رواية حب الأرسلان الفصل الثالث عشر 13 - بقلم ميار محمود

في صباح يوم جديد الساعة 7 الصبح. قام مصطفى قلقان من حلم وشرب ميه وقرر أنه ينزل يبص على سارة. فتح باب الأوضة ونزل على السلم وتوجه لأوضة سارة وفتح الباب، بس اتفاجئ بإن سارة مش موجودة في الأوضة. فتح الحمام اللي موجود في الأوضة وبرضو ملقهاش. نزل تحت بسرعة زي المجنون خايف على بنته مش عارف يعمل إيه. بص تحت ملقهاش، طلع الجنينة وبرضو ملقهاش. فضل ينادي باسم سارة ولكن محدش بيرد.

الكل فاق على صوت مصطفى بقلق ومصطفى بصوت أشبه بالصراخ بينادي بأعلى صوت على سارة. الكل نازل على السلم بخوف وقلق ومحدش فاهم حاجة. أرسلان بقلق: في إيه يا عمي؟ سهام بخوف: مالها سارة وبتنادي عليها ليه؟ مصطفى بيتكلم بتأتأة: س. س. ا. ر. ة. وبيغمى عليه تحت صدمة الكل. بتطلع سمر تجيب برفان بسرعة من أوضتها. أرسلان بخوف وقلبه بيقوله أنها مش كويسة، والوحيدة اللي منزلتش على صوت مصطفى بيطلع يجري على فوق وبيفتح باب أوضتها، ومبيلقهاش.

بيخاف أكتر وقلبه يوجعه، بيدور في الأوضة كلها مش بيلاقيها. سمر بتجيب البرفان وتبدأ تفوق في مصطفى وبيستجيب، فبيفوق. نزل أرسلان جري على تحت. أرسلان بتوتر: سارة اتخطفت. سهام بدموع وصراخ: لا بنتي أنا عايزة بنتي، يعني عليكي يا بنتي ده انتي لسه صغيرة على المرمطة دي، أنا عارفة أنا السبب. وتقرب من محمد بإنهيار: بص بص يا محمد خلي يأخدني أنا بدالها سارة لسه صغيرة.

وقول له يا مصطفى قول له بص اتصل بيه وكلمه وقول له إنك هتطلقني بس يرجعلي بنتي، أنتم كلكم ساكتين ليه أنا عايزة بنتي. وبتجري عند الجد يونس: انت اللي فهمني قول لي ابنك يكلم إبراهيم ويقول له إن مصطفى هيطلقني ويرجع بنتي. يونس بحزن وألم: اهدى يا سهام إن شاء الله هنلاقيها خير بإذن الله. تليفون مصطفى بيرن فبيرد بسرعة. إبراهيم بضحك هستيريا: طلعت قد كلمتك ورجعتلي ابني مع إنكم مرحمتوهوش، واللي اتعمل في ابني هيترد في بنتكم. وكمّل

باستفزاز: ده لو لقيتوها معاك 8 ساعات عقبال ما الأكسجين اللي في الأوضة اللي فيها بنتك يخلص وتموت. مصطفى بغضب وصوت عالي: أنت عارف لو بنتي حصلها حاجة مش هرحمك يا إبراهيم. إبراهيم بعصبية: مش لما تلاقيها، عمتا هي عندكم في البيت بس فين. وكمّل بضحكة خبيثة: معرفش، يلا سلام بقى لما تلقوها ابقى كلمني. وقفل السكة على طول. مصطفى حاطط التليفون على ودنه بذهول وصدمة. ماجد وأرسلان في صوت واحد: قالك إيه.

مصطفى تحت تأثير الصدمة: قالي إن سارة في البيت هنا بس. أرسلان: بس إيه. مصطفى: قالي ندور عليها في البيت قبل 8 ساعات عشان المكان اللي هي فيه الأكسجين هيخلص. أرسلان زفر بضيق: صدقني هنلاقي سارة ومش هرحمه. سهام واقفة تحت صدمتها وعمالة تقول: عايزة بنتي. أرسلان: طب يلا كلنا ندور كويس، سمر انتي وتالا دوروا كويس في الأوضة بتاعتكم في كل حتة تتوقعوها. سمر وتالا: حاضر.

أرسلان: نبيلة خدي الخدم ودوروا كويس في المطبخ في كل حتة والأوضة بتاعتكم دوروا فيها. نبيلة: حاضر يا بيه. أرسلان: ماجد خد باباك ودوروا في الأوض بتاعتكم وفي الجنينة. ماجد: ماشي. أرسلان: أنا ومحمد هندور في أوضة الكراكيب وأوضة الجيم والأوضة بتاعتي وأوضة محمد. محمد: تمام. مصطفى بحزن: وأنا أدور فين. أرسلان: بص يا خالى انت دور كويس في الأوضة بتاعتك وأوضة جدى. مصطفى: تمام. نغم بهدوء: طب وأنا.

أرسلان: بصي حضرتك دوري في اوضتك بس كويس أوي في أي مكان ممكن تتوقعي حتى لو في الدولاب. وانتِ يا ماما دوري في أوضتك كويس والحمام والأوضة الصغيرة بتاعتك دوري فيها كويس. نغم: تمام. تيسير: ماشي يا بني، استرها يارب مش عارفة المصايب كلها جت مرة واحدة كده ليه. أميرة: طب وأنا. أرسلان: خليكي جمب سهام وجدي. أميرة: حاضر. أرسلان بصوت عالي: يلا كل واحد يدور في المكان اللي قولتله عليها عشان نكسب وقت.

عند سارة بتفوق بتلاقي نفسها في مكان ضيق ومش عارفة تتنفس. سارة بخوف: أنا فين، يارب أكون بحلم. سارة بصراخ وتخبيط جامد: يا بابا يا ماما، طفيتوا النور ليه، أنا إيه اللي جابني هنا، يا ماما انتوا عارفين أنا بخاف من الضلمة والأماكن الضيقة. وتنادي سارة وتخبط جامد وهي بتنهج ونفسها بيروح بالتدريج. في الفيلا عند إبراهيم. مراد بألم: شايف يا بابا عمل فيا إيه صدقني مش هرحمه، أقوم وأقف على رجلي من تاني وهقتله.

إبراهيم بغضب: ابعد عنه خالص، كفاية لحد كده اللي حصلك، احنا هنسافر بكرة إنجلترا ومش هنرجع تاني. مراد بهوس وانفعال: إنجلترا إيه يا بابا أنا مش همشي من هنا غير لما آخد سارة معايا. إبراهيم بغضب وصوت عالي: لا خلاص مفيش سارة تاني أنا خلاص خلصت منها. مراد بغضب: يعني إيه خلصت منها، أنا مش همشي من غير سارة فاهم. إبراهيم: مفيش تاني سارة خلاص، سارة ماتت ومحدش هيلاقيها، وانت هتسمع كلامي وإلا هترجع المصحة فاهم.

إبراهيم ساب ابنه ومشي. مراد بغضب: هنشوف مين اللي كلمته هتمشي يا بابا. في القصر الكل بيدور بطريقة جنونية. سمر: لقيتي حاجة يا تالا. تالا بحزن: للأسف لا. سمر: يارب نلاقيها بقى طيبة وتستاهل كل خير. تالا: يارب، بس هو مين الست اللي اسمها نغم دي. سمر: دي الدكتورة بتاعت العلاج الطبيعي بتاع بابا، بس الغريبة إني حاسة إن الكل عارفنها وبيعملوها كويس وهي شكلها طيبة أوي. تالا: فعلاً أنا كمان حسيت كده، فعلاً شكلها لطيفة.

سمر: طب يلا ننزل تحت. تالا: يلا. نزلت سمر وتالا. سهام بانهيار ودموع: ها لقتوها. سمر وتالا بحزن: للأسف لا. نزل ماجد وأحمد وبرضو ملقوهاش. ورجعت نبيلة والخدم وبرضو ملقوش حد. نزلت نغم وبرضو فشلت أنها تلاقيها. نزل مصطفى وعلى وشه فقدان الأمل. مصطفى بأسف وحزن: ملقتهاش، حد منكم لقها. ماجد: للأسف لا يا عمي. مصطفى: مفضلش غير أرسلان ومحمد، لسه منزلّوش. أحمد: لا لسه متفقدش الأمل بإذن الله هنلاقيها. مصطفى: يارب.

مصطفى راح قعد جمب مراته لأنه حاسس أنه هيفقد الوعي. عند أرسلان ومحمد دوروا في الجيم وفي أوضهم، مفضلش غير أوضة الكراكيب. محمد بخوف: أنا حاسس إن سارة مش بخير، سارة عندها فوبيا من الأماكن الضيقة ولو حسبنا الوقت نلاقي إن عدى أربع ساعات وسارة مش هتستحمل أربع ساعات كمان ده لو مفقدتش الوعي من بدري. أرسلان بعزم: لا هنلاقيها أنا متأكد، دور كويس. محمد: يارب.

بدأ يدوروا كويس بين الكراكيب والآلات الحادة وحركوا كل حاجة كانت في المكان وبرضو ملقوهاش. محمد: هنعمل إيه، برضو ملقنهاش. أرسلان بحزن: لا أكيد هنلاقيها متقلقش. طلع أرسلان ومحمد ونزلين تحت. في الشركة. أسر: صباح الخير يا سلمى. سلمى: صباح الخير يا فندم. أسر: اطلبلي قهوة مظبوط وهاتيها عند أرسلان في المكتب. سلمى: بس أستاذ أرسلان لسه مجاش. أسر بقلق: يعني إيه لسه مجاش، ده عمره ما اتأخر.

سلمى: للأسف لسه مجاش، بس ريان هانم جت وسألت عليه واتخانقت معايا ودخلت قعدت في المكتب وبعد ربع ساعة مشيت من غير ولا كلمة. أسر بقلق: ماشي أنا هروح ليه البيت، خلي بالك من الشغل هنا. سلمى: تمام يا فندم. في القصر. نزل أرسلان ومحمد بحزن. مصطفى بعيون حمراء من قلة النوم والقلق والضغط: ها لقتوها. محمد: للأسف لا يا بابا. أرسلان: احنا دورنا في كل مكان ممكن تتخيلوا، مفيش حتة مدورناش فيها. سهام بصدمة: يعني إيه مش هشوف بنتي تاني.

يونس بحدة: أكيد في مكان مدورتوش فيه يا أرسلان. أرسلان: للأسف دورنا في كل حتة في القصر. نغم بتفكير: لا في مكان أنا متأكدة إن محدش دور فيه. بص الكل ليها بصدمة. مصطفى بصدمة: إيه فين. نغم: في.