رواية حب بنت الشوارع الفصل الخامس 5 - بقلم ملك اسامة

صقر صقر صقر فاق من تخيلاته على صوت حياة. صقر بتوهان: في إيه!! حياة: أنت اللي في إيه؟؟ فينك كل ده؟ ناديتني وقلتلي متطلعيش واقفلي الباب وبعد كده سرحت. صقر: آه تمام. أطلعي انتي. حياة بصتله باستغراب وطلعت. صقر اتنهد واستغرب نفسه من تفكيره ده. طلع موبايله واتصل على صاحب طفولته. _عم الناس إيه الأخبار؟ صقر: تمام التمام. وانت؟ _الحمد لله بخير. صقر: يارب دايما. المهم عايزك في حاجة. _إيه هي؟ صقر حكاله كل اللي حصل...

وصاحبه بدأ يضحك. صقر: في إيه يا سفيان بتضحك ليه؟ سفيان: أصل ده الحب يا صقر يا صفتي. صقر: حب إيه بس يابني انت كمان. سفيان: والله ده الحب. بس انت حبك مختلف. انت عايز تمتلكها وتبقى ملكك، عشان كده اتخيلت اللي حصل. صقر: يعني!! سفيان: يعني أنت حبيت يا باشا. صقر ضحك: طيب أقفل أقفل يا أخويا. قال حبيت قال. قفلوا وصقر حاول يشغل نفسه عن التفكير في حياة وبدأ يشتغل. *** بالليل.

ناهد وعاصم جم وقعدوا مع صقر وحياة شوية، بعد كده طلعوا يرتاحوا. حياة طلعت جابت ملف من أوضتها ونزلت توريه لصقر. حياة: بص الكام نقطة دول كده. صقر مش مركز معاها أصلا. حياة: صقرررر. صقر فاق: إيه في إيه؟ حياة قفلت الملف: لا دا واضح إنك مش هنا خالص. أنا طالعة لما تبقى تفوق نبقى نتكلم. حياة طلعت أوضتها وصقر اتنهد وطلع أوضته. *** مر يومين. صقر: حياة عيد ميلاد نونا النهاردة. حياة: آه عشان كده زعلانة وكده النهاردة.

صقر: هي فاكرة إن محدش افتكرها، بس إحنا هنعملها حفلة ومحتاج مساعدتك. حياة: أكيد معاك طبعًا. صقر: خلاص تمام. بابا هياخدها تخرج وإحنا هنبدأ نظبط كل حاجة، وسفيان صاحبي ووليد هييجوا يساعدونا. حياة: تمام. وفعلًا عاصم أخد ناهد وخرجها، وسفيان جه هو ووليد وتولين مصممة الحفلات وناس كتير جت عشان يبدأوا يظبطوا الفيلا. تولين على السلم: ما تيلا يا سفيان هات البلالين. سفيان: لحظة يا تولين بنفخهم. تولين: وأنا هفضل متعلقة كده يعني؟

حياة بتبصلهم وبتضحك وتبص لصقر بفرحة أنه بيحب مامته كده، وبتتمنى من جواها لو كان عندها عيلة زي كده. وليد قرب منها. وليد: أحم. آسف. حياة: متتأسفش. أنا فهمت أنت عملت كده ليه، بس طريقتك كانت غلط على فكرة. وليد: عارف عشان كده بتأسف. حياة بضحك: أعمل بإسفك إيه أنا بقى!! يلا ساعدني. وليد ضحك: أساعد مساعدش ليه يعني؟ بدأ وليد يساعد حياة وصقر قرب منهم وخلى وليد مكانه، وهو اللي بدأ يساعد حياة.

التجهيزات خلصت وكلهم طلعوا يجهزوا، وحياة اتفاجأت بفستان موجود في أوضتها وجمبه ورقة. "حياة دا فستان حفلتك البسيه هيبقي حلو عليكي" صقر الصفتي

حياة ابتسمت وأخدت دش ولبست الفستان وعجبها خصوصًا بلونه السماوي وأنه طويل ومنفوش والكتاف متغطية بطريقة حلوة جدًا. لبست التاج اللي كان معاه وعملت شعرها كحكة ونازل منها كام خصلة ولبست جزمته وكانت باللون الأسود. خلصت وحطت روج وبس. واتنفست ببطء وفتحت الباب. أول ما فتحت الباب لاقت تولين في وشها. تولين: آععع قمر قمر. حياة ابتسمت: شكرًا.

تولين جريت على أوضة صقر وخبطت وهو فتح، وقالتله إنها حلوة جدًا وإنها لبست الفستان. ابتسم برضا وقفل الباب يكمل لبسه. الكل خلص لبس ونزلوا عشان يستقبلوا الناس. كل رجال الأعمال جم، حتى أميرة جت. عاصم اتصل بصقر وقاله إنهم جايين. صقر أمرهم يطفوا النور. وبعد وقت دخلت ناهد وعاصم ونزل عليهم ورد من فوق والنور اتفتح وكلهم بيغنوا لناهد. ناهد اتبسطت وحضنت عاصم وصقر ووليد وسفيان وحياة، وفرحت بالمفاجأة والحفلة بدأت.

بعد وقت حياة انسحبت عشان تطلع تتمشى في الجنينة وصقر عينه عليها. أميرة: أهدي مش هتتخطف يعني. صقر: هي مين دي؟ أميرة: البنت الجربوعة اللي سبتني عشانها. صقر: أميرة. قاطع كلام صقر صوت صريخ حياة باسمه.