رواية جرح يداويه العشق الفصل الرابع عشر 14 - بقلم جنات

فى المطبخ روح وشهد بيغسلو الاطباق سوا. شهد: مش ناويه حضرتك ترتاحي شوية بقيروح: قربنا نخلص اهو ياشهد. شهد رمت الطبق اللي في إيدها على الرخامة واتكسر. روح اتخضت. شهد: بجد مش قادرة أفهمك بقي. أنتي روح اللي مش بيهون عليها تقتل صرصار. بجد هاين عليكي الروح اللي جواكي ومش فارق معاكي. روح سابت اللي في إيدها وبدأت تلم الإزاز. شهد: سيبى اللي في إيدك وردي عليا ياروح. ده ابنك على فكرة. روح: وابنه هو كمان. افهمي بقى.

شهد: مش ذنبه إنه هو أبوه. مش ذنبه اللي انتي عيشتيه معاه ياروح. روح بصوت مخنوق: صدقيني وجوده بيفكرني بكل دقيقة عيشتها في الشقة دي. مهما حكيت محدش هيحس بيا ياشهد. لأن محدش عاش الواقع اللي عيشته.

شهد: يا حبيبة قلبي كلنا معاكي وحاسين بيكي. بس ده ابنك. وروح جواكي ياروح. مش ذنبه أي حاجة حصلت معاكي. وبعدين أنا مش فاهمة انتي ليه بتنفذي كل حاجة للي اسمها إجلال دي. هي وبنتها دول بيتعاملوا معاكي كأنك خدامة عندهم. وأنتي مش بتعترضي على أي حاجة. روح: أبوس إيدك ياشهد. أنا مش عايزة مشا مشاكل مع حد. لا هما ولا غيرهم. يونس كان واقف على باب المطبخ وسامع كل كلمة. قالوا لها ونادى قبل ما يدخل: روح.

روح نزلت النقاب ويونس دخل. وشايف هدوم روح وشهد اللي متبهدلين. لأنهم بيشتغلوا بيهم من الصبح. يونس: أنتي بتعملي إيه هنا ياروح. روح: ولا حاجة. شهد: هو إيه اللي ولا حاجة. إحنا هنا من الساعة ١٠ الصبح بنخبز وبنطبخ وبنعمل حلو. وكمان بنغسل الأطباق. وده بأمر من مرات عمك ومراتك. يونس قرب من روح اللي استغربته. ومسك إيدها وخرج. راح المندرة اللي كان الكل متجمعين فيها. رجال وحريم.

يونس: مش أنا قولتلك يا أمي روح متعملش حاجة عشان ما تتعبش. فاطمة: أيوا يابني. بس. إجلال: دي عادات يا جوز بتي. يونس: كل ده ما يهمنيش. هي مش خدامة عند حد. وأظن يا مرات عمي بنتك لما اتجوزت مادخلتش المطبخ. ووقتها حضرتك ما اهتمتيش بالعادات دي ولا إيه. ومن وقت جوازنا وهي مش بتدخل المطبخ. صح ولا إيه. وروح لسه لحد الوقت مابقتش مراتي عشان تنفذي عليها عاداتنا وتقاليدنا. وحتى لما تبقي على ذمتي مش هسمح بده يحصل.

إجلال معرفتش ترد عليه. عثمان: إني لما سألت على روح قولتو إنها في أوضتها بتريح. رحمة: لا يا جدو. روح من الصبح في المطبخ بأمر من مرات عمي إجلال. عثمان ضرب بعصايته في الأرض: كيف ده. الموضوع ده لو اتكرر مش هيحصل خير واصل يا إجلال. إجلال اتضايقت وطلعت أوضتها وصفا وراها. عثمان بص لروح: حجك على راسي يا بتي. روح: متقولش كده يا جدو. محصلش حاجة. راضية: اطلعي يا بتي ارتاحي. أكيد تعبانة.

روح هزت راسها وشدت إيدها من يونس وطلعت هي وشهد. يونس افتكر طارق وخرج يشوفه. ما كانش موجود. وكلمه قاله إنه رجع البيت. *** صباح يوم جديد. الكل متجمعين على السفرة. ما عدا عثمان وعم محمد. إجلال عينيها على روح اللي قاعدة جنب شهد ويونس اللي بياكل وبيخطف بعض النظرات ليها.

إجلال: صوح يا جوز بتي. العروسة الجديدة هتفضل في أوضة الضيوف ولا هتعملها أوضة جديدة. أكيد مش بتبيتي وياك في الجناح. أصل يونس ما يحبش حد يدخل جناحه واصل وبيزهق بسرعة. يونس بص لها ببرود ومردش عليها. شهد ضحكت: زي ما زهق من بنتك كده. رحمة ضحكت وضربت كف هي وشهد. فاطمة بحدة: رحمة. شهد: بس روح قلبي ما يتزهقش منها أبداً. دي نعمة في حياة أي حد. رحمة: في دي معاكي حق الصراحة. وربنا يجعلها سبب سعادة في حياتك يايونس يارب.

روح كانت هتموت من الكسوف وحاسة بنار خارجة من وشها. وبتشتم شهد في سرها. صفا: ليه يا بت عمي إني ما كنتش سبب سعادة في حياته ولا إيه. رحمة: الله أعلم بقى. صفا بصت ليونس: أنت عاجبك الكلام ده. سايبهم يتمسخروا على مراتك. يونس: بطلو كلام وكلوا. على: أومال جدي وعمي محمد فيني. يونس: راحوا يتمشوا في الأراضي. على: طب يلا عشان نلحق الاجتماعي. يونس: يلا. روح تعالي عايزك. صفا بصت له قوي ومستغربة. هو عايزها في إيه.

روح قامت ومشيت ورا يونس. شهد بهمس: هو أخوكي لسه مشافش روح صح. رحمة بنفس الهمس: صح. شهد: ماهي الصنارة عمرها ما هتغمز كده. لازم يشوفها عشان يوقع في سحرها. رحمة: صح. وهنخليه يشوفها إزاي بقى. وبعدين روح مش هترضي لأنه مش جوزها. شهد: بس في حاجة اسمها رؤية شرعية. والعريس لازم يشوف عروسه. رحمة: طب هنعملها إزاي دي. شهد: هفكر وأقولك. *** روح دخلت المندرة مع يونس ومتوترة ومش عارفة هو عايزها في إيه.

يونس بص لها: روح ممنوع تدخلي المطبخ أو تعملي أي حاجة. حتى لو أمي أنا شخصياً طلبت منك. سمعاني. روح: بس إني. يونس قاطعها: سامعة. أنا قولت إيه. خليكي مع شهد ورحمة ومتتعبيش نفسك. روح: حاضر. يونس لسه هيمشي. وقف وقرب من روح وباس راسها من فوق النقاب. وروح اتصدمت لما عمل كده وقلبها دق بقوة. يونس: يلا روحي لشهد. أنا بطمن وإننتي معاها. لأنها بتعرف تاخدلك حقك من أي حد. روح ابتسمت من تحت النقاب. ويونس كمان ضحك. يونس: يلا.

روح: حاضر. روح خرجت ويونس كمان خرج من القصر وركب عربيته مع علي وراحوا على الشركة. *** في بيت طارق. طارق: جاهزين. ماهنية: أيوا يابني يلا. بت ياشروق همي شوية. شروق: جاهزة يا أمي. طارق وهنية وشروق ركبوا العربية وراحوا على قصر الهلالي. بعد شويا وصلوا ونزلوا. واستقبلتهم فاطمة في الصالون بحب. *** في أوضة صفا دخلت إجلال. إجلال: أنتي قاعدة كده ليه. صفا: هعمل إيه يا أمي. إجلال: طارق وهنية تحت. صفا: لي.

إجلال: جايين يباركوا لفاطمة. وبصراحة إني عايزة أخليهم يشوفوا رحمة. صفا: ليه يا أمي. إجلال: هنية مش هتسكت واصل. وإني على أخرى منها من وقت الفطار. صفا: أنتي بتجولي فيها يا أمي. إجلال: طب تعالي ويايا. صفا قامت خرجت معاها. إجلال نزلت وسلمت عليهم بحب مزيف: فاطمة تعالي معايا عايز اكي. عن إذنكم يا جماعة. البيت بيتكم. هنية: اتفضلوا. *** في المطبخ كانت رحمة بتساعد راضية. دخلت عليهم صفا. صفا: رحمة. رحمة: نعم.

صفا: مرات عمك بتجولك ضيفي الضيوف. رحمة: هو في ضيوف عندنا. صفا: أه. ويلا عجلّي. راضية: روحي يا بتي. جدملهم حاجة مسقعة وحلويات. رحمة: هما كام واحد. صفا: تلاتة. رحمة راحت حضرت الصينية واخدتها وخرجت. وقربت من الصالون وما كانتش شايفة اللي قاعدين. عشان ضهرهم كان للمطبخ. رحمة: أهلاً وسهل. رحمة وقفت ومش مصدقة إنها شايفه هنية بعد الوقت ده كله. رحمة حطت الصينية على التربيزة. وشروق قامت حضنتها: رحومة اتوحشتك جوي.

رحمة بادلتها الحضن: وأنتي كمان عاملة إيه. شروق بعدت عنها: بخير الحمد لله. رحمة قربت من هنية ومدت إيدها ليها: إزاي حضرتك. هنية فضلت شوية تبصلها. وبعدين مدت إيدها: زينة. رحمة اتحرجت: يا رب دايمًا. رحمة قربت من الصينية وبدأت تقدملهم الضيافة. وطارق عينه عليها. رحمة قدمت لهنية وشروق. ومدت إيدها بطبق لطارق. طارق: عاملة إيه يارحمة. رحمة بصت لهنية اللي بتبصلها بغضب. رحمة: الحمد لله. عن إذنكم. رحمة لسه هتمشي. جت إجلال وفاطمة.

إجلال: خدي هنية وشروق يتعرفوا على روح يارحمة يابتي. رحمة: حاضر. اتفضلي. هنية قامت معاها هي وشروق. وطارق خرج يستناهم برا. *** في أوضة روح وشهد قاعدين. وفاطمة قالت لها إن في ضيف هتيجي تشوفها. وكانت روح لابسة عباية استقبال وطرحة. وملبستش نقاب. الباب خبط. وشهد قامت فتحت: أهلاً وسهلاً. اتفضلوا. ودخلت هنية وشروق اللي انبهرو بجمال روح. هنية: بسم الله ماشاء الله. كيف الجمر يابتي. ألف مبروك. روح: الله يبارك في حضرتك. اتفضلوا.

شروق: ألف مبروك. روح: الله يبارك فيكي. رحمة: دول أهل طارق صاحب يونس يا روح. روح: اتشرفت بمعرفتك. هنية: تسلمي يابتي. فضلو يتكلموا شوية. وطول القعدة هنية بترمي كلام زي السم على رحمة. اللي ماسكة دموعها بالعافية. هنية: صوح ياروح يابتي. أنتي عندك خوات بنات. روح: لا. ماليش إخوات. هنية: خسارة يابتي. كان بودي عروس كيفك زي الجمر لابني طارق. يمكن ربنا يعوضه عن جوازته الأولانية. رحمة بصت لها بصدمة. ومقدرتش

تمسك دموعها أكتر من كده: عن إذنكم. وخرجت من الأوضة. شهد وروح لاحظو دموع رحمة. وهنية وشروق استاذنوا ومشوا. شهد: هي الست دي بتعامل رحمة كده ليه. روح: حرّجتها أكتر من مرة. شهد: تعالي نروح نشوفها. لأنها مشيت وهي بتعيط. روح: هلبس النقاب. شهد: نقاب إيه ده. أوضتها جمبنا. وبعدين محدش في البيت. شهد وروح لسه هيخرجوا. فون شهد رن برقم محمد. شهد: الو. يابابا. أنت تحت. طيب هنزلك اهو. باي.

شهد قفلت مع أبوها: بابا تحت وعايزني. هنزل أشوفه وأجيلك. روح: حاضر. شهد نزلت. وروح خبطت على أوضة رحمة اللي فتحتها وهي منهارة. روح بخوف: رحمة مالك بتعيطي ليه. رحمة دخلت قعدت على السرير. وروح دخلت وقفلّت الباب وقعدت جمبها على السرير: مالك يارحمة. رحمة عيطت أكتر. وروح خدتها في حضنها: اهدى وفهميني مالك. أنتي بتعيطي عشان طنط هنية صح. وكلامها معاكي. رحمة هزت راسها بأه.

روح: مش هي المفروض أم طارق صاحب أخوكي. ليه بتعمل معاكي كده. رحمة: أنا كنت مرات طارق. روح بصدمة: كنتي. أنتي كنتي متجوزة. رحمة هزت راسها بأه. روح: وليه اطلقتي. رحمة بدأت تحكي لروح اللي حصل معاها ومعاملة حماتها ليها من أول يوم جواز. والمشاكل اللي حصلت لما عرفت إنها مش بتخلف. رحمة عيطت أكتر.

وروح خدتها في حضنها: حبيبتي دي حاجة بإيد ربنا مش بإيدك. وعلى فكرة هي الخسرانة مش أنتي. بس بجد حرام تظلمي طارق. لأن على كلامك إنه بيحاول معاكي من وقت طلاقك. رحمة: أنا هبقى بظلمه بجد لو وافقت أرجعله. ويعيش طول عمره من غير ولاد. روح: بس انتي قولتي إن الدكتورة قالت إن فيه أمل. وممكن ربنا يرزقك. رحمة: وأنا هعيش أنا وهو على أساس الأمل. ياروح. طب لو محصلش. روح: حبيبتي اهدى. وربنا يكتب لكوا اللي فيه الخير. الباب خبط.

روح: ده أكيد شهد. هفتح له. روح راحت تفتح. واتفاجأت بيونس قدامها. ويونس بص لها أوي ومش عارف مين دي. رحمة جت من وراها. ويونس شافها معيطة. قرب منها واخدها في حضنه: مالك يا قلب أخوكي. رحمة: أنا كويسة يا حبيبي. متخافش عليا. يونس: إيه اللي حصل. هنية قالت حاجة ضايقتك. رحمة: لا يا حبيبي. أنا والله كويسة. وروح مسابتنيش لوحدي. يونس بص لها تاني. وروح كانت محرجة. يونس: روح.

رحمة ضحكت: مالك يايونس. هو أنت ما كنتش تعرف إنها روح ولا إيه. يونس: لا. أول مرة أشوفها من غير نقاب. رحمة قربت من روح: بقي تبقي هتتجوز القمرية دي. ولسه مشوفتهاش. دانت فاتك نص عمرك يا أوس أوس. شهد جت عليهم. واتفاجأت بيونس. وبصت لرحمة اللي غمزلّتها: أنتي كويسة يارحمة. رحمة: أيوا. يونس: كويسة ليه. إيه اللي حصل. شهد طبعاً

مش بتقدر تمسك لسانها: أبداً. الست اللي كانت هنا. كانها كانت مستقصده تحرجها وتضايقها. ست غبية أوي زي مرات عمك كده. رحمة وروح ضحكوا. ويونس تاه في جمال ضحكة روح اللي أول مرة يشوفها. وروح لاحظت نظراته. وبصت في الأرض. يونس: متزعليش نفسك يارحمة. وإنتي المفروض ما كنتيش قعدتي معاهم. رحمة: السبب مراتك. هي اللي قالتلي روحي ضيفي الضيوف. وما قالتليش مين هما. يونس: ماشي يا حبيبتي. ارتاحي وبطلي عياط. رحمة: حاضر يا حبيبي.

يونس خرج من الأوضة. وروح كمان راحت أوضتها. شهد بهمس لرحمة: كنا بنخطط نخليه يشوفها. واهي جت من عند ربنا. والله إحنا نيتنا صافية. رحمة: صافية. صافية. صافية. الاثنين ضحكوا. وشهد راحت تنام. ورحمة كمان نامت.