رواية جرح الأيهم الفصل الثامن عشر 18 - بقلم أيلان

جثه هامده يتسلل منها الدماء متيبسة على الارض تاركه بقع واضحة. جدران ضيقة ذات لون ابيض مائل للرمادي ملوثه بـ بقع الدم الصغيرة و الكبيرة. ارض صلبه باردة ، خالية من الدفو. "يلي حاوطني بـ احد المرات من قبَل و انا بـ احضان والدي. عيون الجثه الهامدة مفتوحة على وجهي." غمضت عيوني مُتمنيه زوال هذا المنظر. فتحت عيوني مره ثانية ، فزيت مبتعده. انفاسي تلهث ، بعد ما شفت الجثة بـ وجهي. ضوء خافت يرمش يسبب الرعب النفسي.

اصوات الزناجيل تحتد بـ مسامعي. الضحكات المقرفة الـمُثيرة للـ اشمئزاز تتراود من اتجاهات مختلفة. غطيت اذاني ، غلقت عيوني. العرق يتصبب من جبهتي. انفتح الباب. رفعت راسي مرعوبه. اذاني مسكره بـ احكام بواسطة كفوف ايديه. دحكت لـ طولة لحد ما انرفع نظري لـ وجهه. دم متصبب من جبينه ناحية رگبته. وسعت عيوني ، همست بـ صوت يرجف. مُلاذ: بابا! شهكت بـ عمق روحي. فتحت عيوني بـ صعوبه. الوجع هايج بيهم. كأنوا راح يطلع فص عيني من مكانه.

عقدت حواجبي و نظري مشوش. بـ طريقة خلتني ادوخ و اتشتت. غمضت و رجعت فتحت عيني. فركت عيني بـ اصبعي ، ادحكت. وضح نظري هالمرة اكثر. كأنو انرفع الضباب يلي مغطي عيني. درت نظري بالغرفة ، الدنيا ظلمة. ضوء خفيف يمر من الشباك. دحكت الكل نايمين بـ طريقة مبعثرة. امي نايمة على كرسيها و بمكانها. نور ماكو ، خالتي نيروز جاية و باقية. ذيج الايام كلها تجيني و تروح بس هالمرة باقية. جسار متجتف ، ساند راسه على الحايط ، غافي.

القنفه نايمة عليها بيبي. مغذي معلق بـ ايدي. عيوني تتراوح بالغرفة. حطيت ايدي فوك بطني. حاولت اكعد ، بلعومي يابس. غمضت عيوني حيل. عكفت ملامح وجهي متوجعه. درت وجهي لـ اتجاهات مختلفة. احاول اشوف المي وين. فزيت على صوت غاده. غاده: مُلاذ. گلت مستغربه: غاده؟ گامت الي بسرعة. كانت بـ جهة مظلمة ما شفتها. غاده: ها كعدتي. اجت عليه بسرعة. تتطمن عن وضعي. مُلاذ: شصارلي؟ غاده: انفتحت الخياطات و سووهن. اجيت بعدين و عرفت بيك.

مُلاذ: الدكتور؟ غاده: يا دكتور؟ مُلاذ: أيهم. قدمت شفتها. رفعت اكتافها بـ عدم معرفة. غاده: منو هذا؟ هزيت راسي ، نافية. نافضة افكاري: هيج ماكو شي. غاده: صارلي شكد منتظرتج تكعدين. ابتسمت ، بلعت ريكي. گلت بـ صوت مشحرج. مُلاذ: اريد مي. فوراً اخذت البطل المحطوط على الميز بجانب راسي و فتحته ، قدمته الي. رفعت راسي بـ ايدها و شربتني. رجعت نمت بمكاني. مُلاذ: شوكت اطلع منا؟ غاده: لحد ما تصيرين زينه كلش.

باعي ايدج منفوخه جسار يكول حاجيت الدكتور كال لازم نعالجها. رفعت ايدي يلي كسر بيها اصبعي. و فعلاً انتفخت بمرور الايام. بحيث صرت ما احس بوجعها. و لا كدرت الاحظها بسبب انشغالي. مُلاذ: صافيناز شلونها؟ غاده: ما اكدر اگلج وضعهن كلش زين. هي و ملاك. ملاك كل يوم بالليل نسمع صراخها و تبجي و توسوس و هي نايمة ما تهدء ابد. تروح حبالها الصوتية و هي على فد بجيه عبالها خطفوها مره ثانية و تظل تدور على امها. بلعت ريك.

نظري يتراوح على السقف. مُلاذ: الي صارلها ابد مو سهل. غاده: ما عرفت منج شنو الصار. بس ملاك سولفت و لمن سولفت. ما حجت اي شي غير خطفوكم و باعوكم. و بـ اكثر الي حجته انتِ جنتي ماكو. يوم موجودة و يوم لا! ههه اگللها شغلوني رقاصة؟ خلوني وجهه اعلاني للملهى مالتهم... زفرت نَفس. مُلاذ: جنت امكيج بنات. غاده: اكيد؟ مُلاذ: و الله اعرفج. تضمين هواي انتِ و تكبتين بداخلج. مُلاذ: ابد ، لتخلين. جهزت راسها بـ قبول.

كعدت على الكرسي يمي و انا غفيت. *** نور: -وكفت كدام المراية ادحك لـ وجهي. شكد تعبان و داخلي منهار. درت عيوني متلافية شكلي. نشفت شعري اخذت المشط ، عقلي شارد. صفنت لـ دقايق بيني و بين نفسي. امشط شعري بـ هدوء. نظري ع الكاع. تصعق عقلي الافكار بـ اشياء مختلفة. تارةً افكر بـ اركان و شنو صار بي. ارجع و افكر بـ اهله و يعود تفكيري لـ ابوه. فزيت ، وگع المشط من ايدي. على اثر صوت الصياح. گمت بسرعة اتجهت نحو الباب اشوف شكو.

فتحت باب غرفتي و وكفت بالباب. امي: ظل على هاي سووووالفك. جدت عطف منكم لمن الله گاللها بس. ابوي: تنجبين و تبلعين لساااان. جو حق علي بن ابي طالب الزمج ادوس بمصارينج. من باجر اطلكج و اردج لـ اهلج. امي: بزرك واحدهم بطووولك. و حايرلي بـ فيروز صاير من توالي عاشك. ظليت مبحلقة عيوني و صافنه. ابوي انهال بالضرب على امي. اسكندر و عزيز يريدون يرفعونه عنها ما يلحكون. كعدت بالكاع ، ادحكلهم ، ايدي ترجف. دفعت امي ابوي عنها.

گامت دشداشتها مشكوكه ، شعرها مخربط. خدها طبعات اصابع ابوي. بيرفعت اصبعها و صارت تصيح. امي: بناتها لوووو شريفات. مو سنتين محد يدري بيهن وين ما وين. الله اليعلم شسوو بيهن و ذبوهن عليكم. بعد ماكو واحد يتزوجهن تذبهن على گلوبنه. منارس: شهالحجي هذااا. خافي الله ، خافي الله بالناس. اتقي ربج ، كلامج ثمني ولج بكد ولدج. بيش مأثرات عليج ؟؟ حوبتهن ما تتعداج ان شاء الله ي علياء. استمر الصراخ و الهوسه دامت.

الا اسكندر يلي انسحب بـ هدوء. كعد على القنفه ، صافن و يفكر. عزيز طلع ابوي و عمتي ردت لغرفتها. اسكندر اتبعهم و طلع. كعدت امي تشتم حظها و تدعي علينا و على بيبي و عمتي. انا ادحگلها ، خفت اكون مثلها بالمستقبل. التفتت و دحگتلي بـ خزره. ظليت مكاني ما كدرت اكوم. رجليه قوالب ثلج انغرست ع الارض. اجت ناحيتي امي جرتني من الكاع. عمري عبر ال ٢٠ سنه. بعدني انذل و انضرب و انهان! امي: جبتج خلفتج ظليتي عاله على گلبي.

خلفتج عبالي تفيدين ما فديتييي بـ شي. بلاء اسود نقمة سوده خلفتج. و انگلبت حياتي جحيم بالزايد. سحبتني لـ داخل الغرفة. و دفعتني: ما اريددد اشوف جهرتج. غضب اجتاحني بـ لحظة من اللحظات. صرخت بصوت عالي و انا اضرب رجلية بالكاع. بطريقة هستيرية: كااااااااااافي. اوسعت عيونها عليه. ما اعرف ، ما اعرف شسويت. شكد صرخت شكد حجيت. شكد ظليت اضرب رجلية ع الكاع. و اضرب بايديه على رجلية. نور: عووووووفيني كله من ورااااج.

كل شي صااااار بيه من وراج. عوفينييي ، شسويتلج اناااا شسويتلج؟؟؟ امي: بـ كلشي ما فلحتيييي. حجيت منفعله: بـ شنووو ما فلحت. شنووو سويت الج صووتي ما يطلع. صووتي من كد هدوئي ما تسمعينها. اذا اتعورت ناشغت بالسكته. خفت تسمعيني و تكتليني. اذا انضربت سكتت و بلعت غصتي. ما طلعت صوت ما نطقت حرف. اذا طحت رفعت نفسي و كمت وحدي. اذا اتمرضت كمت بنص المرض. اسوي الكمادات لـ روحي بس حتى ما ازعجج. سنين عمري انهدرت و راحت.

و انا ادور على بصيص ضوه. يتسلط عليه و تشوفيني ، شسويتلج ؟ شنو ذنبي القذررر لهاي الدرجة !!! كدام عينج تدمرت و انهلكت. عمتي سألت عليه ، عمتي لاحظت حزني. عمتي انكسرت عليه ، عمتي بجت عليه. و أنتِ دمرتيني و هلكتيني و اتغاضيتي عني. خليتيني ادور على حب الام و انا عندي ام. خليتيني افتقد النومة على رجلين الام. و انا عندي ام ، خليتيني اتمنى كلمة يمه. بدون كسرة الخاطر الواضحة بـ نبرتي. موتتي امي و هي عايشة.

كل صياحي ، شوغتي ، لوعتي. كانت بلا جدوى بعد ما اتقدمت عليه. و ضربتني طحت على الكاع. قبضت ايديها تضربني. على ايدي و وجهي. ظليت مكاني بلا اي حركة حتى صوتي ما طلع. استمعت لـ صوت عمتي ، تصيح بـ خوف. اتقدمت تدفع بـ امي عني و تطردها خارج غرفتي. اجت ناحيتي تركض ، رفعتني عن الگاع. كعدتني على الجرباية ، هرولت خارج الغرفة. رجعت دخلت بـ ايدها كاسة مي شربتني. نظري بالفراغ و صافنه. بلعت غصتي. الاحمرار يحاوط عيني.

احتضنتني عمتي لـ صدرها. راحة ايدها تمسح على ظهري بـ هداوة. *** مُلاذ : -فتحت عيوني مثل ذبانه دايخة. انام و اكعد و ارجع انام و اكعد. دورت بـ عيوني امي يمي بـ كرسيها. رجعت دحكت ممرضة لازمه ايدي. ابره حاطتها بالكانولا و تمشي بيها ببطئ. الدكتور واكف و متجتف. مُلاذ: يمه. اجت امي ناحيتي بسرعة. فيروز: ها حبيبتي. مُلاذ: شكو؟ فيروز: جاي يكملون علاج. جهزت راسي. مُلاذ: وين الباقيين؟

فيروز: انا مساع اجيت رحت اشوف ملاكو اجيتج و جسار و غاده و عزيز راحوا. مُلاذ: انتوا ناقليني لـ غير غرفة؟ فيروز: اي. مُلاذ: ليش؟ التفت الي الدكتور. أيهم: هاي الغرفة افضل الج. حجاها و غمز. ما فهمت. اكتفيت خازرته. مُلاذ: الحجيه وين؟ فيروز: رجعوها ما خليناها تبقى. رح يرجعون بعد شوية جنات و غاده. مُلاذ: صافي و ملاك منو يبقى يمهن؟ فيروز: عمتج منارس و نيروز. رح يروحن الهم. هزيت راسي بـ قبول. مُلاذ: يمه ديربالكم على صافي.

فيروز: بعيونهم مخليها. بس هي اهلها وين ؟ يعني ما تعرفهم يا منطقة؟ مُلاذ: خل اطلع منا و احل كل شي. فيروز: بس اكعدي يمه. بس اركديلي بـ مكانج. و الله مالي طاقة اخسركم بعد. مُلاذ: فيروز لا تخافين هالمرة محد يخسر. الثانية. مجرد راح ارجع كل شي لـ مرامه. فيروز: شوكت تتخلين عن حس المسؤولية هذا. مُلاذ: فوفو تعلمت منج حس المسؤوليه. ابتسمت ، اخذت ايدي تريد تبوسها. سحبتها بسرعة. مُلاذ: يمه لا تضوجيني.

فيروز: ما اكدر ادنكلج ابوسج. مُلاذ: فوفو يعني اله تبوسين. دهجتي. من نبدي العلاج بوسيني براحتج. ضحكت ، هزت راسها بـ ايجاب. مُلاذ: شعجب ما گلبتي الدنيا. ع البارحه .... بعدني داحجي و أيهم صار يكح. مُلاذ: ها دكتور سلامات. ولك دكتور ، وين المي؟ حط ايده على حلكه يكح كل قوته. مُلاذ: يا شحط شبيك دكتور. غصيت بـ شيكام يدك على رجله و يكح. امي راحتله بالكرسي بسرعة. الممرضة قدمت اله المي. رفع راسه ، اخذ البطل صكه كله.

فيروز: ها خالة خو ما بيك شي؟ ظل يشرب مي و يدحگلي. خزرته. نزلت عيني لـ ايده يسوي حركة گرصة. ظليت مستغربة هذا شماله. فجأه وكع بطل الـمي من ايد الدكتور على امي. أيهم: العفو العفو خالة. مُلاذ: دكتور جنك دايخ شو تعال اكعد. فيروز: لا عادي يمه عادي. أيهم: اسيل ساعدي الست. حاولي تنشفين ملابسها اعتذر خالة. فيروز: لا يمه ما صار شي. هسه ملابسي ينشفن من وحدهن. أيهم: لا ما يصير ما يصير. أسيل استعجلي. ركضت أسيل ناحية امي.

فيروز: ولج لا يمه عادي عوفيه. ما اكدر اطلع منو يبقى يم مُلاذ. أيهم: انه يمها خاله لا تخافين. بس نشفي ملابسج بسرعة و تعاي. طلعوا امي ينشفون ملابسهن. مُلاذ: دكتور هاي سوالف اغنياء. هسه تكعد بالشمس هم ينشفن ملابسها. و هم تحصل فيتامين D. سد الدكتور الباب. اجاني يدك على رجله. أيهم: ولج اسكتي ولج. مُلاذ: انت شني تسكتني. بعدين شني ولج شني اعرفك تعرفني؟ أيهم: اكرصيها لهاي البراطم اكرصيها. ما تدري بالسالفة مال الي رايد يكتلج.

الضابط الجان هنا هو بلغنا ما نحجي. و انتِ لسانج يهرول. مُلاذ: ياااااااا. تخصر و وكف يدحگلي. مُلاذ: دكتور لا تدحگلي شعليه انا. أيهم: گلبت المي على المره من وراج. مُلاذ: دكتور شمدريني. بعدين انت شنو من دكتور ، دكتور. بالله تمرضت امي من وراك شون؟ أيهم: شيكض لسانج بعد. اتقدم كعد يمي يكمل بالابره. بلع ريگه ، كال بـ هدوء. أيهم: شبيها ايدج؟ شوصلها لهاي الحالة؟ رفعت ايدي دحگت اله. نفضت افكاري ، حركت راسي بـ "رفض".

مُلاذ: ما بيها ، حادث. اصبعي انكسر و ورمت ايدي. أيهم: شلون انكسر؟ مُلاذ: حادث. أيهم: منو كسره؟ مُلاذ: حادث. أيهم: منو كسره؟ مُلاذ: انا. غمض عيونه فرك وجهه. أيهم: منو كسر اصبعج؟ مُلاذ: ليش تسأل؟ أيهم: اريد اعرف. مُلاذ: فضولي كلش انت. أيهم: بالمواضيع التهمني! مُلاذ: و موضوعي مهم؟ أيهم: لو تعرفين رح تفهمين. مُلاذ: شنو اعرف؟ أيهم: الي اطلق عليج. نفسه كسر اصبعج؟ مُلاذ: دكتور انت ليش تسأل. كل مهنتك هي تعالج مرضاك.

ما تتدخل بـ حياتهم و باللي عاشوه. و لا توكلهم و تشربهم و لا تحميهم. احتدت تعابير وجهه. خلا ايده على عينه فركها حيل بـ ايده. كمل الابره بـ الكانولا. دام الهدوء كم دقيقة. كسرت هذا الهدوء بـ سؤالي. مُلاذ: شوكت اطلع منا؟ أيهم: كم يوم بعد. مُلاذ: شكد يعني؟ أيهم: يومين او ثلاثة. مُلاذ: و الخياط؟ أيهم: نوخره بعدين. هزيت راسي بـ قبول ، انفتحت باب الغرفة. رفعت راسي بـ صعوبة ، أيهم ظل كاعد مكانه. ضرغام: مُلاذ كاعده؟

دخل و دحگلنا انا و ايهم. و اتبع دخوله اسكندر يلي فزز عيونه علينه. مُلاذ: اي كاعده. اسكندر عبر ضرغام و اجا ناحيتنا. وكف يمي من الجهه الثانية خلا ايده على شعري. خزرته. درت راسي ما اريد يلزمني. دحگت لـ أيهم خازره هم و يدحك لـ ايدهم. مُلاذ: اسكندر. اسكندر: كولي حبيبتي؟ اوسعت عيوني عليه ، هذا شبي مخبل! لا و فوكها مو وحدي ضرغام و أيهم موجودين. مُلاذ: وخر ايدك عن شعري. و اترك هاي التصرفات التافهه! درت وجهي دحگت لـ أيهم.

نزلت عيني على ايده يلي قابضها. اتحولت نظراتي للاستغراب مفاهمه. بعدت راسي من ايد اسكندر. اسكندر: شتسوي هنا؟ أيهم: شلك علاقه؟ اسكندر: انت تدري انا ضابط. بـ دقيقتين يشيلوك منا و بـ امر مني. أيهم: ضابط؟ هههههه ما لايگلك. عيون اسكندر صارت بكصته. و أيهم مفرش رجليه ع الكرسي. كاعد بكل اريحيه شهالدكتور الغريب!؟ لا يخاف من احد و لا يستحي. اتقدم ضرغام ، لزم زند اسكندر. ضرغام: اسكندر هالحجي ماله لزوم. اسكندر: وخرررر ضرغام.

نترا ايده من ايد ضرغام. و ايده بعدها على شعري. أيهم: ارفع ايدك عن شعرها. رفع حواجبه اسكندر ، ضحك بـ صدمه. ترك شعري و اتجهه من الجهه الثانية. لـ أيهم و صار كدام الكرسي. اسكندر: و انت اشوفك ماخذ راحتك كلش؟ أيهم: طبعاً. اسكندر: متحمس على السجن؟ أيهم: تهمتي؟ اسكندر: خلال دقيقتين تتلبس بتهمة المخدرات. او محاولة ضرب ضابط و الاعتداء عليه. أيهم: تهديد واضح كدام ضابط اخر. ممكن تتحاسب عليه. أيهم يحجي بكل برود.

اسكندر اعصابه فايره ، انا و ضرغام. اتخذنا وضعية المشاهد ، ما فاهمين شديصير! گام ايهم من الكرسي ، حط ايديه بـ جيبه. دار لـ اسكندر ، أيهم اطول من اسكندر. و اضخم منه و اكتافه عراض. بحيث شكلهم هو و اسكندر خلاني اريد اضحك. دنك أيهم لـ اسكندر. أيهم: و اكتب وياهن ، محاولة اغتصاب للضابط. مو بس اعتداء خاف تنساها. اوسعت عيوني مصدومة ، اسكندر تيبس بـ مكانه. اندار ايهم و اجا وخر عني المغذي القديم. خلالي مغذي جديد.

أيهم: لازم تتغذين بس. كل افضل. حتى تتركين المغذيات و تبقالج الابر. رح اشوف امج و اجيبها يمج. اندار و خلا و طلع بكل اريحية. و اسكندر بعده متصنم مكانه. بعد خروج ايهم بـ لحظات. راد اسكندر يطلع ورا ايهم و ضرغام لازمه. مُلاذ: انت شبيك خبللل؟؟؟ گلي خبل انت من شنو تعااااني ! اجا عليه بسرعه و ضرغام لازمه. اسكندر: لسانج اكصه اموتج هنااا. افتهمتييي! هنا احط ايدي بـ خوانيك. جوخرت الغطى عني شمرته.

وخرت المغذي من ايدي و سديت مكان المغذي. كمت لـ اسكندر لازمه بـ بطني. مُلاذ: شتريددد تسووووي ؟ تخوفني انت؟ ضرغام: مُلاذ ردي لـ مكانج. مُلاذ: وخر ضرغام ! انت ما تخوفني زين؟؟؟ اعتقني اعتقني معليك بيه لا اختك و لا مرتكو لا امك و لا اعودلك ب شي غير بت عمك! اسكندر: اكسر خشمج و اخذج غصباً عليج. ضرغام: اسكندررر ، مُلاذ ردي لـ مكانج! مُلاذ: ضرغام وخررر گلت. اتقدمت على اسكندر اكثر. مُلاذ: لو تموت لو يصبوك من ذهب.

لو تحط سجينه على رگبتي انا مو الك. زين؟ افتهمت؟ على كص ركبتي. اسكندر: ضرغام اطلع برا. مُلاذ: ما يروح لـ مكان. ضرغام: تريد تموت البت انت ! مُلاذ: ما يكدر يسويلي شي. اسكندر: ضرغاااام اطلع برا. اريد احاجيها كل شي ما اسويلها. مُلاذ: شتريد مني؟؟؟ شتريد ! صاح اسكندر بـ ضرغام. ضرغام دفع اسكندر بـ كتفه و طلع. بقينا بس انا و اسكندر. ما كدرت اوكف اكثر مكان الخياط رجع يوجعني. كعدت على السرير و سانده روحي بـ ايديه.

جر اسكندر كرسي كعد كدامي. اسكندر: سؤال واحد راح اسئلة الج. و تجاوبيني بكل صراحه فهمتي؟؟ مُلاذ: شتريد؟ اسكندر: لمن خطفوج احد كدر يلمسج؟ اوسعت عيوني عليه مصدومة. حسيت راح يطلعن من محاجرهن. اسكندر: احجي شسوولج؟ شكم واحد ؟؟ احنا المفروض نسوي فحص اصلاً! اطرافي صارت ترجف من الصدمة. حلكي حسيته اتخيط. اسكندر: نحدد موعد فحص و نشوفج. من بعد محاولات كدرت انطق. مُلاذ: انت .. انت شدتحجي! اسكندر: كم واحد؟؟؟ جاوبيني.

مُلاذ: ولك انت شدتحجي ! انا اشرف منك بنص الخطف محد كدر يلمسني. انت شدتخرط شداتحجي !! حافظت على روحي. و على ملاك ما خليت واحد يتدنا النا ! تجي انت القذر تحجي من وحدك!! اسكندر: مُلاذ سنتين بطولهم و عرضهم. من المستحيل ماكووو واحد اتدنى يمج !! كليلي شكم واحد ؟ مُلاذ: اطلع برا. ظل كاعد مكانه. رفعت ايدي اشرت على الباب. مُلاذ: اطلع بررررررا. اسكندر: مُلاذ !

عطت بصوت اعلى يطلع بـ اللحظة يلي عطت بيها كل الادوات الي محطوطه على الميز اخذتها. وصرت اشمره بيها ، كام مبتعد عني. انا مستمره شنو يلي يطيح بـ ايدي اشمره. دخل ضرغام ، دخلت امي و انا اشمر. اعصابي تلفت انهارت و تهسترت. فوك كل يلي تحملته فوك كل الي شفته. يجون يتهموني اتهامات باطله !!! انا اشرف منه و اشرف من الخلفوه. يجي انسان مثل هذا الحثاله هيج يحاجيني !!! يتشكك بيه و يظن انا اخاف منه و اخفي شي.

ما عندي شك اذا سمعوا كلامه رح يصدكونه. و ما يهمني يصدكون او ما يصدكون. انا محد عاش الي عشته محد شاف يلي شفته. يجون و يتهمون بيه اتهامات باطله ! اعصابي ترجف و هو كام مبتعد. دخل ضرغام يدفع بـ اسكندر عني. و بـ لحظة فزيت على صراخ امي. لمن شفت اسكندر هو و الدكتور ع الكاع. و الدكتور فوكاه و يضربه كل قوته. تركت كل شي اختنكت من المكان يلي انا بي. صرت گوه اجر النفس ، الاصوات تزرف راسي. كمت من مكاني بـ صعوبة لزمت بالحيطان.

تركت الغرفة و طلعت امشي بالممر. ايدي على الحايط ساندة نفسي عليه و امشي. التفتت لـ امي دحگتلها يمي بالكرسي مالها. و تحرك بي وراي تريد تلحك عليه. و تلزم ايدي ، لزمت ايدها و ظليت امشي. فيروز: يمه وين رايحه رح تنفتح خياطاتج؟!! ظليت ساكته و امشي. دحگت لـ جسار يلي اجا من بعيد. و عبروه كم شرطي يركضون. رجعت يمر كدامي شلون قتلت الريسة. الجثه يلي انقتلت كدامي ، شرف ، الملهى. الحراس ، الملثمين ، الانظار يلي كانت عليه.

كعدت بالكاع رجليه ما تعينني. ضغطت على محاجر عيوني. امي اتملكها الخوف و الرعب. صارت تصيح بصوت شبه عالي. رفعت راسي دحگتلها هزيت راسي بـ رفض. مُلاذ: محد سوالي محد كدر. فيروز: شنو شبيج يمه. يمه بنتي رح تموت. لزمت بـ ايدي و جسار فوك راسي. مُلاذ: محد سوالي شي حتى ملاك. محد سوالنا انا حافظت علينا. حافظت على امانة ابوي ضربونا. بس ما خليتهم يسوولنا شي... *** فيروز : -ادحگلها تحجي و توهوس وحدها. عيوني تصب دموع عليها.

جسار: منو وياها ؟؟ درت وجهي دحگت للـ الدكتور. خطية اخذوا الشرطه و احنا مفاهمين الصاير. دحگتله يدحك لـ مُلاذ و يحاول يشوفها. الشرطه محاوطينه و يدفعون بي. التتمت المستشفى و كلهم يمشون ورا الدكتور. الممر كله اتجمع يمشي وراها. جانا ضرغام بسرعة ، كنبص يم مُلاذ. انطاها بطل مي ، اخذ البطل جسار. فتح البطل الها و يحاول يشرب مُلاذ. بس ما تتقبل ، حجا النا ضرغام عن البداية. الباقي هو همين ما يعرف شصار.

مُلاذ مستمرة توهوس وي نفسها. اجت جنات من بعيد صحت اله. ركضت علينا بلا ما تفتهم الصاير. اخذن مُلاذ ، غاده و جنات يرجعنها للغرفة. انا و جسار وراهم و ضرغام راحو اسكندر ما موجود بالغرفة. كرهت هذا الكرسي ، يمنعني اساعد بنتي. فلذة كبدي روحي من هالدنيا. عاجزه حتى أنُ ارفعها عن الكاع. نوموها بـ مكانها و هي ساكته و صافنه. رفعت راسي لـ جنات يلي كعدت على القنفة. تطبطب على ايدي و تصبرني. جنات: شوي و يتحسن وضعها اكثر.

و تسولفلج شصاير. هزيت راسي بـ قبول ساكته. عيني عليها و دموعي تنزل. اموت من اشوفهن هيج. راح جسار يسأل عن اسكندر. مرت فترة مُلاذ نوموها بـ ابرة. دخل جسار ندحگله نترقب جوابه. جسار: اسكندر مضروب راسه بالكاع. متعور و هسه مضمدي راح ورا ضرغام. فيروز: زين شصاير ؟؟ جسار: ما اعرف و الله. صحت مُلاذ ، حاولنا نعرف منها بس ماكو. ما گالت اي شي و لا قبلت تگول. مُلاذ: الدكتور؟ سولفت الها عنه. اوسعت عيونه.

مُلاذ: شنو هالحيووووان يسجن بكيفه؟!!! فيروز: مُلاذ خياطاتج. مُلاذ: انطيني تلفونج يمه. فيروز: شتسوين بي ؟؟ مُلاذ: انطيني التلفون. انطيتها التلفون بسرعه. و هي تدور تدور ، التفتت الي. مُلاذ: عندج رقم ضرغام؟ هزيت راسي بـ قبول. قدمت الي الجهاز گالت مستعجلة. مُلاذ: شوفيلي اياه. اخذت الجهاز من عدها. دورت على رقم ضرغام و انطيته. مُلاذ: الو ها ضرغام. مُلاذ انا تعال للمستشفى اريد احاجيك. فركت وجهها و كملت معصبة.

مُلاذ: گل لـ اسكندر يسحب شكوته. حاجي ضرغاام ! تعال للمستشفى. سكتت و نزلت الجهاز سدت الاتصال. ظلينا كاعدين و ننتظر ، اجا ضرغام. ضرغام: سلام عليكم. -و عليكم السلام. مُلاذ: يمه تكدرين تجيني؟ رحت الها و اني احرك بـ عجلات الكرسي. وصلت الها گالت بـ هدوء. مُلاذ: يمه اريد احاجي ضرغام بـ شغلة. تكدرون تطلعيهم كم دقيقة. فيروز: شتحاجينه؟ مُلاذ: اكو موضوع اريد احاجي بي. فيروز: مُلاذ لا تموتيني بـ شنو تحاجينه؟

مُلاذ: يخص صافيناز اريد احاجي بي. فيروز: شبيها ؟ مُلاذ: يمه! اتنهدت ، من خوفي عليه. ما اكدر اعوفها و اروح لـ اي مكان ، هزيت راسي بـ قبول. التفتت الهم. فيروز: تعالوا نطلع لـ برا شوية. دحگولي كلهم مستغربين. هزيت راسي الهم بـ معنى "يلا". اتقدمت جنات تدفع الكرسي و غاده بصفها. جسار بقى بالغرفة و طلعنا احنا ننتظره. *** مُلاذ : -دحگت لـ جسار يلي واكف على صفحة. اتقدم عليه بـ هدوء دنك الي. جسار: مُلاذ صاير شي؟

مُلاذ: لا بس اريد احاجي ضرغام. بـ موضوع يخص صافيناز. جسار: اكيد؟ هزيت راسي بـ قبول. جسار: تمام ، اذا تحتاجين شي. انا هنا موجود. مُلاذ: تمام. طلع من الغرفة اجا ضرغام ناحيتي. ضرغام: شصاير؟ اشرت على الكرسي: اكعد. اخذ الكرسي وكعد. شبك ايد بـ ايد و حنى ظهره: اسمعج؟ مُلاذ: اريد احاجيك بموضوعين. اول موضوع الدكتور تطلعونه. ضرغام: هذا الشي مو بـ ايدي ؟! اسكندر اشتكى عليه. مُلاذ: حاول وي اسكندر ضرغام.

الدكتور ماله علاقه ما اعرف ليش هيج اتصرف. بس ماله اي علاقة و لا اله ذنب و انت تعرف. ضرغام: مُلاذ هذا الدكتور شيريد؟ مُلاذ: مثل ما گلتلك انا ما اعرفة. و لا هو يعرفني مجرد ردة فعلة ، كـ اي رجل عاذا شاف احد يتعرض لموقف مو حلو. راح يحاول يدافع عن الشخص الثاني. انتَ هم ما سمحت لـ اسكندر يحاجيني. بـ طريقة مو حلوه و ما اعتقد من اللازم اسألك عن سبب تصرفك هذا لان ردة فعل طبيعية. اتنهد و هز راسة بـ قبول.

ضرغام: تمام احاول احلها. و اشوف جاره وي اسكندر. مُلاذ: زين. ضرغام: الموضوع الثاني شنو كان؟ مُلاذ: ردت احاجيك عن شغلة. بس هذي الشغلة تبقى بيناتنا ضرغام. ما تحجيها لـ اسكندر و لا لـ اي شخص. ضرغام: مستحيل ، ما رح احجي اكيد. سولفي شصاير؟ شنو الموضوع؟ حجيت اله عن موضوع نور. اوسع عيونه و صافن و انا اسولف. ضرغام: زين ليش ! ليش ما حجت لـ اخوها؟؟ مُلاذ: ضرغام اسكندر مو صاحي اولاً. ثانياً نور بنت خجوله كلش و هادئه و تخاف.

من المستحيل تروح و تسولف لـ اسكندر هالموضوع انا اساساً ما كنت اريد اسولفه. لان هي سولفت الي و ما سولفت لـ غيري. حسيت نفسي داحجي سرها. بس ما اكدر لازم اساعدها. و بالأكثر اساعد اركان يلي اختفى ! ضرغام: زين شنو اكدر اسوي ؟؟ مُلاذ: اريد تعرف اركان و ابوه وين. و عائلة اركان شصار عليهم. اعذرني ضرغام بس ما عندي غيرك. اطلب من عنده هذا الشي. ضرغام: لا ، عادي بالعكس. همزين حاجيتني. مُلاذ: وهسه؟ ضرغام: تمام راح اشوفلج الوضع.

سهله ان شاء الله. مُلاذ: اركان اعرفلي وينه. ضرغام: تمام ، أنتِ شلون صرتي؟ مُلاذ: زينه ، رح اسألك بعد شغلة. ضرغام: گولي. مُلاذ: الي اجا حتى يطعني. شصار عليه؟ ما عرفتوا ليش؟ ضرغام: مرسول من جماعة شرف. لكن شرف و الي لزمناهم ويا. رافضين يعترفون على رأيسهم و حتى ... مُلاذ: حتى شنو؟؟ ضرغام: لگو شرف بالحمامات. ايديه مشرحه بموس و ميت.