رواية حبك نار الفصل الخامس 5 - بقلم أسماء الكاشف

اتخبطت في شخص ووقعت على الأرض بعصبية. رفعت وشي عشان أهزقه، بس لقيته بيمدلي إيده عشان يقومني. = أنا آسف يا مروة، خليني أساعدك. بصيتله بغيظ وضربت إيده برخامة وقمت لوحدي. * شيل إيدك يا جدع أنت، أحسن توحشك. أسلوب مختلف عني، بس معاه هو وبس. بقلب شريرة واديتله ضهري وأنا ببرطم وبمشي. * واحد تافه، دايماً طالعلي في كل حتة زي عفريت العلبة. _بتكلمي نفسك وبتبرطمي ليه يا حلوة؟ بصيت لغادة بهدوء وقولت بعصبية.

* الأستاذ فارس ده خلاص خنقني، كل شوية موقف زفت. = عمل إيه المرة دي بس؟ * خبطني ووقعني، وعلى أساس إنه ما يقصدش. واحد لزج، قولتها ووصلت للكرسي المخصص ليا. قعدت وغادة قعدت جنبي وهي بتضحك. _ما أنتِ اللي حلوة، وهو هيموت عليكي. * أنا متجوزة، ماليش في كلام الصحوبية ده. _ماهو ما يعرفش إنك متجوزة أصلاً، أنتِ محدش يعرف عنك حاجة. أنتِ بالنسبة لهم سر كبير عايزين يكشفوه. اتنهدت بهدوء. * عارفة، بس أعمل إيه؟

أبيه عاصم هو اللي قايل إن محدش يعرف، والكل هيعرف وقت الفرح نفسه. ده مجرد كتب كتاب. * ساعات بحس عاصم ما بيحبنيش ومش عايز حد يعرف بعلاقتنا، كأنه بيستعر مني. حطت إيدها عليا وقالت برزانة. _مش كده، متفكريش في الهبل ده. هو بس خايف عليكي، عشانك صغيرة بس. قولت بعصبية. * صغيرة إيه؟ ده واحد خاين، شوفته معاها تاني يا غادة. البجحة جت ليه، وهو طنشني انهارده عشانها ومجاش المدرسة ياخدني زي كل مرة. _يمكن أنتِ فاهمة حاجة غلط.

جيت أتكلم، المدرس دخل فسكت وكملت الحصة. دخلت البيت ملقيتوش في الشقة، طلعت أوضتي وقولت. * أكيد راح للبنت الملزقة دي. طيب أنا هوريك. قولتها وابتسمت بخبث وأنا بطلع دعوة للحفلة. ونمت شوية. صحيت على صوته بيخبط على الباب. _مروة، اصحي عشان تتعشي. * حاضر. قولتها بنعاس. دخلت غسلت وشي ونزلت، لقيته قاعد بيتعشى. قعدت جنبه من غير كلام. _آسف عشان اتعصبت عليكي. بصيتله بحب. * أنا كمان آسفة. قولتها ورميت الكرامة ورا ضهري.

ابتسم ليا بعينيه اللي بتسحرني. * حبيبتي يا ناس، أنتِ أعلى حد عندي يا مروة، وخليكي فاكرة ده كويس. قالها وقام من مكانه دخل المطبخ وأنا ببص عليه بحب. ما يعرفش قد إيه أنا بحبه وبغير لما بتقرب منه أي بنت. بس لما افتكرت البنت اللي شفته معاها بالليل والحبوب اللي بيديهالي، فوقت شوية وقولت.

* غبية، وبيضحك عليا بكلمتين. قومت من مكاني وجيت أطلع أوضتي إذاكر شوية. نادى عليا وفى إيده الحبوب. بصيتله بحزن. المرة اللي ما تتعدش، بيخذلني. أخذتها منه وشربت المايه قدامه من غير ما أبلع. * شكراً يا أبيه. ودخلت مخذولة. هستنى تيجي مرات عمي وأحكيلها. هي بتحبني وهتساعدني. وقفت قدام المراية. * ما أنا حلوة أهو، ليه ما بيحبنيش؟

طيب هخليك تندم. قولتها وجريت على خزنة اللبس وطلعت فستان أحمر قصير مفتوح من الضهر لنصفه، وهو تحت الركبة بمسافة صغيرة. لبسته ووقفت قدام المراية، لقيت حوالين نفسي وصفرت بمرح. _مزة. حطيت إيدي على شفا*يفي. التليفون نور شوية ووصلتني رسالة على الواتس. _هشُوفك انهارده يا حب، بلاش تلبسي قصير عشان بغير. اتنهدت بغيظ وبعتله. * حل عني بقى يا أخي. لو أنت راجل عرفني نفسك، مش مستخبي ورا رقم. بعت رسالة بس مفتحتهاش.

ورنيت على غادة عشان تجهز. عملت نفسي نايمة على السرير واتغطيت عشان الفستان ما يبانش. وحسيت بيه دخل الأوضة، باس خدي وخرج. فتحت عيني وبصيت مكانه بحزن. شوية سمعت صوت العربية بتتحرك، عرفت إنه خرج وجيه وقتي. وقفت قدام المراية وحطيت ميكب، ثقلته شوية. كنت عايزة أحس إني جميلة ومرغوب فيها. حبيت أعرفه إن الكل هيجري ورايا، وإني أستاهل أتحب. اتسحبت وخرجت.