رواية حب المشاغبين الفصل السابع 7 - بقلم حنين هاني

بيلا: هو انت بترقبني بقا ولا إيه؟ مراد: يا شيخة روحي، وبعدين أنا كنت قاعد هناك أصلاً من ساعة وكنت لسه شايفك. بيلا: اه، هو انت اللي كان معاك بنت هناك دي أكيد حبيبتك؟ مراد: لا والله يختي، أنا مش مرتبط بس بفكر، وبعدين دي زميلة ليا وأنا بصراحة مش بطيقها. بيلا: ليه يعني؟ مراد: عشان بتحبني وأنا مش عاوز أأذيها أكتر من كده، أنا بختصر علاقتي معاها عشان أنا مش بحبها ومش عايزها تتعلق بيا أكتر من كده، فعشان كده بعملها وحش.

بيلا: أي حيلك حيلك، أي مصدقت؟ مراد: عادي يعني عشان متفكريش إني مرتبط، ده أنا سنجل السناجل. بيلا: يا سكر. مراد: يا قلب السكر. بيلا: وجع في قلبك. مراد: يا أختي هو انت تطولي تبقي قلبي؟ بيلا: مش عايزة أطول يا خفة. مراد: المهم بقى. بيلا: خير. مراد: قالولي إنك سألتي عليا، أي وحشتك؟ بيلا: لا ياشيخ. مراد: اه طبعاً، وبعدين أنا متوقعتش إنك تكوني دكتورة. بيلا: اهو بقى. مراد: طبعاً انتي مستغربة إزاي كنت في المكتب سيف وفي الكلية.

بيلا: بفضول. لا عادي يعني، مش عايزة أعرف. مراد: بصي يا ستي. بيلا: ركزت معاه بصري. مراد: رفع حاجبه وقالها: ما انتي مش عايزاني أحكي. بيلا: على فكرة أنا مش عايزة أعرف. ضحك مراد.

مراد: طيب خلاص هحكي، بصي بقى أنا أكبر إخواتي، فلما جت تسميني قالت مراد وبابا كان ناوي على سيف، فهو عشان كان بيحبها أوي نفذ لها رغبتها وسماني في شهادة الميلاد مراد، بس بقى هو من كتر حبه إن اسمي يموت سيف، مش بيناديني غير كده، فا لما اشتغلت معاه قالي هكتب المهندس سيف، بس في البيت اسمي مراد والشغل اسمي سيف. بيلا: اممم، طيب إزاي مهندس وفي كلية فنون جميلة؟

مراد: هحكيلك، بس خلي بالك مبحكيش غير للحبايب بس، وغمزلها. بصي أنا عديت ثانوية عامة تلت مرات بسبب إني مجبتش مجموع هندسة، مع العلم كانت بتقف على فرق بسيط، بابا قالي هدخلك خاص وأنا اللي رفضت وفضلت أعيدها وبردو في الآخر مجبتش مجموع، فا تالت مرة ماما كانت زهقت مني وراحت مقدمة ليا على الكلية دي، وعشان هي متأكدة إني مش بعرف أزعلها كانت واثقة إني هتعصب شوية وبعدين هقولها ماشي، بس دخلتها وبقيت آخد السنة بسنتين، بقا عندي 28 أهو ولسه متخرجتش، بس أنا لاقي نفسي في الهندسة، أنا قعدت أربع سنين أتعلم وأخد كورسات كتير ونزلت تدريب سنة لغايه ما حققت النجاح اللي كنت عاوزه الحمد لله.

بيلا: ماشاء الله، طيب دلوقتي أنا لما أناديك المفروض أناديك إيه؟ مراد: بيلا. بيلا: نعم. مراد: أصلي بحبه أوي. بيلا: حبك برص، ابعد. أيوه، أنا بردو أناديك إيه؟ مراد: ده انتي رخمة، ناديني مراد. بقولك، أنا محدش يعرف عني حاجة في الكلية، الكلام ده سر بينا يا صديقتي. بيلا: أكيد. مراد: طيب إيه بقى، مش هتعرفيني عليكي؟ ده أنا حكيت قصة حياتي وانتي لسه. بيلا: مش بحب أتكلم عن حياتي. مراد: ليه؟ بيلا: دي طبيعية فيا للأسف.

مراد: إحنا مش بقينا أصدقاء؟ بيلا: اممم، موافقة، بس ممكن أسألك سؤال؟ مراد: اتفضلي يا بلبلة. بيلا: ليه كدبت عليا وقولت إن الشقة هتاخد أكتر من شهر مع إنها بتعد أسبوع؟ مراد: احم، إيه الإحراج ده، وبصلها، عايزة الصراحة؟ بيلا: الصراحة. مراد: اتشديت ليكي من أول لحظة شوفتك فيها وكنت حابب أعرفك، فعشان كده قولت كده. بيلا: اممم. مراد: اممم. وفونه رن. مراد: أي ياحبيبتي. فريدة: فينك يا مارو؟ مراد: قاعد مع ناس ياحبيبتي.

فريدة: ناس مين ياحبيبي؟ يلا تعالى عشان نتعشى كلنا سوا. مراد: لا ياحبيبتي اتعشوا انتو، أنا مطول شوية. فريدة: مش هينفع، انت معاك مزة ولا إيه؟ مراد: ماما، مش وقت الكلام ده. فريدة: معاك مين؟ مراد: واحدة صديقة ليا. فريدة: طيب اديها الفون كده. مراد: ماما بقولك مش هينفع. فريدة: يلا يا مارو. مراد بص لبيلا وقالها: احم، ماما عايزة تكلمك. بيلا: اوكي. فريدة: الو، ازيك ياحبيبتي. بيلا: الحمد لله، حضرتك أخبارك إيه؟

فريدة: أنا زي الفل، انتي اسمك إيه يا قمري؟ بيلا: اسمي بيلا. فريدة: عاشت الأسامي ياحبيبتي، أنا فريدة أم مراد. بيلا: اتشرفت بحضرتك. فريدة: ده من زوقك ياحبيبتي، بصي بقى أنا عزماكي على العشا النهاردة. بيلا: شكراً والله، مش هينفع. فريدة: لا والله ما يحصل، هتجي يعني هتجي، وبعدين متقلقيش، مرات ابني ريان موجودة وخطيبة يونس برضو موجودة، يعني مش هتكوني لوحدك، ومن غير نقاش أنا مستنياكي انتي ومارو. بيلا: محبتش تكسفها.

بيلا: ماشي يا طنط. وأدت الفون لمراد. مراد بصوت واطي: إيه اللي انتي عملتيه ده يا ماما؟ فريدة: ولا مش عايزة أسمعلك حس، ساعة وتكون جيت انت وبيلا. وقفلت. مراد: احم، معلشي هي ماما كده اجتماعية وبتتكلم بطلاقة على طول. بيلا: لا ويهمك، دي زي العسل، ربنا يخليهالكم. مراد: انتي لو مش حابة تيجي أنا هقولها أي حاجة وخلاص. بيلا: لا طبعاً، أنا مش هينفع مروحش عشان خاطرها، هروح معاكم. مراد: بجد؟ طيب يلا بينا.

ومشيو، وبعد وقت وصلوا البيت. مراد: اتفضلي يا ماما. بيلا: شكراً. ودخلت. فريدة: مساء الخير، ازيك ياحبيبتي؟ ده انتي جميلة خالص، ماشاء الله عليكي، انتي مرتبطة؟ مراد: يا ماما اهدي. فريدة: انت مالك ياحبيبي، لما الحريم تتكلم العيال تسكت. مراد بصدمة: أنا عيل؟ بيلا ضحكت عليه. بيلا: وقالت: حضرتك عينك اللي حلوة. فريدة: لا والله، ده انتي زي القمر. بيلا: ربنا يخليكي. فريدة: يلا بقى نتعشى على طول، وقاموا كلهم.

عبد الله: وانتي بقى يا بيلا شغالة إيه؟ بيلا: أنا دكتورة فنون جميلة. عبد الله: ماشاء الله، مش باين عليكي خالص. فريدة: انتي عندك كام سنة؟ مراد أول ما سمع كده بص عليها. بيلا بصتله وحست إنه مصدق يعرف. بيلا: يعني ماشية في 27 أهو. فريدة: لسه صغيرة، مرتبطة بقى؟ عبد الله: فريدة سيبي البنت تاكل. بيلا: لا عادي يا عمو، سيبها براحتها، لا يا طنط مش مرتبطة. فريدة: طيب الحمد لله. وغمزت لمراد في كتفه: دي مرتبطة، إيه رأيك أخطبها لكم؟

مراد: مش دلوقتي يا ماما، بعدين. فريدة: طيب، وانتي يا بيلا قاعدة لوحدك فين؟ بيلا: قاعدة في الفندق عقبال ما الشقة تخلص وهنقل فيها. فريدة: يلا ياحبيبتي، أنا أعينك. وعدوا يتكلموا. وبعد ساعة بدأت تتعب وبصت في الساعة لقت إن معاد الدوا فاته. بيلا: معلش، أنا لازم أمشي دلوقتي. فريدة: لا مش هينفع، لسه بدري. بيلا: بتعب. بيلا: معلش يا طنط، أكيد هنشوف بعد تاني. وقامت وهي دايخة، ولسه هتمشي وقعت. مراد بصدمة: بيلا.