رواية حب الصدفة الفصل الثالث والأربعون 43 - بقلم ملك عتمان

فوق عند نوران وريم. ريم: مالك يا نوران بتعيطي ليه يا حبيبتي؟ إنتي متخانقة مع كريم ولا إيه؟ نوران بدموع: أيوة، أنا وكريم مبقاش ينفع نكمل مع بعض خلاص. ريم: إنتي بتحبيه يا نوران؟ نوران: بحبه بس ده حياتي كلها. ريم: أمال في إيه بقى؟ نوران: مينفعش نكمل مع بعض يا ريم، فارس مات بسبب إخواته وأنا مستحيل أبقى مع الشخص إن أخويا مات بسبب حد من عيلته.

ريم: إنتي عارفة إن كريم مكنش يعرف أي حاجة عن الإنتقام ده، وقولتلك كتير إن فارس عمل حادثة بعربيته، محدش قتله، ده قضاء وقدر ربنا وده عمره اللي ربنا كاتبهوله. عايزاكي تفكري كويس في الموضوع ده، كريم ملوش ذنب في أي حاجة من اللي حصلت. نوران: حاضر يا ريم. عند عمر كان بيلبس ونازل. مريم: إنت نازل؟ عمر: أيوة. مريم: رايح فين؟ عمر باسها من راسها: هقولك بعدين، ادعيلي إنتي بس. مريم بإبتسامة: ربنا يوفقك يا حبيبي، مع السلامة.

عمر: سلام. أول ما عمر نزل لقيت تليفونها بيرن. مريم: إزيك يا نهى؟ عاملة إيه إنتي وألين؟ حشتوني خالص. نهى: إحنا كويسين الحمدلله، إنتوا أخباركم إيه؟ مريم: إحنا تمام الحمدلله، بس بعد ممشيتوا والدنيا اتلغبطت أكتر من الأول، وعمر بيعمل نفسه مبسوط وهو جواه حزن كبير، أنا حاسة بيه بس هو مش بيبين، ده مش ناويين ترجعوا بقى؟

نهى: والله يا مريم الدنيا مش ملغبطة عندكوا بس، وعندنا كمان حاجات كتير حصلت هنا، إتفاجئنا بيها، المهم متكونيش قولتي لعمر إحنا فين. مريم: اطمني، مقولتلوش. نهى: طب أنا هقفل معاكي دلوقتي، أبقي بوسيلي البت سدرة، كان نفسي أشوفها والله. مريم: إنشاء الله ترجعوا وتشوفيها ونتلمى كلنا مع بعض زي زمان. نهى: إنشاء الله، سلام بقى، ألا ألين هترجع وأنا لسه معملتش الأكل. مريم: سلام يا حبيبتي. نهى أول مقفلت مع مريم لقت جرس البيت بيرن.

راحت تفتح لقته مروان. مروان: عاملة إيه يا نهى؟ نهى: تمام الحمدلله، واقف بره ليه؟ تعالى جوه. دخلوا جوه وقعدوا. مروان: جبتلكوا أكل بقى معايا عشان متتعبوش نفسكوا. نهى: بتيجي إنت في الوقت الصح، ألا ألين زمانها جاية من بره وكنت لسه معملتش الأكل. مروان: هي ألين مش هنا؟ نهى: أيوة، راحت الشركة لفارس ولا أدم ده، والله الواحد مبقاش عارف هو مين بالظبط. مروان بعصبية: وإنتي سبتيها تروح لوحدها؟

إفرضي طردها من الشركة زي معمل المرة اللي فاتت، إفرضي إيه ده، أكيد طردها. نهى: إهدى بس، مالك؟ أنا قولتلها أجي معاكي، قالتلي لا وإنها عايزة تروح لوحدها. مروان: مكنش ينفع برضو يا نهى تسبيها لوحدها، أنا ماشي. نهى: رايح فين؟ مروان: رايح لألين. نهى: طب إستنى هاجي معاك. ولسه بيفتحوا الباب عشان يطلعوا لقوا ألين واقفة قدام الباب والدموع بتنزل من عينيها. نهى: ألين مالك يا حبيبتي؟ إيه اللي حصل؟

ألين بعياط مليء بالشهقات: فارس طلع مات بجد. مروان: طب تعالي جوه وإحكيلنا كل اللي حصل بالظبط. دخلوا جوه وقعدوا. مروان: ها يا ألين، عرفتي منين إن فارس مات بجد وإن اللي شوفناه في الشركة مش هو فارس؟ ألين: أنا لما روحت الشركة قابلت أدم وقالي إنه مش فارس، هو أخو فارس التوأم وإسمه أدم. نهى: إنتي متأكدة يا ألين؟ أصل فارس مكنش ليه إخوات خالص غير نوران.

ألين: هو قالي إنه لما روح سأل أبوه وأمه عن اللي في الصورة معايا، قالوله إنهم مكانوش بيخلفوا، ويوم ولادته هو وفارس أخدوه بمساعدة ممرضة من غير محدش يعرف، لإن أم فارس مكنتش تعرف إنها حامل في توأم، وطالب مني أنزل معاه مصر عشان أوديه لعيلته. مروان: طب إنتي هتعملي إيه دلوقتي؟ هتنزلي مصر معاه؟ نهى: ألين مينفعش تنزلي مصر، لو نزلتي حاجات كتير أوي هتتغير، فكري في إبنك طيب. ألين: مهو أصل أدم عرض عليا الجواز.

مروان: إنتي بتقولي إيه؟ ألين: هو قالي أوديه لعيلته، وعشان مينفعش أنزل مصر هيتجوزني على ورق بس عشان يحمي إبني، ولما أخلف هنتطلق. مروان: وإنتي هتعملي إيه؟ نهى: أكيد إنتي مش هتوافقي صح؟ ألين: أنا موافقة أتجوزه. نهى: إنتي أكيد بتهزري، هتتجوزي أخو فارس حب عمرك؟ ألين بعياط: هو إنتوا مبتحسوش بيا ليه؟ هو إنتوا فاكريني مبسوطة أوي إني هتجوز حد غير فارس سواء أخوه أو مش أخوه؟

أنا كل يوم قلبي بيتقطع لما أفتكر إن فارس خلاص مبقاش موجود معايا، أنا هتجوزه بس عشان أحمي إبني مش أكتر، وأنا أخدت قراري خلاص، ياريت محدش يناقشني في الموضوع ده تاني، أنا داخلة أوضتي. مروان: أنا همشي. نهى: ماشي فين؟ متخليك قاعد شوية. مروان: ورايا شغل، هبقى أجيلكم تاني، سلام. نهى: مع السلامة. مروان طلع ركب عربيته وهو متعصب، وأول موصل بيته فضل يكسر في أي حاجة حواليه.

مروان بشر: بقى أنا أخلص من فارس يطلع لي أخوه، شكلك يا أدم هتحصل أخوك فوق أهوه، تونسوا بعض برضو. في مصر. يوسف: زي مقولتلك، هتكلمها وتقولها إنك بتحبها، إنتوا عشان متخانقين فطبيعي هتقفل السكة في وشك، فتقوم إنت قبل متقفلها في وشك تعمل نفسك عربية خبطتك، تقوم هي جيالك علطول. كريم: إنت متأكد إن الخطة دي هتنجح؟ يوسف: اطمن، أنا شوفتها في فيلم قبل كدا ونجحت. كريم: ربنا يستر. يوسف: إتصل عليها يلا. كريم: حاضر. في فيلا الدمنهوري.

ريم ونوران كانوا قاعدين بيتكلموا مع بعض. نوران: ريم إحنا السنادي ضاعت علينا في الكلية، إحنا كدا نعتبر مدخلناش الكلية من أساس لإن دي أول سنة لينا. ريم: مش مهم يا نوران، إنتي عارفة إن مكنش بمزاجنا السنة دي، حصل فيها مشاكل حاجات كتير أوي مكوناش نتخيل إنها تحصل. قطع كلامهم رنة تليفون نوران. نوران: إلحقي يا ريم ده كريم. ريم: طب مترديش. نوران فتحت المكالمة. نوران: بتتصل ليه؟

كريم: عشان أقولك إني بحبك وخلاص مبقتش قادر أعيش وإنتي بعيدة عني كدا. نوران والدموع بدأت تتساقط من عينيها: وأنا قولتلك إن مبقاش ينفع يا كريم، سلام. كريم: نوران إستني، ونبي متقفلي، أنا عايز أقابلك، عايز فرصة واحدة بس، ولو مرضتيش تكملي معايا بعديها صدقيني مهكلمك تاني. نوران بصت لريم: بيقول عايز يقابلني مرة واحدة، ولو موافقتش بعديها أكمل معاه مش هيكلمني تاني وهيعتبر موضوعنا إنتهى. ريم: وافقي، قوليله ماشي يلا.

نوران: طيب يا كريم أنا موافقة هقابلك، إمتى؟ كريم بفرحة: كمان ساعة عند البحر في المكان اللي بنقعد فيه علطول. نوران: طيب سلام. يوسف: إيه يا بنى؟ منفذتش الخطة ليه؟ كريم: لا مهو أنا خلاص قدرت أقنعها إنها تقابلني. يوسف: مدام إنت تقدر تقنعها من الأول متعب أمي معاك ليه بس وأخطط وأنفذ؟ كريم: معلش، هنعوزك في وقت تاني متقلقش. يوسف: تبقى بتحلم، أنا خلاص مش مساعدك في حاجة تاني، مشاكلك بتاعة الحب دي حلها بنفسك.

كريم: تصدق أنا غلطان إني جوزتك أختي عشان بتحبها ووقفت جنبك، ولغاية دلوقتي مقولتلهاش إني أخوها لغاية متتنيل وتحبك مع إني مش عارف لو حبتك هتحبك على إيه. يوسف: هتحبني زي ما نوران بتحبك كدا. كريم: بقولك إيه، وسع كدا أنا مش فاضيلك، ورايا معاد مع نوران. يوسف: سلام يا عم الحبيب.