رواية حبيبي الشبح الفصل السابع 7 - بقلم سوس خليل

أيمن بصدمة: يونس! ابتسم يونس بس. أيمن بدموع: خشوا خشوا! ياسمين ويونس دخلا. جاء أيمن ليحتضن يونس، فتخطاه وارتطم بالحائط ووقع على الأرض. ياسمين ويونس خافا عليه، وجرت ياسمين عليه وساعدته ليقوم. ضحك يونس عليه بصوت واطٍ: لسه أهبل زي ما أنت. قام أيمن مع ياسمين: وحشتني يا صاحبي. يونس باشتياق: أنت أكتر والله يا دكش. نظر أيمن لياسمين: هو حضرتك تعرفي يونس منين؟ وبعدين هو إزاي كده؟

ياسمين: مبدئيًا أنا اسمي ياسمين، ومأجرة الشقة بتاعة يونس الله يرحمه بعد ما صاحب البيت اللي كنت ساكنة فيه مع أهلي الله يرحمهم طردني، وروحه ظهرت ليا وبيقول إنه مش مرتاح وعايز ياخد حقه من اللي قتله، وعلشان كده جايين ليك علشان تساعدنا. نظر أيمن لياسمين ثم نظر ليونس.

أيمن بدموع: كنت حاسس يا صاحبي إنك مش مرتاح، كنت دايمًا أحلم بيك وتجيلي زعلان ومخنوق وأكلمك ما كنتش بترد، كنت عايز آخد حقك بس أنا ما أعرفش مين اللي قتلك، أنت ما لحقتش تقولي حاجة ومت. يونس: أنا فعلًا مش مرتاح يا أيمن، اللي قتلني ناصر الصاوي. أيمن بصدمة: أنت بتهزر؟ ده كان بره مصر. يونس بنفي: لا، رجع وأول ما رجع غدر بيا أنا. أنا مش عارف قتلني ليه أساسًا، ده ما كانش بيطيق البوص، فجأة كده بقى بيحبه.

أيمن: أو ممكن يكون قتلك مش من حبه في البوص، لا علشان يبعدك عن طريق المافيا، وأكيد لما وصلوا إنك عايز تنسحب، كلنا عارفين إن الصاوي بيحقد عليك علشان أنت كنت أهم فرد في المافيا، كنت بتقوم بعمليات ما حدش بيعرف يقوم بيها، كان بيكرهك بس أنت ما كنتش واخد بالك، كلنا كنا واخدين بالنا ما عدا أنت، وهو خدها فرصة وخدك على خوانة. يونس بغل: أنا عايز آخد حقي يا أيمن. أيمن: معاك يا صاحبي.

يونس: آه صح، إمبارح كان موجود في المطعم اللي ياسمين بتشتغل فيه، وشكله كده عينه بقى فيها ياسمين، أداها ١٠٠٠ جنيه هي بس، وشكلها كده دخلت دماغه. أيمن بصدمة: لا يا جدع، يبقى معقول هي اللي عليها الدور السنة دي؟ ياسمين بخوف وعدم فهم: يعني إيه مش فاهمة. أيمن ويونس نظرا لبعضهما،

وبعدين يونس قال لياسمين: كل سنة الصاوي بيروح أماكن مختلفة، بيشوف بنات جميلة وفيها الملامح الشرقية الأصيلة، يعمل زي ما نعمل معاكي كده، وعلشان هو شاب ووسيم فالبنات بتبقى هتموت عليه، هو بيصطاد اللي تخش دماغه، يفضل يلعب عليها ويخش عليها بجو الحب والهدايا والفسح والحوارات دي، لو البنت يتيمة يعمل كده وبالتالي الدنيا بتتساهل معاه علشان هي ما عندهاش حد يسأل عليها، ولو البنت عندها أهل يخش عليهم بأنه الشاب الطيب اللي مش بيعمل الغلط ورجل الأعمال المحترم اللي ما فيش منه اتنين ويغرقهم بالفلوس، بعد كده يضحك عليهم لحد ما ياخد بنتهم ويعمل فرح ويجيب ناس تعمل أبوه وأمه وأهله وكده، وياخدها بعد كده ويسافر ياخد اللي عايزه منهم وبعدين يرميها ويبيعها قطع غيار.

قاطعته ياسمين: يعني إيه قطع غيار؟ أيمن: يعني لتجارة الأعضاء. شهقت ياسمين بصدمة وخوف، ويونس كمل: أو يختفي ويسيبها للمافيا تحطها في الدعارة، وبقى كل سنة كده علشان ما يلفتش انتباه حد ليه، وآخر مرة باع البنت للدعارة، المرادي لو أنتِ عبيطة وما كنتيش قولتي كان زمانك دلوقتي متقطعة. ياسمين بخوف: يا خرابي ده إزاي ده؟ ده ما عندوش دم، ده مش بني آدم، ده وحش! يونس بسخرية: واحد في المافيا عايزاه يطلع إيه؟ مصلح اجتماعي؟

أيمن: طب هنعمل إيه يا صاحبي دلوقتي؟ وأهلك هنعمل فيهم إيه؟ أنا سقطتهم خالص. ياسمين ويونس نظرا لبعضهما، بعد كده نظرا لأيمن ويونس حكى كل حاجة لأيمن. أيمن بدموع: ربنا يصبرنا على فراقك يا صاحبي. ياسمين: أنا أول مرة أشوف حد بيدعي لحد ميت وهو واقف قدامه، بجد حاجة ما وردتش على حد قبل كده. أيمن ويونس ضحكا: ولا إحنا بصراحة. يونس لأيمن: أيمن أنا جاتلي فكرة. أيمن: إيه هي يا صاحبي؟ يونس: إحنا هنخلي ياسمين تلعب على ناصر.

ياسمين بخضة وصدمة: نعم نعم يا عمرررر؟ بتقول إيه؟ مين ياسمين؟ يونس: أنتِ، هو في ياسمين غيرك؟ ياسمين: وأنا مالي يا أخويا؟ بترمينا إنا في وش هولاكو ده؟ يونس: ما هو أنتِ اللي هتجيبي رجله يا ياسمين. ياسمين: أجيب رجل مين؟ ده هو اللي هيجيب كرشي يا عم، شوفلك حل تاني غير ده، قال ألعب عليه قال، ده لو عملت كده هبقى جيم أوفر قبل الماتش ما يلعب أصلًا، أنا منسحبة، نازل لاعب تاني مكاني. يونس: لاعب تاني إيه يا ياسمين؟

أنتِ اللي عليكي العين. ياسمين: بلا عين بلا ودان، الكلام ده لا يمكن يحصل. بعد ١٠ دقايق. يونس: ها فهمتي كده؟ ياسمين وهي بتشرب كوباية عصير الليمون: فهمت فهمت يا يونس، ده عدت الخطة 3000 مرة لحد دلوقتي. يونس: ما هو أنتِ غبية وممكن تودينا في داهية. ياسمين بصتله بضيق: أنت مش ملاحظ إن أنت من ساعة ما شوفت خلقة أمي وأنت نازل شتايم، أنت خدت عليا أوي على فكرة. يونس وأيمن ضحكا.

يونس لأيمن: وأنت خلي عينك عليها وما تسيبهاش، وأنت كمان هفضل معاكوا بس أنا مش هعرف أعمل حاجة، أنا هبقى متفرج بس. أيمن وياسمين هزا دماغيهما بمعنى ماشي. ياسمين: طيب ها هنبدأ إمتى؟ يونس: لما تنزلي شغلك، هو أكيد هيجي تاني المطعم علشان يشوفك. ياسمين: اشطا على بركة الله. أيمن: أهم حاجة مش عايزك لما تشوفيني تتوتري، عايزك كأنك لسه ما تعرفينيش علشان أنا هظهر معاه كتير تمام. ياسمين: تمام.

أيمن: وكمان عايزك تتكلمي معاه بكل ثقة، مش كأنك فاهمة دماغه، اعملي عبيطة على أي حاجة يقولك عليها، وأنا هبقى في ضهرك دايمًا ويونس برده مش هيسيبك وهيبقى معاكي، أوعي تخافي. ياسمين هزت دماغها وقالت: ماشي ربنا يستر. يونس: تمام كده تبدأ الخطة.