رواية حب مستحيل الفصل العشرون 20 - بقلم سارة اللومي

جسمي مكسر وتعبانة، مش قادرة أقوم حتى. والأهم إني مكنتش قادرة أواجهه بعد اللي حصل بينا امبارح بالليل. كتر التفكير في الأحداث اللي حصلت في التلات أيام اللي فاتوا بس وجعلي دماغي. كنت لوحدي في الأوضة. قمت وفضلت قاعدة في سريري بفكر هعمل إيه، أروح ولا أستنى؟ ما هي الحكاية اتعقدت خالص. ولو قعدت هنا أكتر من كده هتحصل كارثة. لقيت حياة داخلة وجايبالي تفاح. "صباح الخير يا بسمة، مالك يا حبيبتي؟ دبلانة ليه قوي كده؟

دا انتي كنتي زي الوردة المفتحة. إيه اللي حصلك؟ "مفيش حاجة، ما تشغليش بالك." "ما أشغلش بالي إزاي؟ انتي شفتي نفسك في المراية!؟ "لا، ما هو أنا متعودة على كده. كل شهر هما يومين تلاتة بس وهبقى كويسة." "طب إيه رأيك تقومي تغيري جو شوية؟ النهاردة السوق الأسبوعي وأنا والبنات رايحين. لو تحبي ناخدك تتمشي معانا هتبقي أحسن. قولتي إيه؟ "قولتلِك مش عايزة يا حياة، تعبانة. سيبيني براحتي بقى." "وبعدين معاكي؟ هتفضلي هنا بين أربع حيطان؟

طيب تعالي آخدك لدكتورة البلد يمكن تديكي مقويات." "ارجوكي يا حياة، أنا بخير وما فيا حاجة، بس عايزة أرتاح شوية." "انتي مخبية عليا إيه يا بنت؟ شكلك مخطوفة كأنك شايفة عفريت. ما أنا قولتلك إني كاشفاكي يا بت. قولِلي مالك؟ "بصراحة؟ مش عايزة أطلع من الأوضة لأني مش عايزة أقابل أخوكي تاني." "هو عمل معاكي حاجة؟ قولي بس ما تخافيش، دا أنا كنت أطينلك عيشته!!

"لا، مفيش حاجة. بس أنا مش عايزة مواجهات بيني وبينه. خايفة أهلك يحسوا بحاجة. وهو بصراحة زودها قوي اليومين اللي فاتوا. كفاية بقى لحد كده." "يا ستي، إذا كان على محمد ما تشيليش هم. هو طلع مشوار بعيد، مش راجع قبل الليل. أصل أنا امبارح كلمت أمي في الموضوع." "كلمتيها؟ قولتي لها إيه؟ اوعي تكوني خربتي الدنيا؟ "لا ما تخافيش.

أنا قولتلها: 'ابنك مش عاوز يسيب بنت الناس في حالها وملاحقها زي خيالها، دا غير إنه بقاله تلات أيام ما خرجش من البيت. ما تشوفيله صرفة ولا تكلميه يغور لأي مكان يخلينا نتنفس شوية!! "هاه، وكلمته؟ "أيوه. وقالها إن عنده توصيلة لواحد في محافظة بعيدة شوية، ويمكن يتأخر لحد الليل." "طيب الحمد لله. يبقى أنا أقوم أغسل وشي وأروح الجنينة أشم شوية هوا نضاف بقي."

"أحسن حل. وأنا طالعة كمان. ولو عايزة حاجة أجبهالك وأنا راجعة، قوليلي، اوعي تتكسفي." "لا يا حبيبتي، سلامتك. ابقي سلميلي على خالتي أم نفيسة لو روحتي عندها." "طيب، ماشي. سلام عليكم." "وعليكم السلام ورحمة الله." البنات طلعوا وبقيت أنا وطنط نفيسة لوحدنا. طلعت عالجنينة أتمشى شوية وفضلت يجي نص ساعة. قولت يمكن طنط تحتاجني ولا حاجة. جيت أطلع لقيته واقف قدام الباب!!! يا لهوي، هو هنا؟ مش قالوا إنه غار ومش راجع إلا بعد المغرب؟