رواية هديه من مجهول الفصل العاشر 10 - بقلم محمد السبكي

أنت بتقول إيه؟ لا طبعاً مستحيل. الدنيا علمتني إن مفيش حاجة اسمها مستحيل. وأنت بقا عرفت منين أنه بيتاجر في الآثار؟ ضحك وقال: أنا هكر قد الدنيا. طلع تليفونه ووراني محادثات كتير لدكتور جمال. وفعلاً كلامه كله مظبوط. الدكتور المحترم طلع تاجر آثار كبير. والمصيبة الكبيرة أنه كان بيشيل عندي أنا البلاوي دي. بيخبي قطع الآثار في الأجهزة اللي بيشيلها عندي. كل ده وأنا زي الأطرش في الزفة. قلت لخالد وأنا مصدومة:

يعني الجهاز اللي عندي ده فيه آثار؟ خالد قالي: ومش أي قطعة. دي تساوي ملايين. والحلو في الموضوع أنه مش عارف يتصرف فيها اليومين دول. لأن العين عليه ومتراقب. وطبعاً هو مطمن أنها عندك. قلت له بحزن: عشان كدا جي معايا البيت ساعتها. كان جاي يطمن على حاجته بعد تفتيش الشرطة للبيت. بس إزاي الشرطة ما كشفتش الموضوع؟ قطعة الآثار محطوطة جوه الجهاز بطريقة احترافية جداً. اتهديت بحزن وقلت له:

وطبعاً أنت عملت كل ده معايا عشان الجهاز اللي عندي، صح؟ مسك إيدي وقالي: لأ طبعاً. كان سهل جداً عليّ أخد الجهاز كله من غير ما إنتِ تحسي أصلاً. بس أنا عايزك معايا. أنا بحبك يا شهد واخترتك شريكة لحياتي. في الخير و الشر هتكملي الطريق معايا ولا هترجعي لبر الأمان؟ دماغي كانت هتنفجر من الحيرة. ياترى أكمل مع خالد طريقه ولا أهرب من البداية أحسن.

سبت لعقلي فترة من الراحة واستمتعت بالمشاعر الجديدة اللي بحس بيها لأول مرة في حياتي. خالد طلب أنه يوصلني للبيت وبصراحة وافقت. لأني أنا كمان كنت عايزة كدا. واحنا بنتمشى قالي: إيه أكتر حاجة نفسك فيها دلوقتي؟ شاورت له على محل كباب وكفتة وقلت له: نفسي آكل من المحل ده. وفعلاً نفذ لي طلبي في الحال. ده غير أنه جاب لأهلي كمان من كل الأصناف. وأول لما وصلنا تحت البيت. اداني كيسة سودة وقالي:

خدي الفلوس دي يا شهد واعملي لوالدك العملية في أسرع وقت. قلت له بخوف: دي فلوس مين؟ دي فلوس لسه جايالي من نصابة جديدة. شفتِ بقا أنا واضح معاكِ إزاي؟ لأ أنا مش هاخدها. لو إنتِ مش محتاجاها أبوكِ محتاجها. وصدقيني أنا مابسرقش غير اللي يستاهل السرقة. يلا بقا خديها ومتبقيش عندية.