رواية جرح الأيهم الفصل السابع عشر 17 - بقلم أيلان

فزيت و طاح الأكل من إيدي. تجمدت بمكاني بعد ما وصل صوت صراخ عالي لمسامعي. يصدر من الغرفة اللي بيها ملاذ. ركضت ناحية الغرفة وأنا أتعثر بخطواتي. نور: ملاذ، ملااااذ. دخلت للغرفة ودحكت مصدومة. الغرفة فارغة، ملاذ ما موجودة. شخص واقف وخلفه شخص ثاني يتلاوى وياه. لما ركزت، انتبهت هذا الدكتور! الدكتور ضرب الشخص حيل على وجهه. بإيده سكينة والدكتور رافعها وصادها. وهو يريد يوصل إيده للدكتور ويصيح. الدكتور انهار بالضرب على المجرم.

بحيث صوته رج الغرفة رج. غطيت أذاني. نزلت دموعي وأنا خايفة تهسترت. اندفعت من جتفي، دخلوا الشرطة. دخل ضرغام، يركضون ناحيتهم. بلا ما يفهمون أي شي. القو القبض على الشخص. ظليت جامدة بمكاني. راح قلبي، فكرت ملاذ صارلها شي. بس استغربت أكثر لما شفت الغرفة فارغة. من بعد ما أخذوا هذا المجرم وطلعوه برا الغرفة. دخل ضرغام يتساءل وأنا أتساءل منو هذا الشخص. أيهم: صار لي فترة من اجت مريضتكم لهنا. لاحظت يوقف بالباب ساعات.

تجي اتصالات، وكم مرة راد يدخل للغرفة. بس تطلعون أنتوا موجودين، يخلي ويروح. البارحة دخل لهنا لحقته والكل نايم. أسئلة منو أنت؟ يكلي جيت زيارة. عرفت سالفته مو خالية. هسه أخذت المريضة لأن ما ارتحت والغرفة فرغت. خليت واحد مكانها، جيت لقيته داخل للغرفة. وبإيده سكينة، يريد يذبح النايم هنا. شهكت وحطيت إيدي على حلقي. ظلينا مصفصفين وصافنين. نور: ملاذ هسه وين؟؟ أيهم: لا تخافين جاي نسوي لها فحوصات.

ضرغام: تسلم دكتور، إحنا كنا ندور على الأفراد المتبقية من شرف وأنت لقيت لنا واحد منهم. تصافحوا، هز رأسه الدكتور. أيهم: واجبي. ضرغام: هسه المريضة وين، شلون وضعها؟ أيهم: هسه رح أروح أشوفهم. هزينا راسنا. انتبهت لركبته متعورة بالسجينة وخلف أذانه هم. ردت أروح وياه أشوف ملاذ. بس استوقفني ضرغام. ضرغام: من يجون لا تفتحين هذا الموضوع لهم أبداً. أم ملاذ وضعها تعبان ورح يخافون كلش.

خلينا نسده هنا ونغير غرفة ملاذ، وإذا اضطر الأمر نغير المستشفى. نور: تمام. دخل اسكندر، تبعه دخول خالة فيروز. دحكوا بالغرفة باستغراب ونطقوا سوا. -وين ملاذ؟ ضرغام: إحنا هم جينا سألنا عنها. گالوا ودوه يفحصونها وتحاليل. ماكو داعي نروح وياهم. فيروز: ليش فحوصات مال شنو؟ ضرغام: أشياء روتينية. فيروز: أكيد؟ ضرغام: نعم. هزت رأسها خالة فيروز ما مقتنعة. بس حاولنا نقنعها. ظلينا منتظرين ملاذ وخفنا عليها كلش. خالة فيروز قامت تلوى.

ظلينا هواي ننتظر. لحد ما جتي ممرضة گالت. الممرضة: الضوء كان مقطوع بقسم التحليل والفحص والآن قدرنا نصلحه. ما قدرنا نشتغل بدون ضوء. فـ هسه رح نكمل، لا تخلون بالكم على المريضة، هي بأمان يمنا. هزينا راسنا. دحكت لخالة فيروز. ارتاحت ولو شوية. طلعتها للحديقة وظلينا نفتر أنا وياها لحد ما تجمعوا الكل. رجعنا للغرفة ننتظر ملاذ ونسولف. ملاذ: درت وجهي الحيرة تتوسط قلبي. ورا ما طلعت نور من يمي. ما توقعت أبو أركان هيج أبداً!

صحيح كان يشرب وسكير. ولو شأتوقع منه، وين اكو سكير بي خير؟ هزيت إيدي، نزلت نفسي بصعوبة. نمت على السرير، خليت إيدي على بطني. درت وجهي ناحية الشباك. أدحك للضوء اللي يمر منه. أحس بالهواء اللي أتنفسه. من بعد ما كنت بمكان يمر بي نتفة ضوء والهواء اللي بي شبه رح ينتهي. من انباعيت كان الضوء عمى بالنسبة لي. والهواء سم أتجّرعه. بسبب الظروف اللي عشت بيها. بس هسه أحمد الله ألف مرة. فزيت من صفنتي لمن انفتح الباب حيل.

وسعت عيوني مخترعة، انداريت أدحك. لقيت الدكتور دخل عليّ وبإيده مدري شنو. ملاذ: دكتور شمالك كل شويه تداهمني وتشربني العافية؟ تكول داخلين عليّ داعش. تقدم عليّ بسرعة بدون ما يحجي. تعابيره واضحة عليها "التوتر والاستعجال". أيهم: كومي بسرعة. ملاذ: شنو، شكو، منو؟ أجا عليّ، وخر الغطا عني. بسرعة لزمت الغطا. ملاذ: شبييييك؟؟ أيهم: وخري إيدج بسرعة استعجلي. ملاذ: شكو شبيك خبل أنت؟ ما حاجاني، سحب الغطا عني. هذا شماله الخبل المسودن.

حط يمي شال وعباية. وخر المغذي من إيدي. لبسني الشال، أنا صافنة. هاي شصاير؟ شني متت وما أدري وجاي أتوب بالبرزخ؟ ملاذ: لك أنا ما محجبة. أيهم: أدري بيج أم شعر. جر العباية لبسني إياها. كل حركة يتحركها باستعجال. يا ربي استرني وأدركني. ملاذ: ولك شتريد؟ منو أنت؟؟ شبيك ياااا وخررر. أيهم: اسكتي، صوتج بس اسكتي. ملاذ: يمه بطني. ولك ما أكدر أصيح، شكو؟ أيهم: بس أوكفي، هسه أفهم. مجطركاعة سودة مصخمة ملطمة، شلعتي قلبي.

وكفني على رجليه. لف الشال عدل وسد العباية الإسلامية. لزم زندي وراد يجرني وياه ويمشي. ثبتت رجليه بمكاني. ملاذ: شكووو خبلتني ترا؟!! جر زندي أكثر ومشى بيه. وأنا أحجي وأدردم. أيهم: ولج بس صوووتج، صوتج موتتيني! ملاذ: يماااا راح يخطفوني مرة ثانية. كمت أعيط وأصيح بعلو صوتي. سد حلكي بإيده ويجرجر بيه. وأنا أتلاوى وياه وبطني موتتني. أيهم: ولج طركاعة فضحتينا. أنتِ منوووو يخطفج؟ أنتِ تخطفين اللي يخطفج. يا مخبل يخطفج ما تكليلي؟

مرر إيده من ورا ظهري، حاطها على حلقي. الإيد الثانية لازم زندي، صاير حاجز بيني وبين الناس. ملاذ: أنعل أبو الچتال، أنت من يمه موووت. عليك وعلى اللي خلاك دكتور. يا ما تستاهل امداااك، ولكم ديخطفووووون! يتهسترت الناس تدحك لي مستغربة. رجع سد حلكي بسرعة. عود اسكت؟ لا أعيد بصوت مكتوم وأحوص. أيهم: الخياطات انـ*** بيهن. ملاذ: ولك عوووووفني، يمااااا خطفوني. يماااا خطفوني مرة ثانية بالعباس. أروف ببطنك أخنكك بجهاز الإعطاء.

أيهم: أربطج بي هسه. اسكتي كافي فضحتيني. مروا ممرضين من يمنا. وإحنا نمشي، وخر إيده عن حلقي وأنا أعيد. ملاذ: ولكمممم الحكولي ديخطفنييي. يوگفوا يدحگولنا باستغراب. شلت إيدي، خرمشت خده، كام ينزف. اندار عليّ وعاط بيه. أيهم: كاااافي. جت وحدة من الممرضات ناحيتنا. بسرعة وخرت إيد الدكتور عن حلقي وصرخت. ملاذ: انقذينيييي، يريد يخطفني. اتجاهلتني الحيوانة، عبالك حايط. حولت نظراتها للدكتور، گالت بقلق. الممرضة: دكتور أنت زين؟

ملاذ: ولج ديخطفنييي، سم مابي. تعالي انقذيني من هذااا. گال دكتور ثاني. -دكتور أيهم صاير شي تحتاج مساعدة؟ كمل مشي يجر بيه، هز رأسه برفض. أيهم: لا ماكو داعي، اعذرونا، هاي مخبلة. -دكتور على بختك هاي مستشفى. شيسوون المخابيل داخلين هنا. غير مكانهم الشماعية!؟ أيهم: هو إنه هسه ماخذها للشماعية. كمم حلگي بإيده وضغط عليهم. ملاذ: ولك سافل نعال حيووووان. دعوفني بغل حمار رحل مخبل مسودن. أنا مخبببببله؟ جلبببب. ضغط على حلكي أكثر.

عضيت إيده وبعده مثبتها على حلقي. أيهم: خرب شرف شرفج. ولج أنت تخطفين العالم مو العالم يخطفونج. وصلنا لغرفة، فتح الباب، دخلني بيها. دفعني. كان مكتب وأكو قنفة، كعدني عليها. ملاذ: بعدني ما مكملة تفكيري. بعدني ما حامدة رب العالمين عدليا. ظلام يا جلاب، طاحظك وحظ الچتال. أيهم: ولج طركاعة الله السودة. اكعدي هناا لا تطلعين. ملاذ: عووووفني، شتريدون من عندي؟ والله أرجع و أهرب منكم، عبالكم أخاااف؟!!

أفكس عيون الچتال، والله أفكس عيونه. دار وجهه مغلس عني، راد يطلع. كمت أصيح أريد أطلع. دار وجهه عليّ، صاح بيه معصب. أيهم: اكعددددي گلت!! ملاذ: لاااا تصيح عليييه! شتريد مني؟؟ رجع گال بنفس العصبية والصوت العالي والخزرة. أيهم: يا أم عقeline، واحد يراقبج. يراقبونج، الله أعلم شمسوية. بحيث يريدون يطلعون روووووحج. انتظري هنااا واكعدي، خل أروح أطّف ذاك العارم. ملاذ: منين تعرف أنت؟ شمدريك؟ ضحك باستهزاء.

أيهم: لا تصيحين ولا تتحركين. تنفتح خياطاتچ هسه، أرجعچ لمكانچ. دار وجهه، أخذ مفتاح الباب وطلع. قفل الباب عليه من برا! أسمع صوته يحجي وي واحد. أيهم: أوكف هنا ولا تخلي كائن من يكون يوصل هنا. وإذا سألوك منو، يصيح: گول صوت جاهل جايبه الدكتور وياه. اختفى صوته وأنا اتخبلت. وكفت أدك بالباب ولازمه ببطني. دكيت لمن تعبت وصرخت لمن انهد حيلي. لكن لا حياة لمن تنادي. وكفت هادئة لكم دقيقة. عيوني تدور بالغرفة، زفرت أنفاس تلهث.

رحت كعدت على القنفة، طاقتي منتهية. رفعت الشال عن راسي وخليته على القنفة. دورت عيوني بالمكان أتفحصه. مكتب فخم بالمعنى الحرفي، من الطراز الحديث. الجدران كلها بيض إلا جدار خلف المكتب أسود. تتوسط الجدار لوحة مخطوط عليها اسم "الأيهم" بطريقة مزخرفة، خط عريض كأنوا اللي كتب الاسم وخطه كان بكل عناية وحبال. خط ذهبي، اللوحة سوداء سواد قاتم. الجدار الثاني، موضوع رفوف مزينة بالجمجمة.

رسمة القلب الحقيقي ودماغ مثل اللعبة وأعضاء أخرى. بجانب الرفوف على طول الحايط صورة تتضمن هيكل عظمي وشرح الأجزاء، مع تأشيرات. الجهة الثانية صورة الأعضاء وأسمائهم وشرح عنهم، مؤشر عليهم أيضاً. الشرح بالصورتين باللغة الإنجليزية. الرفوف ماخذة الوسط بين الصورتين. وهذا الشي ضايف جمالية للجدار! تقدمت على المكتب بهدوء. دحكت على الاسم (د. أيهم) يتبعها اسم أبوه. رحت على اللوحة، تقربت منها. دحكت لاسمه المخطوط بشكل مثالي.

نزلت عيني لطرف اللوحة. مكتوب بخط غير واضح. إلا شخص يركز حرف "m". رفعت حواجبي باستغراب. هزيت راسي بتعجب. ليش هيج الحرف صغير وبطرف اللوحة؟ لما ركزت باللوحة اكتشفت حرف "m" موجود هووواي باللوحة وبالزوايا. لكن كان الحرف باللون الرمادي. اتغاضيت عن هالحرف. معقولة هذا الكائن الخبل يحب؟ درت وجهي، دحكت للمكتب. مرتب، نظيف، عليه أشياء تخص الطب. تتوسط المكتب سماعة أطباء. على المكتب صورة لطفل صغير.

أخذت الصورة، ابتسمت على شكل الطفل. شكد بريء شكله وابتسامته بالصورة. ملاذ: الخبل كان بريء وهو صغير. هزيت إيدي، رجعت الصورة لمكانه. رحت يم الباب أحاول أسمع. ما سمعت أي شي، حاولت أفتحها ما تفتح. رجعت كعدت على القنفة اللي قدام المكتب. لونها أسود وقماشها جلد، شكلها فخم. مثل اللي يطلعن بالأفلام، قعدتها مريحة كلش. صفنت والف حسبة ببالي. هم رح يرجعون يخطفوني؟ مستحيل أصلاً يفكون ياخة عني.

فكرت إذا رجع الدكتور أوگف ورا الباب وأضربه بشنو أحصل وأشرد. ما أريد أنخطف مرة ثانية. أتراوى بعقلي سيناريو. هسه ديجهز ابر التخدير حتى يخطفني. ودينطي خبر للمجرمين اللي وياه. حتى يلزموني ويخدروني ويخطفوني. ويأخذون كليتي الثانية وأموت! وأنا أتخيل فزيت على روحي. لازمه بإيدي وحدة من الجماجم. ضغطت عليها قوية وثگيلة. شني هذا الخبل بس لا كاتل واحد صدك. وماخذ جمجمته؟ صرت كل شي أتوقع. هزيت إيدي، رحت وكفت ورا الباب.

رجليه تعبن من الوگفة والانتظار. سمعت صوت خطوات وصوت الدكتور. حضرت نفسي واستعديت. شددت لزمتي على الجمجمة اللي بإيدي. كتمت أنفاسي وأنا واقفة ورا الباب. انفتح القفل وانفتح الباب. دخل الدكتور يدور عليّ. أدحك لظهره شعرضه واكتافه وشطوله تگول تيل. وكفت ورا بإيدي الجمجمة. راد يندار كمزت أحاول أوصل له. ضربت راسه بالجمجمة. وكفت بإيدي الجمجمة. حطيت أظافيري بحلكي صافنة عليه. صار هدووووء. خلا إيده على مكان ضربتي.

عبالي رح يطيح مثل الأفلام. بس شو هذا يا جبل ما يهزك ريح؟ التفت إلي عاكد حواجبه. إيده على رقبته من ورا. أنا أرمش وأدحگله بهدوء. بدال لا أشرد بعده على نفس وضعه. گال بهدوء واضح فيه الاندهاش. أيهم: خرب العرامه. بحلق عيوني عليه وهو نظراته باردة. نزل إيده من رقبته بيها دم. رفع عينه خزرني. جر الجمجمة من إيدي. شمرها على القنفة، اتقدم وگف كدامي. نتر بيه بصوت عالي. أيهم: شبيييج مخبلة أنتِ؟؟ ملاذ: والله ما أخليكم تخطفوني.

أيهم: منو خاطفج يا مخبل خاطفج؟؟ افتهمتيني شنو حجيت مساع لو لا؟؟ ظليت ساكتة وهو كمل. أيهم: واحد يراقبج يا أم عقلين يا أم ٣ عقول. واحد يراقبج ودخل لغرفتج يريد يكتلج. لو ما متلاحگج بالليل جان هسه أنتِ ميتة. گال عود هو من أهلج ودخل يشوفج. وهسه حصل له فرصة ثانية حتى يدخل علييج ويگتلج!! فهمتي؟؟ ظليت ساكتة. رافعة عيوني أدحگلهم. ملاذ: منين عرفت يراقبني؟ أيهم: ما يخصج. خزرته وكمل: أهلج ينتظرونج. هزيت راسي بهدوء. ملاذ: شكراً.

ردت أطلع، وكف كدامي وحجز الباب عني. دحگتله باستغراب. ملاذ: شكو؟! أيهم: شمسوية؟ منو ذولة ليش جاي يلاحگونج؟ شسويتي الهم حتى ما يعوفوج بحالج؟ ملاذ: دكتور شكراً على مساعدتك. عدا هيج ما يخصك أي شي. أيهم: يخصني. خزرته ما فاهمة كلامه. وهو ما اتراجع بقى ساكت ويدحگلي. ملاذ: ما يخصك! ما أعرفك أنا. أيهم: أنتِ مريضتي ومسؤوليتج عليّ. ملاذ: وهاي شتدخلها بـ هاي؟ أيهم: الها دخل كلش جبير. سكتت وعيوني تخزر. بيدرت وجهي أريد أطلع.

صاح وراي. أيهم: برطمت أم براطم. انداريت عليه موسعة عيوني!! وصلت حدها وياه كلش، ماخذ راحته؟ رحت عليه معصبة، مكان الخياط يوجعني. ملاذ: أنت ماخذ راحتك كلش؟؟ أعرفك تعرفني وتحجي عني هيج! سد الباب اللي وراي. خلا إيده عليها وهو كدامي. دنك الي، انسفطت بالباب. أيهم: جذبت؟ ملاذ: دكتور! أيهم: مريضتي؟ ملاذ: أنت نازع الحياء فرد نوب؟! أيهم: من تلبسينه ألبسه وياج. ملاذ: ما تضحك أولاً. ثانياً شوكت قللت ادب مثلك؟

أيهم: قصدج شوكت ما قللتي أدب. أول ما حاجيتج زركتيني بـ "انجب". كل ما أحاجيج يطلع لي جعفر من داخلج. خو لسانج مترتين ينلفن لف على الواحد. شبعتيني عض وخراشيش وضرب. گلبتيني مخبل وخاطف ودكتور مسيء لمهنته، ها بعد أعد؟ ملاذ: أولاً جنت مبنجة وما أدري بروحي وأمي معتذرة منك عن كلمتي. ثانياً جعفر مو بداخلي، أنا جعفر بنفسه. ثالثاً غلطان لساني ٣ مترات مو مترين. رابعاً العض والخراشيش ردة فعل لا أكثر.

خامساً أنت ما فهمتني وانجبرت أقلبك مخبل. سادساً أريد أمي، لا تعد بعد. مركز وياي ويستمع لي. يلمن خلصت، ضحك وهز رأسه بقبول. الأيهم: زين نتصاحب؟ عقدت حواجبي. الأيهم: لا تصيرين نحسة. جاي أطلب الصحاب. ملاذ: يلا خوش اتصاحبنا. منو يسوي عمليتي أنوب؟ ضحك گال رافع حواجبه. الأيهم: بس أنا أسويه. لأن بس أنا أعرف الجقلصت عيوني أدحگله. قربت وجهي من وجهه أريد أحجي. كفخني عطر مثل عطر أبوي بالضبط. أول ما صار بخشمي نزلت نظري مستغربة.

عيوني تدور بالمكان على مصدر العطر. نسيت شجنت رايدة أحجي. ركزت بالعطر، والله عطر أبوي!! عبالك هو واقف كدامي. درت وجهي تركته وطلعت بسرعة. مثل شخص انهزم، وهمت نفسي. حسيت شخص يمشي وراي. انداريت لقيته أيهم. ملاذ: شتريد لاحگني؟ أيهم: غير أوديج لغرفتج! وين تعرفين شلون اجيتي؟ ملاذ: لا شكراً، أنا أندل. رفع حاجبه بمعنى "متأكدة؟ ملاذ: أندل. حط إيديه بجيبة، ميل رأسه. گال بهدوء وهو يرفع أكتافه: بكيفج. درت وجهي عنه ومشيت.

هسه أنا وين؟ أتذكر الغرفة صار لي شكد محبوسة وهذا المخبل من طلعني كان كدامي. كل شي ما شفت من وراه. منين دخلنا منين طلعنا ما أدري. حكيت گصتي بحيرة. وكملت مشي وكفت أدحك ممرات ثنين. صفنت عليهن منين أروح هسه. ملاذ: امشي ورا إحساسج الما موجود ملاذ. رحت يمنه وأمشي وأمشي. وأدور بالغرف، أهلي ماكو. وأنا أمشي شفت ممرضات. من عابت كون، يدحگ لي بطرف عينهم. مشيت شوي بعد، لگيت ممرضة ثانية. رحت عليها. ملاذ: ي بنيه ي بنية.

الممرضة: نعم. ملاذ: وين نور؟ تعرفين نور؟ بنية جتي وياي. هيج گصيرة ولابسة شال وعباية سود. ودمعتها بعينها وتفتر. أسولفلها وأوصف شكل نور. وأحرك إيديه، أراويها طول نور. أرجع إيدي على عيني. وأنزل بطرف إصبعي لخد. بمعنى "دموع نور". دحگت الممرضة لمكان بعيد. انداريت أدحك وياها، ما لكيت شي. ضحكت الممرضة، دارت وجهها ومشت. صفنت عليها، هاي شبيها! صحت وراها متنرفزة. ملاذ: على كيفج رح يدك خشمج بالسقف. وسؤال، منو ما يعرف نور يعني؟

ما اندارت ولا عبالك، كملت مشي. ملاذ: امداج أي والله وامداي همين. رجعت أدور وأفتر، كفشتي شكبرها. جني مخبلة أروح منا وأجي منا. الوادم تدحگ لي مستغربة مني، أخزرهم. يعوفوني ويروحون، حتى اللي يريد يساعدني يبطل. كمت ألطم على وجهي وأزلغ خدودي. ملاذ: ضيعني الحيوان، ضيعني. أجا صوته من وراي. أيهم: لا تخافين، هسه الحيوان شخصياً يدليج. التفتت عليه خازرته. رحت عليه معصبة، من وراه ضيعت أهلي! ملاذ: ضيعت أهلي من وراك.

و هسه خياطاتي يمكن انفتحت. ورجليه راح تموتني من الوجع. إذا طحت هنا فـ بسببك لأن ضيعتنييي. أيهم: إذا انفتحت خياطاتچ أخيطهم من جديد. وإذا طحتي أسندج، وإذا ضعتي أدليج. أصير لج دكتور وسند وبوصلة. ملاذ: بعد ما تصير سيارة؟ أيهم: ممكن. رفعت عيوني أدحك بعيونه. گلت بنفاذ صبر، گازه على أسناني. ملاذ: رجعني لأهلي. أيهم: تعالي. مشى كدامي، اندار عليّ. حرك لي رأسه بمعنى "يلا". مشيت وراه بهدوء ونوب حافية.

وكاع المستشفى عبالك ماسحيها بدهن. ظليت أمسح رجل برجلي لعبت نفسي. ملاذ: هاي العباية منين جبتها؟ أيهم: مال ممرضة وياي. ملاذ: عيع شبيك دجيب جديدة. بالله طلعت الممرضة اللي وياكم. لا سامح الله مريضة وعدتني. شلون بيه شلون؟ أيهم: شلون بيج شلون؟ گالها بطريقة لطيفة وهو يدحگ لي وضحك. سرت ابتسامة على شفتي فوراً، تداركت الوضع. رجعت غندبت ملامحي. ملاذ: أي يعني تجيب لي عباية ممرضة؟ أيهم: تعذريني، جان لازم أكول لليراقبج.

انتظر خل أشتري لها عباية جديدة وأجيك. أخيك مو هسه تكتلها، خل ألحك عليها لا تفطس. طبكت شفتي، فلتت ضحكة مني. يضحك وياي، انداريت دحگت له، خزرته. بسرعة سكت، رد لي الخزرة. ملاذ: طبعاً أنتوا الدكاترة فد قفاصين. أيهم: رحم الله والديج. واشتعلوا أهلي إذا ساعدتج بعد. ملاذ: يووو سبيتني سبايه. هو شسويت جيت طلعتني من الغرفة. سودنتني وفتحت خياطاتي والآن رح ترجعني. أيهم: اسكتي أم شعر. لسانج إذا انمد شي، ضمه بعد.

وبعدين وين خياطاتچ انفتحت؟ لو مفتوحات جان هسه هنا بحيرة دم. ملاذ: معليك بلساني. أيهم: ينرادله جاره. عيبت عليه ودرت وجهي. وكف فجأة واندار عليها. شر لي على الكراسي. أيهم: شو تعالي هنا. ملاذ: ليش؟ أيهم: تعالي. مشى، مشيت وراه كعدت على الكرسي. تقدم فتح العباية، لزمتها. ملاذ: خييير؟ أيهم: بس خل أشوف. خاف انفتحن صدك. ملاذ: مااا ما وخر عني. أيهم: ولج يابه بس أشوف مكان الخياط. ملاذ: لااا! أيهم: لا تتعبيني، بس أشوفهن.

هزيت رأسي برفض ما قابلة. زفر نفس بفحيح غضب وگام. دار بعيونه شاف ممرضة، صاح عليها. أيهم: الممرضة أسيل. التفتت اله ودحگتله. بانت تعابير الفرح على وجهها. جت ناحيتنا بسرعة. أسيل: اتفضل دكتور؟ أيهم: بس شوفي لي خياطاتها خاف انفتحن. دحگت لي ودحگت له باستغراب. كمل كلامه قبل لا تحجي. أيهم: ما تخليني أشوفها. لأن أبوي اللي سوى عمليتها! أسيل: تمام دكتور، لا تعصب، هسه أشوفها. جت ناحيتي گالت بهدوء. أسيل: أكدر أشوفهن؟

هزيت رأسي بقبول. أكو غرفة بصف. دخلتني بيها ودخل أيهم ويانا. أشرت بيدها على السدية بمعنى "اكعدي". كعدت، حسيت رجليه اتگرمن من التعب. جت ناحيتي وأيهم واقف. منتظر تشوف الخياطات. ملاذ: دور وجهك. دار وجهه ساكت. جت الممرضة نزعتني العباية. رفعت تشيرتي تشوف الخياط. أدحك للـ أيهم يرفع راسه وينزله. ويهز رجله ومنتصر ومنطيني ظهره. أيهم: ها أسيل؟؟ أسيل: لا ما بيهم شي. اندار بسرعة وبطني بعدها ما متغطية.

جريت العباية على السريع غطيته. ملاذ: شبييك؟! اصبر. استغفر لهمس وكف يفرك عيونه. نزلت التشيرت على بطني وضميته. دحگت لي الممرضة بنظرات قلقة. بعد ما شافت الآثار اللي ببطني. أسيل: أنتِ زينة؟ نزلت عيوني وأنا أتذكر أسبابهم. بلعت ريگي، رفعت عيني لـ أيهم. اللي منزل إيده عن عيونه. محاوط بيها خشمه وحلقه وواگف يدحگلنا. مترقب جوابي، نظراته ينقري بيها شعور. ما عرفت أوصفه، انداريت على الممرضة. همست بعد ما بلعت ريگي. ملاذ: زينة.

هزت راسها بقبول. رغم تعابيرها توضح عدم اقتناعها. ابتسمت بلطافة. أسيل: عندج العافية. ملاذ: الله يعافيج. ردت أكوم، أشر لي أيهم أكعد بمكاني. أيهم: اكعدي، اكعدي. ملاذ: ليش؟ أيهم: أسيل تعالي شوي. راحت يمه الممرضة. وكف يحاجيها وأنا صافنة عليه. هي تهز راسها بمعنى "أي". غطاها أصلاً البنية بعد ما أشوفها من ورا. تطلب كم دقيقة وهمَ يتغامسون والبنية طلعت. ملاذ: وين راااحت؟ التفتت عليه وجا ناحيتي. حاط إيديه بجيبة.

أيهم: تبلغ أهلج نتأخر عليهم. وتسوي بعد شغلة. ملاذ: شنو، شنو ليش نتأخر؟ ابتسم ورقص حواجبه. أيهم: رح أخطفج. ملاذ: أدري بيك صوجي صدگتگ. بس والله أخنكك بجهاز الإعطاء. أيهم: أدري جهاز إعطاء لو حبل مشنقة. ملاذ: حبل مشنقة. ابتسم وهز رأسه. تقدم الي أكثر: شلون صارت بطنج؟ ملاذ: توجعني. أيهم: هسه آخذج ترتاحين. وأضربج أبرة تهدء الألم. ملاذ: شصار على اللي جان يراقبني؟ أيهم: أخذوا الشرطة. ملاذ: زين شصار بالضبط ما گلتلي؟

أيهم: لا تشغلين بالج بهاي السوالف. هسه المهم أنتِ زينة. ملاذ: أريد أعرف. أيهم: بعدين أسولفلج. تدوخين هسه، أصلاً وجهج أحمر. وضعج كلش تعب، لازم ترتاحين. تتمددي على ما تجي أسيل ونروح. ملاذ: أنت ليش ساعدتني؟ أيهم: واجبي هذا. هزيت راسي ساكتة. أيهم: اتمددي يلام. ملاذ: لا تكش روحي. أيهم: ليش؟ ملاذ: ما أدري، السدية أحسها وصخة. أيهم: جا شلون جنتي نايمة هنا؟ ملاذ: غيرولي فراش السرير، ترا أهلي جابوا لي لحافي.

ومسحولي السدية كلها بمنظف يلا گدرت أنام. أيهم: لا تدققين هلكد، تتعبين. ملاذ: ما أعرف، ما أتقبل كل شي. أيهم: لا تتقبلين كل شي، بس لا تزيدينها هم. هزيت رأسي ساكتة. أيهم: كومي شوي. ملاذ: وين؟ أيهم: كومي. كمت، نزلت من السدية و وكفت. نزع اللاب كوت اللي لابسه. فرشه على السدية و لجوا فرش العباية. الأيهم: يلا تمددي. دحگت له، ما ردت أظل ما قابلة على كل شي. أشوف شلون يحاول يخليني أرتاح. ما ردت أفشله أو أعيب التصرف تجاهه.

هزيت رأسي بقبول وتمددت بصعوبة. أيهم: ها مرتاحة؟ هزيت رأسي بقبول: شكراً. أيهم: العفو. أخذ كرسي، حطه يمي وكعد. جتف إيديه، تجى ظهره على الكرسي. ظل ساكت ويدحگ لي. أدحگ له بنظرة خاطفة. أرجع أدور وجهي، أحس بي يدحگ لكل ملامحي. ما تحملت أتوتر من أحد يدحگ لي. ملاذ: وترتنيد. دار وجهه مشتت نظراته. أيهم: بالغلط، اعذريني. گام من يمي، طلع من جيبه باكيت جكاير. فتح الشباك وكف بالشباك، دار الي وجهه. الجكارة معلكة بحلكه.

أيهم: خو ما باردة؟ هزيت رأسي برفض. ملاذ: لا مو باردة. ما استمع لكلامي. خلا الشباك على النص، وكف كدام الفتحة. بحيث صار سد للهوا وما يوصلني. ورث جگارته وهو واقف بالشباك. الغرفة هدووووء، قاطع هذا الهدوء. صوت رنين تلفونه، فتح الاتصال فوراً. حطه على اذنه، أسمع مقتطفات من كلامه. أيهم: هلا، أي، عندي شغل، ما أكدر. بالله العظيم إذا رجعت يصير الحجي. مو خوش حجي، خل أرجع ويصير خير. شمر گطف الجگارة، سد الشباك.

طلع جگارة ثانية، التلفون على اذنه. عقد حواجبه معصب، ورث جگارته. طلع من الغرفة وهو يحجي بالتلفون. سد الباب. ظليت كاعدة وحدي. بالله هاي أسيل وين راحت؟ نوب هسه أهلي أكيد قلقانين عليّ. زفرت نفس بتعب، مرت دقايق طويلة. بهذي الغرفة وحدي والهدوء محاوطني. انفتح الباب، عقدت حواجبي، دحگت لـ أيهم. دخل وجهه مگلوب گلاب مو مثل قبل كم دقيقة. لحد ما نزلت نظري لجف إيده ينزف! فزيت بسرعة من مكاني، كعدت على حيلي.

لزمت بطني متوجعة بس تغاضيت. ملاذ: شبيها ايدددك؟ أيهم: ما بيها، اتمددي. أريد أحجي، عافني، راح جاب شاش. ومادري شنو بعد وي الشاش. أجا كعد على الكرسي اللي يمي. يعالج إيده، أدحك لوجهه، أبد ما متوجع. حتى نتفة تعابير عن الوجع ماكو. لفها وهو ساكت. ملاذ: شبيها إيدك؟ أيهم: ما بيها. ملاذ: خل أشوفها. أيهم: لا عوفيها، تمددي ارتاحي. نزل راسه، حط إيده على گصته. يهز رجله باستمرار، ظليت ساكتة. ما أعرف شنو أتصرف بهيج مواقف.

انفتح الباب دخلت أسيل، رفع عينه أيهم دحگلها. گام الها، أخذ علاليك من إيدها. أيهم: عشتي. أسيل: اعتذر دكتور اتأخرت. أيهم: ما صار شي، حاجيتي أهلها؟ هزت راسها بقبول. أيهم: شگالوا؟ أسيل: كلتلهم دنسويلها فحوصات. وهم گالوا تمام منتظرينها. أيهم: عفيه. ابتسمت الممرضة. أسيل: دكتور تحتاج شي بعد؟ أيهم: أي تعالي. طلع لها كاسة سفري مادري شنو بيها. انطاها الها وانطاها خاشوكة بلاستيك ولفة وصمونه.

رفضت أسيل تاخذهم بس أيهم أصر عليها كلش، أخذتهم وهي خجلانة منه. تشكرته وراحت والابتسامة على وجهها. اندار الي. أيهم: هسه نجيج ست فوصة. العفو ست ملاذ. ملاذ: شبيييك شبييك بالغلط حجيتها. يعني أنا متنجة أحسب كلامي؟؟ أيهم: هههههه، يلا هاهيه ما أحجي. لا تضوجين ست فوصة. خزرته وهو ضحك. سحب الكرسي القدامي. أيهم: فنج شجبت الج؟ ملاذ: مخدرات؟ أيهم: تؤ شني دكتور لو نعل؟ ملاذ: هههههه، كلور؟ أيهم: أي أغسلج بي. ملاذ: حلويات؟

أيهم: ماكو داعي، أنتِ موجودة. ملاذ: اهووو بطل هالدروب. ضحك وطلع من العلاقة علبهم. ملاذ: شنو هاي جبت لي الماس؟ حط العلبة بحضنه. ودحگ لي بنظرات فطستني ضحك. ضحك على ضحكتي وفتح العلبه. دحگت حذاء بالعلبة. ملاذ: يااااا. قلد بنفس نبرتي. أيهم: ايييي. ملاذ: شسوي بيها هاي؟ أيهم: تاكليها. ملاذ: طوختها أنت ترا! أيهم: شتسوين بيها يعني غير تلبسينها. ملاذ: ما أكدر أقبل شي منك. أيهم: اش. ملاذ: لا تگلي اش. أيهم: اسكتي ما أسمع كلمة.

ملاذ: ما أريد. أيهم: بعدين رجعيها عود. رفضت ألبسها وما ردت أخذه. بس إصراره يكتل الواحد كتل. دنك وأنا أحجي لبسني إياها، ظليت صافنة. وكعد يشد القيطان. ملاذ: دكتور شبيك ما أريد. لا تلبسني وخر ياا؟!! أيهم: بعدين انزعيها، لا ترديني. مو اشتريتها علمودج؟ ملاذ: اهوووو دكتور. هسه شبيك هيج حباب؟ أيهم: ههههههه. گام كعد على الكرسي مرة ثانية. جر طاولة متحركة ينحط عليها الأكل. دور على معقم ورشة عليها ومسحها بالكلينس.

حط عليها علاقة وكاسة شوربة وخاشوكة. ويمها صمون حجري. أيهم: جبت لج هم لفة ثانية مال كص. بس أول أكلي شوربة، صار لج هواي مماكلة عدل ومعدتج ما تتحمل أكل دسم گبل. ملاذ: دكتور؟ ما أريد. أيهم: ملاذ، رجاءاً! ملاذ: ما جاي أرتاح هيج ترا. قاطعني قبل لا أكمل. أيهم: لا تفكرين هذا الشي بس وياج. انه وي كل مرضاي هيج وأسألي عني. ورح يجاوبوج، ماكو داعي ما ترتاحين. جسمج جاي يرجف وأنتِ أساساً ما ماكلة. ما تريدين ترجعين لصحتج أنتِ؟

هسه إذا نطلع منا نطيحين والله. يلا أكلي. أكلني وشربني بالحجي. أريد أحجي ما يخليني ويقاطعني. ونوب أنا جوعانة صدك. حطيت الخاشوكة وكعدت آكل. بس إيدي ما أسيطر عليها ترجف. أحس بأيهم كل شوي يريد يسوي شي. ومتردد ما يكدر يحجي. يلمن أكلت لقمة بعد. زفر نفس عالي، مال رأسه. گال بعيون تتمنى القبول. أيهم: خليني أوكلج؟ دحگت له ودحگت لإيدي. نزلت الخاشوكة خجلانة. ملاذ: دكتور ما أحب أحد يشفق عليّ. أيهم: ما شفقان عليج أبد بس...

ملاذ: بس؟ أيهم: الشوربة حارة أشوفها جاي توگع عليج. وجاي تنصلخين بس ما تحجين، خليني أوكلج؟ بلعت ريگي، صدك كم مرة انصلخت. بس بلعتها وسكتت ما حجيت. ما أعرف هو شلون مركز انتبه من وكعت. ظليت ساكتة. أتقدم كعد كدامي. أيهم: يلا أوكلج؟ بلعت ريگي أدحگله. أومأت برأسي بهدوء. أخذ كاسة الشوربة بسرعة. وأخذ الخاشوكة ويشربني الشوربة. إيده تحت حلكي وهو يوكلني. حتى إذا طاحت الشوربة. تطيح على إيده وينصلخ. أيهم: عفيه بالحبابة.

ابتسمت على نبرته، ما تحملت وضحكت. يضحك وياي وهو مستمر يوكلني. أيهم: اش يلا لا تغصين. أومأت بالقبول، قدم الخاشوكة. يوكلني، عاف الخاشوكة، أخذ صمون. ويغمسه بالشوربة ويوكلني. أيهم: خلي مجال لفة الكص. حجيت واللقمة بحلكي. گوه أحجي: لا دكتور لا. حطيت إيدي على حلكي. كملت اللقمة، بلعتها وكملت كلامي. ملاذ: دكتور كافي بس شوربة. وترجعني لأهلي. أيهم: لفة الكص هم تاكليها. ملاذ: لا. أيهم: أكليها.

ملاذ: لااا دكتور لا تخليني أطلع جعفر. أيهم: هذا كله وما مطلعة جعفر. ملاذ: جعفر موياهو الجان. جعفر إذا ظهر جان هسه أنا ما آكل. أيهم: لا دخيلج خلي مضموم. بطلنا عمي، عوفي لفة الكص. ابتسمت، فتح بطل اللبن صغير وشربني. ورجع يغمس صمون ويوكلني. لحد ما انتخمت. ملاذ: دكتور عليك الله كافي والله رح أطك. هاي الشوربة انمسحت مسح. أيهم: بس هاي اللقمة بعد. ملاذ: بداعة أمك كافي شـ.... بعدني داحجي وحطها بحلگي.

ملاذ: يباوو ولك كافي شبعت. ضحك وكام نكث إيديه. شال الكاسة وبطل اللبن وكل شي. شمره بالعلاقة وشدها. طلع من علاقة ثانية كلينس رطب. أطاني كلينسة مسحت حلكي بيها. ابتسم وگال بصوت لطيف: عَفيــه. هزيت إيدي، درت وجهي وضحكت. فتح الشباك حتى تتهوى الغرفة. رجع الغراض لـ مكانهن. أجاني گال بحماس. أيهم: يلا نروح لماما. ملاذ: دكتور والله مو صوجك. الا أطلع لك جعفر من داخلي. أيهم: دطلعي رح يموت إذا بقى بداخلج.

راح اخذ العباية واللاب كوت. ملاذ: ما أريد العباية. عض إصبعه گال ممثل العصبية: اااخ اخ. أخذ اللابكوت والعباية. حطهن على ساعد إيده. ملاذ: يلا دكتور رجعني لأهلي. كافي هواي تعبت اليوم. أيهم: امشينا بوية امشينا. طلعنا من الغرفة. دحگ بعيونه وگال. أيهم: انتظري. راح دقايق ورجع إلي. ملاذ: شنو هاي؟ ماخذ كرسي متحرك وجاي الي. أيهم: يلا اكعدي حتى نوصل أسرع. ملاذ: والله ما أكول لا. ابتسم، كعدت. مشى بيه يدفعني.

رفعت راسي دحگت له، نزل راسه دحگ لي. وهو يمشيني بالكرسي المتحرك. ملاذ: دكتور عود أنتوا ليش قفاصين؟ أيهم: بويه شبيج كارضة ملحتنا. هاي ياهو گلج إحنا قفاصين؟ ملاذ: دكتور يعني هسه أنا علاج أبو الخمسمية يفيدني. أنتم تكتبون طن علاجات وما نصير زينين. أيهم: وين اكو علاج بخمسمية أولاً. ثانياً مجربة علاج من العلاجات اللي كتبناهمو ما فاد وياج؟ ملاذ: دكتور ما جربت بس يعني والله هواينوب أكلك دكتور؟ زفر نفس، ضحك وگال. -كولي.

ملاذ: أنتم ليش خطكم يلعب النفس؟ يعني 12 سنة تدرسون، كمل عليها دراسة الكلية. كل هذا أنتم تكتبون ومتعلمين ع الإنجليزي. ليش عود خطكم ما ينفهم ويلعب النفس ويسبب دوخة وإحنا نقراه؟ أيهم: يا يمه يا حبيبه هذا كله بخطنا؟ ملاذ: والله دكتور تحس الورقة مكتوب بيها مادة مخدرات مو علاج. الخط شاطح والواو شادة حيلها صايرة نون. والزاي نقطتها شاطحة، شمالكم دكتور؟ أكو واحد يركض وراكم؟ أيهم: طركاعة مو لسان، فصلتينا تفصل.

بس باعي يعني هسه إنه من أكتب أكون مستعجل لأن عندي مرضى. ولازم أشوفهم وأستعجل بشغلي. فـ أكتب بسرعة، مرات هذا خط الشخص هو هيج يكتب. يعني متعود ع السرعة. ملاذ: زين أبو الصيدلية شلون يفتهمكم؟ أيهم: يتعودون بعدين على خطنا ويفهمون الدوا اللي يحتاجه المريض. من يشوف الحالة شنو. ملاذ: ها، زين، دكتور. أيهم: ها ها. ملاذ: شبيك دكتور ما تتحمل. أيهم: عمي إنه المسكين حاچيم. ملاذ: اسمع دكتور. أيهم: يلا جاي أسمع.

ملاذ: يعني هسه أنتم تطبقون النصايح اللي تنطوها لـ مرضاكم؟ أيهم: بالنسبة إلي، بعضهم أطبقهم. بعضهم لا. ملاذ: يعني مثل شنو ما تطبق؟ أيهم: يعني مثلاً ما أنصح بالتدخين. وأمنع المرضى والناس من التدخين وأبين الهم أضراره، بس أنا أدخن. ملاذ: يعني يعلم ع الصلاة وما يصلي. أيهم: ههههههه، بالضبط. وصلنا لغرفة غير غرفتي القديمة. مليت الجماهير متجمعة. بس انفتح الباب كلهم دحگولي. حكيت حاجبي وسندت كصتي على إيدي. ملاذ: سلام عليكم.

-وعليكم. يجاوبون ويدحگولي بطرف عينهم. ونوب يرجعون يدحگون للدكتور. جت أمي عليّ بكرسيها. فيروز: ليش كاعدة على كرسي؟ ملاذ: تعبت شوي والدكتور جاب لي كرسي. ابتسم بطرف شفته يدحگ لي. وهو وراي صارت أصابعه على خصلات شعري. بسرعة وخرهن واتحمّحَم. أيهم: التحاليل باجر تطلع. هزيت راسي بإيجاب. اسكندر: وهاي الفحوصات صارلها فوك الساعتين؟ أيهم: أي، اكو مشكلة؟ اسكندر: أبد ماكووو، طراطير إحنا هنا! من الصبح لحد هسه ندور على الخانم.

تالي طلعت تسوي فحوصات، شلون سالفة. المطي ما يقتنع بيها. اتقدم أيهم من وراي. بخطوات رزينة على اسكندر. أيهم: أنت شنو قصدك من كل هذا؟ گام اسكندر من مكانه. راح على أيهم گال بعصبية. اسكندر: تعرف مقصدي كلش زين. أيهم: لا والله؟ لازم ناخذ إذن منك؟ احتدوا كلش بيناتهم. وحتى ضرغام كان كاعد. گام صار بيناتهم: اهدوا شباب. گاموا سلطان وصفاء همين يفرقونهم. وهم واحد يخزر الثاني. أيهم عيونه تريد تطلع من محجرها.

كمت بصعوبة، إيدي على بطني. أمي لزمت إيدي، هزيت راسي. بمعنى "مابيه شي". اتعديتها ومشيت. نور همين گامت اجت ناحيتي هي وعمة منار. ملاذ: مابيه شي. رحت عليهم، دخلت بيناتهم. وجهي لـ اسكندر: شبيك أنت؟ اسكندر: ملاذ باحلامج تراب، باحلامج تخلصين مني زين؟ ملاذ: ليش تحب تحرج روحك؟ وتخليني أفشلك گدام الناس. الف مرة گلتلك و أرجع أكولها. أنا أشرف منك، أنت ما توصل لشعراية مني. يعقد حواجبه اسكندر. الدم صعد بوجهه، رغم هالشي.

أبداً ما اهتميت، عت زندي حيل. كلهم گاموا يصيحون على اسكندر. بيبي: اسكندررر عوف البت، ما أكدر اكو ومن. تعالي منار لزميني ما أگدر أحرك جدمي. نور: صارت عيطة وهوسة. وأيهم يدفع بـ اسكندر عن ملاذ. اتخبل يريد يهجم على اسكندر. كلنا مستغربين ردة فعله هاي؟ بس اتجاهلناها بسبب المشكلة اللي دتصير. ملاذ: أنت شنووو وتمد إيدك عليّ؟ لا تجي وتستشرف براسي. ما سويت شي غلط ولا أسوي، الكل يعرفوني هنااا ويعرفونك أنت شنو!

كز على سنونه الدكتور گال بحدة. أيهم: ملاذ وخري من النص. جره سلطان واندارت ملاذ للدكتور. ملاذ: شكراً دكتور، باجر آخذ الفحوصات. ظل يدحگلها معصب. ومشخص عيونه على اسكندر. ملاذ: دكتور رجاءاً. نزل عيونه الها تدريجياً، نظراته الشاخصة. اللي توحي العصبية، بدت تذبل. تتحول إلى نظرات مليانة كلام. بلع ريگه وهو يدحگ بعيون ملاذ. اسكندر يصيح، ضرغام يصيح بـ اسكندر. بيبي ما قابلة على اسكندر، مكان جوه مليء بالمشاحنات الصارت.

بس همَ كانوا بعالم وحدة. نهاية حرب النظرات، دار وجهه أيهم. طلع بسرعة وهو يمسح بكصته. تبعه سلطان، راح وراهم صفاء. ظلت ملاذ تدحگ وراهم لثواني. بدأ يختل توازنه تدريجياً. لزمت براسه. بلحظة وكعت من طولها على الكاع فاقدة. دحگت لمكانها عليه قطرات من الدم. يتبع.