد، عيوني يطلعن نار. فتحت البرده، دحگتله واكف يتلفت. أندار دحگلي فزز عيونه عليه. فتحت الشباك. نطقت بخمول.

مُلاذ: شتسوي هنا؟ تجولن عيونه على عيوني. نظرات الخوف عبالك تنطق من عيونه. أيهم: مُلاذ شبيج! ? ليش مريضة؟ سحبت نفس راسي مسطور سطر. مُلاذ: فلاونزا. ظل يدحگلي نزل راسه ضايج. رفع ايده بيها علاگه. أيهم: جبتلج علاجات. مُلاذ: ليش تعبت روحك؟ أيهم: ما تعبت روحي من جبتلج علاجات، بس هسه تعبت من شفتج هيج. وين امج و اختج؟ مُلاذ: موجودين. أيهم: ليش ما مخلين بالهم عليج و مداريج؟

مُلاذ: مخلين بالهم و امي تروح و ترجع عليه، بس انا ما أحب أحد يظل فوگ راسي. أنا أعالج روحي بـ روحي. أيهم: ماكو هيج كلام بـ قاموسي. وخري. مُلاذ: شنو؟ أيهم: وخري. ابتعدت دنك شويه. مديت راسي من الشباك. أشوف شديسوي. لكيته ينزع أحذيته (تكرمون) . رفع روحه، كمز من الشباك دخل للـ الغرفة. مُلاذ: أيهم هسه يدخلون علينا. أيهم: مُلاذ اكعدي بس انطيج علاج و أروح. مُلاذ: ما اريد اشتريت. أيهم: لا، أكلتي؟

رحت كعدت على الجرباية. أيهم واكف. رفعت راسي دحگت له. مُلاذ: بلاعيمي تاذيني، ما اتقبل الأكل هسه. أيهم: ما ماكله؟ هزيت راسي بـ قبول. نزل نظره لـ ايدي. گال بـ استغراب: مو ما رحتي للصيدلية؟ مُلاذ: أي ما رحت ليش؟ أيهم: الكانولا؟ نزلت نظري عليها. مُلاذ: أنا شكلتها. فتح عينه مندهش من جوابي. أيهم: وحدج!!؟ هزيت راسي بـ معنى "أي". مُلاذ: دكتور كدامك انسانه متدربة. شسوي رايحة للـ الصيدلية بعد.

أيهم: ما يصير. تركبيها لـ روحج فوصة. مُلاذ: انت الفوصة مالي خلكك. ابتسم بـ حزن، كنبص كدامي. أيهم: لَـذه، ليش هيج ترجفين؟ مُلاذ: بردانه. أيهم: اتغطي لفي روحج باللحاف. سحبت اللحاف لفيت روحي بي. يدحگلي، تنهد و اخذ من العلاگه لفه. مُلاذ: شنو هاي؟ أيهم: اكل ادري بيج ما تاكلين. مُلاذ: ما اريد بعدين شنو تشتريلي بـ فلوسك؟ دكتور انت متزوج. أكرهه هاي التصرفات. أيهم: مُلاذ سالفة زواجي طلعيها من عقلج. زين؟

انه ما احبها و لا اكو أي علاقة بيننا. تمام؟ فهمتي وصلت؟ مُلاذ: أناااا ما اريد وجودك وياي. و بـ نفس المكان انت انسان متزوج و هذا غلط! أيهم: لا تريدين. نزل نظره عني. فتح اللفة دحك بنصها. أيهم: نعلعلا ابيك احسان. عود گلت لا تحط طماطه. مُلاذ: شنو؟

أيهم: جبتلج لفه و ادري ما تحبين الطماطه وي الكص. گلت له ما يخلي و طلع مخلي. بس عيني ما جبت بس لفة كص جبت تكه وياها. و معلاك خليت المعلاك قليل. ادري بيج ما تحبينه ف جبتلج تكه اكثر. كلامه بـ كل مرة يصدمني و يدهشني. شمدري انا شنو أحب و شنو ما أحب. مُلاذ: أيهم شمدريك؟ ترا دمرت عقلي و أنا أفكر منين تعرف عني كل شي. تجاهل كلامي و قدملي اللفة. رفضت ما قبلت أكلها. هو يريدني أكل و أنا ما أقبل. ضغط و بانت عظمة فكه و هو معصب.

مُلاذ: أيهم رح تجاوبني لو شلون! أيهم: اكلي و اسئلي و أجابوج. مُلاذ: والله هسه تجينا أمي و خوش أكل. ما اريد أكل أيهم جاوبني. أيهم: و داعة أمي أجابوج بس اكلي. اخذت اللفة من عنده، أكلت لگمة. مُلاذ: يلا جاوب منين تعرفني؟؟ أيهم: كملي اكل و انطيج الادوية. مُلاذ: منين تعرفني؟ أيهم: مو مهم. مُلاذ: مو گلت أجابوج؟ أيهم: شنو الي يهم إذا عرفتي؟ مُلاذ: أيهم! أيهم: ما عليج مُلاذ اعرفج من مكان. مُلاذ: منين تعرفني و من شوكت؟

أكلت لگمة، ظليت أسأل و ما يجاوب. بطلت أكل لمن بطل يجاوبني. أيهم: هاهيه اكلي و الله أجابوج. اكلي. رف گلبي على نظراته و اهتمامه. غمضت عيوني خايفه و مرتبكه من الشعور الي متكون بـ داخلي. رجعت وجهت نظري على اصبعه يلي بي الحلقة. رفعت راسي استوعبت كل الي جاي يصير. مُلاذ: أيهم كوم روح! دحگلي مستغرب. گال بـ هدوء: ليش؟ مُلاذ: شجاي تسوي أيهم! شجاي تسوي انت متزوج كوم روح منا.

أيهم: مُلاذ بوجهها ما أعاين. ما توالمني و لا أوالمهااا. شوكت تفهمون! مُلاذ: بيناتكم طفل! بيناتكم عشرة و سنين. جاي تلاحظ روحك شنو جاي تسوي؟ أيهم: شذكرج هسه انتِ؟ شذكرج؟؟ حظي ذكرج! مُلاذ: ما نسيت أنا أيهم كوم اطلع منا. المرة الي جنت وياها هي الي تستاهل تسويلها كل هذا اصـ... قبل ما أكمل قاطع كلامي. كام وكف و هو يحجي معصب. أيهم: ما تستاااهل ما تستاهل. مُلاذ: فنت عمرها وياه جابتلك طفل. بالنهاية تكول متستاهل؟؟

أيهم أنا ما اريدك. حجه بـ حدة و غضب. أيهم: تعرفيها انتِ؟ هزيت راسي بـ رفض. أيهم: بعد شكوو تحجين؟ تعرفين إذا انه جنت قابل بيها لو لا؟؟ تعرفين إذا انه جنت رايدها؟ ما تعرفين شي مُلاذ ما تعرفين شي.

مُلاذ: ما جاي تنطيني فرررصة أعرف. أسألك ما تجاوب. كل يوم تصرفاتك تصدمني. حجيك كل حركة تتحركها تصدمني. أنا وياك ما بيناتنا شي. بس ما أريد مرتك تتاذى بـ سببي بعدين. لأن انت تعاملك مو عادي وياي. و شكد ما حجيت و شكد ما گلت. ثنينا نعرف تعاملك و تصرفاتك مو عادية. شحرج صوتي و أنا أحجي، كحيت گحة قوية. سكت، ظليت أكح هواي. راد يجي عليه و وكف. لأن ما يكدر يلمسني. دور مي بـ الغرفة ما لگى.

أيهم: اكعدي اكعدي. خل أشوفلج مي لا تبلعيها كحـ... فتح باب الغرفة على كيف و مد راسه. أريد أنطق و أكله يوكف لا تشوفه أمي. ما گدرت الگحة مانعتني. أمي نايمة و غرفتها لمن تنسد بابها. بعد مينسمع شي بيها و ملاك هم نايمة. حطيت ايدي ع صدري حسيتني رح أموت. ايديه يرجفن، بلعت كحتي اختنكت. رفعت عيني دحگت اله. دخل يركض عليه انطاني مي. اخذت و شربته. أيهم: اشش اهدئي اشربي على كيفـ...

شربت خايفه تجيني الكحة و أنا أشرب المياغص بي و أموت. سويت سيناريو كامل بـ راسي. وخرت المي و انطيته اله. اخذه و دحگلي. أيهم: شلون صرتي؟ مُلاذ: أحسن. هز راسه وظل ساكت. كعد بـ الگاع، سند ظهره على الحايط. أيهم: مُلاذ عوفني روح. مرتك خطيه. أيهم: كافي تگولين عن ذيج الـ*** مرتيييي! غمضت عيوني بـ نفاذ صبر. مُلاذ: أيهم. بـ اعتبار هاي خيانة. أيهم: مو خيانة. مُلاذ: خيانة. أيهم: مو خيانة. ما عندي شي وياج!

شفتينا شمسوين لمسة ما المسجو. أخاف عليج من الحرام. إذا أحاجيج و إذا أسوي أي شي. أسوي طبيعي و اتصرف طبيعي. مُلاذ: و جرحك؟ كل ما گلت أيهم جاوبتني جَرحه؟ اكتشفت انت تعرفني! أيهم: مُلاذ كافي. مُلاذ: شكراً أيهم على مساعدة الي. تكدر تروح لـ مرتك. أيهم: جاي تطرديني. عديتها اكثر من مره و جاي تأذيني. لأن گلبي النعال ابن النعال ما يخليني أعوفج هيج. مُلاذ: أيهم راح أتخبل. احجي كافي احجي.

دحگلي بنظرات واهنه. لمس رجليه، ظل ساند ظهره مد ايديه ع ركبة رجله. بـ ايده سيم يعوج بي. دحك لـ السيم و گال. أيهم: ما خنتها وياج، خنتج وياها. مُلاذ: شنو؟ أيهم: خنتج وياها. عگدت حواجبي مستغربة. كمل كلامه. أيهم: بـ امتحانات السادس الاعدادي الوزارية دفعتكم... كنت جاي أشوف باهر امتحانه بـ نفس الكليه يلي تمتحنون بيها. رفع عينه دحگلي و أنا أستمع له. رجع نظره ع السيم، كمل كلامه.

أيهم: لمن مطرت مطر الصيف. كنت أمشي أدور على باهر. اتصلت عليه گلي هو طلع من زمان. مشيت بـ سرعة أريد أطلع. انه هم. يدحك لـ الفراغ ابتسم و گال. أيهم: صدفتي الحلوة، انردمت بيـ... عطستي بـ وجهي و أنا أدحگلج. اعتذرت منچ. بس ما حاجيتيني. اخذتي أغراضج و رحتي. ظليت اعاين وراج. مشيتج عصبيتج صوتج. شكلج كل شي بيج خلاني صافن وراج. رفع ايده فرك عينه. أنا مصدومة و متجمدة بـ مكاني أسمع له. أيهم: نزلت عيني على الكاع.

ضحك و كمل: لگيت ماشتج طايحة. اخذتها حجه و لحگتج. ردت انطيها الج. وكفت بـ مكاني لمن شفتج كاعدتلج بـ زاوية. خانگه روحج ما تبجين. أشوفج و واكف. تبللت و تبهذل حالي. بردت من المطر. بس دموعج النزلن يحرگن خدج حرگني قَبله. سكت لحظات. مُلاذ: كمل!

أيهم: لحگتج من طلعتي، لحد ما وصلتي لـ بيتج. شفتج تدخلين البيت آمَنت. ردت أروح. وكفت بـ مكاني لمن شفت سيارة دخلت فرعكم. نزل منها اسكندر. فكرته أخوج. اخذج و رحتوا. بقيت انه بـ ذاك الركن واگف. عيوني تلحك السيارة الصعدتي بيها. وددت انطيج ماشتج الوگعت. اترددت هواي على بيتكم أيام أوگف گدام بابكم. يطل وجهج عليه من تطلعين. بـ ايدي ماشتج ما فارگتني و لسا عندي. تصرفاتج و كلامج و عصبيتج. ضحكتج. عركاتچ و لسانج شعرج عيونج المكحله. قوتج و مسؤولياتج و تعبج...

سكت متنهد عاجز عن الكلام. بلع ريگه و كمل كلامه. أيهم: عدت الأيام. دخلتي الجامعة. أعوف كل شي أترك كل شغلي و أجيك أدحگلج من بعيد لـ بعيد. أتخبل من الي يمر من يمج. أركز على كل حركة. حفظتج حفظ من راسج لـ جدمج.

أيهم: صارت حفلة تعارف. رحت ويا باهر بس حتى أشوفج. وكفت و غنيت الهم. و بين كلمات الأغنية أنطق اسمج بـ داخلي. و انتِ ما تدرين و انتِ ما فاهمه. رحتي و بـ وسط أغنيتي الكانت تقصدج. غيرتها و غنيت الهم غير شي. كل شي سويت حتى أحاجيج. من ثولي و صدمتي سألتهم. مُلاذ: شسويت؟

أيهم: صرت سايق تكسي. وكفت أبيع شعر بنات. صرت أشتغل وي محل السيارات الي تروحين اله حتى تصلحين سيارتج. صرت كاشير صرت نادل. أشگال و ألوان. گمت أتأنكر عود رجال كبير اشتري منچ. لو أسوي روحي شاب و أشتري. وكفت و لفيت وجهي و گمت أبيع وياج. استوعبت شغله قاطعته و گلت: مُلاذ: انت ابو الرسائل! ابتسم تك خد. هز راسه بـ قبول.

أيهم: يا طفل الگى اكضه و أدزلج بـ ايده ورقه. خلصت الخردة ع الجهال. كل شوية گاضلي واحد. ما گدرت أحاجيج. و لا گدرت أوصل خطوة يمج. الوثج انه ورگتج البيضه الطخها بـ سوادي. مُلاذ: شلون صرت سايق تكسي؟ شنو صرت نادل ما جاي أفهم؟ أيهم: أفشش تايرات سيارتج. اخذ التكسي من صديقي و اوكفلج ع الشارع. بس أشوفج تطلعين و تشوفين تايراتج مفششها. أجينيج و تصعدين وياي أوصلج ملثم ما تدرين بيه. وسعت عيوني.

مُلاذ: يا مصخم الوجهه الله يصخمك و أنا أدفع فلوس على تايراتي و ما وعبالي الجهال يفششوهن!!! كل يوميه أروح أتعارك وي أم أوس. عبالي أوس الي يسوي هيج بـ سيارتي! أيهم: جنج ما مستغربة لمن كم مرة تلگين فلوس طايحة بـ سيارتج؟ مُلاذ: انت المخلييييهن؟ أيهم: أي. تدخلين لـ مطعم. أغطي وجهي و أجي آخذ طلبج. تروحين لـ كاشير. ألبس شفقة و كمامة. سويت عملية أمج. لحد ما جا ذاك اليوم الأكشر صديقتج. غادة جانت كاعدة گالت خطبوج و قبلتي.

بلع ريگه و فرك وجهه بـ عصبية. أيهم: أتخبلت، عقل ما ظل بـ راسي. طلعت من مكاني و باهر يلحگني. جنت رايد أجيك. صارت شغلة ما گدرت أجي. من حرگة گلبي من الصار بيه ذاك اليوم. رحت شربت غلط و اعترف بي. بس الصارلي بـ يومها مو قليل. أيهم: اجيت لـ بيتكم بـ الليل. ما أدري شصار ما أدري شسويت. فزيت الفجر لگيت روحي بـ نص طرمة بيتكم. شلون دخلت شلون اجيت و شسوي ما أدري.

أيهم: طلعت بسرعة گوه أمشي. رحت لـ بيتي. قبلت بـ لينا بـ هذاك اليوم الأكشر. كلما تاهه دربي الگى روحي گدام بابج. تعبت و أنا الگاج ملجئي بـ ضياعي. و من أوصل ما أحصل أثر منج. فتح باكيته طلع جگاره بعد ما خلصت الي بـ ايده. شمر الباكيت، ورث الجگاره. يحجي بـ حرگة أعصاب. يوصف الموقف كانو هسه جاي يصير.

أيهم: گعدت گدام باب بيتكم أيام و ليالي. أنتظرچ تطلعين عليه و أشوفج. بس ماكو. عتمة البيت مثل عتمة روحي. سموني رَماد من صغري ينادوني بـ هذا الاسم. بس لمن رحتي الكل عرفني رَماد. كل الي يسألني عن اسمي اگله رَماد. رَمادچ انه و انتِ أخ. انتِ النار الي حرگتني. ظليت صافنة لا عرفت أجابو لا عرفت أستوعب. تعبت تعب عقلي من گد الصدمات الي انصدمتها. مُلاذ: لـ ... ليش ما حاجيتني. ليش ما گلتلي... ليش اتنكرت دائماً؟

أيهم: ما اگدر. شجاعة العالم الأكبر خليتها بـ گلبي و هسه أنه گدامچ. مُلاذ: بـ مرة... بـ مرة من المرات. استوقفني ضابط. اجا اله طفل. بلعت ريگي. كملت بـ صعوبة. مُلاذ: اجا اله طفل و انطاه ورقة. الضابط وكتها دحگ لـ جهه و هز راسه. انت... رفع عيونه الي متحجرات الدموع بيها. قاطعني قبل لا أكمل. أيهم: أنه، أنه سويت عملية لـ هذا الضابط. عالجته و ساعدته هواي. طلبت منه يعبرچ. ما رد طلبي و عبرچ.

أنطويت على نفسي، لزگت روحي يم الحايط. حسّيته إنسان مهووس. ما عرفت أوصف احساسي اتجاهه. فهمني من نظراتي. گام بسرعه وكف، اجا ناحيتي. خليت ايدي گدامي مستوقفته. گعد على ركبه بـ الكاع گدامي. و أنا گاعدة ع الجرباية. استغربت صوته يلي يتغصغص. أيهم: مُلاذ... مُلاذ لا تسوين بيج هيج. لا تأذيني هيج. ما حجيت الج و لا ردت أحجي. بس لازم تعرفين كل شي. و الا رح تظلين تسألين طول حياتج. و ما رح أعرف أجابوج.

مُلاذ: أيهم عوفني روح. تعبت تعب عقلي. كافي كل يوم أحد يصدمني. و خصوصاً انت أيهم من يوم عرفتك. كل يوم أنصدم بـ شغلة تخصك. تعبت. أيهم: بس اسمعيني مُلاذ. مُلاذ: روح أيييهم. أيهم: رح أروح. هذا اخير لقاء بيننا. بس اسمعيني خليني أحجي. ظليت ساكته و هو كمل. أيهم: لينا ما دخلت گلبي و لا لحظة. نفرت منها و ما تقبلتها. و الله و داعة أمي و عيونج. ما اتقربت الها و لا لمستها و لا حتى حاچيها.

أيهم: أشهر أنه ما شايفها عدل. گعدت بـ يوم لگيتها يميش. صار و شكو ما اعرف. مُلاذ اتجننت. ما لمستها و حق الحق ما لمستها و لا أتذكر الصار. أيهم: اتخبلت عليها بـ ذاك المصباح. فترة و طلعت حامل. سويت الف تحليل مال ابوه. كل مرة التحاليل تثبت أبوي ابني. بس انه ما قبلت بيها. و لا اتقبلتها كـ زوجة. حاولت و ما گدرت.

أيهم: كنتي و بعدچ گدامي و بـ كل لحظة. مستحيل أتقبلها كـ زوجة و لا رح أحبها. ايدي ما رح تلمس غيرچ. و عساها تحترك إذا لمست غيرچ... أيهم: زين؟ انه رح أروح. ما أريد أتعبج اكثر. ريحي بالج و فكري زين. اكلي و اخذي علاجات. بس صيري زينة و لا تهتمين لـ شخص. إذا بـ يوم ردتي شي. إذا بـ يوم دورتي شخص يمج. رح تلگيني يمج حتى لو بعيد. تمام؟ دحگلي ثواني رفعت عيني. دحگت له دمعت عينه.

أيهم: محد رح يريدج بـ خير بگدي. أتمنى أذيتج هاي و مرضج و تعبج كله بيه. تركني و طلع من الشباك. أنا بـ مكاني صافنه و أدحك و أتذكر كل موقف حجاه. ما كنت أعرف هذا المنتصف من كلامه! مرت أيام هواي أيهم فعلاً ما شفته بعد. بـ كل لحظة ظليت صافنه و أفكر. يرجع كلامه و ينعاد بـ اذني. عقلي تعب تعب لـ درجة لا تصدق. تمنيت اكدر أفرغ عقلي من كل شي.

طلعت من شغلي رحت لـ الأطفال. دحگت لـ حزن يلي كاعدة وحدها. و الأطفال يمسحون جامات و يبيعون بـ الشارع. ابتسمت و أنا أدحگلها. شلون مبتسمه و هي صافنة. مُلاذ: حزن. رفعت عينها دحگتلي، اتوسعت ابتسامتها اكثر. گامت وكفت، گنبصت بـ الكاع و أشرت لها بـ معنى "تعالي". ابتسمت ابتسامة ظاهرة سنوني. اخذت وردة من ورداتها الي على الرصيف. اجت ناحيتي تركض فرحانه و تضحك. صاحت و هي تضحك.

حزن: ماما مُلاذ جبتلج گلاده هديه. لأن عرفتيني على عمو الدكتور. تركض تحجي و تضحك فرحانه. صرخت بـ فزع لمن سيارة سريعة دعمتها. وسعت عيوني مصدومة، فتحت حلگي. طارت حزن لـ فوك و انضربت بـ الگاع. نزلت عيني لـ دمها يلي ترس الشارع. صرخت بـ كل صوتي و ركضت عليها. مُلاذ: حززززززن! رفعتها من الكاع ضميتها لـ صدري. گمت أصرخ و الدموع متحجرة بـ عيني. فتحت عيونها دحگتلي همست. حزن: ماما مُلاذ.

مُلاذ: بنتي روحي حزززن. دحگيلي حزن دحگيلي فدوه لا تغمضين. رفعت ايدها ع الگلاده. غمضت، طاحت ايدها. صرخت بـ لوعة بـ كل صوتي. مُلاذ: حززززززن!!! يتبع...