رواية حبيبي الشبح الفصل العاشر 10 - بقلم سوس خليل

ايمن ويونس فضلوا مستنيين ياسمين تصحى. ياسمين بخرف: منك لله، اللهي تولع. يونس وايمن بصوا لبعض، وبعدين بصوا لها تاني. ياسمين: منك لله يا يونس، اللهي تتشك في لسانك يا ابن صباح، يا رب خد لي حقي منه، راجل لسانه فرّق له. يونس اتصدم وبص لايمن شافه بيضحك عليه، بس ضحك ايمن ما كملش لما سمع كلام ياسمين.

ياسمين: وايمن ده راجل يا ست، نفخ على الفاضي، ده عيل سوسة ومش قد كلامه، ده يوديك البحر ويرجعك عطشان، آآآآآآه يا رب تقع من على السلم وإنت ماشي يا ابن أم، ما عرفش أمك اسمها إيه، منك لله، أشوف مسحول سحلة سودة. ايمن بص ليونس بصدمة وهو بيشاور على نفسه بمعنى "ده أنا؟ "، يونس بصله بضحكة وهز راسه فوق وتحت بمعنى "آه". ايمن بص لياسمين بتوعد لما تفوق.

كملت ياسمين: وناصر يا رب ده بقى الراس الكبيرة، احرقه يا رب، اشويه، اقليه، حطه في الفرن أي حاجة بس انتقم منه، بتاع الكبد والقوانص ده، ربنا ينتقم منك يا ناصر يا ابن أم ناصر، يا رب وإنت نازل من سلم فيلتك تتزحلق تتكسر رقبتك وتخش جهنم بريس، ويبقى صاحب البيت اللي طردني. ايمن بصدمة: إيه ده، دي جابت رجل الكل، البنت دي إيه يا خربيت لسانها!

يونس بصدمة: أنا كنت فاكر إنها طيبة ومش محترمة، قصدي محترمة بس طلعت عكس كده خالص، دي بتشتم فينا في أحلامها. ايمن بسخرية: كلمة الحق بتظهر أوي، واحدة يا شبح. يونس: نستنى بقى لما تصحى علشان تكلم الزفت. ايمن هز دماغه. بعد شوية ياسمين فاقت وقالت وهي حاطة إيديها على دماغها: آه، هو اللي حصل؟ ايمن بصلها بتوعد. ياسمين بخوف: هو إنت بتبص لي كده ليه؟ وبعدين بصت ليونس: هو بيبص لي كده ليه يا يونس؟

لكن لقت يونس بيبص ليها نفس بصة ايمن، خافت أكتر: إيه ده؟ إنتوا هتبيعوني قطع غيار ولا إيه؟ في إيه يا جدعان مالكوا؟ ايمن كان لسه هيقرب منها بس الباب خبط، راح بص في العين السحرية لقى صبا وأمها، جري بسرعة علشان يلبس النقاب. ياسمين باستغراب: في إيه؟ مين على الباب؟ وليه بتلبس البتاع ده؟ ايمن وهو

بيلبس النقاب اتكلم بسرعة: دي الدكتورة صبا جارتك اللي ساكنة في الشقة اللي جنبك هي ومامتها، بصي أنا معرفهم إني صاحبتك واسمي سوزان وجيت لك زيارة أشوفك ولما إنتي تعبتي خبطت عليها وجت كشفت عليكي، أوعي تقعي لا لسانك قدامها وتقولي ايمن، أنا اسمي سوزان ماشي؟ ياسمين: ماشي، طب يلا يلا، البت هتحنط بره. ايمن راح فتح وعمل صوته بصوت البنات: أهلاً أهلاً، اتفضلوا.

ياسمين سمعت صوته استغربت بس افتكرت إنه عامل صاحبتها وكانت هتضحك على منظره وهو بيتكلم بس مسكت نفسها. أم صبا وهي ماسكة صينية الأكل ورايحة جنب ياسمين: إزيك يا بنتي، عاملة إيه؟ ألف سلامة عليكي، وراحت حضنتها. ياسمين بابتسامة وهي بتحضنها: الله يسلمك يا طنط، تسلمي لي يا رب، وبعد كده خرجت من حضنها وبصت على الصينية: إيه يا طنط اللي حضرتك جايباه ده؟ تعبتي نفسك ليه؟

أم صبا بابتسامة: ما فيش تعب ولا حاجة يا بنتي، ده إنتي زي بنتي صبا بالظبط، وإنتي يا نن عيني قاعدة لوحدك لازم أسأل عليكي. ياسمين دمعت من كلامها وحنية قلبها، أم صبا شافتها كده حضنتها: لالالا، مش عايزة أشوف دموعك دي، إنتي تعبانة ما ينفعش كده، يلا علشان تاكلي علشان تخفي. ياسمين مسحت دموعها: شكرًا يا طنط بس أنا مش جعانة والله.

أم صبا: لا إنتي كده تزعليني، هتكسفيني، ده عاملة ليكي فراخ ورز وسلطة، ما ليش أنا في أكل العيانين ده، فراخ مسلوقة ومش عارفة إيه مسلوق، أنا عاملة آه فراخ مسلوقة بس دي هتاكليها دلوقتي وبعدين بقى هتاكلي اللي أنا عاملة ده، يلا بقى علشان تاخدي الدوا.

ياسمين ابتسمت وابتدت تاكل، وأم صبا قاعدة تبص عليها بابتسامة وهي حزينة على حالتها إن هي اتيتمت وعايشة لوحدها، دمعت بس مسحت الدمعة قبل ما حد يشوفها بس ايمن شافها وعرف قد إيه إن أم صبا قلبها حنين وطيبة، ابتسم من تحت النقاب على طيبة قلبها، بعد شوية ياسمين خلصت أكل وصبا ادت لها الدوا واطمنت إنها بقت كويسة عن الأول بكتير وقالت لايمن يعمل ليها كمادات علشان لسه في سخونية.

صبا بابتسامة: بصي بقى يا ست ياسمين، إحنا كل يوم هنتغدى مع بعض، مرة تيجي شقتنا تتغدى معانا ومرة إحنا نجيب الأكل ونيجي نتغدى معاكي، تمام؟ ياسمين بابتسامة كسوف: مش عايزة أتقل عليكوا. صبا بابتسامة: لا ما تقوليش كده لا تقل ولا حاجة، وبعدين الموضوع ده كان اقتراح ماما، إيه رأيك هينفع تكسفي ماما؟ ياسمين: لا طبعًا ما أقدرش، بس أنا مش هعمل كده غير لما أدفع معاكوا تمن الأكل.

أم صبا: أخص عليكي يا صبا، إحنا مش هنرضى تخليكي تدفعي حاجة، إنتي زي صبا بالظبط، ولا إنتي مش معتبراني زي أمك؟ ياسمين بسرعة: لا والله يا طنط مش قصدي، أنا بس علشان إنتوا 2 ستات لو حدكوا وحضرتك عارفة يعني الحاجات بقت غالية، هنخلي الأكل بالنص وبعدين حضرتك ما تقلقيش أنا ماهيتي حلوة ومناسبة جدًا، ها قولتي إيه؟ أم صبا: اللي يريحك يا بنتي بس أنا مش راضية. ياسمين بابتسامة: معلش أنا كده هبقى مرتاحة.

أم صبا بابتسامة: ماشي يا حبيبتي، وبعدين بصت لايمن: إيه يا بنتي، إنتي لابسة النقاب ليه؟ ده إحنا حتي ستات زي بعض، اقلعي النقاب يا حبيبتي علشان ما تتخنقيش. ايمن بتوتر: لالا يا طنط أصلي أنا نازلة أجيب حاجات من تحت علشان ياسمين كانت محتاجاها، مش كده يا ياسمين؟ ياسمين: آه آه كانت نازلة، وبعدين قالت بخبث بعد ما شافت نظرة ايمن لصبا: طب ما تنزلي دلوقتي يا يا سوزان، حتي ما أقعدش لوحدي لما تنزلي، أهو طنط وصبا قاعدين معايا.

ايمن بصلها بغضب وتوعد وهو بيشاور بصوابعه لرقم 2 معلمها يعني "دي تاني غلطة ليكي معايا". ياسمين بصلت له باستفزاز وهي بتحرك حواجبها. صبا قالت برقة لايمن: خلاص يا سوزان، لو هتنزلي انزلي وإحنا قاعدين معاها لحد ما تيجي. ايمن بصلها وقال بتوتر من نبرة صوتها اللي حبها جدًا: لا لا عادي، أنا هبقى أنزل بس شوية كده. أم صبا: طب خلاص لو هتنزلي شوية كده اقلعي النقاب بقى.

ايمن بسرعة: لا حضرتك ده أنا افتكرت حاجة مهمة جدًا عايزة أجيبها، عن إذنكوا، وبص لياسمين بمعنى "ماشي لما نبقى لوحدينا" ونزل. ياسمين ضحكت عليه. أم صبا: بتضحكي على إيه يا حبيبتي؟ صبا ابتسمت وبعد كده قالت: ماشي يا حبيبتي، احكي لي عن حياتك بقى لو ما عندكيش مانع. ياسمين: لا أبدًا يا حبيبتي، ده أنا فرحانة والله إني قاعدة معاكوا. بعد كده ياسمين قعدت تحكي ليهم عن حياتها كلها.

أم صبا: يا عيني يا بنتي، ربنا يرحمهم ومنه لله صاحب البيت ده. ياسمين: الحمد لله. صبا: وإنتي معاكي إيه بقى يا ياسمين؟ ياسمين بابتسامة: أنا مخلصة كلية تجارة إنجلش وكنت ناوية أتعين في شركة بس أمي وأبويا ماتوا ما لحقتش أعمل حاجة، وغير كده الوظيفة اتخدت وكان مرتبها جميل، دورت على شغل من الشركات اللي من النوع ده بس ما لقتش فاشتغلت في مطعم مشهور.

صبا: إيه ده ده إنتي كده اتظلمتي، بصي أنا صاحبتي أخوها صاحب شركة العادلي للحديد والصلب لو إنتي تعرفيها يعني، أنا هكلمها وتشوفك معاه شغل. ياسمين: ما لوش داعي بقى، إنت بشتغل أهو الحمد لله. صبا برفض: لا طبعًا، إنتي معاكي شهادة جميلة ما ينفعش مجهودك ده ترميه كده في الأرض. ياسمين ابتسمت: ربنا يخليكي يا صبا، أنا مش عارفة أقولك إيه. صبا بابتسامة: ما تقوليش حاجة، خلاص أنا هكلمها وهبقى أقولك. ياسمين: ماشي يا حبيبتي.