رواية جرح الأيهم الفصل التاسع والعشرون 29 - بقلم أيلان

مُلاذ : -مُلاذ : أنا قتلت شخص. ظل يدحك بوجهي، موسع عيونه. بلحظتها حسيت الدموع تتجمع بعيني. ولأول مرة بعد فترة طويلة، بلعت ريگي وأنا أدحك بوجهه. أيهم : منو قتلتي وليش؟ درت وجهي عنه، رفعت نظري لفوق. مسحت عيوني قبل ما أدمع. فركت صدري، گلبي ينبض حيل. هوسة بعقلي، خنكة، غصة. بس هاي الغصة مستحيل رح تطلع، أعرف. رح تظل متحجرة ببلعومي. كل هاي السنين اتحجرت ببلعومي. التفتت على صوته وراي، همس: أيهم : لَـذه.

المكتب اظلم، ضوء يمر من الشباك، يضوي داخل المكتب. دحگت لأيهم. أيهم : احجيلي. مُلاذ : شنو أحجي؟ أيهم : منو قتلتي وليش؟ مُلاذ : لمن خطفوني، أخذوني لشخص حاول يعتدي عليّ. طعنته برگبته، مات. ظل موسع عيونه يدحك بوجهي. دار عيونه بين عيوني. أيهم : دافعتي عن نفسچ؟ مُلاذ : بالنهاية قتلت. أيهم : دفاع عن النفس. نزلت عيني، دحگتله، صام إيده حيلي. يحاول يتمالك أعصابه. مُلاذ : ليـ... بعدني أريد أحجي، طك خشمه دم. فتحت عيوني بوسع.

مُلاذ : أيهم!!! ركضت فتحت الضوء. أخذت كلنسة بسرعة من الطاولة، خليتها على خشمه. لزم الكلنس بإيده. تقدم، كعد على القنفة، ظل لازم بالكلنس. أركض وراه، خفت. طك فجأة وهو. مُلاذ : أيهم شبيك؟؟ دايخ بيك شي؟ شسوي ها؟ ترفع رجليك تنزلهن؟ أيهم : اكعدي لا تخافين. عدل نفسه، نظراته ذبلانة. راد يكوم، وكفته: أكعد گلي شسوي، لا تگوم. أيهم : لا تخافين لَـذه، ما بيه شي. مُلاذ : وخشمك؟؟ أيهم : ارتفع ضغطي. مُلاذ : عزززه من وراي.

دكتور أنا أرفع ضغطك؟؟ أيهم : انطيني مي. ركضت للثلاجة يلي بالغرفة. فتحتها، دحگت بيها حلويات ومي وعصاير. أخذت بطل مي، رحت اله. مُلاذ : دكتور، بس هذا بارد. هسه تتجمد مثل توم، وين أوديك؟ أخذ البطل من إيدي، خلاه على خشمه. ظل كاعد على القنفة وأنا أدحكله. أيهم : أخاف أگلج وين توديني وما ترضين. مُلاذ : وين أوديك؟ أشمرك بمكان حار لحد ما تذوب. أيهم : لمن أعاين لوجهچ أذوب تلقائياً. وسعت عيوني، حكيت كصتي.

مُلاذ : دكتور لا تتغزل، عيب، أنت متزوج. أيهم : عمي ساعة الگشره العرفتي بيه. مُلاذ : أهووو دكتور، غير متزوج. أيهم : عمي متزوج لو مصلخ، شبيچ؟ كل ما حجيت حجاية گلتي متزوج. شني تعيريني لو تضوجيني؟ مُلاذ : لا دكتور، بس أذكرك بحالتك العاطفية. أيهم : لا تذكريني، ما ناسي إنه. مُلاذ : أي دكتور، أحسن. أيهم : تعلين گلبي من تسوي هيج بيهم. مُلاذ : دكتور والله أنت تتبلى عليه. أيهم : زين. مُلاذ : دكتور، لازم أرجع. أيهم : ارجعي.

رحت ع الباب، فتحته، ما انفتح. مقفول. نداريت وأنا أكول: دكتور الـ... دحگتله، واكف وراي. يفصل بيننا مسافة. لا كلش قريب ولا كلش بعيد. شوكت يلحك يجي يوكف وراي، ما أعرف. بلعت ريگي، ظهري ع الباب وهو كدامي. يدحگلي ويرجع نظره لشفتي. خزرته و گلت: مُلاذ : عيونك العسلية، أفسها. أيهم : عيونچ السود أبوسها. وجهي أحس نار صارت بيه. ما أعرف عصبية لو خجل. بس أنا ما أخجل من الغزل. لذلك اكتفيت، خازرته. مُلاذ : مو صوچك.

صوچي أجى وياك للمكتب. ذب نفس عالي وظل يدحگلي. هو يدحگلي. فتح قفل الباب. قبل ما أفتحها وأطلع، ظل طابگها بإيده. أيهم : لا تخافين لَـذه، إيدچ ما المسها بالحرام. عدا لمن نكون مجبورين ومضطرين. مثل لمن انجويتي لو لمن تتمرضين. غيرها ما المسچ لمسة وحدة وألطخچ بالحرام. وإذا ما صرتي من حلالي، لا سامح الله. أگضي عمري كله بعيد عنچ، بس حتى ما أجيسچ. ابتعد عني، أشر للباب. فتحت الباب، ردت أطلع، تذكرت خشمه.

مُلاذ : دكتور، خشمك خـا... أيهم : لا، انكطع الدم، لا تخافين. روحي وأنه رح ألحگچ. مُلاذ : ليش؟ أيهم : أخاف عليچ. حكيت شعري، طلعت وتركته. ظليت أمشي وأدحك لوراى. ألكاه يمشي بس بعيد. استمريت أمشي، درت وجهي، دحگت. لگيت ممرضة تحاجي وهو يهز راسه. عگدت حواجبي وأنا أدحگلها، تضحك ويا. التفت إلي، دحگلي. خزرته، بقى يدحگلي. وأنا على نفس الخزرة، نظري يتجول عليهم. ابتسم، تك خد، دار وجهه، دحك للممرضة باهتمام. درت وجهي عنهم،

أمشي وأهمس وي روحي: مُلاذ : امشي منا مُلاذ. لا أركع راسچ بهذا الحايط، شعليچ أنتِ. انجبي واتأدبي، متزوج، طالعة عينچ. هااااا، من شوكت؟ أمشي وأحجي وي روحي. أرزل بنفسي. درت وجهي، دحگت. ما لگيته وراي. مُلاذ : طبعاً بعده يحاجيها. خاين أبو النسوان، يخون مرته. أم سوادي، الدكتور واسطة. أمشي وأدردم لحد ما وصلت للغرفة. جريت نفس، فتحت الباب، دخلت. دحگت لـ عمتي. منارس : وين صرتي عمه؟ مُلاذ : مو ضيعت الدكتور.

طلع وهم يخلولي دم و... گامت وكفت كدامي، ابتسمت. منارس : ترا أعرف. مُلاذ : شنيييي؟ منارس : سولفتلي غاد. مُلاذ : شسولفتلج؟ منارس : لمن خطفوج، راحو لبيت هاي البنية السورية. لأن يريدون يعرفون منها شصاير ومنو الخطفچ. تعارك هو وأخوه بالشارع، گايل هو يحبچ. جمدت بمكاني، أدحگلها. شنو ما أدري بهالسالفة؟ مُلاذ : عمه غلطانة. منارس : يمه غاده سولفتلي. مُلاذ : متزوج، ترا غاده سامعة غلط. منارس : ياااااا. مُلاذ : اممم.

منارس : شگد عيب، ظلمنا الرجال. مُلاذ : عادي، ما تدرينه. هزت راسها ولزمت إيدي. عدتني ع السدية، اتمددت. ظليت طول الفجر هيج أتقلب. ورگبتي أثر الحرك اللي بيها ما راح. أمي لمن شافته اتخبلت. لو تدري بالجويات اللي ببطني، شيصير بيها. أبد ما سمحت لها تشوف جسمي. أعرفها ما تتحمل منظر الجويات والتعذيب. طلعوني من المستشفى ثاني يوم. أيهم ما موجود. لو موجود ما يخليني أطلع. أكره المستشفى، ريحة الديتول تجيب لي غثيان.

أول ما رجعوني، ما خليت أمي تساعدني. گوه أقاوم وجعي وألبس. جسمي كلش تعبان، بحيث أمشي وأوكع. ما أكدر أوكف على رجليّه. حسيت مقاومتي بذيج الأيام كلها. وتعذيبي قبل، هسه طلع بيه. جسمي صار ما يتحمل أي ألم بعد. گمت من الغرفة دايخة، راسي مسطور. الدنيا سودة كدامي. لزمت براسي وأمشي. سندت روحي ع الحايط. شعري نازل على وجهي، عيوني توجعني. ظليت سانده نفسي ع الحايط وأمشي. لباب الغرفة، ما كدرت أكمل.

وكعت وكعة قوية، انضرب راسي بحافة الباب. من گد تعبي، حتى ما صرخت. لزمت براسي. كشّلت ملامحي متوجعة. دحگت لأمي، اجت إلي تركض. عيونها تريد تطلع من محجرها. لمن شافتني ع الگاع. فيروز : يممممه سودة بوجهي. شلووون طحتي؟ يمه بنيتي دحگيلي. خلت راسي بحضنها. هزيت راسي برفض، نطقت بهمس: مُلاذ : لا تخافين، ما بيه. طاحت دموعها على خدي، سكتت. صاحت على ملاك، اجت تركض. جانت تشر هدوم برا. رفعوني من الگاع. سندوني عليهم.

فيروز : وين جنتي رايدة ترحين؟ مُلاذ : للحمام. أخذتني للحمام، رادت تدخل وياي، ما خليتها. دخلت لوحدي، وكفت أحاول أسبح. ملزمة بالحايط، گوه أسبح. طلعت من الحمام، لزمت بأمي المنتظرة. أخذتني للغرفة، نشفت شعري. گامت تمشط لي. أسمعها تبجي، جسمها يهتز وهي تمشط شعري. شالت شعري بيديها، باسته حيل. ابتسمت، ظليت ساكته. ملاك كاعدة يمي. ندك الباب، ركضت ملاك فتحت الباب. تخاف تروح وتحتاج شي وما تلحك عليه.

كل ما تسوي شغله تسويها ركض ركض. حتى تلحك عليه وتساعدني. دخلوا جسار وسلطان ونور وعمه منارس. ابتسمت أدحگلهم. غابت ابتسامتي لمن شفت إسكندر وياهم. جسار وسلطان يتأففون. أتقدموا سلموا عليّ. تقدم من وراهم إسكندر، هم سلم عليه. رديت له السلام. سندوني نور وأمي، أخذوني للصالة. حجينا بموضوع الخطف، أكدت لهم. كل اللي خطفوني، هاهيه، بعد ما يكدرون يطلعون. لَكن القتال بعده حُر طليق... گامت أمي تصب جاي. ملاك راحت وراها.

گام إسكندر، كعد يمي. بمكان أمي، اتحمحمت ودنيت نفسي عنهم. مخلية بحضني المندر وأدحك لقدامي. حسيت إيده صارت على شعري. غمضت عيوني بنفاذ صبر، متنرفزة. ردت أعيط بي، فتحت عيوني. دحگت لـ جسار، واكف كدامي. جسار : شو زيحي. تدنيت، كعد بنصنا، أنا وإسكندر. دار لإسكندر، أخذ إيده من على التيشو. هو صافح إيده، ظل يكول بيها. جسار : إيدك أنثوية، شتستخدم لها؟ ظليت أدحك لقدامي. أضم بشفتي، حاصرتني الضحكة. إسكندر : شنو أنثوية؟

جسار : ما أدري، رقيقة وناعمة. نور تنطينا من الكريمات مالتچ مو؟ نور ابتسامتها بسرعة تفلت. اتحمحمت وهزت راسها برفض. إسكندر صافن علينا وعاقد حواجبه. دخلت ملاك، قدمت الجاي. سلطان : حتى شعرك شنو صابغه؟ إسكندر : لا. سلطان : شو صاير حلو، شنو عفت شغلك؟ إسكندر : ها؟ جسار : سمعنا أنت مجمد. ظل يدحك بوجوههم، وسعنا عيونا، ما ندري. مدري منين دروا جسار وسلطان. وأنا أگول ليش يتحارشون بيا. جت ملاك، كعدت يمي. بقوا شويه بعدين راحوا.

بقيت عمتي منارس ونور يمنا. ظليت على هالوضع كم يوم. بعدين بلغني ضرغام، لسا ما لاگين الخطفني. وسعت عيوني بصدمة. مُلاذ : شلون يعني؟ ضرغام : أساساً لمن جيتي، أيهم شايل. لزمنا بس التابعين للخطفچ. بس الشخص الأساسي، لا، ما گدرنا نلقاه. حكيت كصتي، أتذكرت أيهم. مُلاذ : ضرغام، دقايق وأخابرك. ضرغام : تمام. سديت الاتصال. دورت على رقم أيهم وأعض بإصبعي. أول ما لگيت رقمه، اتصلت به. ظل يرن يرن هواي، فقدت الأمل يرد عليه.

نزلت تلفوني، أريد أسد الاتصال. وكفت لمن انفتح الخط. خليت التلفون على أذاني بسرعة، أريد أحجي. حجا قبلي بصوت نعسان. أيهم : أيمن، رح أنعل الخلفوك. حبيبتك أنا، هسه تدك عليه، امشي ولي عني. سيارة جديدة، طركاعة بعينك، جديدة، ماكو. حصرت ضحكتي عليه. يسولف نعسان ومتضجور. مُلاذ : أيهم. أيهم : انجب، لا تقلد صوت مُلاذ. مو ابتليت على روحي، جفصت گدامها. ما اتحملت، كاتمة صوتي. وجسمي يهتز، أضحك عليه. مُلاذ : أيهم، أنا مُلاذ.

سكت ثواني، رجع حجا. أيهم : آخ يابه، عيوني. أيمن، انجب، ما أكدر أقرأ الاسم. عيوني توجعني ومسطور، أمشي وأليم. مُلاذ : أييييييهم. سكت ثواني، صارت حركة يمه. أيهم : مُلااااذ؟ مُلاذ : أي مُلاذ. أيهم : شنو؟ منو صاير شي؟ منو اتعرضلچ؟ احجي ولج!! مُلاذ : الـ... مُلاذ : شبيييييك؟ محد اتعرضلي. صدك دتحجي، شجاك! أيهم : أكيد محد اتعرضلچ؟ آخر مرة اتصلتي بيه، سمعت صراخ. مُلاذ : هي بس ذيج المرة الوحيدة اتصلت بيك.

أيهم : لا تجذبين، اتصلتي بيه. لمن اندعمت، حزن هم. مُلاذ : حافظهن. أيهم : بشريني، شصاير من مصيبة؟ أنتِ ما تدگين عليه بس بالمصايب. مُلاذ : المصيبة مصيبتك. أيهم : أي، أنتِ مصيبتي. مُلاذ : أنت بعدك نايم؟ أيهم : مادري، جاي أحس بأعراض الحلم. لأن أنتِ جاي تحاجيني وهاي مو من عوايدك. مُلاذ : تصحى لو شلون؟ أيهم : ما أصحى. مُلاذ : لا تخليني أصحيك بطريقتي. أيهم : أويلي يابه، صار بيها طرق. وشرحيلي طريقتج، بس بالتفصيل الممل.

مُلاذ : إسكندر اتقدملي وقبلت بـ. ياذاني، انرجت رج من عيطته. أيهم : شنوووو؟ وخرت التلفون عن أذاني. كشّلت ملامحي، رجعت التلفون. مُلاذ : صحيت؟ أيهم : شنووو قبلتي بإسكندر؟ هاي جايكم وأبو فاضل، إلا أخطبچ هسة. مُلاذ : يمعود. أيهم : أوكفيلي، خل ألبس. مُلاذ : جذب، ما قبلت، ولك اوكف. أيهم : مُلااااااااذ! شنووو قبلتي بـ نعلمُلاااااااذ! ولج مُلاااااااذ! لا تطلعيني عن طوري. مُلاذ : شبيييك؟ انزلقت أذني، صدك تحجي!

سمعت شي يمه انكسر. لا، هذا خبل مو صاحي. مُلاذ : ما قبلت بي، يابه، ما قبلت. جذب حتى تصحى، گلت قبلت بي. أيهم : شنو؟ مُلاذ : جذب، ما قبلت بإسكندر. عاط بأذني بصوت عالي. أيهم : ولج مُلاااااااذ! ولج الطركاعة السودهمُلاااااااذ! مُلاذ : كافي، أذني، شبيك؟ أيهم : احجي مُلاذ، شنو قبلتي بي؟ والله العظيم هاي رح أطلع من البيت. آجي أكض إسكندر، أسحله على طول الشارع. مُلاذ : و العباس وداعة أبوي، جذب. سكت ثواني، رجع گال معصب.

أيهم : أنه أعلمچ تجذبين عليه، انتظري جاي. مُلاذ : ولك وين يمعود؟ سد الاتصال مني. أحلف عليه، خبل مو صاحي. رجعت أدگ عليه، ما يجاوب. خبلني. ظليت أدگ هواي وهو ماكو، ما يجاوب. قرابة النص ساعة. أنا أدگ وهو يرفض. مُلاذ : عمي خبل، والله أم سوادي. درت وجهي للتلفون، لمن جاني اتصال. أخذته بسرعة، فتحت الاتصال. أيهم : أنا بالفرع اليم البيت اللي بصفكم. تعالي بسرعة، منتظرچ. صوته عصبي، مال واحد الدنيا محترگة يمه. يحجي بجدية ومنزعج.

مُلاذ : ما أجي. أيهم : خوش، أنا آجي. مُلاذ : ما أگدر أيهم. رجليّه ما أكدر أوكف عليهن، حتى. أيهم : شنو شبيج؟ ليش ما خابرتيني! مُلاذ : مابيه أنا، جسمي تعبان. مو أنتوا گلتولي جسمچ ما يتحمل أذية بعد. أيهم : جايچ مُلاذ، ما أكدر أظل هنا. مُلاذ : اوكف، خل أگل لأمي. أنت اجيت. أيهم : وأنتِ منين تدرين أنه اجيت؟ ما رح تسألچ أمچ هالسؤال؟ مُلاذ : خابرتك أسأل عن وضعي. لأن أنت دكتوري وتعرف حالتي. وبلغتك وضعي مو زين.

وأجيت تشوفني شنو وضعي. حتى على أساسه تنطيني علاجات وتساعدني. أيهم : يلا مُلاذ، حاجيها. گدام بابكم أنا، لا تسدين الاتصال. حاجيها وأنتِ على المكالمة. مُلاذ : ليش؟ أيهم : حتى أول ما تخلصين، أدك الباب. مُلاذ : لو ساكتة أحسن لي. أيهم : يلا عيوني، حاجيها لأمج. نزلت التلفون من أذاني. صحت لأمي وأنا گاعدة بالفراش. اجتني تركض، دخلت للغرفة. فيروز : ها يمه، بيچ شي؟ مُلاذ : لا فوفو، بس الدكتور راح يجيفيروز : يا دكتور؟

مُلاذ : أيهم. فيروز : يا هذا الدكتور الحليولطمت على كصتي بإيدي. المكالمة مفتوحة وهو يسمع. بلحظتها اندك الباب. فيروز : يا هاي يمكن أجه. بس ليش أجه؟ مُلاذ : خابرته أسأله عن علاجات تفيدني. وهو أجه حتى يشوف حالتي وعلى أساسها ينطيني علاجات. فيروز : يلا خطيه الولد ينتظر. طلعت وعافتني. خليت التلفون على أذاني. مُلاذ : اجتك. أيهم : أنا دكتور حليو؟ حتى أمچ تگول عني حليو. شنو الما يرضيج بيه ست مُلاذ. مُلاذ : متزوج وخاين.

أيهم : أنا أعلمچ بعدين على كلمة خاين. سد الاتصال مني. لحظات مرت، سمعت صوت أمي ترحب بـ. فيروز : والله هستونه ذكرناك. گالت مُلاذ الدكتور أجه يشوفني. بعدنا نحجي وأنت دكيت الباب. أيهم : ابن حلال خاله. فيروز : هههههه صدك ابن حلال. اتفضل يمه اتفضل اكعد. خل اجيب مُلاذ وأجي، خطيه ما تكدر تمشي. أيهم : أساعدچ؟ فيروز : لا يمه تسلم، اكعد استراح. أيهم : خل أساعدچ. فيروز : لا لا عيني، اكعد. اختفى صوته. اجتني رسالة على تلفوني.

أيهم : بيه ولا بيچ لَـذه. مُلاذ : اسم الله. رفعت عيني، دحگت لأمي. لمن دخلت الغرفة، اجت تساعدني أكوم. لزمت بيها وگمت، كلياتي توجعني. مُلاذ : ماما، خل أبدل. ملابسي ما مناسبة. فيروز : تعالي يلا. كعدتني ع الجرباية، راحت تطلع لي ملابس. أخذتهن من عندها، رادت هي تلبسني، ما قبلت. طلعت وكفت يم الباب وسدتها. لبست گوه، والكانولا مشدودة بإيدي. صحت لأمي لمن خلصت، اجتني بسرعة. تلفوني تجيه إشعارات متتالية.

خليت عطر، مشطت شعري شلون ما جان. لزمت بأمي، طلعنا أنا وياها للصالة. أول ما دخلت، دحگت لأيهم، فزز عيونه عليهم. مُلاذ : شلونك دكتور؟ أيهم : زين بشوفتچ. خزرته وأمي دحگتله صافنة. ضحكت، أغلس ع الوضع، گام أيهم، اتقدم علينا. أيهم : خل أساعدچ خاله. فيروز : لا يمه، هياتني وصلتها. أيهم : عوفيها خاله، ما تكدرين. أخذ إيدي، خلاها على رگبته. أمي عافتني، بس تمشي وراي تخاف أطيح. سندني عليه، حجيت بصوت ناصي. مُلاذ : والحرام؟

أيهم : حالة طارئة، لازم أساعدچ بيه. مُلاذ : زين. كعدت ع القنفة، كعد هو كدامي. وكفت أمي تسأل أيهم. فيروز : يمه، شتشرب؟ جاي، عصير؟ أيهم : تسلمين خاله، ما أريد شي والله. لا تخبصين روحچ، تعالي اكعدي، لا تتعبين نفسچ. فيروز : لا لا يمه، يا تعب؟ راحت أمي تسوي جاي وتصيح لملاك. ظل هو كاعد بمكانه. قدم ظهره، گال بصوت ناصي. أيهم : ليش ما كلتيلي هيج تعبانه؟ ليش ما تخابريني وتگولين؟ تردين تموتيني أنتِ؟ مُلاذ : كم يوم وأتحسن.

أيهم : ماكو هيج حجي. تتأذين، يصير شي، تخابريني، لا تخبليني عليچ! مُلاذ : أيهم، أنا خابرتك على شي ثاني. أيهم : هاااا، ذكرت، شني تگليلي قبلتي بـ صخام؟ وتجذبين عليه، خليتيني ما أدل دربي منين. لا تأذيني مُلاذ، هاي السالفة ديربالچ تعيديها! مُلاذ : جنت أشاقه وياك حتى تكعد. أيهم : لا تتشاقين وياي هيج. ما تتوقعين شصار بيه. لسا إيديه يرجفن من العصبية. خط أحمر عندي ذني السوالف. مُلاذ : شلون أعنس مثلاً؟

فرك وجهه، صار أحمر ومتنرفز. مدنك راسه للكاع، يدحك ويهز برجله. تذكرت لمن طك خشمه دم، گلت فوراً. مُلاذ : أشاقه وياك. أيهم : لا تتشاقين هيج. مُلاذ : اگلك، عوووف هالسالفة. أنا اجيت أحاجيك على سالفة ثانية. أيهم : شني هي؟ مُلاذ : الخطفني، وين وديييته؟ ما مسلمة للشرطة ومضيعه عنهم. أيهم : أي؟ مُلاذ : شنو أي؟ وينه؟؟ ليش ما سلمته للشرطة؟ أيهم : جاي أتونس بي. مُلاذ : أيهم! أيهم : شيريدون؟ شيسوون بي؟

مُلاذ : يسجنونه، أيهم، شيسوون؟ أيهم : لا يتعذب أول، مثل ما عذبني. مُلاذ : أيهم، لا تخبلني، دكتور أنت. شجابك على هاي السوالف مال إجرام! أيهم : أنا كل شي صرت علمودچ. مجرم ما أصير؟ مُلاذ : مالها علاقة. أيهم باچر تسلمه للـ الشرطة. أيهم : لا. مُلاذ : أيهم! لا تخبلني. أيهم : إذا ج، باعي حالچ شصاير بي من وراه. لو اجلده سبعين ألف جلده وأخنكه، ما أرتاح. مُلاذ : أيهم، أنا ما أريد تعذبه أنت. أريد بالقانون ينال عقابه!

أيهم : القانون يمشي لمثل هذا ويطلعونهم. مُلاذ : لا، ما يطلعونه، أيهم حباب. والله تعبانه، مالي خلق أظل ألح لخاطري. أيهم : تمام. مُلاذ : والله؟ أيهم : والله لخاطرج. دخلت أمي جايبة جاي وكعك يمهن عصيرين. دخلت وراها ملاك. قدمت لأيهم كيكة. أيهم : خاله، شني القضية؟ ليش تعبتي روحچ، ماكو داعي والله. فيروز : لا يمه، أكل أزعل عليك. أنطوني كلاص عصير. شربت وأنا مبتسمة أدحكله. دحگلي، ابتسم هو هم. رجعت الكلاص لملاك.

ملاك : اشربي، ششربتي؟ مُلاذ : ما أريد، ما أشتهي. فيروز : ولج اشربي. دكتور، أحجيلك كلمة. خزرني. أيهم : اشربي مُلاذ. مو زين تظلين بلا أكل وشرب. يلا اشربي بسرعة. مُلاذ : ما أشتهي. أيهم : ولا حس، اشربي. مُلاذ : ما أريد. أيهم : لعد يختل اتفاقنا ويخرب بكيفك. دحگتله وهو يشر لي على العصير، خزرته. يقصد ما يودي الخطفني للـ الشرطة. فيروز : يا اتفاق؟ مُلاذ : اتفقت وي الدكتور. علمود أخوه باهر وغادة، نسويلهم مفاجئة.

خطيه لأن ما جنت أنا حاضرة بعرسهم. وهو ما قصر، قبل. فيروزه : ها، أي يمه، أحسن. خطيه غاده ضاجت من ما لگتج بعرسه. مُلاذ : أي. أيهم : اشربي، لو يخرب الاتفاق. أخذت الكلاص من إيد ملاك. شربته مرة وحدة وأنا أدحك لأيهم وخازرته. هو مبتسم يدحگلي. أنطيت الكلاص لملاك. وأنا أدحگه بنفس النظرات. أيهم : عفيه. ضحكت أمي وملاك، وأنا أخوزر بي. رح يجلطني، يلا يودي الخطفني. گلي اوكف وأحاول أمشي. ووكف هو كدامي، مشيت خطوتين.

رجليه ظلّن يوجعني وجسمي نحلان. أشر لي أكعد، كعدت. طلب من أهلي علاقة العلاجات مالتي. جابتهن ملاك وجت أنطتهن اله. كنبص كدامي، ضربني إبرة بالكانولا. وعلّق لي مغذي. أيهم : لازم نخليلج بطالة دم. هسه بالتحليلات طلعت نسبة دمج منخفضة. ورح تظلين مستمرة ع المغذيات لفترة. مُلاذ : يمه، ما شني بطالة دم، ما آخذ لو أموت. أيهم : أي، مو أنتِ رح تشربيهن! غير تخليهن بالكانولا. مُلاذ : ما شنو دم شخص ثاني يمشي بدمي.

أيهم : خاله، شلون متحملتها؟ فيروز : تعلعل بگلبي تعلعل. أيهم : زوجيها. فيروز : هههههه، لا ما أزوجها. وسع عيونه مصدوم. حصرتني الضحكة على نبرة صوته. أيهم : خاله دخيل بختج. فيروز : ههههههه، ماكو أحد يحبها ويتحملها مثلي. فلذة كبدي هي وملاك. أيهم : لا خاله، اكو واحد يحبها مثلچ. دحگت له أمي بإستغراب. عدل كلمته فوراً، گال: أيهم : يمكن اكو، ههههه. فيروز : وين ي يمه، حشاك، زلم هالوكت. لا يعرفون يحبون، لا يعرفون يحتوون.

أيهم : مو كلهم خاله. فيروز : طبعاً مو كلهم، بس الأكثرية. أيهم : أي صحيح. هي مُلاذ تسوي للواحد گلب جديد. فيروز : هههههههه، عاد وياك أنام. مُلاذ : شو كارضين ملحتي فرد نوب. وتتناقشون بزواجي، جنكم ما عاجبكم. ضحكت أمي، تدنت، باست راسي. فيروز : وين اكو مثلچ يمه. من وأنتِ طفلة شايلة مسؤوليتج. وما قصرتي بيوم واتحملتي أشگال وألوان. لا بيوم شكيتي ولا بيوم حجيتي. لو ينطوني الدنيا وما بيها، ما أنطيج لأحد.

ابتسمت وهي تحجي من كل گلبها. أيهم متجي إيده ع القنفة، مخليها جوه خده. مبتسم ويدحگلي. اتحمحت وگلت: مُلاذ : دكتور، اخذ كيكة لأمك وابنك. فيروز : أي صدك، اوكف يمه، أخليلچ. اتغيرت تعابير وجهه أيهم. گام گال وهو يعدل ملابسه. أيهم : لا خاله تسلمين، أنا خل أروح. فيروز : انتظر، انتظر، خل أخليلهم كيكة. أيهم : لا، هم مو بالبيت، يم أهلها. فيروز : ها، يا حرامات. زين حتى لو اخذ وياك، خاف تريد كيك فد شي. أيهم : لا عيني خاله، تسلمين.

يلا أنا أروح. فتح الباب، طلعت وراه أمي. صحت لملاك، لزمت بيها. طلعت وراهم، دحگتله يمشي بالشارع. مُلاذ : ملاك، تعالي، اخذيني وراه. فيروز : يا وين تروحين؟ مُلاذ : أريد أسأله عن العلاج. فيروز : انتظري، أنا أسألهم. مُلاذ : لا ماما، هواي أسئلة. أكو أدوية معينة متعرفين أسماءها. فيروز : زين، خل آخذچ أنا. مُلاذ : لا فوفو، خل تاخذني ملاك. وهياته هنا، بس أسأل وأجي، رح يروح. فيروز : يلا، زين، أنا واگفة هنا أنتظرچ. مُلاذ : تمام.

طلعنا أنا وملاك، لابسين جاكيتات فوك ملابسنا. غطيت راسي بالكلاو مال جاكيت. حاولت أسرع خطواتي حتى نلحگه. فتحت تلفوني، اتصلت بي، رد ع الاتصال. مُلاذ : انتظر، لا تروح. أيهم : ليش، صار شي؟ مُلاذ : اوكف، جايتس. نزلت التلفون، سديت الاتصال. ملاك تدحگلي مستغربة، ما فاهمة. وصلنا لـ گدام الفرع، دخل بيد. دحگت واكف يم سيارته، يدخن. التفت إلي، وصلت لـ يمه. أيهم : شبيج؟ صار شي؟ دحك لملاك، رجع دحگ لي. سندت ظهري ع السيارة.

اندار هو، صار كدامي. مُلاذ : ملاك، انتظريني شوي. هزت راسها بقبول. افتهمت قصدي، راحت وكفت بعيد عنا بمسافة. رفعت راسي، دحگت لأيهم. أيهم : رح توگعين ترا. شتسوين هنا؟ ما گلت لي أجيك؟ مُلاذ : ضجت مني؟ أيهم : شنو؟ مُلاذ : لأن ذكرت مرتك، لا تجذب عليّ. أيهم : اجيتي حتى تسأليني هالسؤال؟ وأنتِ مريضة وتعبانة، امشي أرجعچ. مُلاذ : أيهم، جاوبني، ضجت؟ لا تغير الموضوع، ولا تجذب عليّ. خلا إيديه بجيبه. رفع راسه، دحگ للمنطقة.

رجع نزل راسه، دحگ لي. أيهم : عدتي هواي ولحيتي بكل ما تحاجيني تگليلي متزوج. رغم وضحت الج السبب و گلتلچ ليش اتزوجت. گلتلچ ما أحبها، بس بعدج مصرة. ما أعرف ليش جاي تعاقبيني هالشكل. على شي مو بـ إيدي، كل تصرفاتي وياچ. وخوفي عليچ وضعفي يمج مو بـ إيدي. افتهمت، ما تريديني. بس جاي تلحين بموضوع الزواج. تمام، تريدين أبتعد عنچ؟ هاهيه، أبتعد. علاقتي بيج تقتصر على دكتور ومريضة. لا تذكريني كل لحظة بزواجي ومرتي.

اللي هي بعمرها ما صارت مرتي. ما تدرين بيها شسوت بيه، ولا تدرين بمصايبها. هزيت راسي بقبول. مُلاذ : تمام، آسفة، ما رح أعيد هالشي. ما جنت أدري بيك هيج تضوج. وما تحب هالموضوع، ما ينعاد بعد. أيهم : عادي. مُلاذ : هسه جاي تطبق عليّ البرود؟ أيهم : ما أطبق شي عليچ. أنا أستثنيچ عن الكل وبكل شي. أكبر دليل، كم مرة عدتي هالسالفة. وكم مرة حاولتِ تطرديني من يمچ. بعدني باقي وياچ بنفس المكان. على الرغم إنه كرامتي عندي فوگ كل شي.

وأكرهه أظل ورا شخص معين. وإنه أشوف منه معاملة ما أستحقها. أتركه من أول غلط، بس أنتِ ما تركتيني. مُلاذ : أيهم، ما أعرف أشرحلك. بس أنا معاملتي هاي وي الكل. أكو ناس ما أرتاح وياهم بالكلام. وأكو ناس أحاول أخلي حدود بيني وبينهم. ما قصدي أذكرك بزواجك. بس جاي أحس بالذنب، رغم إحنا ما مسوين شي. أنا وياك ما عدنا شي، بس أنا ما أعرف... قاطعني قبل ما أكمل. أيهم : ارجعي هسه للبيت. رح أدگ عليچ، جاوبيني حتى أسولفلچ كل شي.

هزيت راسي بقبول. أشر لملاك، اجتني بسرعة. خطيه جمدت من البرد. أيهم : أنا وراجن، أوصلجن للبيت وأروح. مُلاذ : تمام. أخذتني ملاك ورحنا للبيت. نزلتنا أمي لأن تأخرنا. أخذوني لغرفتي، اتمددت. طلعن أمي وملاك من يمي بعد ما اتطمنن عليه. اتصل بيه أيهم، جاوبته. أيهم : ها. مُلاذ : ها. أيهم : وين أنتِ؟ مُلاذ : بالغرفة. أيهم : أحجيلج كل شي؟ مُلاذ : احجي. أيهم : تمام، انتظري أصعد سيارتي. ظليت ساكته، أنتظره.

لحد ما سمعت صوت تشغيل السيارة. مُلاذ : صعدت؟ أيهم : أي. مُلاذ : سولف. أيهم : أنا ما جاي أخونها أولاً، وگلتلچ. أنا جنت قبل ما أتزوجها. عيني بكل مكان تدور عليچ. لو لمحتچ، أتگحل بشوفتچ. وهذا الشي قبلها وبعدها راح يظل. ثانياً، على الرغم من مشاكلنا أنا وياها. بس لمن شفتچ ماكو وظليت أشهر أنا ببابكم. تالي صحيت على نفسي. ذكرت نفسي مثل ما تذكريني هسه، أنا متزوج. رحت وحاولت أتمم كل شي، بس ما گدرت.

بس اجت كعدت يمي، لمست إيدي، ما گدرت. رجعت وحاولت وجبرت روحي وما گدرت. حاولت أعدل علاقتي بيها وأشتري لها وأجيب الها. وأگعد أحاول أسولف وياها. تكوم تسوي حركات تلعب نفسي. فهمتها إنه ما رح تحصل مني شي. وبقيت أسولف وياها وأحاول ما أقصر. بكل مرة تستغل هالشي وما تحترم رغبتي. بعدين خلت كل شي إجباري يصير. وحجيت الج وأحلف بكل المقدسات. إنه إيدي ما لامستها، هي سوت شي. وأعرف كلش زين، بس ما لازم عليها دليل.

لأن أنا ما بيوم رديتلها سكران. وگلتلچ بس مرتين بحياتي. مخلي هالسم بحلگي. وبالمرتين جانت ما موجودة. غيرها وهي موجودة، ما شربت. جابت أبيل وتركته، وأنا أعتني بأبيل. أمي ربيناه، هي ما تدخلت أبداً. تعرف أبيل خط أحمر يمي وتأذي. كل يوم تجوي لو تضربه. خل أگلچ من الأخير، اللي تسوي بأبيل، أسوي بيها. تضربه أضربها، تجوي أجويها. لأن أنا محذرها وهي ما سمعت لتحذيري. ألف مرة اجيت وياها بالعين وأغاث. وما فاد، رجعت أذته وضربته.

وصلت بيها تخنكه، أشكال وألوان سوت بي. شهگت وكممت حلگي. شلون تكدر تسوي بي هيج! وين اكو أم هيج تسوي بابنها. كمل كلامه. أيهم : والله العظيم بليلة فزيت. على صوت أبيل يصرخ، رحت ركض أشوفه شبي. لگيتها حابسته بالكنتور، قافلة باب الكنتور عليه. أتسودنت، طلعته من الكنتور، وجهه أزرك. ما يجر النفس منها، صارت بي خوفة. مُلاذ : عزززه. أيهم : وأنا من وكته، نعلت والديها. حبستها بقفص دجاج. لا أجمل روحي گدامچ ولا غير شي.

أگللچ اياها مثل ما هي، دمرت أبيل دمار. أركض لها أكتلها وأوديها لأهلها. بس أريد أبعدها عنه، تدمر دمار من وراه. ما اگدر أروح لبيتي وأخذه. إخواني وأهلي هناك، شلون أعوفهم؟ أبقى يمها، ما تفك ياه منه، تريد توجع گلبي بيچ. گلت لها نتطلق وتشتريد تسوي الها. ما تقبل وتگلي أخذ أبيل، وأمي ما تقبل أطلقها. وأهلها يعرفونا وهي ملچبه، ما تقبل. حتى خيانة خانتني وأنا عفت دربي وملجئي. يعلمود لا أقصر وياها بيوم.

ولج وي حارس بيتنا، تتخيلين أنتِ؟ وي الحارس اللي مأمن البيت يمه. وغيرها من سوالف، سوت سوايات. بس الله يعلم بيها. هسه لا تگليلي مرتي. ولا تگليلي متزوج، بأقرب فرصة أطلقها. ظليت مصدومة وصافنة. مُلاذ : ما جنت أدري هيج. أيهم : شفتي الفرق؟ شفتي ليش أنا يمج؟ ما لگيت مُلاذ. ما لگيت بنية تشبهچ وتردع الولد مثلچ. أيام الكلية أشوفچ بطرف عيني، ما تعاينين. أشوفچ شلون تركضين علمود أهلچ. أشوفچ شلون تواسين الجهال اللي بالشارع.

لحد ذاك اليوم من أخذتيني وياچ للجهال. مُلاذ، تعبت، كافي، فهميني، كافي تأذيني هيج. مُلاذ : تمام، ما عليه بعد بسالفة زواجك. أيهم : مهمد، صلوات على گولة أيمن. مُلاذ : هههههههه. أيهم : ما تنباع بالصيدليات؟ مُلاذ : شني؟ أيهم : ضحكتچ أو مثلاً ريحة شعرچ. مُلاذ : شيسوون بيها بالصيدليات؟ أيهم : تعافي الواحد. مُلاذ : هذا الواحد بس أنت. أيهم : طبعاً بس أنا، شحدها تعافى غيري. مُلاذ : ههههههه. أيهم : لَـذه.

مُلاذ : ها يـ أم سوادي المعلعلة أفادي. ضحك بصوت عالي. أيهم : حبيتها. مُلاذ : اوباااااا. أيهم : شو عيديه. مُلاذ : ما. أيهم : بـ داعة الصاكين. مُلاذ : اوباااا. أيهم : هههههه، انعل أبو الفواص. مُلاذ : أنت افوص. أيهم : افوص و فوصتهم. مُلاذ : لاااا، افوص و فوصة. أيهم : لا، فوصتهم. مُلاذ : ليش ليش؟ أيهم : لأن هي فوصته بس إله. الفوصة للكل، بس فوصته لا. مُلاذ : والأفوص هم للكل. أيهم : خلي بس إلها. مُلاذ : لا، ما ترهَم.

أيهم : ها، لأن متزوج؟ مُلاذ : لا. أيهم : لعد؟ مُلاذ : فوصته، ما متعودة على هالسوالف. تخاف منها وتستصعبها، يمكن رح تحتاج وقت. سكت لـ ثواني، أنا هم سكتت. گال بصوت هادئ. أيهم : شنو افتهمها أنه هسه هاي؟ مُلاذ : مثل ما تريد، افهمها. أيهم : اللي كامل الحرية بالخيال مو؟ مُلاذ : أي هههههه. أيهم : اگلچ. مُلاذ : ها. أيهم : گولي اوباما. مُلاذ : لا تلح. أيهم : بس هالمرة. مُلاذ : اوبا. أيهم : لا، عدل. مُلاذ : أهوووو أيهم.

أيهم : يلا لذته، يلا. مُلاذ : اوباااا. كل ما أحجيها يضحك وأنا أضحك وياه ع الواهس. مُلاذ : يلا أنا أروح. أيهم : تمام. مُلاذ : باي. أيهم : بيباي لَـذه. سديت الاتصال منه، بقيت أتقلب بفراشي. لحد ما نمت. مر من بعد هذا اليوم أسابيع. كل يوم يتصل عليّ أيهم يتطمن. صرت زينة ع العلاجات، رجع وضعي زين، أحسن. نگضيها أنا وأيهم نضحك ونسولف. لأول مرة بطلت أتقيد بالكلام وي شخص. مُلاذ : أيهم. أيهم : جَرحه. مُلاذ : أنت شنو؟ أيهم : شنو؟

مُلاذ : بصراوي بغدادي؟ شو كله تگول إنه وكضت لهجتك بصراوية. أيهم : أي، أنا بصراوي. مُلاذ : جا شجابك ببغداد؟ أيهم : من عمري ٣ سنوات أنا ببغداد. بس لهجة أهلي بصراوية، تعلمت منهم. مُلاذ : فهمت. أيهم : وأنتِ؟ كله تگولين دحگت. مُلاذ : بابا من الأنبار وأمي من ديالى. ملتقين ببغداد، صايرتلك مشكل يا لوز. بابا كله جان يحجي أنباري. ما يگول أباوع، يگول أدحك لو دحگي. ما يگول أباوع، يگول أدحك لو دحگي. ما يگول أتْدنى، يگول أكحز.

ما يگول مصيبة، يگول عثرة لو نكبة. هواي كلماته أنبارية، تعلمت نص من أمي. النص الثاني من بابا، وظليت أحجي مثلهم. أيهم : أويلي يابه، أصلچ أنباري طلع. مُلاذ : البصراوي. أيهم : الأنباريه. مُلاذ : يا البصرة لو مايج حلو. جا جيتت بـ هدومي. أيهم : سدي اثمج يا مهبولة. ي عثرة، ي نكبة گلبي. مُلاذ : ولك طلع عدك رس أنباري. أيهم : هيفتيني يا مصكوع. مُلاذ : هههههههه، ديلا كافي، لا تلح. أيهم : سدي اثمج. خليت إيدي على وجهي وضحكت.

سوالفه تضحكني غصب. مرت الأيام. بيوم نزلت من السيارة، دخلت البيت، خليت السويج ع الكاونتر. طلعت أمي تركض عليّ. صارت تخاف من الهوا لو خنگنا. اتبعتها ملاك، سلمت عليهم. دك تلفوني، دحگت "أم سوادي". گمت للغرفة، دخلت، سديت الباب. رديت على الاتصال، بعدني ما حاچية، گال. أيهم : مُلاذ، اتحضري. مُلاذ : لـ شنو؟ أيهم : تكونين محاميتي. مُلاذ : ليش أكون محاميتك؟ شكو؟ أيهم : طلگت لينا وراح تحاول تاخذ أبيلو.

وتخلي المحكمة ينطونه الها لأن عدها تصويرالي وإنه أضربها.