رواية حبي الاول الفصل الرابع 4 - بقلم نيرة عبد الله

أحمد بصلة بغضب وقال: ما تتلم يعم انت وتاخد بالك من كلامك. الشخص: انت مين اصلا وبعدين انت مالك بتدخل بيني وبينها؟ وعلى ما أظن إن شيمو مش مضايقة ولا إيه. شيمو: أيوا طبعاً ي مروان. أضايق ليه؟ وبعدين انت زي أخويا بالظبط ومفيش حد هنا له حق إنه يدخل. أحمد بصلها بغضب وأخد بعضه ومشي. محمد راح وراه. بسمة: أنا آسفة ي شيمو على تصرف أحمد. معرفش هو إيه اللي عمله ده أصلاً. شيمو: حصل خير ي بسمة. بس ياريت تقولي له يلزم حدوده.

بسمة: أكيد ي شيمو. هكلمه النهاردة وأقول له. شيمو: أفندم؟ وتكلميه ليه؟ بسمة: عشان أقوله إنك اتضايقتي. شيمو: لا، اياكي تتكلمي معاه. كفاية اللي قولته له وهو أكيد عرف غلطه. نور: طب ممكن نقفل على الموضوع ده ونكمل لعب بقى؟ مروان: أيوا نور معاها حق. أنا اللي عليا الدور. وسحب الورقة وكان عليه الدور إنه يمثل. وفضلوا يكملوا لعب ويضحكوا ويهزروا. محمد: إيه اللي أنت عملته ده ي أحمد؟

أحمد: أنت مش شايف كان بيتكلم معاها إزاي وبيقولها إيه؟ محمد: وأنت مالك بتدخل ليه أصلاً؟ وفي الآخر حرَجَك. أحمد بعصبية: محمد قفل على الموضوع ده. محمد: حاضر ي أحمد. بس فوق شوية لنفسك بقى. أحمد بص له وطلع بيته. ومحمد راح بيته. في بيت شيما. نور: بس شكله بيحبك وبيغير عليكي أوي. شيما: هو مين ده؟ نور بغمزة: أحمد. شيما: وهو يغير عليا بصفته إيه أصلاً؟ وبعدين يغير عليا من مروان ده أخويا في الرضاعة.

نور: بس محدش يعرف إنه أخوكي الرضاعة. شيما: نور، أنت هتستعبطي؟ ما كل زمايلنا عارفين إن مروان أخويا في الرضاعة من أيام الحضانة. نور: بس أحمد ما يعرفش. شيما: يعرف أو ما يعرفش، هو ملوش علاقة بينا. نور: طيب يختي أنا هقوم أمشي يلا. شيما: لا خليكي قاعدة معايا شوية. نور: يابنتي الساعة بقت 11 واحنا عندنا مدرسة بكرة. يدوب ألحق أروح بقى عشان ننام. شيما حضنتها: طب خلي بالك من نفسك ي حبي. واصحي بدري مش كل يوم نتأخر بسببك.

نور بضحك: حاضر يختي. ونزلت وسابتها. ونور نزلت وشيما نامت على السرير. وكانت بتفتكر غيرة أحمد عليها. وكان جواه فرحان. وفتحت الفيس وجابت أكونت أحمد وفضلت تقلب فيه لحد ما نامت. تاني يوم. شيما صحت متأخرة ولبست هدومها بسرعة ونزلت من غير فطار. عشان نور كانت بترن عليها كتير. شيما: معلش ي نور راحت عليا نومة. نور: لا ولا يهمك. بس بسرعة عشان متأخرين أصلاً. واخدتها وراحوا المدرسة بسرعة. في المدرسة.

محمد: لسه زعلان من اللي حصل امبارح؟ أحمد: لا، وهزعل ليه؟ أنا فعلاً غلطت إني اتدخلت بينهم. مكنش لازم أعمل كده. محمد: أنا عارف إنك بتغير عليها. بس كان المفروض تتحكم في غيرتك ومش قدام الناس تظهرها. خاصة إنك مش عارف مشاعرها من ناحيتك. أحمد: خلاص ي محمد، موضوع وانتهى وخلص. محمد: تمام ي أحمد. يلا عشان الطابور بدأ. وكل واحد طلع على فصله. وبدأ ياخد حصصه. وأحمد مكنش مركز في حاجة.

وكان بيفكر إن ممكن يكون فيه حاجة بين شيما ومروان ولا لأ. لحد ما جه وقت البريك. نور: مالك ي شيما وشك أصفر ليه؟ شيما: لا ي نور أنا كويسة، متقلقيش. نور: طب خليكي هنا، هروح أجيب ليكي عصير. شيما: أنا هاجي معاكي، مش هقعد لوحدي. نور: طب يلا تعالي. ولسه شيما هتقوم حست إن الدنيا بتلف بيها ووقعت على الأرض.