رواية حامل ليلة الزفاف الفصل الثالث عشر 13 - بقلم فاطمة أبو جلاب

أيمن: طيب مبروك، بس متنسيش إنك منجحتيش من غير مساعدة أميرة. ومسقطتيش عشان أميرة كانت بتساعدك. تهاني بغضب: أنا مش فاهمة، أنت عمال تقول الكلام ده دلوقتي ليه؟ أنا نجحت عشان أنا ناجحة. أيمن: لأ، أنتِ نجحتي عشان أنتِ بتلفي وتدوري ومش سالكة. تهاني: آه، أنت شكلك زعلان أوي عشان بقيت أحسن من أختك. أيمن: لأ خالص، أنا بس بعرفك نفسك وبفكرك بمساعدة أميرة ليكي ووقفتها معاكي، وإنتي عملتي إيه في الآخر معاها.

تهاني: أنا معملتش حاجة، أنا بس بعدت عنها وكملت طريقي ونجاحي. تامر: خلاص كفاية كده أسئلة يا أيمن. ويلا يا تهاني امشي. تهاني: ماشي، مع السلامة يا حبيبي. وبعد مغادرة تهاني، أيمن: أتمنى دي تكون آخر مرة أشوف فيها خطيبتك هنا يا تامر. تامر: هو فيه إيه يا أيمن؟ هي تهاني عملتلك حاجة؟ بعدين هي جاية صيدليتنا مش جاية بيتك يعني. أيمن: أنت قلت إيه؟ صيدليتنا؟ أنت قلت كده؟ تامر: أيوه قلت كده. أيمن: أنت تقصد صيدليتي وصيدلية أبويا؟

تامر: آه، نسيت بس متنساش إن نص الصيدلية ده كان لينا. أيمن: ده كان زمان، قبل ما أبويا يبيع نصيبه ويمشي من هنا. وأبويا اشترى نصيب أبوك، وفي الآخر أنت وأبوك ضيعتم فلوسكم. تامر: خلاص يا أيمن، مفيش داعي نفتكر الماضي دلوقتي. أيمن: لأ، أنا بس بفكرك إنك وخطيبتك فاشلين. وأنا بهزر معاك طبعاً، ومتزعلش مني. تامر: لا عادي، ولا يهمك يا أيمن. بعدين كلها شوية وقت وتعرف إننا مش فاشلين. أيمن: ليه يعني؟ أوعى هتكونوا هتطلعوا المريخ؟

تامر: لأ، متخافش، أنا هطلع من الفقر اللي أنا فيها. أنا نسيت أقولك يا أيمن حاجة مهمة أوي. أيمن: خير، إيه الحاجة دي؟ تامر: مش أنا شفت سمر وطارق امبارح. أيمن بغضب: وأنا مالي يعني شوفتهم أو لأ. تامر: أصل سمر بعتت معايا السلام ليك. أيمن: آه بقي كده، طيب ابقي روح وعرفها إني مش عايز أسمع منها أي حاجة ومفيش بينا سلام. تامر: ماشي يا أيمن، بس متزعلش نفسك. بعدين أنا أول مرة أشوف واحد زعلان من إنسانة كان بيحبها وكانت خطيبته.

أيمن: ممكن متفتحش الموضوع ده تاني، واتفضل شوف شغلك. والبني آدمة دي أنا مش عايز أسمع عنها حاجة نهائي، ماشي يا تامر. تامر: ماشي يا أيمن، اهدي بس ومتزعلش نفسك. أيمن: أنا طالع عشان أتغدى، خلي بالك من الصيدلية. تامر: بألف هنا يا ابن عمي. أيمن: طيب أنزلك غدا؟ تامر: لأ تسلم، أنا هطلب أكل. حال الصمت والحزن في طريق سفر يحيى وأميرة إلى أن...